APOCALIPSIS 13

1Xwilni yahiloj hune' no' niman nok' yul ha' maran, lahun̈eb' yuc'a' no' b'oj hujeb' swi' no'. Hunun yuc'a' no' aycoj scoronail. Yin̈ hunun swi' no' aycoj b'ihe xalni tx'oj yin̈ Comam Dios. 2No' ich nok' xwil tu'an, haca' jilni no' leopardo jilni no', haca' yoj no' oso yoj no', haca' sti' no' cajco b'alam sti' no'. Xa' ich niman lab'ah scan̈il yeyi b'oj smay b'oj schejb'anil tet no' xtit yul ha' mar tu'. 3Hune' swi' mac Nok' sb'ih tu', haca' jilni tu' xaxtic'a potx'laxi, yaja' x'an̈cha slahwilal x'a'ni camoj tu', yuxin sunil anma ay satyib'an̈k'inal ti' xc'ayiloj sc'ul yilni, x'oc tzujnuj yin̈. 4Xhak'eot ich niman lab'ah tu' yu anma, haxca xa' schejb'anil mac Nok' sb'ih tu'. Xhak'eot pax mac Nok' sb'ih tu', chalni anma: —Mach hunuj mac chu slahb'ancoj sb'a yin̈ mac Nok' sb'ih tu'. ¿Mactaxca chu ya'ni howal b'oj?. 5Xa'ni pax eloj Comam yin̈ sc'ul mac Nok' sb'ih tu' slolo'n̈en sb'a, chalni tzoti' tx'oj yin̈ Comam. Xa'ni pax Comam chejb'anil hune' mac tu' yu yoc yahawoj yulb'al 42 x'ahaw. 6Yuxin x'oc yalaltoj tzoti' tx'oj yin̈ Comam Dios. Tx'oj stzotel yin̈ sb'ih Comam b'oj yin̈ yatut Comam, b'oj yin̈ hantaj mac ay satcan̈. 7Xa' Comam Dios scan̈il ye ya'nicoj howal yin̈ mac ayxacoj yin̈ Comam masanto ẍ'ay yu. Xa' pax Comam schejb'anil yib'an̈ sunil hej yic'al, hej con̈ob', hej anma nanan yab'xub'al b'oj hej nación. 8Ẍhak'elaxoj mac Nok' sb'ih tu' yu anma ay sat tx'otx'otx' ti', hantaj mac mat tz'ib'n̈eb'iloj sb'ih yul te' hum yettax x'ichitij satyib'an̈k'inal ti', hune' te hum b'ay ahayoj sb'ih mac ayxa sk'inal mach stan̈b'al. Hune' te' hum tu' yet Comam Canelu sb'ih ye te', Comam xpotx'laxi. 9Maquex cheyab'e hune' ti', a'wej heyanma he txumniloj. 10Mac tak'xa ye yib'an̈ sto yul presu, ẍto yul presu. Mac tak'xa ye yib'an̈ scam yu ch'en espada, ẍcam yu ch'en espada. Yuxin mac yet-xa Comam Dios yet ay scawxi sc'ul yin̈ Comam yun̈e stecha sya'tajil yu. 11Lawitu' xwilni yahiloj hune'xa no' ich scab' nok' yul tx'otx'an. No' tu' cab' yuc'a' no', lahan yuc'a no' b'oj yuc'a' no' canelu. Haca' stzotel ich niman lab'ah tu' stzotel no'. 12X'ec' no' schab' sunil scan̈il ye tet no' b'ab'el nok' tu', xcan no' yalan̈ schejb'anil no'. Sunil anma ay satyib'an̈k'inal ti' schilb'a no' shak'e' no' b'ab'el nok' tu', no' x'an̈chacan slahwilal xpotx'nitoj. 13Chuni no' scab' tu' nimej c'ayb'alc'ule, hasta yiniaytij k'a' k'a' satcan̈ yin̈ sat anma. 14Yu hunk'aan c'ayb'alc'ule xa' Comam yub' no' scab' yin̈ sat no' b'ab'el tu', sub'cha sunil anma ay satyib'an̈k'inal ti' yu no'. Schejni no' watx'elaxoj hune' yechel no' xpotx'lax tu' yu ch'en espada yaja' xpitzc'acan̈ no' hunecxa. 15X'a'laxpax scan̈il ye no' scab' tu' ya'ni sk'inal yechel no' b'ab'el tu', hasta yin̈ stzoteli, b'oj spotx'ni mac mach ẍhak'en hune' yechel no' tu'. 16Schej pax no' alaxojcoj yechel sunil anma: Niẍtej unin, yihla anma, anma k'alom b'oj anma meb'a', anma yet sb'a yin̈ smunil b'oj anma txon̈b'il. Sunil anma tu' x'alaxcoj yechel yin̈ swatx' k'ab' mato yin̈ spalan̈. 17Mach hunuj mac chu slok'i mato ẍtxon̈i ta machcoj yechel no' b'ab'el tu' yin̈, sb'ih no' mato snúmeroal sb'ih no'. 18Yun̈e chu co txumni hune' ti' tz'ajan co c'ul chala. Ji'a' cuenta yin̈ tzet yelapnoj ye snúmeroal mac Nok' sb'ih tu', snúmeroal anma chala. Hune' número tu' 666.


Copyright
Learn More

will be added

X\