FILIPENSES 1

1Hanin Pablo inti'an yeb juẍta Timoteo, ischejab Comam Jesucristo jehan̈. Chicotz'ibn̈etojan hune' carta ti' teyet hex yetexxa Comam Dios yeb ayexxaco yul isk'ab Comam Jesucristo ay bey con̈ob Filipos, yeb tet ebnaj anciano yeb tet ebnaj diácono. 2Yak'ab Comam Dios Mame yeb xin Comam Jesucristo isc'ulch'anil isc'ul yeb xin ak'anc'ulal teyet. 3Hunta el chextit yul inc'ulan, caw chiwak'an yuch'andiosal tet Comam Dios teyin̈. 4Yet chintxahlihan tet Comam Dios, caw chitzalacano inc'ulan ink'annihan isc'ulal isc'ul Comam teyiban̈ hununex. 5Yuto ha' hunexpaxo chexcolwa hepujbanic'o Tzoti' yet colbanile jintajan̈, yettaxtic'a heyanico heba yul isk'ab Comam Jesucristo masanta tinan̈. 6Caw t'in̈an wehicojan tato haca' yu yichenico Comam Dios ismunil teyin̈, hac tu' chu islahnico quexiswatx'enico yin̈ isc'ulal masanto yet chihul Comam Jesucristo hunelxa. 7Caw yilaltic'a innanihan haca' ti' teyin̈ hesunil, yuto caw xahan ayex wuhan, yeb xin ha' hunex chexcolwa win̈an yin̈ hune' munil ak'bil wetti'an yu Comam, hac tu' xin ha' hunex chechah isc'ulch'anil isc'ul Comam. Chexcolwa win̈an waxan̈ca ayinictojan yul preso maca yet chinocan sata ebnaj yahawil yu incolnihan hune' tzoti' yet colbanile ti' cat walnihan ta caw yeli. 8Caw yohta Comam Dios ta caw xahan ayex wuhan hesunil, hacojtam Comam Jesucristo chexxahann̈eni. 9Caw chink'anpaxojan tet Comam Dios yin̈ intxahan tato caw ec'na xahan cheyil heba hununex yeb ta caw chiyak' Comam hehelanil yeb henabal. 10Yun̈e heyohtan̈en hesaynilo baytet caw c'ul, hac tu' xin caw c'uln̈etic'a tzet chebeybaln̈e, haxinwal machi istx'ojal chiilchalo teyin̈ yet chihul Comam Jesucristo. 11Yeb xin sunil isc'ulal chitit yin̈ Comam Jesucristo ayexico hebeybaln̈eni yun̈e isbina Comam yeb yu yocpaxo ismay Comam. 12Hex wuẍtaj, hex wanab, chiwochehan cheyohtan̈eloj tato huntek'an isya'tajil chiwilti'an chicolwa yin̈ ispujbalaxic'o Tzoti' yet colbanile. 13Caw sunil mac ay yul palacio yeb sunil anma ohtan̈eni ta ayinicojan preso isyayil ischejab Comam Jesucristo wehan. 14Hayet yillaxi ta preso wehan, caw tzetc'a ebnaj juẍta yihti yanma ispujbanilto Tzoti' yet colbanile. Caw matxa chixiw ebnaj yalnic'oj yuto caw yaco ebnaj Comam Dios Jahawil yipo yanma. 15Walca xin yin̈ caw yeli, ay mac chihalni Istzoti' Comam yu chichiwa isc'ul win̈an, cat xin ispalc'on wiban̈an chiyute isnani. Aypaxo xin ebnaj juẍta ti' c'ul tzet nabil yu yuxinto chiyalic'oj. 16- 17Ay mac chihalnic'o Istzoti' Comam Jesucristo yu ay tzet chiyochecoj, mach caw yelo isc'ul chiyalnic'oj, yuto choche yak'aco yak'bil isya'tajil wiban̈an yulbal ayinictijan yul preso ti'. Aypaxo mac xin chalic'o yin̈ sunil yanma, caw xin yohtaj tato ayinicojan preso ti' yu incolnihan Tzoti' yet colbanile yacano Comam Jesucristo coxol. 18Yaja' machi wocan yin̈ ta c'ul nabil yu ebnaj maca mach xin, tan̈e chihallaxic'o Istzoti' Comam Jesucristo; wal xin caw chintzalahan yu chihallaxic'o Istzoti' Comam. Yaj xin caw ec'balto chintzalahan, 19yuto wohtajan tato sunil ti' chicolwa quiniscolnihan, yuto chextxahli win̈an yeb yu iscolwal Yespíritu Comam Jesucristo win̈an. 20Yaja' ha' hune' chiwochehan yeb ayco yin̈ wanmahan, tato mach chincanan yin̈ tx'ixwilal, walxinto ha' intzotelan yin̈ sunil wanmahan haca'tic'a yet yalan̈tocanoj. Waxan̈ca itzitzinan maca chincaman chiwochehan ta chiillax isc'ulal Comam Jesucristo win̈an. 21Yuto yulbal yet itzitzinan, han̈c'an̈e ismunil Comam Cristo ayco yin̈ wanmahan inwatx'enan; taca chincaman xin ec'bal caw c'ul chinelicojan. 22- 23Yuxin tato yet itzitzinan yin̈ inchibehalti'an, chiyu inmunlahan ninoxa yin̈ ismunil Comam Jesucristo, yuxin caw mach wohtajojan baytet wal insaynilojan xol cabeb ti'; yuto ay wala'an tato chincamnahan, cat intohan isc'atan̈ Comam Jesucristo, yuto ec'na c'ul hune' tu'. 24Yaja' xin, caw yilal itzitzinan hanic'oxa yul sat yiban̈k'inal ti' yu inmunlahan texol. 25Caw xin t'in̈an wehan yin̈ ti', tato chi-to-quinheayojan texol yu incolwahan teyin̈ hech'ibi, yeb yun̈e cam heyaben tzalahilal, yu xaheyayto yul heyanma yin̈ Comam. 26Hayet chinapnihan tec'atan̈ hunelxa, cheyak' tzalaho hec'ul yin̈ Comam Jesucristo. 27Hachcachann̈e chiwaltojan teyet tato cheyaco yin̈ hec'ul hebeybaln̈en haca' cuybanile aycano jet yu Comam Jesucristo. Hac tu' xin waxan̈ca chintohan quexintucle'an maca machoj, chiwochehan wabehan hek'umal hesunil tato caw tohol heyehicoj, yeb xin tato caw hun chiyu hemunlahi, yebpaxo xin lahan helahnico hesunil heyanico heyanma yin̈ Tzoti' yet colbanile. 28Yeb xin mach chexxiw tet ebnaj caj chexilni. Hac tu' chiyu isyenilo isba tato chic'aycanto ebnaj tu' yin̈ huneln̈e, yebpaxo xin hac tu' chu heyeniloj tato ayxa hecolbanil yu Comam Dios. 29Yuto isc'ulch'anil isc'ul Comam Jesucristo maẍn̈etaj janico janma yin̈, ha' wal juni, wal xin yilal jak'ni cabo coba jaben isya'tajil yinta Comam. 30Hex ti', hun lahan heyak'ni heyip helin̈ban heba xol isya'tajil haca' inti'an. Caw xaheyila tato caw wak' wanmahan inlin̈ban inbahan xol isya'tajil texol, tinan̈ xin lan̈an heyabeni tato hune'n̈e ha' wak'ni wanmahan xol isya'tajil.

will be added

X\