APOCALIPSIS 14

1Lahwi tu' wilnihan Comam oc xahanbalil lin̈ancan̈ yiban̈ iswi' witz Sión; ayco ciento cuarenta y cuatro mil anma isc'atan̈. Tz'ibn̈ebilico isbi Comam oc xahanbalil yeb isbi Ismam Comam oc xahanbalil tu' yin̈ ispalan̈ huntek'an anma tu'. 2Wabenan hune' yul nuk'e yul satcan̈ haca' isbili ha' nime ha', yeb haca' isn̈irla c'uh, yeb haca' yet caw tx'i'al mac chianico te' arpa. 3Chanic'o hune' ac' bit sata istz'on̈obal Comam Dios, yeb sata ebnaj can̈wan̈ querubín, yeb sata ebnaj anciano. Caw xin machi hunu mac chu iscuyni hune' bit tu', cachann̈e ebnaj ciento cuarenta y cuatro mil colchalo xol anma ay yul sat yiban̈k'inal ti'. 4Huntek'an ebnaj tu', maẍtic'a hunu ix yik' ebnaj, machi hunu mule iswatx'e ebnaj yeb hunu ix. Caw tzujann̈etic'a ebnaj yinta Comam oc xahanbalil bayxan̈etu'wal ch'ec' Comam. Ebnaj tu' colchalo ebnaj xol anma, yuxin lahan ebnaj haca' babel sat tz'unub chiak'lax tet Comam Dios yeb tet Comam oc xahanbalil. 5Caw machi nich'ano lek'ti'al ilchalo yin̈ ebnaj, caw machi nich'ano ismul ebnaj sata Comam Dios. 6Lahwi tu' wilnihan hune'xa naj ángel chiec' yictabal satcan̈, ik'bil Tzoti' yet colbanile mach istan̈bal yu naj yu yalnic'o naj tet anma ay yul sat yiban̈k'inal ti'; tzijxan̈e nime con̈obal, tzijxan̈e anmahil, tzijxan̈e abxubal chala, yeb tzijxan̈e niẍte con̈obal. 7Chalni naj ángel tu' yin̈ caw ip: —Xiwan̈we tet Comam Dios cat heyanico ismay, yuto maapni yorahil yilni Comam yin̈ tzet chielico anma. Iweyo heba tet Comam watx'en̈e satcan̈ yeb tx'o tx'otx' yeb ha' mar yebej isnuk' ha ha', ẍi naj. 8Tzujan hune'xa naj ángel yinta naj babel tu', yalni naj iscab tu': Wal tinan̈ maayc'ay niman con̈ob Babilonia, yuto ha' oc uc'tzenocan̈ sunilej con̈ob yu istx'ojal iswi' yin̈ ixloj yeb yin̈ winajloj, ẍi naj. 9Tzujanxa xin yalni naj yox ángel yin̈ caw ip: —Ta ay mac chiyiyo isba tet naj Nok' isbi yeb tet yechel naj, cat ischahnico yechel isbi naj yin̈ ispalan̈ maca yin̈ isk'ab, 10chitit hune' niman isya'tajil yiban̈ yu Comam Dios. Haca' vino caw how chiuc'laxi caw machi nino issomil ayayto xol, hac tu' ishowal Comam Dios chiay yiban̈ huntek'an anma tu'. Chiak'lax ec'oya' yanma xol k'a k'a' yeb azufre yin̈ sat sunil ebnaj yángel Comam Dios, yeb yin̈ sat Comam oc xahanbalil. 11Hune' bay chiak'lax ec'oya' yanma ebnaj tu' ayn̈etic'aco yah isn̈ubal yin̈ sunilbal tiempo. Tz'ayic, ak'bal machi nino xewilal chiak'lax tet macta chiyo isba tet naj Nok' isbi tu' yeb chiyo isba tet yechel naj, yeb chichahni yechel isbi naj yin̈ ispalan̈ maca yin̈ isk'ab, ẍi naj. 12Yuxin sunil macta yetxa Comam Dios yehi, macta chiyijen ischejbanil Comam yeb chaco yanma yin̈ Comam Jesús, yilal niman chute isc'ul yak'ni techahoj. 13Lahwi tu' wabenan hune' yul nuk'e awi yul satcan̈, yalni wetan haca' ti': —Tz'ibn̈ecano hune' ti': “Sak'al yet mac chicam yin̈ ismunil Comam Dios yin̈ tz'ayic chihul cosata ti',” ẍi. Yalnipaxo Comam Espíritu haca' ti': “Ho' caw yeli, huntek'an anma chicam tu' chixew yin̈ sunil ismunil. Sunil isc'ulal iswatx'e yul sat yiban̈k'inal ti' chiak'lax ispaj selel tet yu Comam,” ẍi Comam Espíritu, ẍi yul satcan̈. 14Lahwi tu' wilnihan hune' moyan caw saj, tz'on̈anayo hune' mac haca' anma jilni yiban̈ hune' moyan tu'. Ayahto hune' corona naba oro yin̈ iswi', ik'bil hune' ch'en c'upbal trigo yu, caw ayahti yeh. 15Lahwi tu' yelti hune'xa naj ángel yul yatut Comam Dios, yawi naj yin̈ caw ip tet mac tz'on̈anayo yiban̈ hune' moyan tu' haca' ti': —Ocan̈ hac'upucan̈ ixim trigo, yuto k'anxa ixim, istiempohalxa isc'uplaxcan̈ ixim sat tx'o tx'otx', ẍi naj. 16Yin̈n̈ena tu' yanicto hune' mac tz'on̈anayo yiban̈ moyan tu' isc'upom trigo xol ixim, isc'upnican̈ naj ixim trigo sat tx'o tx'otx' ti'. 17Lahwi tu' yelilo hune'xa naj ángel yul yatut Comam Dios yul satcan̈, yetbipaxo naj hune' ch'en c'upbal uva caw ay yeh. 18Yelpaxilo hune'xa naj ángel bay ay meẍa yet xahanbal, hune' naj ángel tu' ay yip naj yiban̈ k'a k'a'. Yawi naj yin̈ caw ip tet naj ik'n̈e ch'en c'upom uva: —Acto ha' c'upom uva xol te' uva ay sat tx'o tx'otx' cat hac'upnilo te', yuto k'anxa te', ẍi naj. 19Yoc naj ángel tu' isc'upno sunil te' uva ay sat tx'o tx'otx' ti', yanayto naj te' yul hune' niman bay chixan̈laxilti yal te'. Hune' ti' chal yelapno yin̈ hune' niman isya'tajil chitit yu Comam Dios. 20Ha' xin istxam con̈ob xan̈laxilti yal te' uva tu', yelilo chic' bay yatz'lax yal te', isto lehno chic' tu', caw nahat ah ispimal, ah apno yin̈ isti' no' cheh bay cachan yec' isfreno no', wal bay to lehno chic' tu' aymi hunu ochenta legua yucoj.

will be added

X\