SAN MATEO 9

1Lawitu' x'octoj Comam Jesús yul te' barco, xmeltzo sk'axepal ha' lago, x'apni yul scon̈ob'. 2Yet ay Comam b'etu', x'iottij hune' naj machu sb'ili snimanil tet Comam. Hilanay naj sat swayb'al. Ha' xilni Comam to caw ẍcawxi sc'ul heb'naj i'n̈e naj tx'oj ye tu' yin̈ Comam, xalni tet naj: —Itij hawanma tawin̈ mamin, xtan̈can ha mul, 3C'uxan ayictoj hunk'aan heb'naj cuywaom yin̈ sley ya' Moisés, chalni heb'naj: Hune' naj ti' slahb'acoj sb'a naj yin̈ Comam Dios. 4Wal Comam xax xtxumna tzet ch'ec' yin̈ sc'ul heb'naj, yuxin xala: —¿Tzet yuxin ch'ab'xal he c'ul win̈an? 5¿B'aytet k'a' sub'utaj jalni cat yijni sb'a yin̈ naj cheyab'e? ¿Tom, Xtan̈can ha mul, ta conchi tet naj, mato Ahan̈ lin̈noj cat ha paxtoj, ta con̈chi? 6Tinan̈ chin yeb' heyila'an, to hayin Ab'ilintij yu Comam Dios xol jet-anmail ti'an, chu wa'nican tan̈oj smul anma ay satyib'an̈k'inal ti'an, Xalni Comam tet naj machu sb'ili snimanil tu': —Ahan̈ lin̈noj, ican̈ ha wayb'al cat ha paxtoj tawatut, 7X'ahna lin̈noj naj, xpaxtoj naj yatut. 8Ha' xilni anma hune' tu' caw xc'ayiloj sc'ul, x'ichi yanicoj smay Comam Dios, haxca caw tx'ihal scan̈il ye Comam xa' tet anma. 9Lawitu' xto Comam Jesús. Ha' x'ec'toj Comam b'ay tz'on̈an hune' naj iomiloj melyu yet tohlab'al, Mateo sb'ih, xalni Comam tet naj: —Ocan̈ tzujnuj win̈an, Ha' xab'en naj hune' tu', x'ahna lin̈noj naj, xto naj yin̈ Comam. 10Yet hunec, tz'on̈an Comam wa'oj b'oj heb'ya' ẍcuywi yin̈ yatut naj Mateo. Tx'ihal heb'naj iomiloj melyu yet tohlab'al x'apni paxoj, b'oj hunk'aanxa heb'naj mat c'uluj yecoj. 11Ha' xilni heb'naj fariseo hune' tu', xalni heb'naj tet heb'ya' ẍcuywi yin̈ Comam: —¿Tzet yuxin ẍwa' he cuywaom ti' xol heb'naj iomiloj melyu yet tohlab'al, b'oj heb'naj mat c'uluj yec'oj? ẍi heb'naj. 12Ha' xab'en Comam hune' tu', xalni tet heb'naj: —K'inaloj ta ay hunuj naj an̈lom tinan̈, ¿tox anma c'ul yeyi, ha' chan̈te' naj xin? Machoj, anma tx'oj ye sc'ul, ha' chan̈te naj. 13Yuxin ẍwal teyetan, saywej heyila' yul Yum Comam Dios tzet chaliloj hune' ti': Wocheb'alan stz'a' he c'ul yin̈ heyet-anmail, matoj han̈c'a heya'ni xahanb'al wetan, ẍiayoj. Mach xquin hul hin saya' anma t'in̈an yecojan, to yu anma xtxumniloj to ahmul, yuxin xquin hulan yun̈e sb'ejnican yanicoj smul, . 14Yet hunec x'apni heb'ya' ẍcuywi yin̈ ya' Juan Bautista sk'amb'e' tet Comam Jesús: —¿Tzet yuxin heb'ya' ẍcuywi tawin̈ ti' macha' heb'ya' ayuno? Walon̈ b'oj heb'naj fariseoan, coc'n̈e xol ẍja' ayunoan. 15Xalni Comam tet heb'ya': —K'inaloj ta ay hunuj k'in̈ yet mohilal, sunil anma awteb'il yin̈ mohilal tu', ¿taxca ch'ocoj yin̈ b'isc'ulal yulb'al aycoj naj ẍmohyi xol anma? Machoj, hato yet ch'apnoj tz'ayical yilaxojiloj naj xol anma, waltu' sje ya'noj anma ayuno. 16Ay hune'xa: Machu yalaxcoj hune' k'ape ac' matto tx'ahb'iloj sb'ujiloj hune' xil k'ape xilxa, haxca yet xtx'ahlaxoj, ẍmoc'oj b'uj tu', cat scam stzilmohojtoj hune' xil k'ape tu'. 17Ay hune'xa: Machu yalaxaytoj vino matto howb'inajoj yul hune' no' xil tz'um tx'uy yeyi, haxca yet ch'inoj vino showal ẍlin̈mooj no' xil tz'um tu', cat yetaxojtoj scamajanil, ha' ye vino, ha' ye no' tz'um. Yuxin han̈c'a no' tz'um ac' b'ay chu yalaxaytoj vino matto howb'inajoj, yun̈e mach ch'etaxtoj scamajanil, ẍi Comam tet heb'ya' ẍcuywi yin̈ ya' Juan. 18Lan̈anto b'in yalni Comam Jesús hunk'aan tu', x'apni hune' ya' swi'al capiya. X'ay jahnoj ya' yin̈ sat Comam, xalni ya': —Mamin, ay hune' ni'an hin cutz'in lan̈anto scamayoj tinan̈an, yaja' ta chach to win̈an cat hawa'nicoj ha k'ab' yib'an̈ ix, chuluj sc'ul ix. 19X'ah lin̈noj Comam xto yin̈ ya', xtopax heb'ya' ẍcuywi yin̈ Comam. 20Xol anma tzujan yin̈ Comam, aycoj hune' ya' comi' tx'oj ye sc'ul. Cab'lan̈eb'xa hab'il mach ẍtuqui xtx'ahwi snimanil ya'. Xhitzicoj ya' sc'atan̈ Comam, stzab'ni ya' sti' xil sk'ap Comam, 21haxca xal ya': Waxan̈ca han̈c'a sti' xil sk'ap Comam chin tzab'an, chin an̈chaojan. 22Ha' xab'en Comam stzab'ot xil sk'ap, xmeltzo t'an̈na yin̈ ya' comi', xalni tet ya': —Itij hawanma tawin̈ miyay, cach an̈chacan tinan̈, haxca ẍcawxi ha c'ul win̈an, Yin̈n̈ena tu' xwatx'ican ya' comi' tu'. 23Yet x'apni Comam yatut ya' swi'al capiya tu', xab'eni to lan̈an yok'tzen heb'naj sonlom te' su', b'oj xayanxan̈e anma yok'i. 24Xalni Comam tet anma: —Elan̈wejtoj b'eti', haxca ix ni'an ti' mat camnajoj ix, to ton̈e ẍway ix, Yaja' ton̈e x'oc heb'jetb'i tzeb'oj yin̈ Comam. 25Lawi schejniltij Comam sunil anma tu', x'octoj yul n̈ah b'ay ayictoj ix ni'an tu', stzab'ni Comam sk'ab' ix, x'ahwanoj ix. 26Sunil soyanil tu' xpujna tzet xu Comam b'etu'. 27Yet x'el Comam Jesús b'etu', x'oc tzujnuj cawan̈ heb'naj machu yilni yin̈ Comam, ch'awi heb'naj, chalni: —Mamin, yic'al ya' rey David, stz'aojab' ha c'ul jin̈an. 28Ha' x'apni Comam x'octoj yul n̈ah, x'ocpaxapnoj heb'naj tu'. Xalni Comam tet heb'naj: —¿Tom ẍcawxi he c'ul ta chu hin colwa teyin̈an? ẍi Comam. —Ho' Mamin, ẍcawxi co c'ulan. 29Yuxin xacoj Comam sk'ab' yin̈ sat heb'naj, xalni Comam: —Haxca cheya' yuluj he c'ul win̈an chex an̈chacanoj, 30Xhajlona sat heb'naj, xa hu yilni heb'naj. Yin̈n̈ena tu' xalni Comam: —Tinan̈ ẍwal teyetan, mach b'ay cheyalic'oj hune' ti', 31Yaja' hanic'hixto ẍto heb'naj, stzab'nicoj heb'naj yalni tet anma tzet xu shajlo sat heb'naj yu Comam. 32Lan̈an ẍmeltzo heb'naj xwatx'ican sb'ak' sat tu', xhul hunk'aanxa heb'naj x'initij hune'xa naj tet Comam Jesús. Machu stzotel naj haxca aycoj hune' yespíritu naj matzwalil yin̈ naj. 33Lawi yiniloj Comam hune' yespíritu tu' yin̈ naj, stzotelcan̈ naj. Caw xc'ayiloj sc'ul anma yet xilni hune' tu'. Xalni heb'jetb'i: —Mach hunecoj ẍjil yuni hunuj tzetet co xol hayon̈ Israel hon̈ ti' haca' hune' lan̈an jilni ti'. 34Yaja' xal heb'naj fariseo: —Hune' naj ti', chu yiniloj hej yespíritu naj matzwalil yin̈ anma yu scan̈il ye naj yahaw yespíritu naj matzwalil, 35Sunil yulaj con̈ob' b'oj wayan̈b'al x'ec' Comam Jesús cuywaoj yul hunun capiya. Spujb'anc'oj tzoti' c'ul yin̈ tzet chu joc yul sk'ab' Comam Dios. Chan̈ten Comam anma yin̈ tzantzet yab'ilal aycoj yin̈, b'oj xcolwa Comam yin̈ mac aycoj sya'tajil yin̈. 36Ha' chilnicoj Comam anma, stz'a'coj sc'ul yin̈, haxca tacnaj sc'ul, mach xtxumcha yu tzet wal yuten sb'a. Haca' no' canelu mach stan̈eomal yet, hactu' yeyi. 37Yuxin xal tet heb'ya' ẍcuywi yin̈: —Hunk'aan anma ti', lahan b'oj ixim trigo lan̈an sk'anb'iloj, caw tx'ihal munil, yaja' haywan̈n̈e munlawom ẍyamb'ancoj ixim. 38Yuxin k'anwej tet Comam Yahaw munil, haxin̈wal chatij Comam yak'b'il munlawom xol anma ti',


Copyright
Learn More

will be added

X\