FILIPENSES 2

1Wohtajan ta iptzeb'ilex yu Comam Cristo, che chani yak'lob'al he c'ul haxca chex yoche Comam, hun ye heyanma yu Comam Espíritu, cheyochen heb'ya' jetb'i b'oj che nanitij heb'ya'. 2Yuxin, chin k'an teyetan ehan̈wejc'oj yin̈ ak'anc'ulal, ochewej he b'a, hunb'awej heyanma b'oj hune'xan̈e tzet che nab'e. Ta hactu' cheyute, caw tzalalal ẍwucanan. 3Yet ẍjuni hunuj tzetet, mat yuuj co palc'on yib'an̈ jetb'i ẍjuni, matojca yu yoc co may yuxin ẍju, machoj, to chon̈ ay ni'anb'ail, b'oj ha' ẍjute jalni to k'a' c'ul tu' jetb'i tu' co sataj. 4Mat han̈c'aoj sc'ulal jet ẍco sayc'oj, ẍco saya' pax hunuj tzetet c'ul ch'ocnicoj yu jetb'i tu'. 5Lahan ẍjutewej co nab'al haca' snab'al Comam Cristo Jesús: 6Haxca wal Comam, Diostic'a Comam, yaja' mach xocletoj xacan sDiosal tu', 7to x'ay ni'anb'ail, xanican tzet ye yin̈ sDiosal tu', x'ec' yi'noj tzet ye hune' chejab', xpitzc'a haca' chu co pitzc'ayi. 8Ha' x'ehc'oj Comam satyib'an̈k'inal ti' anma yeyi, x'ay ni'anb'ail, yijyom xute sb'a masanto xcami, caw tx'ixwub'al xu scam yin̈ culus. 9Yuxin caw xacoj Comam Dios smay, xa'ni Comam sb'ih, hune' b'ihe ec'b'al yib'an̈ hunujxa tzet b'iheal, 10yun̈e yet ẍhal-lax sb'ih Comam Jesús, ch'ay jahnoj sunil mac ay satcan̈, mac ay sat tx'otx'otx' ti', b'oj mac ayxaaytoj yul tx'otx', 11cat yalni ta Comam Jesucristo, ha' Yahaw yeyi, smayoj Comam Dios Padre. 12Yuxin hex xahan ay wu ti'an, haca' xu he yijyeni yet ayin te xolan, cam yijyewej tinan̈, yet machin te xolan. Awejcoj yin̈ he c'ul cam he lin̈b'an he b'a yin̈ he colb'anil. Chex nanon tet Comam Dios cheyuni, 13haxca ha' Comam ch'a'ni pitzc'aoj yin̈ janma ẍjuni, b'oj ẍcolwa jin̈ yijniapnoj sb'a tzet chal sc'ul. 14Hantaj tzet cheyu te xol, mach'ah heyaw, machca chex pohli cheyuni, 15yun̈e mach he mul, machca he tx'ojal ẍcan yul sat anma. Ehojon̈wejc'oj yin̈ sc'ulch'anil. Haca' yuninal Comam Dios ẍjute co b'a xol anma mach swalil b'ay ayon̈ayoj ti'. Haca' smujli hej tx'umel satyib'an̈k'inal ti' xol k'ejholo, hactu' ẍjutewej pax co b'a, 16haxca ẍjal stzoti' Comam Dios tet anma, hune' tzoti' ch'a'ni k'inal. Ta hactu' he yijyeni, chim wab'e' yocoj tzalalal yin̈ wanmaan yet chuluj Comam Cristo hunecxa, haxca ẍtij yin̈ hin c'ulan ta mat nab'a'oj xquin munla te xolan. 17Waxan̈ca hayin hun chin cam xahanb'alil stz'ajoj tzet cheyalte tet Comam Dios yu heya'ni yuluj he c'ul, chin tzalaan. Xwa' heyohtajn̈ean to chin tzalaan. 18Haquex, hex hun cheyab'e tzalalal win̈ yala'an. A'wej wohtajn̈ean ta chex tzala paxoj. 19Ta ch'el yin̈ sc'ul Jahaw Jesús, ẍwa'atoj ya' Timoteo hex yila' hecal cab'e ti'an, yun̈e yilni ya' hanic' heyecoj, cat yinitij ya' tzoti' wetan, haxin̈wal ch'ak'locan̈ hin c'ulan. 20Haxca mach hunujxa mac haca' ya' ti'. Haca' yecoj wanma teyin̈an, hactu' yepaxcoj yanma ya' teyin̈. 21Haxca hunk'aanxa heb'ya', han̈c'a sc'ulal yet heb'ya' sayc'oj, mataj smunil Comam Jesucristo aycoj yin̈ sc'ul heb'ya' yuni. 22Hexti' heyohtaj hantaj sc'ulal chute sb'a ya' Timoteo, b'oj hantaj ẍcolwa ya' win̈ yalnic'oj stzoti' Comaman, haca' hune' hin c'ahol caw ẍcolwa win̈ ye ya'an. 23Yuxin tan̈e ẍwilan tzet chin tan̈ b'eti'an, cat wanitoj ya'an. 24Haquinan, ẍcawxi hin c'ul yin̈ Comam Jahawan ta lemb'il chin tojna hex wila' paxan. 25Pax ya' juẍtaj Epafrodito ẍwet munla yin̈ smunil Comaman, ya' xeyatij hin ilnoj yun̈e scolwa win̈an, x'oc yin̈ hin c'ul wanipaxtoj ya' hex yilnojan. 26Caw aycoj yin̈ sc'ul ya' smeltzotoj hex yilnoj te hunil, ẍtac sc'ul ya' teyin̈ haxca xax heyab'eloj ta xyab'ilni ya'. 27Yeli xyab'ilni ya', etza xcam ya', yaja' stz'a'can̈ sc'ul Comam Dios yin̈ ya' xcolchacan ya'. Matn̈etaj yin̈ ya', haquin paxan stz'a' sc'ul Comam win̈an, yun̈e macha' Comam yak'b'il b'isc'ulal wila'an. 28Yuxin sunil hin c'ulan ẍwanitoj ya' yin̈ lemb'ilan, yun̈e yak'locan̈ he c'ul heyilni ya' hunecxa, haxin̈wal hayin hun ch'ak'lopaxcan̈ hin c'ulan. 29Chawej ya' yin̈ tzalalal haxca juẍtaj ya' yin̈ Comam Jahaw, caw xahan cheyil ya'. Anma haca' ya' ti', yet aya xahan ch'il-laxi, 30haxca etza xcam ya' yin̈ smunil Comam Cristo. Xacoj sb'a ya' yul sk'ab' camical yu scolwa ya' win̈ te helelojan haxca nahat ay hex.


Copyright
Learn More

will be added

X\