FILIPENSES 4

1Hex caw xahan ay wu ti'an, hex caw ẍwoche hex wila' ti'an. Stzalalal wanma b'oj spaj hantaj hin munil heyean. A'wej heyanma he lin̈b'an he b'a yin̈ Comam Jahaw. 2Chin k'an tet ya' Evodiaan, b'oj tet ya' Síntique, ta chacoj sb'a heb'ya' yin̈ ak'anc'ulal haxca snohxa sb'a heb'ya' yin̈ Comam Jahaw. 3Pax hach wet munlawomal caw yijyom, chin k'an tawetan ta chach colwa yin̈ heb'ya' janab' ti' yanicoj sb'a yin̈ ak'anc'ulal, haxca heb'ya' ti', xcolwa heb'ya' win̈ yin̈ spujb'anc'oj tzoti' yet colb'anil, b'oj ya' Clemente b'oj hunk'aanxa heb'ya' xcolwa win̈an. Sb'ih hantaj heb'ya' ti', tz'ib'n̈eb'ilxa yul te' libro b'ay ahayoj sb'ih mactaj ayxa sk'inal mach stan̈b'al. 4Tzalaojon̈wej yin̈ Comam Jahaw stohb'alk'inal. Ẍwalni paxan: ¡Tzalaojon̈wej! 5Ay chaliloj ta c'ul ẍjute co b'a yin̈ sat sunil anma, haxca toxa chuluj Comam Jahaw. 6Mach ẍtac co c'ul yu hunuj tzetet. Ja'a'c'oj co b'isc'ulal tet Comam Dios yin̈ joración. Co k'ana' tet b'oj ja'a' yuch'antioẍ tet Comam. 7Yin̈ hactu' cha' Comam ak'anc'ulal jet, hune' ak'anc'ulal ec'b'al sataj hantaj chu xtxumcha ju; ha' hune' ak'anc'ulal ti', ha' ẍtan̈enoj janma b'oj co nab'al yin̈ Comam Cristo Jesús. 8Tinan̈ hex wuẍtaj hex wanab', yin̈ b'aytet st'in̈anil ẍjacoj co nab'al, yin̈ b'aytet scha swi' Comam Dios, hej tzetet tohol, hej tzetet caw c'ul, hej tzetet ẍjoche jab'e'. Yin̈ hej tzetet c'ul yal-lax yin̈, hat ẍjacoj janma. 9Ec'an̈wej he yi'a' b'aytet xin cuy teyetan b'oj tzet xin ye teyetan, b'aytet xeyab'e walnian, b'oj b'aytet xeyil wunian. Yin̈ hactu' cha'a' Comam Dios ak'anc'ulal teyet. 10Caw chin tzala yin̈ Comam Jahawan, haxca xquin he natij hunecxaan. Machu walnian ta xquin he nahuln̈etojan, to ton̈em mach xu he colwa win̈an. 11Matoj haxca lan̈an hin cam man̈ melyualan yuxin ẍwal hune' ti'an, machoj, k'aynajinxa wijlenan. 12Wohtaj ẍwijleaytoj sya'tajilan, wohtaj pax ẍwilni sc'ulalan. Xax quin k'ay wilwen sunilan, hune' xan̈c'a yec' wu ẍwab'ean, wal nohnaj hin c'ulan wal chin n̈ohchaan, ta ay hin melyuan, mato man̈ melyual wean. 13Sunil ẍtecha wuan haxca ha' Comam Cristo ẍcolwa win̈an. 14Yaja' yin̈ caw yeli caw c'ul hune' xeyu win̈ ti'an, haxca xquex colwa win̈ yin̈ tzet ch'ocnicoj wuan. 15Yet xquin el b'et Macedoniaan, xquin to wichenojcoj hin pujb'anc'oj tzoti' yet colb'anil yul hunk'aanxa con̈ob'an, hexxan̈e ayex b'et Filipos tu' xeyatij he colwal wetan. 16Hasta yet ayinto b'et Tesalónicaan, cayel oxel xeyatij ch'en melyu ẍcolwa win̈ yin̈ tzet ch'ocnicoj wuan. 17Matoj han̈c'a hin chani ch'en melyu ẍwochean, to k'a' chin tzalaan haxca ec'b'alto che chab' spaj shelel tet Comam Dios. 18Tinan̈ caw tx'ihalxa tzet xin cha teyetan, hasta ec'b'al xu eya'ni. Hantaj xeyatij wet yin̈ ya' Epafroditoan, caw c'uxanxanayi. Hantaj xeyatij wet tu'an, matn̈etaj wetan to sak'al pax yul sat Comam Dios haca' incienso, haca' hune' xahanb'al ch'ah sn̈ub'al yin̈ sat Comam. 19Ha' Comam co Dios ch'anojcoj spixan hantaj tzet ch'ocnicoj heyu, haca'tic'a smay sk'alomal ay yin̈ Comam Cristo Jesús. 20Hal-laxojab' tzoti' c'ul yin̈ stohb'alk'inal yin̈ Comam Dios co Mamwej. Amén. 21A'wej scawil sc'ul hantaj heb'ya' yet-xa Comam Dios, yu Comam Cristo Jesús. Heb'ya' jetb'i ay tin c'atan̈ ti'an, chatoj heb'ya' he cawil. 22Chapaxtoj heb'ya' yet-xa Comam Dios ay b'eti' he cawil, pax heb'ya' aycoj yin̈ smunil naj yahaw ay yul con̈ob' Roma ti'. 23Ya'ab' Jahaw Jesucristo sc'ulch'anil sc'ul teyet.


Copyright
Learn More

will be added

X\