FILEM'ON 1

1Hayin Pablo hin ti'an, presu we sya'iloj Comam Cristo Jesúsan. Hayin b'oj ya' juẍtaj Timoteo ẍjatoj ha cawilan wuẍtaj Filemón caw ocheb'il juan, hayon̈ jetb'i co b'a yin̈ smunil Comaman. 2Chin tz'ib'n̈etoj hune' wum ti' tawet b'oj tet yiglesia Comam syamb'a sb'a tawatut, b'oj tet ya' janab' Apia b'oj tet ya' Arquipo ẍjet a'ni yip yin̈ jalni stzoti' Comaman. 3Ẍwochean ta cha' co Dios co Mam, b'oj Jahaw Jesucristo sc'ulal sc'ul b'oj ak'anc'ulal teyet. 4Huntajel ẍwa' woraciónan xtic'a wa' yuch'antioẍ tet Comam Diosan yet chach tit yin̈ hin c'ulan, 5haxca xwab'e ha k'umal b'eti'an, to caw chawa' yuluj ha c'ul yin̈ Comam Jahaw Jesús b'oj caw chawoche mactaj ayxacoj yin̈ Comam. 6Chin k'an tet Comaman ta yet cha yeni hantaj scawxob'al ha c'ul yin̈ Comam, ẍcam txumcha yu hantaj mac ch'ohtajn̈eni hantaj hej tzetet c'ul ay jet yu Comam Cristo. 7Caw chin tzalaan b'oj caw ch'oc yip wanma ẍwab'ean yet chin nanitijan to chawoche mactaj ayxacoj yin̈ Comam. Caw yuch'antioẍ tawet wuẍtaj haxca hawu, sunil heb'ya' jetb'i scha yak'lob'al sc'ul. 8Waxan̈ca ay hin chejb'anil yu Comam Cristoan, ẍtic'a sje hin chilb'an hunuj tzetet hawub'an, 9yaja' yu jochen co b'a, k'a' t'in̈an amigoal chu hin k'anni tawetan. Hayin Pablo hin ti'an, ichaminxaan b'oj presu we sya'iloj Comam Cristo Jesúsan. 10Chin k'an tawet yu ya' juẍtaj Onésimoan, ya' ti', haca' hin c'ahol ye ya'an, haxca xa' ya' yuluj sc'ul yin̈ Comam Cristo wu yul presu ti'an. 11Ya' Onésimo ti', haca' hune' chejab' matzet ch'oqui hactu' ye ya' tawet yet yalan̈to, yaja' wal tinan̈, caw ayxa tzet ch'ocnojcoj ya' hawu haca' yocnicoj ya' wu b'eti'an. 12Ẍwatoj paxoj ya' tawetan, xahan chawil ya' hacojtam hayinan. 13Yu haxca ayincoj presu yu tzoti' c'ul ẍwalic'oj ti'an, ay wala'an ẍcanna ya' colwaoj win̈ ta helelojan. 14Yaja' mach sje hin c'ul wub' hunuj tzetetan ta mach scha ha wi', mach sje hin c'ulan ta yuxan̈e tx'oj chawab'e cha ta'weni, wocheb'alan ta caw ch'el yin̈ ha c'ul cha ta'weni. 15Ya' ti' x'el ya' ta c'atan̈ hayeb'oj stz'ayicalil. Xmam yu hune' ti' yun̈e ẍmeltzotoj ya' ta c'atan̈ yin̈ huneln̈ecanoj. 16Tinan̈ xin, cha ya' haca'xa caw hawuẍtaj caw ocheb'il hawu, matxa haca'oj hunuj chejab' txon̈b'iltoj. Hayinti'an caw ocheb'il ya' wuan, walach hasta k'a' ẍto hawoche ya', matn̈etaj yu jet-anmail ya', to caw juẍtajxa ya' yin̈ Comam Jahaw. 17Yuxin ta jetb'ixa co b'a yin̈ smunil Comam chawab'e, cha ya' yul hawatut hacojtam hayin chin ha chaan. 18B'oj ta ay hunuj tzet tx'oj xu ya' tawin̈, ta x'oc sc'as ya' tawet, k'an ch'en wetan. 19Hayin Pablo hin ti'an, hayin caw chin tz'ib'n̈e hune' ti'an. Ta ay sc'as ya' tawet, hayin chin tohla'an. Yaja' tijab' pax yin̈ ha c'ul, haca'tic'a' ay pax ha c'as wet yin̈ ha k'inalan, haxca wuan yuxin xawa' yuluj ha c'ul yin̈ Comam Cristo. 20Yeli wuẍtaj, haxca ayon̈xacoj yin̈ Comam Jahaw, yuch'antioẍ chin k'an tawetan ta cha cha ya'. Yin̈ hactu' chawa' yak'lob'al hin c'ulan, sc'ulaloj jet ye yin̈ Comam Cristo. 21Chin tz'ib'n̈e hune' wum ti' tawetan haxca wohtajan to yijyomach, wohtajan to hasta ec'b'al chawub' haca' chin k'an tawet ti'an. 22B'oj hunxa chin k'an tawetan, ta cha watx'e b'ay chin ehojan. Caw ẍcawxi hin c'ulan ta ẍi sc'ul Comam Dios, chin hajlaxojiltoj yul presu b'eti'an yu heyoración xeya' win̈an. Yin̈ hactu' chu wapni texol hunecxaan . 23Chatoj ya' juẍtaj Epafras he cawil, ya' wetb'iictij yul presu ti' yu sya'iloj Comam Cristo Jesús. 24Chapaxtoj ya' Marcos he cawil b'oj ya' Aristarco, ya' Demas, b'oj ya' Lucas. Heb'ya' ti' lan̈an scolwa win̈ yin̈ smunil Comam b'eti'an. 25Ya'ab' Comam Jahaw Jesucristo sc'ulch'anil sc'ul teyet.


Copyright
Learn More

will be added

X\