SAN MATEO 7

1Mach ton̈c'a cheyi'coj heyetoj yin̈ anma, haxin̈wal mach chiatij Comam Dios cuenta teyin̈. 2Haxca haca' heyi'nicoj heyetoj yin̈ anma, hactu' yinojtij Comam scuenta teyin̈. Hatic'a mal cheyacoj che malen tzet ye hunuj heyetb'i, hactu' smalenoj Comam heyet. 3K'inaloj ay hunuj heyetb'i ayictoj hune' ni'an k'alem yul sb'ak' sat, hexti' xin, c'atan̈ictoj hune' patzab' yul sb'ak' he sat, hatoc'anab' ni'an k'alem chu heyilnictoj yul sb'ak' sat heyetb'i tu'. 4Ta c'atan̈ictoj hune' te' patzab' yul sb'ak' e sat tu', ¿tzettaxca chu heyalni tet heyet-anmail ta cheyiltij ni'an k'alem ayictoj yul sb'ak' sat? 5Ta hactu' heyalni, man̈ tx'ixwilex mi. Iwejiltij te' patzab' c'atan̈ictoj yul sb'ak' he sat b'ab'el, haxin̈wal chu heyilni yin̈ c'ul. Wal tu' chu heyiniltij ni'an k'alem ayictoj yul sb'ak' sat heyet-anmail tu'. 6Ha' tzetet yet Comam lahan ye b'oj ch'en perla. Yuxin machu ja'ni tet anma mach Dios sat, haxca lahan hunk'aan anma tu' b'oj metx'i' matz k'ahul yoc lemna jin̈ cat hon̈ xtx'ani. Ay pax mac lahan b'oj no' txitam ton̈e xan̈cantoj tzetet c'ul ẍja' tet. 7K'anwej tet Comam Dios, ẍtic'a ya'a' Comam teyet. Saywej, ẍtic'a chaloj heyu. Awan̈wej sti' pulta cat shajlaxoj te' teyet. 8Haxca mac ẍk'anni, ch'a'laxoj tet, mac saynic'oj, ẍchalooj yu, mac ch'awictoj sti' pulta, ẍhajlaxoj te' tet. 9Yet sk'anni heyuninal yita teyet, ¿tox hune' ch'en cheya' tet? 10B'oj ta cay no' sk'an teyet, ¿tox hune' no' lab'ah cheya' tet? 11Hexti' cheya' hej tzetet c'ul tet heyuninal, yaja' mayu echemex, hajxam he Mam ay yul satcan̈, ¿tox macha'a' tzetet c'ul teyet ta che k'ana? 12Ta cheyoche ta c'ul chu anma teyin̈, c'ul cheyute pax he b'a yin̈ anma chal tu', haxca hactu' ye co chejb'anil yu sley ya' Moisés, b'oj yu heb'ya' schejab'lom Comam Dios. 13Spultail satcan̈ b'ay ay Comam Dios lahan b'oj hune' pulta lot'an. Hat chex octoj, haxca yul pulta b'oj b'eh nimejal sat mat ya'tajoj co to yul, yaja' yul camb'al ch'apni, caw tx'ihal mac ẍto b'etu'. 14Wal pulta b'oj b'eh lot'an sat, caw ya'taj co b'elwi yul, yaja' chon̈ yitoj b'ay ay k'inal mach stan̈b'al, haywan̈n̈e mac ch'ocojtoj yul. 15Nann̈e heyu tet heb'naj chal sb'a schejab'lomoj Comam Dios yet stzotel teyet. C'ulch'an chute sb'a heb'naj haca' no' canelu, yaja' yanma heb'naj lahan b'oj no' oj chon̈ c'uxnitoj. 16Che txumu' tzet ib'il yu yanma heb'naj yu hej tzet chu, haca' co txumni te' satnom te' yu sat. ¿Tox ch'uxlax te' uva yin̈ te' k'antx'ix? ¿Toxca ch'uxlax te' higo yin̈ te' comon tx'ix? 17Te' satnom te' c'ul, c'ul sat te' cha'a. Te' mat c'uluj, mach swalil sat te' cha'a. 18Te' satnom te' c'ul, ¿tox mach swalil sat te' cha'a? Te' satnom te' mach swalil, ¿tox c'ul sat te' cha'a? 19Te' te' mat c'uluj sat cha'a, stzoc'laxc'oj te' cat sn̈uslaxtoj te' yul k'a'. 20Hactu' heb'naj chal sb'a schejab'lomoj Comam Dios, yu tzet chu heb'naj che txumu' tzet ib'il yu yanma heb'naj. 21Ay mac ẍhalni Mam Wahaw win̈an, yaja' mat suniloj anma tu' ch'ocoj yul sk'ab' Comam Dios. To han̈c'a mac ẍyijyen b'aytet chal sc'ul hin Mam ay satcan̈an, ha' ch'ocoj yul sk'ab' Comam. 22Yet ch'apnoj slahub'al tz'ayic, tx'ihal mac ẍhalnoj: Mam Wahaw, xcon̈ ec' hach jalac'oj tet anmaan, yu scan̈il hawe ẍjalan ch'el hunk'aan yespíritu naj matzwalil yin̈ anma, hatic'a scan̈il hawe xjuan tx'ihal c'ayb'alc'ule xco yean, ẍinaoj. 23Ha' ẍwala' tet heb'jetb'ian: Maẍtic'a quex wohtajn̈ean. Hitzan̈wejiloj yin̈ hin satan hex tx'ojaln̈e xeyu ti', quin chinaojan. 24Mac lawi yab'en hin tzoti'an cat syijyeni, lahan b'oj anma caw tz'ajan sc'ul. Xacan̈ yatut, caw c'ul xuteayoj xe' yib'an̈ ch'en ch'en. 25Ha' x'oc yip ha' n̈ab' xch'ib'can̈ ha' ha', xtit cak'e'n̈ab' xhul pok'na yin̈ te' n̈ah tu', mach x'ec' wejna te' haxca c'ul yeyoj xe' te' yib'an̈ ch'en ch'en. 26Yaja' anma ch'ab'en hin tzoti' ti'an, mach syijye, lahan b'oj hune' naj ton̈c'a xayoj xe' yatut b'ay nab'a' tx'otx'. 27Lawi yah te' x'oc yip ha' n̈ab', xch'ib'can̈ hej ha' ha', xtit niman cak'e'n̈ab' xhul pok'na yin̈ te', b'eh xu yec' wejna te', caw tx'ihal huchan x'oqui, ẍi Comam Jesús. 28Lawi stan̈can stzotel Comam, sunil anma xc'ay sc'ul yab'eni, 29haxca caw ay smay scuywa Comam, mat haca'oj scuywa heb'naj cuywaom yin̈ sley ya' Moisés.


Copyright
Learn More

will be added

X\