FILIPENSES 4

1Yuxin hex wuẍtaj hex wanab, caw xahan ayex wuhan. Caw ay wala'an chiwilicojan teyin̈ tinan̈, caw istzalabal wanmahan heyehi, yeb xin ispajpaxo inmunilan heyehi. Caw chelahweco xin, toholojab cheyute hebeybal yin̈ Comam Jesucristo. 2Chiwaltojan tet janab Evodia yeb xin janab Síntique tato caw yilal yoc ebix yin̈ ak'anc'ulal, yuto caw isnohxa isba ebix yin̈ Comam Jesucristo. 3Yebpaxo xin, hach wuẍta wet munlawomal caw yijem, chink'anan tawet chaẍcolwa yin̈ ebix janab ti', haxinwal chioc ebix yin̈ ak'anc'ulal, yuto caw colwa ebix win̈an yalnic'o Tzoti' c'ul yet colbanile xol anma; yebpaxo juẍta Clemente caw colwa wintajan, yeb huntek'anxa ebnaj juẍtaj. Ebnaj tu' tz'ibn̈ebilxayo isbi ebnaj yul te' hum bay ayayo isbi macta ayxa isk'inal mach istan̈bal yin̈ Comam Jesucristo. 4Tzalahan̈we yin̈ Comam Jesucristo Jahawil sunilbal tiempo. Chiwalnipaxojan hunelxa, ¡tzalahan̈wej! 5Caw c'ulch'anojab hec'ul yul sat sunil anma. Hanic'xan̈e tiempohal cat yul Comam. 6Machojab tzet caw cheyaco yin̈ hec'ul. Halwe sunil tzet cheyoche tet Comam Dios yin̈ hetxah, k'anwe tet Comam cat xin heyak'nipaxo yuch'andiosal tet Comam. 7Hac tu' xin chiyu yak'ni Comam Dios ak'anc'ulal teyet. Hune' ak'anc'ulal tu', caw ec'bal sata hanta tzet chiyu istxumchalo yu anma. Hune' ak'anc'ulal tu', ha' chic'uban heyanma yeb xin tzet chiec' yin̈ henabal, yuto caw hunxa heye yeb Comam Jesucristo. 8Tinan̈ xin, hex wuẍtaj hex wanab, aweco henabal yin̈ sunil tzet caw t'in̈an yehi, yin̈ sunil tzet ay yelapno yul cosat, yin̈ sunil tzet caw tohol, yin̈ tzet mach isquistalil, yeb yin̈ sunil tzet caw yeli, yeb yin̈ sunil tzet chijoche jabe', yebpaxo yin̈ sunil tzet caw c'ul yul sat Comam Dios, yeb huntek'an caw istzan yallax c'ulla tzoti' yin̈; ha' yin̈ huntek'an tu' cheyaco henabal. 9Yijewe huntek'an cuybanile yeb chejbanile wak'an teyet, yeb huntek'an tzet heyabe walnihan, yeb tzet heyil inwatx'enan. Ta chewatx'e haca' tu', chioc Comam Dios heyetbihoj, chiyak'nipaxo Comam ak'anc'ulal teyet. 10Wal tinan̈ xin, caw chintzalahan yin̈ Comam Jesucristo Jahawil, yuto quinhenatijan heyaniti hecolwal wetan. Mach lan̈ano walnihan ta xaquinhenahuln̈etojan, ¡machoj! Wal xin ayinn̈etic'acojan yin̈ henabal, yaj ton̈e ton yumi machi yu hecolwa win̈an. 11Wal xin, maẍtaj yu caw matzet ayinan yuxin chiwaltojan hune' ti' teyet, machoj; wal xin k'aynajinxahan wak'ni tzalaho wanmahan yin̈ tzet ay yul ink'aban. 12Wohtajan wijlenan isya'tajil, ay tiempo machi nich'ano tzet ayinan. Aypaxo tiempo caw c'ul chiec' wila'an, wohtajan wijlenan wahil, aypaxo tiempo nohnan̈etic'a inc'ulan, aypaxo tiempo ay inmelyuhan yeb ay tiempo machipaxo inmelyuhan, yaja' k'aynajinxatic'ahan yin̈ sunil. 13Sunil chisje wuhan, yuto ha' Comam Jesucristo chicolwa win̈an. 14Yaja' hex ti', caw c'ul tzet chewatx'e yuto xaheyati hecolwal wetan yet ayinicojan yin̈ hune' isya'tajil ti'. 15Yet welan yul ismajul Macedonia, yet wichenicojan walnic'ojan Tzoti' c'ul yet colbanile yul huntek'anxa nan con̈obal, han̈c'an̈e hex ay yul isk'ab Comam bey yul con̈ob Filipos quexcolwa win̈an. Ha' ton tu' heyak' ispajo wetan, yuto hechah colbanile yu inmunilan texol. Wal hunmajanxa ebnaj ayxaco yul isk'ab Comam yul huntek'anxa con̈ob bey tu', matzet yak'a. 16Yebpaxo yet ayinan bey con̈ob Tesalónica, cayel oxel heyato hecolwabal wetan, yu yoc yin̈ tzet chiocnico wuhan. 17Maẍn̈etaj inchahnihan hecolwabal ayco yin̈ innabalan, wal xin caw chintzalahan yuto ec'balto chiak'lax ispaj selel teyet yu Comam Dios. 18Yuxin caw nimanxa tzet chinchahan teyet, caw xapalc'oni. Sunil tzet heyati wetan yinta naj Epafrodito, c'uxanxa. Caw c'ul hune' tu' yul sat Comam Dios, yuto haca' isxuk'al sam hunu xahanbal chijak' tet Comam, hac tu' issak'alil hune' hecolwabal tu'. 19Ha' Comam Dios xin chiak'ni sunil tzet matzet yul hek'ab, haca'tic'a isc'ulch'anil isk'alomal ay yin̈ Comam Jesucristo. 20Ayojab yelapno isbi Comam Dios Mame yin̈ sunilbal tiempo. Ha' ton Comam, Mame jin̈ cosunil. ¡Hacojab tu'! 21Chiwaltojan teyet cheyil heba yin̈ hecawil hesunil yetexxa Comam Dios bey tu', hex hunxan̈e heye yin̈ Comam Jesucristo. Chalpaxto ebnaj juẍtaj ay inc'atan̈an ta cheyil heba yin̈ hecawil. 22Chalpaxto sunil mac yetxa Comam bey ti' ta cheyil heba yin̈ hecawil, yebpaxo xin ebnaj juẍta chimunla yinta naj yahaw Roma ti'. 23Yak'abayo Comam Jesucristo isc'ulch'anil isc'ul teyiban̈ hesunil.

will be added

X\