APOCALIPSIS 1

1Ha' hune' ti' yak' Comam Dios, isyeb Comam Jesucristo tet ebnaj ischejab yin̈ huntek'an tzet yilal yuni yeb toxa chiyuhi. Ischejniti Comam Jesucristo yángel yak'ni wohtan̈elojan, hanin Juan inti'an, ischejab Comam Jesucristo. 2Haninti'an chiwalan isyelal yin̈ tzet wilan, testigo inpaxojan yin̈ Istzoti' Comam Dios yij isba yu Comam Jesucristo. 3Sak'al yet mac chiilni yeb mac chiaben huntek'an tzet halbilcano yu Comam yul hune' Hum ti', cat isyijen huntek'an tzet tz'ibn̈ebilcano ti', yuto toxa chij isba. 4Hanin Juan inti'an, chintz'ibn̈etojan hune' carta ti' teyet hex huj majan ayexxaco yul isk'ab Comam Jesucristo. Chawe ak'anc'ulal yeb isc'ulch'anil isc'ul Comam Dios; Comam ay tinan̈, Comam ayxatic'a yet yalan̈tocanoj, Comam chihuli. Chahwepaxo ak'anc'ulal yeb isc'ulch'anil tet hujeb espíritu ayco sata bay tz'on̈an Comam. 5Chawepaxo ak'anc'ulal yeb isc'ulch'anil isc'ul Comam Jesucristo, Comam testigo caw yijem. Comam Jesucristo ti' babel itzitzbican̈ xol camom, aypaxo yip Comam yiban̈ ebnaj rey ay yul sat yiban̈k'inal ti'. Caw xahan ayon̈ yu Comam, caw yicanilo Comam comul yu ischiq'uil malto yin̈ te' culus. 6Con̈yanico Comam yahawil yeb sacerdotehal yu jocnico yu Comam Dios, ismam Comam Jesucristo. Hallaxojab tzoti' c'ul yin̈ Comam, yeb xin ta caw ay yip Comam yin̈ sunilbal tiempo. ¡Hacojab tu'! 7Chul Comam Jesucristo tu' xol moyan. Sunil mac chiilni yul Comam, ha' hunpaxo ebnaj potx'ni camo Comam chiilni yuli. Hayet chilni anma ay yul hunun con̈ob yul sat yiban̈k'inal ti' yul Comam chioc yin̈ bisc'ulal, cat yoc ok'o yu bisc'ulal. Ho', hac tu' chuhi. 8Yalni Comam: —Haninan babelinan yeb islahobal, haca' tz'ib A yeb Z, ẍi Comam; Comam chisje iswatx'en sunil tzet ye tu', Comam ay tinan̈, yeb ayxatic'a yet yalan̈tocanoj, yeb chihuli. 9Hanin Juan inti'an, heyuẍta wehan, han-hun-inan chiwabehan isya'tajil yeb hex, yeb xin han-hun-inan chinchahan isnimanbal inc'ulal teyintaj. Hune'n̈e xin chon̈eh yeb Comam Dios yu ayon̈xaco yul isk'ab Comam Jesucristo. Yet hunel, yet ayinan yul hune' con̈ob chiyij Patmos, hune' con̈ob ay xol ha' mar, quinalaxicojan preso yu chiwalic'ojan Istzoti' Comam Dios yeb tzet iswatx'e Comam Jesucristo. 10Yet hunel tu', yin̈ tz'ayic yet Comam, quinocan yalan̈ ischejbanil Comam Espíritu Santo, wabenan hune' yul nuk'e wintajan awi yin̈ caw ip haca' yok' ch'en trompeta. 11Yalni wetan haca' ti': —Tz'ibn̈eyo huntek'an chawil ti' yul hum, cat hawanito tet hujeb majan anma ayxaco yul ink'aban ay yul ismajul Asia: tet Efeso, Esmirna, Pérgamo, Tiatira, Sardis, Filadelfia yeb tet Laodicea, ẍi wetan. 12Inmeltzon inbahan, int'an̈xitojan yun̈e wilnihan mac chitzotel wetan. Wilnihan hujeb candelero naba oro bay chialaxato cantil. 13Xolbal hujeb candelero tu' wilan hune' mac haca' anma jilni. Caw nimajal ishojayo istel xil isk'ap ayicoj, masanta chiayilo yin̈ yoj. Aypaxico hune' iscincho naba oro, nimajal ispak'i sat chiah apno istxam isc'ul. 14Wal xil iswi' caw saj jilni haca' no' saj lana yeb haca' jilni ch'en chew. Haxa isbak'sat lahan jilni haca' xaj k'a k'a'. 15Wal yoj xin chitzejtzoni, haca' jilni ch'en bronce n̈ijbilxalo istz'ilal, n̈usbilxa yul horno. Wal yul isnuk' xin caw ay yip haca' jaben isbili ha' nimeta ha'. 16Yin̈ iswatx'k'ab ayco hujeb tx'umel. Chi-xin-elti hune' ch'en espada caw xixi' iswi' yul isti'. Hune' ch'en espada tu' aypaxati' yeh yichin̈ ch'en. Wal issat lahan jilni haca' yet chitzejla tz'ayic yet caw hajan. 17Yet wilnihan huntek'an tu', wayc'ayan yich yoj, haca' camom wucanilojan. Yanayo iswatx'k'ab wiban̈an, yalni wetan: —Mach chachxiwi, haninti'an yichebanil yeb islahobal. 18Haninti'an itzitzinan, quincaman yaja' tinan̈ xin itzitzinan yin̈ sunilbal tiempo. Haninti'an yahaw inan yin̈ camical yebpaxo yin̈ bay chiapni yanma anma chicami. 19Tz'ibn̈ecano huntek'an maxawil ti', yeb huntek'an chawil tinan̈, yeb huntek'an chawila' yet tzujaniloxa. 20Ha' hujeb tx'umel hawil yin̈ inwatx'k'aban yeb hujeb candelero naba oro, hac ti' chal yelapnoj: Ha' hujeb tx'umel tu', yechel hujwan̈ inchejaban chiilni hujeb majan anma ayxaco yul ink'aban, walpaxo hujeb candelero naba oro yechel hujeb majan anma ayxaco yul ink'ab tu'an, ẍi Comam.

will be added

X\