SAN MATEO 6

1Yin̈ sc'ulal che watx'e, matn̈e yin̈oj sat anma cheyu, haxca ta machoj, mach spaj cha'a' co Mam ay yul satcan̈ teyet. 2Yuxin yet chex colwa yin̈ anma, mache pujb'ac'oj haca' chute anma chal sb'a c'ulal, cha'ni yofrenda yulaj capiya b'oj yul calle yun̈e yal-lax c'ulal yu anma, yuxin hactu' chute. Yin̈ caw yeli, xax schana hunk'aan tu' spaj yin̈ hactu'. 3Yet cheya'ni heyofrenda, macheyal tet anma ni tet hunuj caw heyamigo, 4to ewantaj cheya'a, haxin̈wal ha' he Mam t'an̈an teyin̈ yin̈ ewan, ha' ch'a'noj spaj teyet. 5Yet che ya'ni heyoración, macheyute haca' chute anma chal sb'a c'ulal. Choche hunk'aan tu' ta lin̈an cha'ni yoración yulaj capiya b'oj yin̈laj yesquinail calle yun̈e yal-lax c'ulal yu anma. Yin̈ caw yeli ẍwalan, ta ha' hunk'aan tu' xax schana spaj. 6Wal hex, yet che ya'ni heyoración, ocan̈wejtoj yul heyatut cat he peb'an n̈ah teyin̈, cat heya'ni heyoración tet co Mam ewan ye te c'atan̈ yul n̈ah tu'. Yin̈ hactu', ha' co Mam ch'ilni tzet cheyu yin̈ ewan, ha' ch'a'noj spaj teyet. 7Yet che ya'ni heyoración, machex oc he cayec'n̈e tzoti' matzet chaliloj, haca' chute anma mat ohtajn̈eoj Comam Dios, chalni ta yu nimej tx'an̈ tzoti' chala, chab'e' Comam. 8Macheyute hactu', haxca wal co Mam yohtajxa tzet chex mahlani yalan̈to maẍto che k'ana. 9Yuxin yet che ya'ni heyoración, hacti' cheyute heyalni, la: Hach Comam hach co Diosan, ayach satcan̈, xahann̈elaxojab' ha b'ih. 10Hulan̈ Jahawojan. Yijyelaxojab' tzet chawal sat tx'otx'otx' ti' haca' syijyelax yul satcan̈. 11Ẍco k'an tawetan ta chawa' tzet ẍco lo tinan̈an. 12Tan̈tzecan co mulan, haxca hayon̈ ti'an ẍja' pax nimanc'ulal yin̈ mac tx'oj chu jin̈an. 13Machon̈ ha cha ayoj yin̈ ilweb'alan, to chon̈ ha col tet naj matzwalilan, quex chi. 14Ta che ya' nimanc'ulal yin̈ mac ch'uni tx'oj teyin̈, hactu' co Mam ay yul satcan̈ stan̈tzecan he mul cheyacoj tu'. 15Yaja' ta macheya' nimanc'ulal yin̈ mac tx'oj chu teyin̈, hactu' he Mam, mach stan̈tzecan he mul tu'. 16Yet cheya'ni ayuno, mat b'isc'ulalojtajn̈e cheyute he sat haca' chute anma chal sb'a c'ulal, haxca hunk'aan tu' caw b'isc'ulaltajn̈e chute sat yun̈e yilni anma to lan̈an ya'ni ayuno. Yin̈ caw yeli ẍwal teyetan, hunk'aan tu' xax schana spaj tet anma yin̈ haca' chute tu'. 17Wal hex yet cheya'ni ayuno, tx'ahwej he sat cat he xinitoj xil he wi', 18yun̈e mach xtxum anma to lan̈an heya'ni ayuno. Han̈c'a co Mam ewan ye te c'atan̈, ha' ohtajn̈e, ha' ch'a'noj spaj teyet yin̈ sat anma. 19Mache yamb'a he k'alomal sat tx'otx'otx' ti' b'ay chu yoc nok', mato ẍc'uxmayi b'oj chu yul elk'om yin̈. 20Ha' heyet to yul satcan̈ che yamb'a he k'alomal, b'ay machu yoc nok', b'oj mach ẍc'uxmayi, b'oj mach elk'om ch'apni yin̈, 21haxca ha' b'ay ay he k'alomal hat ay heyanma. 22Sb'ak' co sat smujlub'al co nimanil yeyi. Ta c'ul chil sb'ak' he sat, caw aycoj sajilk'inal teyin̈ chaltu', 23yaja' ta xtx'ojal chil sb'ak' he sat, sk'ejalholo mi ay teyin̈. Ta seleloj sajilk'inal, sk'ejalholo cha' sb'ak' he sat teyet, yin̈ caw yeli hantam sk'ejalholo ye heyanma. 24Machu he yijyen tet cawan̈ yahaw munil, haxca chim heyoche hune' naj cat he yahni hunxa naj. Ha' chaliloj che yijye tzet chal naj b'ab'el cat he man̈c'on tzet chal naj scab'. Hactu' ye ti', machu he yijyen tzet chal Comam Dios, ta k'a' aycoj heyanma yin̈ k'alomal. 25Yuxin ẍwal teyetan: Macheyacoj yin̈ he c'ul tzet chu yec'oj heyu, tzet che lob' tinan̈ b'oj hecal, b'oj tzet chub' yocoj xil he k'ap. Ta cha' Comam Dios he k'inal, ¿tox macha'a' Comam tzet cheyila? Ta cha' Comam he nimanil, ¿tox macha'a' Comam xil he k'ap? 26Iwejiloj heyet yin̈ no' ch'ic. Mach stz'un no' yawal, machca ẍhatx'wi no', mach sc'un̈a no' swatx'e b'ay cha' yixim, yaja' lotzeb'il no' yu he Mam ay satcan̈. ¿Tox mat k'a' yilaloj heye sataj no'? 27¿Mac hunuj hex tinan̈, waxan̈ca caw cheyacoj yin̈ he c'ul, tom chu heyak'b'iln̈en hayeb'ojxa ora he k'inal? 28B'oj yu xil he k'ap, ¿tzet yuxin cheyacoj yin̈ he c'ul? Iwejiloj heyet yin̈ te hak'b'al ẍch'ib' xolaj telaj. Sak'al sch'ib' te'. Mach munla te', machca schem te' xil sk'ap. 29Yaja' ẍwal teyetan, caw lolo' xu sk'aptzen sb'a ya' rey Salomón, yaja' mach hunuj xil sk'ap ya' xacoj haca' sc'ulch'anil jilni te'. 30Sak'al jilni xumac te' tinan̈, yaja' hecal cab'e, ẍtajojiloj te' cat sn̈uslaxojtoj te'. Waxan̈ca hactu', ẍtic'a ya' Comam Dios yelti'ch'anil te'. Hajxam hex ¿tox macha'a' Comam xil he k'ap? Yaja' hexti' caw mach ẍcawxi he c'ul yin̈ Comam Dios. 31Yuxin mache tx'inb'acoj yin̈ he c'ul cheyalni: ¿B'ay ẍtij tzet ẍco lo, b'oj tzet chu yocoj xil co k'ap? mat quex chioj. 32Anma mat ohtajn̈eoj Comam Dios ch'anicoj hunk'aan tzetet tu' yin̈ sc'ul. Wal hex ayexcoj yin̈ sc'ul Comam Dios ay satcan̈, yohtaj Comam to ch'ocnicoj hunk'aan tzetet ti' heyu. 33Yuxin hej tzetet yet Comam Jahaw b'oj tzet choche Comam cheyacoj yin̈ he c'ul, wal tzetet ch'ocnicoj heyu tinan̈, xatic'a' ya'a' Comam teyet. 34Yuxin mache tx'inb'acoj yin̈ he c'ul tzet chu yec'oj heyu hecal, haxca yet hecal nanto cheya'a'coj yin̈ he c'ul tzet chub'. C'ojb'ilna hune' tz'ayic ti'.


Copyright
Learn More

will be added

X\