APOCALIPSIS 14

1Xwilni pax Comam Canelu sb'ihan, lin̈ancan̈ swi' witz Sión. Aycoj 144,000 anma sc'atan̈. Hunk'aan tu' aycoj sb'ih Comam Canelu yin̈ spalan̈, aypaxcoj sb'ih Smam Comam yin̈. 2Yin̈n̈ena tu' xwab'en hune' tzetet ẍk'an̈ stit yul satcan̈an, haca' swahcha ha' nimej ha', haca' jab'en sk'an̈ c'uh, haca' sk'an̈ arpa yet caw tx'ihal heb'naj ẍq'uen̈ni. 3Hunk'aan xwab'e tu'an, ha' b'it ac' chacoj heb'ya' 144,000 sataj stz'on̈ob'al Comam, b'oj yin̈ sat can̈wan̈ querubín, b'oj yin̈ sat heb'ya' anciano. Mach hunuj mac chu scancanoj hune' b'it tu' yul swi', to han̈c'a heb'ya' 144,000 xcol-lax satyib'an̈k'inal ti'. 4Ha' heb'ya' ti' maxtic'a xtx'ojn̈etoj swi' yin̈ heb'ix ix, sajto ye heb'ya' yin̈ sat Comam Dios. Tzujann̈etic'a yin̈ Comam Canelu sb'ih tzantic'a b'ay ẍtoyi. Ha' heb'ya' ti' xcol-lax xol anma, haca' ye sat hunuj tz'unub' b'ab'el ch'elnaloj ẍhaltelax tet Comam Dios b'oj tet Comam Canelu sb'ih. 5Mach lek'ti'al chal heb'ya', mach ninoj xtx'ojal. 6Xwilni pax hune' ángelan, ch'ec' satcan̈, ib'il tzoti' mach stan̈b'al yet colb'anil yu, yu yalnic'oj tet anma ay satyib'an̈k'inal ti', tet sunil hej nación, hej ic'ale, hej anma nanan yab'xub'al b'oj hej con̈ob'. 7Chalni yin̈ ip: —Xiwan̈wej tet Comam Dios cat heyanicoj smay Comam, haxca xax hul tz'ayical b'ay chi'a'tij Comam cuenta yin̈ anma. Hak'ewej Comam xwatx'en satcan̈, tx'otx'otx' ti', ha' mar, b'oj hej snuk' ha' ha'. 8Tzujantij hune'xa ángel, xalni yin̈ hacti': —Xax c'ayiloj niman con̈ob' Babilonia, haxca ha' xa'ni yub' sunil hej con̈ob' yetantoj sb'a yin̈ xtx'ojal ye swi', yuxin chuc'u' vino syeni showal sc'ul Comam Dios spaj seleloj xtx'ojal xu tu'. 9Tzujanpaxtij hune' syox ángel, chalni yin̈ caw ip: —Ta ay mac ẍhak'en mac Nok' sb'ih b'oj yechel, b'oj scha yechel yin̈ spalan̈ mato yin̈ sk'ab', 10ẍtij showal Comam Dios yib'an̈, haca' yuc'lax vino caw how, mach ninoj scalil. Hunk'aan anma tu' ch'a'laxoj ec'oj ya' yanma yu k'a k'a' calan ye b'oj k'ol yin̈ sat sunil hej yángel Comam Dios, b'oj yin̈ sat Comam Canelu sb'ih. 11Topann̈etic'acan̈ sn̈ub'al k'a' k'a' ch'a'ni sya'tajil tet. Matxa ninoj xewilal tz'ayic ak'b'al tet, haxca shak'e mac Nok' sb'ih, b'oj ẍchani yechel sb'ih yin̈. 12Yuxin mac yet-xa Comam Dios, mactaj ẍyijyen schejb'anil Comam, b'oj yijyom tet Comam Jesús, yet ay stecha sya'tajil yu. 13Lawitu' xwab'en hune' tzoti' ch'ayiloj yul satcan̈an, chalni yin̈ hacti': —Tz'ib'n̈ecan hunk'aan ti': Sak'al yet mac yet-xa Comam Jahaw ẍcamoj yet schab'toj ti'. Chalni Comam Espíritu: Ho' yeli, haxca xew yin̈ hantaj smunil swatx'e'. Ay hune' yumal i'n̈e hantaj sc'ulal swatx'e tu'. 14Xwilni pax hune' asun caw sajan, tz'on̈anatoj hune' haca' anma yib'an̈. Aycoj hune' corona nab'a' oro yin̈ swi', b'oj yacb'il hune' ch'en c'upb'al ch'im yu, caw ay yeh ch'en. 15Lawitu' x'eliloj hune'xa ángel yul yatut Comam Dios, ch'awi yin̈ ip tet mac tz'on̈anatoj yib'an̈ asun tu', chalni tet yin̈ hacti': —Actoj ha c'upb'al tu' xol ixim trigo cat ha c'upnican̈ ixim, haxca x'apni stz'ayical sk'anb'iloj ixim sat tx'otx'otx'. 16Yin̈n̈ena tu' xanictoj mac tz'on̈anatoj yib'an̈ asun tu' sc'upb'al xol ixim trigo, xinican̈ ixim. 17Lawitu' x'eliloj hune'xa ángel yul yatut Comam Dios ay satcan̈, yetb'i hune'xa c'upb'al caw ay yeh. 18X'eliloj hune'xa ángel sataj altar, ay smunil yilni k'a' k'a', xawten mac i'n̈e ch'en c'upb'al tu', xalni yin̈ caw ip: —Actoj ha c'upb'al xol sk'ab' te' uva ay sunil sat tx'otx' cat ha c'upniloj sb'ohanil te', haxca k'anxa te'. 19Xanictoj ángel tu' sc'upb'al xol sk'ab' te uva, sc'upniloj te', xaniaytoj te' yul b'ay ẍan̈laxiloj yal. Hune' tu' ay yelapnoj yeyi ha' showal Comam Dios ẍto huluj. 20Hat ẍan̈laxiloj yal te' xtxam con̈ob', hat x'eliloj chic' xtocan linoj, hacam yecan̈ sti' no' cheh hactu' x'ahi, ay mi 80 legua yecoj satb'al.


Copyright
Learn More

will be added

X\