FILIPENSES 1

1Hayin Pablo hin ti'an b'oj ya' Timoteo, schejab'on̈ Comam Cristo Jesúsan, ẍco tz'ib'n̈etoj hune' hum ti' teyetan, hantaj hex yet-xa Comam Dios yin̈ Comam Cristo Jesús, hex ayex yul con̈ob' Filipos, ha'hun heb'ya' anciano b'oj heb'ya' diácono. 2Ya'ab' Comam Dios co Mamwej b'oj Jahaw Jesucristo sc'ulch'anil sc'ul b'oj ak'anc'ulal teyet. 3Huntaj el chex tit yin̈ hin c'ulan, ẍwa' yuch'antioẍ tet Comam Dios heyuan. 4Yet ẍwa'ni woraciónan, yin̈ tzalalal chin k'an sc'ulal Comam teyib'an̈an. 5Haxca yichotax he chani Comam yin̈ heyanma, yehn̈e he colwa win̈ spujb'alaxc'oj tzoti' yet colb'anil ti'an. 6Comam x'ichencoj smunla teyin̈ hex swatx'eniloj, yuxin wohtajan to ẍto cam hex swatx'eloj Comam masanto chuluj Comam Cristo Jesús. 7Yettic'a aya hactu' hex hin nanitij te hunilan, haxca chex wochean, b'oj hex hun chex colwa win̈ yin̈ hin munil xa' Comam wet ti'an. Chex colwa pax win̈an yulb'al ayincoj presuan yun̈e hin colni tzoti' yet colb'anil ti' yin̈ sat heb'naj yahaw con̈ob', b'oj yu hin yeniltojan to st'in̈anil yeyi. 8Yohtaj Comam Dios tato caw ẍwochean ta chex wilan, haca' hex yochen Comam Cristo Jesús. 9Chin k'an tet Comaman ta k'a' ch'ahcan̈ smalil heyochen heb'ya' jetb'i, b'oj cha' heyohtajb'al yun̈e he txumniloj sunil tzetet. 10Ta hactu', chu he sic'len b'aytet k'a' c'ul, yun̈e chu heyehc'oj yin̈ c'ul, mach mac xtxok'ni he sat yet chuluj Comam Cristo. 11Yu scan̈il ye Comam chex ehojc'oj yin̈ stoholal yun̈e' c'ul ẍal-laxoj teyin̈ smayoj Comam Dios. 12Hex wuẍtaj hex wanab', wocheb'alan cheyohtajn̈eloj ta hej sya'tajil ẍwil ti'an, ẍcolwa yin̈ spujb'alaxc'oj tzoti' yet colb'anil. 13Sunil hej soldado naj yahaw, b'oj hunk'aanxa anma ayc'oj b'eti' ohtajn̈e ta ayincoj presuan haxca chejab'in yin̈ Comam Cristoan. 14Haxca ayincoj presuan, tx'ihal heb'ya' jetb'i iptzeb'ilxa sc'ul, matxa xiw spujb'anc'oj stzoti' Comam, haxca ayxacoj scawxob'al sc'ul heb'ya' yin̈ Comam Jahaw. 15Waltu' yeli, ay mac yu schiwa sc'ul win̈an, b'oj ẍpalc'on wib'an̈ yalnian, yuxin ch'ec' yala'c'oj stzoti' Comam Cristo, yaja' ay mac c'ul nab'il yu, yuxin ch'ec' yala'c'oj. 16Ay mac yu hin yochenan ch'ec' halnojc'oj, haxca xtxumu to Comam Dios xquin anicoj b'eti' yu hin colni hune' tzoti' ti'an. 17Heb'naj schiwa sc'ul win̈ tu'an, yun̈e yec' b'ab'on heb'naj yalni, yuxin ch'ec' heb'naj yala'c'oj. Mat c'uluj tzet nab'il yu, ham yalni heb'naj ta cam yanicoj sya'tajil wib'an̈an yulb'al ayincoj presu ti'an. 18Yaja' mach woc yin̈an ta c'ul nab'il yu anma mato machoj, tan̈e ch'ec' yala'c'oj tzet ye Comam Cristo. Yuxin caw chin tzalaan.Hasta k'a' ẍto cam hin tzalaan, 19haxca wohtajan waxan̈ca ch'ec' ya' wanma tinan̈an, c'ul chin elojcojan yu heyoración cheya' win̈an, b'oj yu aycoj Yespíritu Comam Jesucristo wetb'iojan. 20Ha' ti' caw ẍwochean b'oj ẍcawxi hin c'ul yin̈an, ta machin can yin̈ tx'ixwilalan, to haca' xu wanicoj smay Comam Cristo yet x'ec'can tu'an, hactu' wanicoj smay Comam tinan̈ yin̈ hin nimanil ti'an, ta hayinc'ojan mato chin potx'otan. 21Haxca yulb'al itzitz hinan, han̈c'a wanicoj smay Comam Cristo aycoj yin̈ hin c'ulan. Taca chin caman, sc'ulaloj pax wetan. 22Ta yu hin munla smayoj Comaman, chin ehojc'oj hanic'ojxaan, ¿b'amitet k'a' c'ul ch'elicoj wetan? 23Lahanxan̈c'a cab' tzetet ti' ẍwab'ean: Caw ẍwochean ta chin camnaan haxin̈wal chin tona sc'atan̈ Comam Cristoan. 24Yaja' yu sc'ulaloj heyet k'a' c'ul tu' ta chin can te xolan. 25Yu hune' ti', wohtajan to chinto canoj hanic'ojxa munlaoj te xolan, yun̈e cam he lin̈b'an he b'a b'oj cam yoc tzalalal yin̈ heyanma yin̈ b'ay xeya' yuluj he c'ul ti'. 26Waltu', yet ayin te xol hunecxaan, ẍcam heya'a'coj smay Comam Cristo Jesús yin̈ c'ul. 27Han̈c'a ti' chin tak'e teyetan, a'wej yilal heyehc'oj haca' chal tzoti' c'ul yet Comam Cristo. Yuxin ta chin apni hex wila'an, mato machoj, ẍwoche wab'ean ta lin̈anex, b'oj chex munla te hunil yin̈ he yalnic'oj tzoti' c'ul b'ay ẍja' yuluj co c'ul ti'. 28Machca chex xiwcan̈ tet mac ch'a'nicoj howal teyin̈ yu stzoti' Comam. Hune' ti' ch'ocnicoj yu Comam Dios yun̈e syeniloj ta stohxa heb'naj yin̈ c'ayb'eal, walex yin̈ he colb'anil lan̈an he toyi. 29Chon̈ tzalayi haxca yu sc'ulch'anil sc'ul Comam ay joc yin̈ ja'ni yuluj co c'ul yin̈ Comam Cristo, aypax joc yin̈ yec'oj ya' janma syailoj Comam. 30Hexti' b'oj hayinan hun jewejcoj yin̈ hune' howal ti'. Xax heyil yet yalan̈to tzet xu winitij wanma win̈ yin̈ hune' howal b'ay ayincojan. Cheyab'en pax sk'umal to yehn̈e winitij wanma yin̈ hin munlaan.


Copyright
Learn More

will be added

X\