FILIPENSES 2

1Yuxin ta chexyiptze Comam Jesucristo, ta chak' Comam yak'lobal hec'ul yu xahan ayex yu, yeb ta hunxan̈e heye yu Comam Espíritu Santo, yeb ta xahan cheyil heyet anmahil, cat istz'aypaxo hec'ul yin̈; 2ta hac tu', ayojab tzalahilal texol, hunlahann̈eojab cheyute hexahann̈en heba. Hunlahann̈eojab cheyute heyanma yeb hunxan̈ehojab tzet chiec' yin̈ henabal; hac tu' xin caw chititcano tzalahilal yul wanmahan heyu. 3Mach chisje ta nime winaj cheyute heba cat helolo'n̈en heba yet chewatx'en hunu tzet ye tu', wal xin chewla winaj cheyute heba. Ec'balojab yelapno ebnaj juẍta teyiban̈ cheyabe. 4Machojabn̈etaj isc'ulal teyin̈ chesayic'oj, wal xin yilal henanipaxti ebnaj juẍtaj. 5Lahanojab cheyute henabal haca' isnabal Comam Jesucristo. 6Waxan̈ca Dios ye Comam Jesucristo, yaj matzet yal isc'ul Comam yin̈ yehobal. 7Wal xin isbejcano Comam sunil tzet yet Comam yehi, yanico isba Comam chejaboj yet ispitzc'a yul sat yiban̈k'inal ti'. 8Anma yu yulic'o Comam coxol, yinayo isba, caw xin yijem yutepaxo isba Comam masanta yin̈ iscamical, waxan̈ca caw tx'ixobal hune' camical yin̈ te' culus tu'. 9Yuxin caw ak'laxcano yip, yilaxcan̈ yu Comam Dios, yanico Comam hune' isbi Comam Jesucristo tu' ec'bal yelapno yiban̈ sunil bihe. 10Yuxin hayet chihallax isbi Comam Jesucristo caw chiay jahno sunil mac ay yul satcan̈, yeb mac ay yul sat yiban̈k'inal ti', yebpaxo mac ayayto yalan̈ tx'otx'. 11Cat xin yalni yu isti' tato ha' Comam Jesucristo, ha' caw Yahawil yecanicoj, hac tu' xin chu yoc ismay Comam Dios Mame. 12Yuxinto hex wuẍtaj hex wanab, hex caw xahan ay wuti'an, yet ayinan texol caw yijem cheyute heba, hacojab tu' xin yet machijinan texol caw ec'nahojab yijem cheyute heba. Aweco yin̈ heyanma hexiw tet Comam cat helin̈ban heba yin̈ hecolbanil. 13Wal xin, ha' Comam chiak'ni oco yin̈ heyanma tzettaj isc'ulal wal heyuni, cat xin iscolwapaxo teyin̈ yun̈e yijni isba haca' choche isc'ul. 14Watx'ewe sunil yaj mach chexak'wi c'ule, machica xin tzet cheyalpaxoj yet chewatx'eni. 15- 16Hac tu' xin, machi mule yeb istx'ojal chiilchalo teyin̈ yu anma, walxinto caw yuninal Comam Dios cheyute heba. Ec'an̈we yin̈ isc'ulal xol anma machiswalil yeb caw tx'ojcanoj. Wal xin caw chextzejla xol anma haca' istzejla tx'umel xol k'ejholo, yuto hex cheyalic'o Istzoti' Comam Dios chiak'ni k'inale tet anma. Hac tu' xin yet chul Comam Jesucristo caw chiwabehan tzalahilal teyin̈, yuto caw wohtajan tato mach nabn̈eho quinec'an texol, yeb xin mach nabn̈eho quinmunlahan texol. 17Waxan̈ca xin caw chiwaco innimanilti'an xahanbalil, yun̈e istz'ajnacano xahanbal cheyak' tet Comam Dios yu heyanma yin̈ Comam, caw chintzalahan cat inpohniltojan hune' tzalahilal ti' texol. 18Tzalahan̈wepaxo hex ti', ak'we tzalaho hec'ul yin̈ hune' bay chintzalacoti'an. 19Tato caw chi'el yin̈ isc'ul Comam Jesucristo Jahawil chito naj Timoteo quexistucle' yet hecal cabe ti' haca' chiwochehan, yun̈e yilni naj hanic' heyehicoj cat yiniti naj tzoti' wetan. Hac tu' chu istzalacan̈ inc'ulan yet chiwabehan hanic' heyehi. 20Yuto han̈c'an̈e naj Timoteo ti', lahan istxumni haca' inti'an, yeb xin chaco yin̈ isc'ul iswatx'en isc'ulal teyin̈. 21Yaj wal huntek'anxa ebnaj xin, ha' tzet choche isc'ul ebnaj chissaya, maẍtaj tzet choche Comam Jesucristo. 22Walex hex ti', heyohtaxa hanta isc'ulal chiyute isba naj Timoteo ti', yeb xin ta caw chicolwapaxo naj wintajan yin̈ jalnic'ojan̈ Istzoti' Comam Jesucristo. Haca' iscolwa hunu naj c'ahole yin̈ ismam, hac tu' iscolwa naj win̈an. 23Yuxin toxan̈e chiwechmahan tzet chinelicojan yin̈ hune' isya'tajil ayayo wiban̈ti'an, cat wanitojan naj quexistuclenoj. 24Yaj xin chicawxi inc'ulan yin̈ Comam Dios tato chintopaxojan quexwila'an yin̈ lembil. 25Chiec'paxo yin̈ innabalan tato caw yilal wanipaxtojan naj Epafrodito quexyila'. Naj juẍta ti', caw chicolwa naj wintajan yin̈ ismunil Comam Jesucristo, yeb ha' hun naj chiak'len isya'tajil wintajan. Naj juẍta ti', hex heyati naj colwal win̈an. 26Wal xin caw choche naj isto quexyila' hesunil, caw xin ayco yin̈ isc'ul naj teyin̈ yuto heyabeloj tato ya'biay naj. 27Wal tu', caw yeli ay hune' yabil oc yin̈ naj, hanic'xan̈e mach cam naj yu. Yaj xin caw ok' isc'ul Comam Dios yin̈ naj iscawxican̈ naj. Yaj caw maẍn̈etaj yin̈ naj ok' yanma Comam, caw tz'aypaxo isc'ul Comam win̈an, yun̈e matxa cam chislahico bisc'ulal win̈an yu naj. 28Yuxin matxa chiec'ayo yet inchejnitojan naj tec'atan̈, haxinwal chextzalacan̈ yet cheyilni yapni naj hunelxa. Yu hetzalahilal yin̈ naj chipax hanic' inbisc'ulalan. 29Chahwe naj yin̈ tzalahilal yuto caw heyuẍta naj yin̈ Comam Jesucristo. Caw xahanojab cheyil mac haca' naj ti'. 30Yuto yu ismunil Comam Jesucristo, yuxin etza cam naj. Caw ishin isba naj iscam win̈an heseleloj, yuto caw nahat ayexilo win̈an.

will be added

X\