APOCALIPSIS 1

1Ha' hunk'aan tzetet tz'ib'n̈eb'il yul te hum ti', xa' Comam Dios tet Comam Jesucristo yu syeni tet heb'ya' schejab' yin̈ hej tzetet toxa chuuj. Ha' Comam Jesucristo x'anitij yángel syeb' wet hayin Juan hin schejab' ti'an. 2Hayin caw ẍwa' hin b'a yin̈ hantaj tzet xwil ti'an, b'oj stzoti' Comam Dios b'ay xa' sb'a Comam Jesucristo. 3Sak'al yet mac ch'ilni te' hum i'n̈e stzoti' Comam Dios ti', b'oj mactaj ch'ab'en tzet chal te' cat syijyeni, haxca lan̈anxa yijnoj sb'a tzet chal te'. 4Hayin Juan ti'an, ẍwatoj hune' wum ti' teyet hex hujeb' yiglesia Comam Dios ay b'et Asiaan. A'laxojab' sc'ulch'anil sc'ul Comam Dios b'oj ak'anc'ulal teyet yu Comam ay tinan̈, ayn̈etic'a b'oj ẍto huluj, b'oj yu hujwan̈ Yespíritu Comam aycoj sataj stz'on̈ob'al, 5b'oj yu Comam Jesucristo, Comam xa' sb'a yin̈ st'in̈anil. Ha' b'ab'el xpitzc'acan̈ yin̈ camical, ha' Yahaw yib'an̈ sunil heb'naj rey ay satyib'an̈k'inal ti'. Chon̈ yoche, xa'nican tan̈oj co mul yu schiq'uil xmaltoj. 6Swatx'en hune' con̈ob'al sacerdote jin̈ yun̈e jocnicoj yu sDiosal, Smam paxoj. ¡Hal-laxojab'coj smay Comam Jesucristo, hal-laxojab'paxoj chub'il ha' Comam Yahaw yin̈ stohb'alk'inal! Amén. 7Ilwejc'anab'i: Chuluj Comam xol asun. Sunil mac ch'ilnoj, hasta mac xt'ok'nicoj ch'en lanza yin̈, ch'ilnoj yuluj. Sunil anma ay yul hunun con̈ob' ẍtacojcan̈ sc'ul yilnoj. Yeli, hactu' chute' sb'a. 8Chalni Comam: Hayin yichob'anil sunil tzetetan b'oj slahub'al. Haca' hune' tz'ib' A b'oj Z hactu' wean, Comam ay tinan̈, b'oj ayn̈etic'a b'oj ẍto huluj, Comam Sunil Chu Yu. 9Hayin Juan hin heyuẍtaj ti'an, haxca tzujan̈on̈ yin̈ Comam Jesucristo, jetb'iwej co b'a yin̈ stecha sya'tajil chul jin̈ haxca ayon̈coj yul sk'ab' Comam Dios. Yet ayincoj presu b'et isla Patmos yu hin pujb'anc'oj stzoti' Comam Diosan b'ay xa' sb'a Comam Jesús, 10yin̈ hune' domingoal xquin can yalan̈ smay sk'ak'al Comam Espírituan. Xwab'en hune' tzoti' win̈tajan caw ay yip tzoteli, haca' yok' ch'en trompeta hactu' sk'an̈i, 11xalni wetan: —Tz'ib'n̈e yul hunuj hum hantaj tzet chawil ti', cat hawanitoj tet hujeb' iglesia ay yul con̈ob' scuenta Asia: Éfeso, Esmirna, Pérgamo, Tiatira, Sardis, Filadelfia, b'oj Laodicea. 12Xquin meltzo t'an̈naan yu wilni mac stzotel wetan. Ha' xwilnian aycan̈ hujeb' yoj stz'on̈ob'al candil nab'a' oro. 13Xol ch'en tu', xwil hune' haca' anma yean, xil sk'ap aycoj yin̈, caw nimej shoji, ch'aycaniloj yin̈ yoj. Wal cincho aycoj yictaj, nab'a' oro, nimejal spawi sat, ch'ahapnoj yin̈ xtxam sc'ul. 14Sajxot-xon̈e xil swi' haca' no' lana saj, mato haca' saj t'ub'i ch'en chew. Sb'ak' sat haca' xaj k'a' k'a' ẍchawi. 15Pax yoj caw ẍchaw jilni haca' stzejla ch'en bronce tx'utx'eb'il, n̈usb'ilxa yul horno; yul snuk', haca' swahcha ha' nimej ha'. 16Xwilni paxan, ib'il hujeb' tx'umel yul swatx' k'ab'. Yul sti' ch'eltij hune' ch'en espada caw ay yeh sataj b'oj yin̈taj. Haca' ẍchaw tz'ayic yet caw hajan, hactu' jilni ẍchaw sat. 17Ha' yet xwilni Comam tu'an, xquin ec' pac'na yich yoj xiwquilalan, haca' camom xwulujan. Yaja' xacoj swatx' k'ab' wib'an̈an. Xalni Comam wetan: —Machach xiwi Juan. Hayinti' b'ab'elinan b'oj slahub'alan. 18Hayin ti'an itzitzinn̈etic'aan. Xquin caman, yaja' tinan̈ itzitzin stohb'alk'inalan. Hayin i'n̈e slaweal b'ay ay hej camoman. 19Tinan̈ tz'ib'n̈e tzet chawil ti', hej tzetet ay tinan̈ b'oj hej tzetet ẍto huuj tzujanxa. 20Ha' hujeb' tx'umel xawil yul hin watx' k'ab' ti'an, yechel hujwan̈ hin chejab' ay b'et hujeb' iglesia yean. B'oj hujeb' ch'en yoj tz'on̈ob'al candil nab'a' oro, yechel hujeb' iglesia ye ch'en.


Copyright
Learn More

will be added

X\