APOCALIPSIS 12

1Syecan̈ sb'a hune' tzet c'ayb'alc'ule satcan̈, syeb'anil hune' tzet caw ay yelapnoj yeyi. Hune' ix hoyancoj tz'ayic yin̈ haca' xilk'ape, aycoj x'ahaw yalan̈ yoj ix, hoyancoj cab'lan̈e'b' tx'umel yin̈ scorona ix. 2Ix tu' ayxa tzet ye ix, ẍc'ajwi ix yu sya'il tzet ye tu', toxa chila' ix yin̈ ni'an yunin. 3Lawitu' syenipaxcan̈ sb'a hunexa c'ayb'alc'ule satcan̈ tu' hune' ich niman caj in̈ lab'ah. Ich lab'ah tu' hujeb' swi', lahun̈eb' yuc'a', aycoj scorona hunun swi'. 4Etza yictaj hej tx'umel shatxaytij ich lab'ah tu' yu sn̈eh, syumniaytij sat tx'otx'otx'. Xb'ey slin̈b'anojcan̈ sb'a yin̈ sat ix toxa ẍpitzc'aoj yunin tu', chin̈e pitzc'aoj ni'an yunin ix tu' cat sc'uxnujtoj ich lab'ah tu' yalni. 5Yaja' yet xpitzc'a ni'an swinaj unin ix, lemb'il x'iotiloj ni'an unin tu' tet ix yin̈ sat ich lab'ah tu', x'iottoj tet Comam Dios yul stz'on̈ob'al. Ha' naj tu' ch'ocoj yahawoj yin̈ sunil hej con̈ob'. Ha' hune' c'ojoch ch'ocoj yul sk'ab' tu', nab'a ch'en, ha' ch'elicoj hune' tu' mach sk'ahul sc'aynojiloj hej mac ẍpaq'uicoj yin̈. 6Wal ix, x'el ix, xto ix yul tajin̈ witz ac'al. Hat watx'eb'ilxa hune' b'ay ch'eh ix yu Comam Dios, hatu' ch'a'laxoj wa'oj ix yulb'al 1,260 tz'ayic. 7Xwilni pax stzab'lo hune' niman howal yul satcan̈an, b'ay scha sb'a ángel Miguel b'oj yángel tzujan yin̈, xa'ni howal b'oj ich niman lab'ah tu' b'oj yángel tzujan yin̈. 8Yaja' mataj ich lab'ah tu' xu yu, yuxin matxa xu scan yul satcan̈ tu'. 9Hactu' xu syumotcantij b'oj yetb'i. Ha' ich tu', payat lab'ah, Diablo sb'ih b'oj Satanás. Ha' sub'ni sunil anma satyib'an̈k'inal ti'. Xb'ejlaxaytij sat tx'otx'otx' ti' b'oj sunil hej yetb'i. 10Lawitu' xwab'en hune' tzoti' caw ip yul satcan̈an, chalni yin̈ hacti': —Tinan̈ xhul colb'anile yu Comam, b'oj scan̈il yeyi, x'oc Yahawoj, xa'ni Comam schejb'anil Comam Cristo sic'leb'il yu, haxca x'iotiltij ich ch'a'wic'ule yin̈ heb'ya' juẍtaj, heb'ya' janab'. Tz'ayic ak'b'al ch'a'wic'ule yin̈ heb'ya' tet Comam Dios. 11Yaja' x'ay ich tu' yu heb'ya' jetb'i yu scamical Comam Canelu sb'ih b'oj yu stzoti' Comam xal heb'ya', haxca maẍtic'a xiw heb'ya' scami, to shin sb'a heb'ya' scam sya'iloj Comam. 12Yuxin tzalaan̈wej hex ayex yul satcan̈, yaja' c'antaj mac ay sat tx'otx'otx' b'oj tzet ay yul ha' mar, haxca ch'ayiloj naj matzwalil teyin̈, caw ẍchiwa sc'ul naj, haxca yohtajxa naj to hanic'xan̈e b'ay ẍtan̈ yet naj. 13Ha' xilni ich niman lab'ah tu' to xb'ejlaxaytij sat tx'otx'otx' ti', x'oc stzumb'enoj ix xpitzc'a swinaj unin tu'. 14Yaja' x'a'lax cab' xic' no' niman t'iw tet ix yun̈e slupitoj ix yul tajin̈ witz ac'al b'ay watx'eb'ilxa b'ay ch'a'lax tzet slo ix yulb'al yictaj scan̈ hab'il. Nahat yeloj hune' tu' yin̈ ich niman lab'ah tu'. 15Lemb'il xaltij ich lab'ah tu' hune' ha' niman ha' yul sti' yun̈e yijottoj ix yuj ha'. 16Yaja' xcolwa tx'otx'otx' yin̈ ix, shajnitoj sb'a tx'otx', xuc'nitoj tx'otx' ha' ha' xaltij ich niman lab'ah tu' yul sti'. 17Xcam tit showal ich lab'ah tu' yin̈ ix, yuxin xto ya'a' howal yin̈ hantajto yunin ix, hej mac ẍyijyen schejb'anil Comam Dios b'oj mac xalni stzoti' Comam yin̈ tzet ye Comam Jesús. 18Ich lab'ah tu' xb'ey slin̈b'acan̈ sb'a sti' ha' mar.


Copyright
Learn More

will be added

X\