APOCALIPSIS 10

1Lahwi tu', wilnihan hune' naj ángel caw ay yip, tit yul satcan̈ xol moyan, aycan̈ xin hune' no' ch'er yiban̈ iswi' naj. Caw xin chitzejla sat naj haca' istzejla tz'ayic, haxa yoj naj xin haca' xaj k'a k'a' chiah joplahi, hac tu' jilni. 2Ay xin hune' te' nich'an hum ik'bil yu naj, leyanto te'; yanayo naj hune' yoj yin̈ iswatx'k'ab yiban̈ ha' mar, haxa hunxa yoj naj yin̈ ismeck'ab yayo yiban̈ tx'o tx'otx'. 3Yawi naj yin̈ caw ip haca' yel yaw no' balam. Hayet yawi naj isn̈irla hujeb c'uh, yalni tzoti'. 4Hayet lahwi istzotel hujeb c'uh tu', wocan intz'ibn̈enojan walnihan. Yaja' wabenan hune' yul nuk'e satcan̈ halni haca' ti': —Ton̈e chac'ubacano huntek'an maxawabe ti', mach chatz'ibn̈ecanoj, ẍi wetan. 5Naj ángel ayayo yoj yiban̈ ha' mar yeb yiban̈ tx'o tx'otx' wiltu'an, yican̈ naj iswatx'k'ab satcan̈, 6yanico naj Comam testigohal, Comam itzitzn̈etic'a yin̈ sunilbal tz'ayic, Comam watx'en̈e satcan̈ yeb sunil tzet ay satcan̈, Comam watx'en̈e tx'o tx'otx' yeb sunil tzet ay sat tx'otx', Comam watx'en̈e ha' mar yeb sunil tzet ay xol ha', yalni naj haca' ti': —Tinan̈ matxa chiec' tiempo, 7yuto hayet ch'ok'tzeno naj ishuj ángel istrompeta cat yijnocano isba tzet ewan yehi, huntek'an nabiltic'a yu Comam Dios, haca'tic'a yu yalni Comam tet ebnaj ischejab yet payat, ẍi naj. 8Hune' yul nuk'e wabetic'ahan yul satcan̈, tzotelpaxayti wetan, yalni haca' ti': —As ilo hune' nich'an hum leyanayo yul isk'ab naj ángel lin̈ancan̈ yiban̈ ha' mar yeb yiban̈ tx'o tx'otx', ẍi wetan. 9Intohan ink'annolojan hune' nich'an hum tu' tet naj, istak'wi naj wetan: —Ay te' lah, loto te', hayet chalono te' caw chi' chieloco yul hati' yu te', haca' ischi'al no' cab, wal yul hac'ul xin caw c'ah chielicoj, ẍi naj wetan. 10Inchahnilojan te' tet naj ángel tu', inlonitojan te', caw xin chi' elico yul inti'an yu te', wal yul inc'ulan xin caw c'ah elicoj yet lahwi inlonihan te'. 11Lahwi tu' yallaxpaxo wetan: —Caw yilal hawalni hunelxa yin̈ tzet chute yalni Comam Dios yin̈ tx'i'alej niẍte con̈ob yeb nimeta con̈ob, yeb tx'i'al abxubal yeb yin̈ ebnaj rey, ẍi wetan.

will be added

X\