SAN MATEO 8

1Yet xpaxaytij Comam Jesús swi' hune' won̈an tu', tx'ihal anma x'oc tzujnuj yin̈. 2Hunep tu' x'apni hune' naj aycoj yab'il lepra yin̈ snimanil, sjahb'anay sb'a naj yin̈ sat Comam, xalni naj: —Mamin, ta sje ha c'ul chu hin hawan̈tenan. 3Xanicoj Comam sk'ab' yin̈ naj, xalni Comam tet naj: —Ho', sje hin c'ulan, chach an̈chacanoj, Lemb'il xc'aynacan̈ lepra yin̈ snimanil naj. 4Xalni Comam tet naj: —Mach mac tet chawal hune' ti', ha' chawute chach to ha yeb' ha b'a tet ya' sacerdote cat hawa'ni hawofrenda tet Comam Dios haca' tz'ib'n̈eb'ilcan yul sley ya' Moisés, yun̈e syeniloj sb'a to cach an̈chacanoj. 5Ha' x'apni Comam Jesús yul con̈ob' Capernaum, x'apni hune' naj capitán romano yila' Comam, sk'anni naj ta chan̈te Comam hune' schejab' naj. 6Xalni naj: —Mamin, ay hune' naj hin chejab' caw tx'oj ye sc'ulan, mach ẍb'ili snimanil naj, ha' ẍlow yab'il yin̈ naj, caw ch'ec' ya' yanma naj. 7Xalni Comam: —Chin toj wan̈te' naj chaltu'an, 8Xalni naj capitán tu' tet Comam: —Mamin, mat yetoj aya chach apni watutan haxca comon anman̈e hinan. Hatcachan ton̈e chawala cat yan̈cha hin chejab' tu'an. 9Wohtaj pax hune' tu'an haxca ayincoj yalan̈ schejb'anil heb'naj swi'al yecoj win̈an, ay pax heb'naj soldado aycoj yalan̈ hin chejb'anilan. Ta ẍwal tet hunuj najan: Asi' b'etu', ta quin chian, ẍto naj. Cat b'eti', ta quin chian, ẍtit naj. Ta ẍwal tet naj hin chejab'an ta chu naj hunuj tzetet, lemb'il ch'oc naj yub'. Hajxam hach, ta chawal hunuj tzetet, chij sb'a. 10Ha' xab'en Comam, xc'ayiloj sc'ul, xalni tet anma tzujan yin̈: —Yin̈ caw yeli ẍwal teyetan, xol jetcon̈ob' Israel maẍto b'ay ẍwil hunuj mac cha' yuluj sc'ul win̈ haca' hune' naj nan con̈ob'al ti'an. 11Yuxin ẍwalan, nanann̈e b'ay ẍca stijcoj anma haca' naj ti' ẍyamojcoj b'oj ya' Abraham, ya' Isaac b'oj ya' Jacob yin̈ meẍa wa'oj b'ay aycoj Comam Dios Yahawoj. 12Yaja' jetcon̈ob' Israel yet ay yoc hoynoj yin̈ hune' meẍa tu' yalni, ẍcanoj yin̈tajiloj xol sk'ejalholo. Ha' b'etu' ch'ok'oj, cat yec'oj ya' yanma yu sya'il, ẍi Comam tet anma. 13Lawitu' xalni Comam tet naj capitán tu': —Meltzoan̈ tawatut. Haca' scawxi ha c'ul win̈ ti'an, hactu' chu ya'lax tawet b'aytet chal ha c'ul, Lan̈antic'a tu' xwatx'inaloj sc'ul naj schejab' naj capitán tu'. 14Lawitu' xto Comam Jesús yatut ya' Pedro. Yet x'apni Comam, xilni to hilan ya' smi' yixal ya' yu hune' yab'il nab'a' k'a'. 15Ha' stzab'ni Comam sk'ab' ya' comi' tu', ha'matajn̈e x'el k'a' yin̈ ya'. X'ahwanoj ya', x'oc ya' swatx'enoj tzet slo Comam. 16Yet lan̈anxa yayoj numnayi, tx'ihal mac ch'etaot yu yespíritu naj matzwalil x'iottij tet Comam Jesús. Hune'n̈e tzoti' chal Comam cat yel yespíritu naj matzwalil tu' yin̈ anma. Xan̈tenpax Comam mac comon yab'iln̈e aycoj yin̈. 17Hactu' xu yijni sb'a tzet tz'ib'n̈eb'il yu ya' Isaías, schejab'lom Comam Dios, chalni ya': Ha' caw x'i'ni sya'il ayon̈, xi'ni pax hej yab'il aycoj jin̈. 18Ha' xilni Comam Jesús to tx'ihal mac hoyancoj yin̈, xalni tet heb'ya' ẍcuywi yin̈: —Ton̈wej sk'axepal ha' lago, 19Yaja' yalan̈to maẍto ẍto Comam b'oj heb'ya', xalni hune' naj cuywaom yin̈ sley ya' Moisés tet Comam: —Mam Cuywaom, tzan b'ay chach toyi, tzujanin tawin̈an. 20Xalni Comam tet naj: —No' wech ay sch'en no' b'ay aya, pax no' ch'ic ay sk'u' no' b'ay aya, yaja' Hayin Ab'ilintij yu Comam Dios xol jet-anmail ti'an, mach watut b'ay chin xewan, 21Xalni hune'xa ya' ẍcuywi yin̈ Comam: —Mamin, ẍto hin muju'can hin mam b'ab'elan, cat to wocoj tzujnuj tawin̈an. 22Yaja' xal Comam tet ya': —Hatcachan, ton̈ win̈an. Mac camomto ye yul sat Comam Dios, ha' yet ay smujni mac ẍcami, . 23Lawitu' x'octoj Comam Jesús yul hune' te' barco b'oj heb'ya' ẍcuywi yin̈, xto b'oj heb'ya'. 24Yaja' yet lan̈an yec'toj b'oj heb'ya' yul ha', xtit hune' niman cak'e' caw how ya'ni. Etza ẍmujitoj te' barco yu ha', wal Comam wayoj chu yul te' barco. 25Yuxin x'oc heb'ya' spitzc'a' Comam, xalni heb'ya' tet: —Mamin, colon̈iloj, haxca lan̈an co to yich ha' . 26—¿Tzet yuxin chex xiwi? Caw mach ẍcawxi he c'ul yin̈ Comam Dios, Lawitu' x'ah lin̈noj, x'oc scachnoj cak'e' b'oj ha' ha' tu'. Hactu' xu spax tz'inna cak'e' b'oj ha' ha'. 27Caw ẍc'ay sc'ul heb'ya', chalni tet hunun: —¿Tzet yelapnoj ye hune' ya' ti'? Somanta cak'e' b'oj ha' ha' ẍyijyen tzet chal ya'. 28Yet x'apni Comam Jesús b'oj heb'ya' ẍcuywi yin̈ sk'axepal ha' lago b'et hune' lugar Gadara sb'ih, x'apni cawan̈ heb'naj aycoj yespíritu naj matzwalil yin̈ schanoj Comam, speto heb'naj yul camposanto. Heb'naj tu' caw ch'eltij lemna heb'naj yin̈ anma, yuxin mach mac ch'ec' yul hune' b'eh b'ay ay heb'naj tu'. 29X'awican̈ heb'naj, xalni heb'naj yin̈ ip tet Comam: —Jesús, Sc'ahol Dios, ¿tzet hawoc jin̈an? ¿Mato chach hul hon̈ haweta'toj yalan̈to maẍto ch'apni co tz'ayican?. 30Scawilal tu', caw tx'ihal no' txitam ẍtan̈eot. 31Yuxin sk'an yespíritu naj matzwalil tu' tet Comam, chalni yin̈ hacti': —Mamin, ta chon̈ hawiloj yin̈ heb'naj ti'an, ay hunk'aan no' txitam b'etu' la, hat chon̈ hawatojan. 32—C'ultic'a. Aswej yin̈ no', Hactu' xu yel yespíritu naj matzwalil tu' yin̈ heb'naj cawan̈ tu', yin̈xa no' txitam xb'ey ya'acoj sb'a. Man̈e'oc yespíritu naj matzwalil tu' yin̈ no', x'ah b'ulna no', xto no' sb'ejnojaytoj sb'a sti' spahawil ha' lago tu', xcam no' yul ha'. 33Caw xiwcan̈ heb'naj ẍtan̈en no', x'el heb'naj. Ha' x'apni heb'naj yul con̈ob', xalni heb'naj tet anma tzet xu no' txitam b'oj tzet xa'le heb'naj aycoj yespíritu naj matzwalil tu' yin̈. 34Yuxin sunil anma ay yul con̈ob' tu' xto ilnoj Comam. Yet x'apni sc'atan̈ Comam, sk'anni ta ch'el Comam b'etu'.


Copyright
Learn More

will be added

X\