APOCALIPSIS 13

1Lahwi tu' isto no' dragón islin̈banocan̈ isba xol arena isti' ha' mar. Wilnihan yahilo hune' mac Nok' isbi xol ha' mar tu', hujeb iswi', lahon̈eb xin yuc'a'. Ayahto hunun iscorona hunun yuc'a' yin̈ hunun iswi' mac Nok' isbi tu'. Yin̈ hunun iswi' tu' tz'ibn̈ebilico hune' bihe, tx'oj istzotel yin̈ Comam Dios. 2Hune' mac Nok' isbi wiltu'an, lahan jilni yeb no' nime tz'ibin̈ balam, wal yoj xin lahan jilni yeb yoj no' oso, haxa isti' lahan jilni haca' isti' no' balam. Yak'ni no' dragón tu' sunil yip yeb istz'on̈obal, yeb iscan̈il ye tet hune' mac Nok' isbi tu'. 3Ay xin hune' iswi' mac Nok' isbi tu', ayco hune' islahwilal chiak'ni camoj, yaja' xin an̈cha islahwilal. Caw xin c'ayilo isc'ul sunil anma ay yul sat yiban̈k'inal ti' yu hune' tu'. Yoc tzujno anma yinta hune' mac Nok' isbi tu'. 4Yoc anma yinoyo isba tet no' dragón yuto ha' ak'n̈e yip naj Nok' isbi. Yocpaxo anma yinoyo isba tet naj Nok' isbi tu', chalni anma haca' ti': —¿Mac hunu chu islahban isba yeb hune' mac Nok' isbi ti', yeb mactaxca chu yak'len howal yebi? ẍi anma. 5Hune' mac Nok' isbi tu' chahlax tzoteloj, islolo'n̈en isba yalni nimeta tzoti', yalnipaxo tzoti' tx'oj yin̈ Comam Dios. Yak'laxpaxo yip yoc yahawilo yulbal cuarenta y dos ixahaw. 6Yoc yalno tzoti' tx'oj yin̈ Comam Dios, isbahwapaxo yin̈ isbi Comam, yeb yin̈ yatut Comam, yeb yin̈ mac ay yul satcan̈. 7Ischahlaxpaxo yanico naj howal yin̈ sunil macta yetxa Comam Dios, isk'oji naj yin̈. Yak'laxpaxo yip naj yiban̈ sunil anma, yiban̈ ej con̈ob, yiban̈ ej anma nananta yabxubal, yeb yiban̈ ej nime con̈ob. 8Yinayo isba sunil anma ay yul sat yiban̈k'inal ti' tet naj Nok' isbi tu', ha' ton mac yettaxtic'a iswatx'i yul sat yiban̈k'inal ti' mach ayoyo isbi yul te' hum yet k'inale yet Comam oc xahanbalil. 9Maquex cheyabe hune' ti' ak'we hayanma hetxumniloj: 10Mac yetxatic'a isto preso, chiilaxto preso, mac yetxatic'a ispotxlax yu ch'en espada, chipotx'lax yu ch'en espada. Yuxin han̈on̈ yuninal Comam Dios hon̈ ti', caw yilal janico janma yin̈ Comam, yeb niman chijute coc'ul jak'ni techaho isya'tajil. 11Lahwi tu' xin wilnihan yahilo hune'xa mac haca' hunu no' niman nok' yul tx'otx'. Hune' no nok' tu' ay cabeb yuc'a' no' lahan jilni yeb yuc'a' no' Me'. Haca' xin istzotel no' dragón hac tu' istzotel no'. 12Caw xin lahan yip no' yeb no' babel, chisyenilo no' yip yun̈e isyijelax tet no' babel tu'. Hac tu' xin sunil anma yul sat yiban̈k'inal ti' chiyo isba tet no' babel tu', no' an̈cha hune' islahwilal. 13Chisyeni no' iscab tu' huntek'an nimeta c'aybalc'ule yeb chu yinayti no' k'a k'a' satcan̈ yiban̈ tx'o tx'otx' yin̈ sat sunil anma. 14Hac tu' xin chu yak'ni subchaho no' anma yu huntek'an c'aybalc'ule chiak'lax iswatx'e' no' yin̈ sat no' babel tu'. Ischejni no' iscab tu' sunil anma ay sat tx'o tx'otx' iswatx'eno hune' yechel no' lahwina yu ch'en espada, yaj itzitztopaxoj. 15Yak'lax yip no' iscab tu' yak'ni isk'inal yechel no' babel tu' yun̈e istzoteli yeb yu yak'ni camo macta mach chiyo isba tet yechel no' babel tu'. 16Ischejni no' yalaxoco yechel anma yin̈ iswatx'k'ab maca yin̈ ispalan̈. Caw sunil anma occano yechel, niẍte unin yeb ichamta anma, anma k'alom yeb anma meba', anma chejab yeb anma yet isba ischuquil. 17Machi xin hunu mac chu islok'wi yeb istxon̈wi ta mach ayoco yechel no' yin̈, hune' yechel tu' ha' ton isbi no', maca isnumerohal isbi no'. 18Hune' ti' choche yitz'atil wi'e. Ha' mac ay yitz'atil iswi', istxumabilo yin̈ tzet yelapno isnumerohal mac Nok' isbi. Hune' numero tu' isnumero anma yehi, ha' ton numero seis cientos sesenta y seis.

will be added

X\