FILIPENSES 3

1Hex wuẍtaj hex wanab', tzalaojon̈ yin̈ Comam Jahaw. Mach ẍcajtza hin c'ul hin tz'ib'n̈entoj tzet xaxtic'a wal teyetan, haxca sc'ulaloj heyet yeyi. 2Nann̈e heyu tet anma ẍpalc'on smatzwalilal, heb'naj xtx'ojaln̈e chu, cat yalni heb'naj ta caw yilal ch'oc hune' circuncisión yin̈ co nimanil. 3Hayon̈ ti' yeli chab'il circuncisión ju yul sat Comam Dios, hayon̈ ẍco hak'e Comam yu Yespíritu b'oj ẍcawxi co c'ul yin̈ Comam Cristo Jesús. Mach ẍcawxi co c'ul yin̈ hej tzetet yin̈n̈e co nimanil ch'oqui. 4K'inaloj ta chu scolni sb'a hunuj anma yu tzetet chu tu', k'a ẍtom hu hin colni hin b'a sataj hunk'aanxa anma yin̈ hactu'an. 5Haxca yin̈ shuj k'in̈ hin pitzc'aan xquin a'lax circuncidaran, israel hinan, yin̈ yic'al stribu ya' Benjamín xquin elan, hebreo hinan, hebreo hin mam hin mi'an. Haxca fariseo hinan caw xin yijye sley ya' Moisésan. 6Caw aycoj wanma yin̈ hin religión tu'an, yuxin hasta xin caj heb'ya' aycoj yin̈ yiglesia Comam Cristoan. Yijyom hin yin̈ sley ya' Moisésan, mach hunuj mac chu yalni tzet chal wetan. 7Sunil hunk'aan lan̈an walni ti'an caw aytic'a yelapnoj ye yul hin satan. Yaja' tinan̈ yuxa Comam Cristo, matxa tzet chaliloj wetan. 8Yin̈ caw yeli sunil hunk'aanxa tu', matxa tzet chaliloj yul hin satan, haxca xax stzujchaapnoj hune' tzetet k'a' ay yelapnoj ye wuan, hune' tu' ha' wohtajn̈en Jahaw Cristo Jesúsan. Sya'iloj Comam, sunil xin c'aycantojan, sunil tzet haca'xa k'alem ye yul hin satan yun̈e hin chani sc'ulal Comaman, 9ẍquin hunicancoj yin̈an. Xquin can c'ulal yul sat Comaman yu wa'ni yuluj hin c'ul yin̈ Comam Cristoan, mat yuoj hin yijyen leyan. Ha' yelapnoj yeyi to chin can c'ulal yul sat Comam Dios yu wa'ni yuluj hin c'ul yin̈ Comam Cristoan. 10Tinan̈, han̈c'axan̈e wohtajn̈en Comam Cristo ẍwochean. Ẍwochepaxan ta syeloj sb'a hune' scan̈ilye Comam Dios win̈an, hune' xpitzc'ancan̈ Comam Jesucristo yin̈ camical. Ẍwochean ta ay woc yin̈ sya'tajil xil Comaman, hactu' chu hin hinni pax hin b'a hin cam haca' xu scam Comaman. 11Ẍcawxi pax hin c'ulan to chin pitzc'aojcan̈ xol hej camoman. 12Matzet lan̈an walnian ta xax tzujcha sunil wuan b'oj ta caw tz'ajan lahanxa wean, yaja' ẍwitij wanma win̈ hin to tin satajan yun̈e stzujchaoj hune' tzet nab'il yu Comam Cristo win̈an yet xquin yawtenan. 13Hex wuẍtaj hex wanab', matzet ẍwalan ta xax tzujcha hune' tu' wuan, ha' tzet lan̈an walnian to chin nahuln̈etoj tzet xax ec'cantojan. Ẍwa'ni yilal stzujcha tzet aytij tin satajan, 14yun̈e stzujcha hune' sab'eal cha' Comam jet, hune' b'ay ay Comam Dios b'ay chon̈ yawte Comam yu Comam Cristo Jesús. 15Hantaj hon̈ xax con̈ yihlani, yilal janicoj hune' tu' yin̈ janma. Taca ay hunuj hex nan he txumni, Comam Dios ch'a'noj he txumu' tzet caw yeyi. 16Yaja' yin̈ caw yeli hantaj xax stzujcha ju co txumni, ha' b'ay tzujanon̈ yin̈ co yijyeni. 17Hex wuẍtaj hex wanab', ocan̈wej tzujnuj yin̈ tzet ẍwuan b'oj cam cheyilcan tzet chu yehc'oj mactaj tzujan yin̈ tzet ẍwu ti'an. 18Tx'ihal el xax wal teyetan, hasta chin ok'an chin nanitijan haxca tx'ihalto mac xtx'ojalto chu haca'to mach yelapnoj ye scamical Comam Cristo yin̈ culus yul sat. 19Ha' yet hunk'aan tu' to ẍc'aylaxojiloj, haxca hej tzetet tx'oj choche, ha' aycoj sdiosoj, can̈tajn̈e ye chute, c'ajam tx'ixwub'al tzet chu, han̈c'a hej tzetet yet satyib'an̈k'inal ti' nab'il yu. 20Walon̈ hayon̈ ti', b'ay ay Comam Dios, hatta aytoj co nab'al, haxca hatta ay co con̈ob'. Lan̈an jechman yayojiloj Scolomal jet, Comam Jahaw Jesucristo. 21Comam, ẍhelnoj co nimanil aycoj yin̈ sc'antajil ti' haxin̈wal haca' yeltich'anil snimanil Comam chub'canoj. Chon̈ shela' yu scan̈ilye xa' Comam Dios tet, yun̈e st'in̈b'ancoj sunil tzetet yalan̈ schejb'anil.


Copyright
Learn More

will be added

X\