SAN MATEO 6

1Yalni Comam Jesús: —Caw nann̈e heyu yin̈ tzet chewatx'e, machn̈ehojab yin̈ sat anma c'ul cheyute heba, yuto ta yun̈e heyillaxi yuxin chewatx'e isc'ulal, mach chechah ispaj selel tet Comam Dios ay yul satcan̈. 2Yuxin yet chexcolwa yin̈ hunu meba', mach chepujbac'o haca' chute ebnaj chal isba c'ulal. Ebnaj tu' ch'ak' ebnaj issabehal yulaj capilla yeb yulaj calle, yun̈e yallax ebnaj c'ulal. Yin̈ caw yeli chiwalan teyet, yet chihallax c'ulla tzoti' yin̈ ebnaj tu' lan̈an ischahnina ebnaj ispaj selel. 3Wal hex ti' xin, hayet chexcolwa yin̈ anma meba' machi mac tet cheyala, nitam tet hunu heyamigo. 4Wal xin yin̈ ewantajil cheyak' tet, haxinwal Comam ay yul satcan̈ chiilni tzet chawatx'e yin̈ ewantajil, cat yak'ni Comam ispaj selel teyet, ẍi Comam. 5Yalnipaxo Comam Jesús: —Hayet chextxahli tet Comam Dios, mach cheyute haca' chute ebnaj chal isba c'ulal. Ha' ebnaj tu' yun̈e yillax ebnaj yu anma, yuxin ton̈etic'a choche islin̈ba isba istxahli yulaj iscapilla ebnaj Israel, yebpaxo yin̈la istxiquin txon̈bal. Yin̈ caw yeli chiwalan teyet, yet chitxahli ebnaj haca' tu' chischahnina ebnaj ispaj selel tet anma. 6Walex hex ti', mach cheyute haca' tu'. Wal xin hayet chextxahli, chexocto yul heyatut cat hepeban ispultahil te', cat hetxahli tet Comam Dios, Comam chiaben tzet cheyala. Chil Comam sunil tzet cheyu yin̈ ewantajil cat yak'ni Comam ispaj selel teyet. 7Hayet chextxahli, machojab chexoc hecayen̈e tzoti' matzet chaliloj haca' chute anma maẍto ohtan̈eho Comam Dios. Yuto chistxum ebnaj ta yu caw nimej chute ebnaj yoj istxah, caw chabe Comam Dios tzet chal ebnaj yalni. 8Wal xin mach cheyute haca' tu', yuto Comam Dios yohtaxa tzet chiocnico heyu yalan̈to yet maẍto chek'an tet Comam. 9Hayet chextxahli, hac ti' cheyute heyalni haca' ti': Hach Comam, hach coDios, ayach yul satcan̈, nimanojab yelapno habi yul sat anma. 10Hulan̈ cat hawoc jahawilojan̈ yul sat yiban̈k'inal ti'. Yijab isba tzet chawoche sat tx'o tx'otx' ti' haca' chu yijni isba yul satcan̈. 11Mamin, chicok'anan̈ tawet, ak' tzet chicolohan̈ hunun tz'ayic. 12Ak' nimanc'ulal yin̈ istx'ojal chicowatx'ehan̈, haca' chu jak'ni nimanc'ulalan̈ yin̈ anma chiwatx'en istx'ojal jin̈an̈. 13Mach chon̈hachayojan̈ xol ilwebal, caw colon̈ilojan̈ yul isk'ab naj matzwalil, quexchi yin̈ hetxah, ẍi Comam. 14Yalnipaxo Comam: —Ta cheyak' nimanc'ulal yin̈ anma chiwatx'en istx'ojal teyin̈, ha' Comam Dios ay yul satcan̈ ch'ak'nipaxo nimanc'ulal teyin̈. 15Yaj ta mach cheyak' nimanc'ulal yin̈ heyet anmahil chiwatx'en istx'ojal teyin̈, mach chak'paxo nimanc'ulal Comam Dios teyin̈, ẍi Comam. 16Lahwi tu' yalnipaxo Comam Jesús: —Hayet mach chexwa' yu hetxahli tet Comam Dios, mach bisc'ulalo cheyute hesat haca' chute ebnaj chal isba c'ulal, yuto ebnaj tu' caw bisc'ulal chute ebnaj sat yun̈e yillax ebnaj yu anma tato ayco ebnaj yin̈ yet mach chon̈wahi yu cotxahli tet Comam Dios. Yin̈ caw yeli chiwalan teyet chischahna ebnaj ispaj selel yet chiillax ebnaj yu anma tu'. 17Walex ti' xin, yet mach chexwa' yu hetxahli tet Comam Dios, chetx'ahwe hesat cat hexínito xil hewi', 18yun̈e mach chalilo isba tato ayexico yin̈ yet mach chexwa' yu hetxahli tet Comam Dios. Wal xin han̈c'an̈e Comam ewan yehi, ha' chiilni tzet cheyu cat yak'ni Comam ispaj selel teyet, ẍi Comam. 19Yalnipaxo Comam Jesús haca' ti': —Mach chetenba hek'alomal sat tx'o tx'otx' ti', yuto chioc no' ih yeta'toj, cat xin yocpaxo isk'uxewal. Macato chul ebnaj elk'om yin̈ cat yinito ebnaj. 20Wal xin ha' hune' cheyute, tenbawe hek'alomal yul satcan̈ bay machi no' ih chietantoj, bay mach chiocpaxo isk'uxewal, yeb bay mach chiapni ebnaj elk'om yin̈. 21Yuxin ha' bay ay hek'alomal ha' tu' cheyapaxico heyanma, ẍi Comam. 22Isbak' cosat cantil yehico yin̈ conimanil, yuxin ta han̈c'an̈e isc'ulal choche yila' hesat tu', sunil henimanil ayco yin̈ sajilk'inal. 23Yaja' ta yin̈n̈e istx'ojal ayco hemujlubal; sunil henimanil ayco yin̈ k'ejholo. Ta hune' issajilk'inal ayco teyin̈ tu' chimeltzoco yin̈ k'ejholohal, chexcancano xol k'ejholo, ẍi Comam. 24Yalnipaxo Comam Jesús haca' ti': —Machi hunu mac chu yoc chejabo tet cawan̈ patrón, yuto ta chisyije naj tzet chal naj babel, chisman̈c'o naj tzet chal naj iscab. Yeb xin tato xahan chil naj naj babel, chisyah naj naj iscab. Hac tu' heye hex ti', mach chu heyijen tzet chal Comam Dios tato ec'bal cheyaco heyanma yin̈ k'alomal, ẍi Comam. 25Yalnipaxo Comam Jesús: —Yuxin chiwalan teyet, mach cheyaco yin̈ hec'ul yin̈ tzet chelo, yeb yin̈ tzet chu yoc xil hek'ap yul sat yiban̈k'inal ti'. Ta chak' Comam Dios cocawil, ¿ha' tom xin tzet chicolo mach chak' Comam, heyalni? Ta ha' Comam ak'n̈e conimanil, ¿ha' tom xil cok'ap mach chak' Comam? 26Ilwec'anab no' ch'ic chiec' satcan̈, machi yawal no' chacoj, mach chihatx'wi no', machipaxo isc'un̈a no', yaja' xin chiak'lax tzet chislo no' yu Comam ay yul satcan̈. ¡Hajxamex to caw ec'bal heyelapno sata no'! 27¿Aymi hunujex ti' yu caw cheyaco yin̈ hec'ul yuxin chu heyanico hanic'oxa yak'bil hak'inal yul sat yiban̈k'inal ti'? 28¿Tzet yin̈ xin caw cheyaco yin̈ hec'ul yin̈ tzet chu yoc xil hek'ap? Ilwec'anab te' caj chich'ib xol k'ebtaj, mach chimunla te', mach chichemlipaxo te', 29yaja' chiwalan teyet, naj rey Salomón yet payat mach apni isk'aptzen isba naj haca' isc'ulch'anil te'. 30Walca caw c'ulch'an jilni isxumaquil te' tinan̈, yaja' yet hecal cabe chin̈uslaxto te' yul horno. Ta chak' Comam isc'ulch'anil te' caj tu', ¿ha' tom xin xil hek'ap mach chak' Comam? Hex ti' caw mach cheyaco heyanma yin̈ Comam Dios. 31Yuxin mach cheyaco yin̈ hec'ul cheyalni haca' ti': ¿Baytaxca chitit tzet chicolo yeb xil cok'ap? 32Yuto ha' anma mach ohtan̈e Comam Dios chianico huntek'an tu' yin̈ isc'ul. Yaja' wal Comam Dios ay yul satcan̈, yohtaxa Comam tato chiocnico huntek'an tu' heyu. 33Wal xin aweco yin̈ hec'ul hesaynilo Comam Dios babel cat heyijen tzet chala, walpaxo tzet chiocnico heyu yul sat yiban̈k'inal ti' xatic'a yak'a' Comam Dios teyet. 34Mach cheyaco yin̈ hec'ul yin̈ tzet chu yec' heyu yet hecal, yuto yet hecal tu' nanto tzet cheyaco yin̈ hec'ul yin̈ tzet cheyu, yuto masan ay isya'tajil yetbi hunun tz'ayic, ẍi Comam.

will be added

X\