FILEM'ON 1

1Hanin Pablo inti'an, ayinicojan preso yu walnic'ojan Istzoti' Comam Jesucristo. Haninan yeb juẍta Timoteo chicotz'ibn̈etojan̈ hune' carta ti' tawet wuẍta Filemón; xahan ayach juhan̈, jetbipaxo coba yin̈ ismunil Comam Dios. 2Chicotz'ibn̈epaxtojan̈ tet ix janab Apia, yebpaxo tet naj juẍta Arquipo, naj caw colwa jin̈an̈ yin̈ ismunil Comam Dios, yeb tet sunil mac ayxaco yul isk'ab Comam Dios chiscutxba isba bey hawatut. 3Ha'ojab Comam Dios Mame, yeb Comam Jesucristo Jahawil chiak'ni isc'ulch'anil isc'ul, yeb ak'anc'ulal teyet. 4Yet chintxahlihan tet Comam Dios hunta el, chaẍinnatijan, chiwak'nihan yuch'andiosal tawin̈ tet Comam. 5Yuto xawabehan tato caw xahan chawil macta yetxa Comam yehi, yeb ta caw ayco hawanma yin̈ Comam Jesús. 6Caw chink'anan tet Comam Dios ta ha' anma xayaco isba yul isk'ab Comam Jesucristo, yu chila ta ayco hawanma yin̈ Comam Dios, caw chistxumiloj tato han̈c'an̈e Comam Jesucristo chiak'ni isc'ulal jet. 7Wuẍtaj, caw chintzalahan yeb xin caw chiyik' yip wanmahan yu isc'ulch'anil hac'ul, yuto hawu yuxin xaischah macta yetxa Comam Dios yak'lobal yanma. 8Haninti'an ischejab Comam Jesucristo wehan, yuxin chu walnihan tawet baytet caw yilal hawatx'eni. 9Yaja' haca' chu yay cosat cok'anni hunu tzet ye tu', hac tu' chu walnitojan tawet, yuto caw xahan ayach wuhan. Hanin Pablo inti'an icham inxahan, caw xin ayinicojan preso yu chiwalic'ojan Istzoti' Comam Jesucristo. 10Caw chinocan ink'ana'an tawet yin̈ naj Onésimo, naj ti' haca'tan̈e inc'aholan ye naj, yuto ischah naj Comam Jesucristo yul yanma yet ayinicojan preso ti'. 11Naj Onésimo ti', haca' hunu chejab caw matzet chiocnicoj, hac tu' ye naj hawu yet yalan̈tocanoj, yaja' wal tinan̈ xin caw chiocnoco naj hawu, haca' yu yocnico naj wuhan bey ti'. 12Wal tinan̈ chiwatojan naj tac'atan̈ hunelxa, c'ul chu hachahni naj, haca'ojtam haninan chinhachahan. 13Wochebalan chicancano naj inc'atan̈an yu inchejnihan naj, ha'ojtam xin hach chachinchejan selelo naj yulbal ayinictijan yul preso ti' yu Tzoti' c'ul yet colbanile. 14Yaja' mach chisje inc'ulan inwatx'ehan hunu tzet ye tu' yalan̈to maẍto chiwabehan tzet chawute hawalni, haxinwal hune' chink'anan tawet ti' machojab lan̈biloj, wal xin yin̈ojab hawanma chitita. 15Naj Onésimo ti', el naj hanic' tiempohal tac'atan̈, yaja' yun̈e ismeltzo naj tac'atan̈ yin̈ huneln̈e. 16Yaja' matxa haca'o hunu chejab chuco naj, wal xin caw nimanojab yelapno naj yul hasat, haca' hunu juẍta caw ochebil ju. Walinan caw xahan ay naj wuhan bey ti', walachpaxo xin, ec'nahojab xahan chawil naj. Machn̈eojabtaj yu jet anmahil naj yuxin xahan chawil naj, walxinto yu juẍtaxa naj yin̈ Comam Jesucristo. 17Yuxin ta caw juẍtaxa coba yin̈ Comam chawabe, chah naj hacojtam haninan chinapnihan tac'atan̈. 18Tato ay hunu istx'ojal iswatx'e naj tawin̈, maca ta ay isc'as naj tawet, teye wetan. 19Hanin Pablo inti'an han-caw-inan chintz'ibn̈etojan, tato ay isc'as naj tawet haninan chintohlahan, waxan̈ca xin chinnatijan tawet tato aypaxo hac'as wetan, yuto haninan walan Istzoti' Comam Jesucristo tawet yet hachahni Comam yul hawanma. 20Hach wuẍtaj yije tzet chink'anan tawet ti', yuto yuninalxa Comam Dios hawehi. Ak' yak'lobal wanmahan, yuto juẍtaxa coba yin̈ Comam Jesucristo. 21Chintz'ibn̈etojan huntek'an ti' tawet yuto wohtajan tato caw yijemach, caw wohtapaxojan tato ec'balto tzet chayije yiban̈ tzet chiwaltoti'an. 22Chiwalnipaxtojan tawet, chasay nino bay chinehan yet chinapnihan texol. Caw xin chiwacojan yipo wanmahan ta yu chextxahli win̈an tet Comam Dios, chiel yin̈ isc'ul Comam intohan quexwilnojan. 23Chalto naj juẍta Epafras ta chawil haba bey tu', ayco naj preso wintajan bey ti' yu yalnipaxic'o naj Istzoti' Comam Jesucristo. 24Chalpaxto juẍta Marcos, juẍta Aristarco, juẍta Demas yeb juẍta Lucas ta cheyil heba bey tu'; ebnaj ti' wet munlawomalan yin̈ ismunil Comam Dios. 25Ha'ojab Comam Jesucristo Jahawil chianayo isc'ulch'anil isc'ul teyiban̈ bey tu'.

will be added

X\