APOCALIPSIS 12

1Lahwi tu' xin, isyeni isba hune' niman yechel yul satcan̈. Wilnihan hune' ix ix hoyanico isk'ak'al tz'ayic yin̈ haca' xilk'ape, ayayo ixahaw yalan̈ yoj ix, ayco xin cablahon̈eb tx'umel iscoronaho ix yin̈ iswi'. 2Hune' ix tu' ayxa tzet ye ix, caw xin chiawi ix yu isya'il yuto iswatx'ixa isc'ul ix. 3Isyenipaxocan̈ isba hune'xa yechel yul satcan̈, wilnihan hune' mac haca' no' nimeta dragón cajin̈, hujeb iswi' yeb xin lahon̈eb yuc'a', ayahto xin corona yin̈ hunun iswi' no'. 4Hune' xin isyox majan tx'umel isn̈ic'ti no' yu isn̈e, isk'ojnayti no' sat tx'o tx'otx' ti'. Islin̈bacan̈ isba no' sata ix iswatx'ixa isc'ul tu' yun̈e isc'uxnayto no' nich'an unin tu' yet chipitzc'ahi. 5Lahwi tu' ispitzc'a nich'an iswinaj unin ix. Ha' naj tu' xin chioc yahawilo sunilej con̈ob, ayco xin hune' isvara naj naba hierro yul isk'ab, yaj ilaxilo nich'an yunin ix tu', yilaxto tet Comam Dios bay ay istz'on̈obal. 6Wal ix tu' elcan̈ ix, isto ix bey tx'otx' desierto. Ha' bey tu' c'ulxa ye hune' yehobal ix yu Comam, yak'lax tzet chislo ix yulbal mil doscientos sesenta tz'ayic. 7Lahwi tu' yoc hune' niman howal yul satcan̈. Naj ángel Miguel yeb ebnaj yángel tzujan yintaj, yak'le ebnaj howal yeb no' dragón yeb yángel no'. 8Yaja' xin mach k'oji no' dragón tu' yeb yángel, matxa xin hamanil tet no' yeb yángel yul satcan̈. 9Hac tu' xin yu yilaxilti no' dragón tu' yul satcan̈. Ha' ton hune' mac tu' yuteco isba labahil yet payat, chihallax diablohal yeb Satanás, ha' xin ch'ak'ni subchaho anma ay yul sat yiban̈k'inal ti'. K'ojlaxayti no' dragón tu' yeb yángel sat tx'o tx'otx'. 10Lahwi tu', wabenan hune' yul nuk'e yul satcan̈ yin̈ caw ip, yalni haca' ti': Wal tinan̈ mahul colbanile, chisyelo Comam Dios yip cat yoc yahawil, cat isyelaxpaxilo yip Comam Cristo, yuto xak'ojlaxayto naj ak'omc'ule yin̈ ebnaj juẍtaj yeb yin̈ ebix janab, naj aytic'aco ak'oc'ule hunun tz'ayic yeb hunun ak'bal tet Comam Dios. 11Xak'oji ebnaj juẍta yin̈ naj yu ischiq'uil Comam oc xahanbalil, yeb yu yak' isba ebnaj yalnic'o Istzoti' Comam. Mach xiw ebnaj yanico isba yul isk'ab camical, to caw ishin isba ebnaj iscami. 12¡Yuxin tzalahojab satcan̈ yeb mac ay yul satcan̈! Yaja' c'anch'anex hex ayex sat tx'o tx'otx' yeb tzet ay xol ha' mar, yuto sunil ishowal naj matzwalil maayapno texol, yuto yohta naj ta hanic'xan̈e tiempo ayc'o naj, ẍiaytij. 13Hayet yilni no' dragón tu' ta k'ojlaxayti no' sat tx'otx', yoc no' istzumbenoc'o ix pitzc'a nich'an iswinaj unin tu'. 14Yaja' xin ak'lax cabeb isxic' ix caw nimej haca' xic' no' t'iw, yah ix satcan̈, isto ix bey tx'otx' desierto bay ay hune' yehobal ix yu Comam, yun̈e nahat chielcano ix tet no' dragón tu'. Ha' tu' xin ak'lax tzet chislo ix yulbal yicta iscan̈ habil. 15Wal no' dragón tu' yalti no' hune' niman ha' yul isti' yun̈e yijlaxto ix yu ha' niman ha' tu'. 16Yaja' xin colwa tx'o tx'otx' yin̈ ix, yuto yuc'to tx'otx' ha' yalti no' yul isti'. 17Caw tit ishowal no' dragón tu' yin̈ ix, isto no' yanoco howal yin̈ huntek'an yunin ix, ha' ton mac chiyijen ischejbanil Comam Dios yeb ebnaj chibeybaln̈e iscuybanil Comam Jesucristo.

will be added

X\