SAN MATEO 7

1Yalnipaxo Comam Jesús: —Mach comono chexoc heyila' tzet ye hunu heyet anmahil, ha' xin wal mach chiocpaxo Comam Dios yila' tzet heyehi. 2Yuto haca'tic'a chu heyilni tzet ye heyet anmahil, hac tu' chu quexyilnipaxo Comam. Wal xin haca'tic'a hemal cheyacoj yet cheyilni tzet yeco hunu heyet anmahil, ha'tic'a xin chexmalenpaxo yu Comam. 3K'inalo tato ay hunu hawuẍtaj ayicto isk'al te' ch'im yul isbak'sat, wal hachpaxo xin patzab te' aypaxicto yul isbak' hasat. Ta mach chawilti te' patzab ayicto yul isbak' hasat tu', ¿hatoc'anab nich'an isk'alemal te' ch'im ayicto yul isbak'sat hawuẍta tu' chu hawiniltij? ¡Machoj! 4¿Mataxca xin chu hawalni tet heyuẍta tu' haca' ti': “Wuẍtaj, wik'altijan hune' isk'al te' ch'im ayicto yul isbak' hasat,” ta cachi? Wal hachpaxo xin k'atanicto hune' te' patzab yul isbak' hasat. 5Tato hac tu' hawalni, ¡lek'ti'ach! Wal xin icanilti te' patzab ayicto yul isbak' hasat babel, lahwi tu' cat hawinilti isk'al te' ch'im ayicto yul isbak'sat hawuẍtaj. 6Istzoti' Comam Dios lahan yeb huntek'an ch'en ch'en perla isbi, caw ay istohol. Yuxin mach chu jak'ni Istzoti' Comam tet hunu mac machi yelapno Comam yul sat, yuto lahan yeb metx tx'i' caw how, chitit lemna jin̈. Aypaxo mac haca' no' txitam, ton̈e chioc isxan̈a'to tzet ch'ak'lax tet, ẍi Comam. 7Yalnipaxo Comam Jesús: —K'anwe tet Comam Dios cat yak'ni Comam teyet, saywej cat yilcha heyu, elojabico heyaw sat pulta cat ishajlax teyet. 8Yuto ha' mac chik'anni chischah, ha' mac chisayni chiilcha yu. Ha' mac chielico yaw sat pulta chihajlax tet. 9K'inalo tato chisk'an heyuninal tzet chislo teyet, ¿tom cheyak' hunu ch'en ch'en tet? 10Maca tato chisk'an hunu no' cay isc'uxu', ¿tom cheyak' hunu no' laba tet? 11Yaja' waxan̈ca caw tx'ojex heyohta heyak'ni isc'ulal tet heyuninal, hajxam xin Comam Dios ay yul satcan̈, ¿tom mach ch'ak' isc'ulal teyet, ta chek'ana? 12Ta cheyoche c'ul chute isc'ul anma teyin̈, hex babel c'ul cheyute hec'ul yin̈ anma tu', yuto hac tu' yalni yin̈ ley yeb yin̈ tzet tz'ibn̈ebilcano yu ebnaj ischejab Comam Dios yet payat, ẍi Comam. 13Yalnipaxo Comam Jesús: —Wal ispultahil satcan̈ bay ay Comam Dios, lahan haca' hunu pulta nich'anch'an sat, ha' tu' xin chexoctoj. Yuto hune' pulta yeb hune' beh caw nimajal sat, yul cambal chitohi. Caw xin niman anma chito yul hune' pulta yeb hune' beh tu'. 14Wal hune' pulta yeb hune' beh nich'anch'an sat xin chon̈yito bay ay k'inale mach istan̈bal, yaja' haywan̈n̈e mac chiocto yul hune' pulta tu', ẍi Comam. 15Yalnipaxo Comam Jesús: —Caw cheyil heba tet ebnaj lek'ti'wom chisbalico isba ischejabo Comam Dios, yuto hayet chitzotel ebnaj teyet, caw c'ulch'an chute isc'ul ebnaj haca' no' me', yaja' wal yanma ebnaj xin lahan haca' no' oj chon̈c'uxnitoj. 16Ixtan̈ hetxumilo tzet nabil yu ebnaj yuto ha' tzet chiswatx'e ebnaj chihalniloj. K'inalo te' uva tinan̈, ¿tom chak' te' sat te' tx'ix? Maca te' higo, ¿tom satpaxo te' tx'ix chak' te'? ¡Machoj! 17Wal xin te' satnom te' c'ul, c'ul sat te' chak'a. Yaja' wal te' mach c'uluj xin machiswalil sat te' chak'a. 18Te' satnom te' c'ul, ¿tom machiswalil sat te' chak'a? ¡Machoj! Yeb te te' machiswalil, ¿tom c'ul sat te' chak'a? ¡Machoj! 19- 20Yuxin ebnaj chal isba ischejabo Comam Dios, yin̈ tzet chiswatx'e ebnaj ha' yin̈ chetxumiloj tzet nabil yu ebnaj. Haca' chu istzoc'laxcan̈ te te' mach c'ulo sat chak'a, chilahwi tu' xin cat isn̈uslaxto te' xol k'a k'a', hac tu' chiutelax huntek'an ebnaj tu', ẍi Comam. 21Yalnipaxo Comam Jesús: —Mach sunilo mac chihalni: “Mamin, Mamin,” win̈an, chioc yul isk'ab Comam Dios, wal xin han̈e mac chiyijen tzet chal Inmaman ay yul satcan̈. 22Hayet chiapni islahobal tz'ayic hantan̈e mac chihalni haca' ti': “Mamin, Mamin, han̈on̈ti'an̈ con̈ec'an̈ jala'an̈ hatzoti' tet anma. Jinipaxilojan̈ ischejab naj matzwalil yin̈ anma yin̈ habi, yeb xin tx'i'al c'aybalc'ule coyehan̈ tet anma,” ẍi anma yin̈ hune' tz'ayic tu'. 23Yaja' chintak'wihan tet haca' ti': “Mach quexwohtajojan, hitzan̈welo yin̈ insatan. Hex ti' istx'ojaln̈etic'a hewatx'e,” quinchin̈etic'ahan, ẍi Comam. 24Yalnipaxo Comam Jesús: —Mac chiaben Intzoti'an cat isyijeni, lahan yeb hune' naj caw ay yitz'atil iswi', yuto hayet yanican̈ naj yatut, yiban̈ ch'en ch'en yayto naj isxe'al te'. 25Lahwi tu' xin istit hune' niman jak'ek' n̈ab, isnohcan̈ ha ha', ismak'nico isba ha' yin̈ te' n̈a tu', yaja' xin mach ayc'ay te', yuto caw c'ul yehayto xe' te' yiban̈ ch'en ch'en. 26Yaja' wal mac chiaben Intzoti'an, machi xin chisyije tzet chala, lahan yeb hune' naj mach isnabal, yiban̈ arena yayo xe' yatut. 27Lahwi tu', yak'ni hune' niman jak'ek' n̈ab, isch'ibcan̈ ha ha', ismak'nico isba ha' yin̈ te' yayc'ay te', yuchc'acanto te', ẍi Comam. 28Hayet lahwi istzotel Comam Jesús tu' xin, caw sunil anma c'aycanocan̈ isc'ul yaben iscuywa Comam, 29yu caw ay yip Comam iscuywahi, mach haca'o chu iscuywa ebnaj cuywawom yin̈ isley naj Moisés.

will be added

X\