APOCALIPSIS 11

1Lawitu' x'aot hune' te' ah wetan, haca' hune' vara ẍmalen tzetet, hactu' ye te'. Xhalot wetan: —As male hantaj aycoj yatut Comam Dios b'oj altar, cat ha b'isni haywan̈ mac ẍhak'en Comam b'etu'. 2Yaja' macha male yamak', haxca ch'alaxojcan tet heb'naj mat israeloj, cat yanojay heb'naj scon̈ob' Comam yalan̈ yoj yulb'al 42 x'ahaw. 3Yulb'al 1,260 tz'ayic ẍwa'a'toj cawan̈ mac cha'a' sb'a win̈an, aycoj xil k'ape ehom yin̈ heb'ya. 4Yechel heb'ya' cawan̈ tu' ye te' cab' olivo b'oj cab' ch'en yoj stzon̈ob'al candil aycoj yin̈ sat Comam Yahaw tx'otx'otx'. 5Ta ay mac choche et'lojcoj yin̈ heb'ya' cawan̈ tu', ch'eltij k'a' yul sti' heb'ya' cat sn̈usni tz'aoj heb'ya' mac ch'a'nicoj howal yin̈. Yuxin hactu' chu scamic'oj mactaj choche et'lojcoj sb'a yin̈ heb'ya'. 6Heb'ya' cawan̈ tu' ay scan̈il ye heb'ya' scachni yay ha' n̈ab' yulb'al spujb'acoj heb'ya' stzoti' Comam Dios. Ay pax scan̈il ye heb'ya' shelni ha' ha' cat spaq'ui ha' chic'al. Nanann̈e sya'tajil cha' heb'ya' yila' anma ay sat tx'otx'otx' ti' hayeln̈etic'a chal sc'ul heb'ya' ya'a'. 7Yaja' lawi stan̈can yalni heb'ya' stzoti' Comam Dios ch'ayoj heb'ya' yu naj Nok' sb'ih ch'ahiloj yul niman xab', cat spotx'laxoj heb'ya' yu naj. 8Ẍcanoj hanoj snimanil heb'ya' yul scalleal niman con̈ob' b'ay x'aotcan̈ Comam Yahaw heb'ya' tu' yin̈ culus. Hune' con̈ob' tu' ẍhal-lax Sodomail mato Egipto, haxca lahan xtx'ojal b'oj hunk'aan con̈ob' tu'. 9Yictaj scan̈ tz'ayic ch'ilaxoj snimanil heb'ya' yu anma ay yul hunun con̈ob', hunun ic'ale, hunun nación, hunun ab'xub'ale. Mach sje anma ta ẍmujlax snimanil heb'ya'. 10Anma ay sat tx'otx'otx' ti' stzalaoj haxca ẍcamoj heb'ya', ẍpalc'on stzalaoj, hasta ay tzet cha'a heb'naj tet hunun, haxca heb'ya' cawan̈ schejab' Comam Dios tu', xa' heb'ya' ec'oj ya' yanma heb'jetb'i. 11Lawi yec'toj yictaj scan̈ tz'ayic tu' ẍpitzc'aojcan̈ heb'ya' yu Comam Dios, cat yahoj lin̈noj heb'ya'. Hantaj mac ch'ilnoj, caw xiwojcan̈. 12Lemb'iln̈e xab'e' heb'ya' hune' tzoti' x'ayiloj yul satcan̈ chalni yin̈ ip: —Ahan̈wejtij b'eti'. Lemb'il x'ahnatoj heb'ya' yul satcan̈ xol hune' asun, yin̈ sat hantaj mac ẍcajwa yin̈. 13Yin̈ hunip k'inanil tu', xa'ni hune' niman chixcab'. Hunun yin̈ lahun̈eb' te' n̈ah yul con̈ob' tu' x'ec' huynayi. Hujeb' mil anma xcam yu hune' chixcab' tu'. Hantajto anma xcani, xcamiloj xiwquilal, xanicoj smay Comam Dios Yahaw satcan̈. 14X'ec'toj scab' sya'tajil, yulxapax syox. 15Ha' xok'tzen shuj ángel strompeta, x'ab'elax hune' tzoti' caw ip yul satcan̈, chalni yin̈ hacti': Hantaj ẍchejb'anil heb'naj yahaw ay satyib'an̈k'inal ti' yet-xa Comam Dios Jahaw yeyi b'oj yet Comam Cristo sic'leb'iltic'a yu. Ha' Comam ch'occan Yahawoj stohb'alk'inal. 16Heb'ya' 24 anciano tz'on̈an yin̈ sat Comam Dios, x'ay jahnoj heb'ya' b'oj x'ay n̈ohnoj shak'enoj Comam Dios, 17chalni heb'ya' yin̈ sb'it: Ẍja' yuch'antioẍ tawetan Mam Yahaw, Dios Sunil Chu Yu, ayach tinan̈, b'oj ayachn̈etic'a, haxca xa ye scan̈il hawe caw nimejal, xcach occan Yahawoj. 18Xtit showal hej nación, cat stit pax ha howal yin̈ chawa'ni ec'oj ya' yanma, chawinitij cuenta yin̈ hej camom, chawa'ni spaj tet hej ha chejab', ha' chaliloj hune' ti', heb'ya' ha chejab'lom b'oj mactaj hawet-xa, heb'ya' ẍnanon tawet, mac mach yelapnoj yeyi, b'oj mac caw ay yelapnoj yeyi. Ch'apni stz'ayical b'ay cha c'aya'loj mactaj ch'et'li sat tx'otx'otx' ti'. 19Lawitu' xhajlax yatut Comam Dios ay yul satcan̈, x'il-lax hune' caẍa yet lahc'ulal ayictoj b'etu'. Ch'ay jepna cayompa, tz'ito yec' c'uh, b'oj huyanxan̈e hunk'aanxa tzetet. Caw ch'ec' chixcab', b'oj caw ch'ay ch'en sajb'at.


Copyright
Learn More

will be added

X\