SAN MATEO 5

1Ha' xilni Comam Jesús to caw tx'ihal anma x'apni, x'ahtoj Comam swi' hune' won̈an, x'ay tz'on̈noj. Lawitu' xhitzicoj heb'ya' ẍcuywi yin̈ sc'atan̈ Comam, 2x'oc Comam scuynuj heb'ya' chalni Comam: 3—Mac xtxumniloj to matzet aya, yuxin yin̈n̈e Comam Dios ẍcawxi sc'ul, sak'al yet, haxca ayxacoj yul sk'ab' Comam Dios. 4Mac ch'ok' yanma yu xtx'ojal chui, sak'al yet, haxca cha'a' Comam Dios yak'lob'al sc'ul. 5Mac huncuentan̈e sc'ul, sak'al yet, haxca schab' tx'otx'otx' halteb'il yu Comam Dios. 6Mac caw aycoj yin̈ yanma ta ch'elwan stoholal choche Comam Dios, sak'al yet, haxca chija' sb'a tzet choche tu'. 7Mac stz'a' sc'ul snanitoj yet-anmail, sak'al yet, haxca snab'toj Comam Dios hunk'aan tu'. 8Mac sajxa yanma yul sat Comam Dios, sak'al yet, haxca ch'ehojc'oj sc'atan̈ Comam. 9Mac ch'anicoj yet-anmail yin̈ ak'anc'ulal, sak'al yet, haxca chala' Comam Dios yuninaloj. 10Mac caj ch'ilot haxca syijye yuni stoholal, sak'al yet, haxca ayxacoj yul sk'ab' Comam Dios. 11Hexti' chex tzeyelaxoj, chex cajlaxoj, cat shob'laxojcan̈ lek'ti'al teyin̈ haxca cheya' yuluj he c'ul win̈an, sak'al heyet. 12Tzalaan̈wej yin̈ c'ul, haxca tx'ihal spaj ch'a'laxoj teyet yul satcan̈. Haca' heyilnoj sya'tajil tu', hactu' xu yec' ya' yanma heb'ya' schejab'lom Comam Dios yet payxa. 13Hexti' haca' atz'am atz'am heye xol anma. K'inaloj ta ẍtan̈toj sc'achi'al atz'am, matxam chu yoc sc'achi'al atz'am hunecxa; matxam tzet ch'oc atz'am, b'ejb'ealxam chucan atz'am b'ay ch'ec' anma. 14Haca' sajilk'inal heye pax xol anma. K'inaloj ta ay hunuj con̈ob' ahatoj swi' witz, hab'an jilnitoj nahat. 15Yet ẍco tzujb'an co candil, mat yalan̈oj cahon ẍjactoj, to yictajb'al n̈ah ẍco t'un̈b'acan̈, yun̈e smujli yin̈ mac ayictoj yul n̈ah. 16Haca' sajilk'inal cheyute he b'a, yewejiloj sajilk'inal tu' yin̈ sat anma. Ha' chaliloj hune' tu', che ye he c'ulal yin̈ sat anma yun̈e c'ul stzotenoj anma co Mam ay satcan̈. 17Ham heyalni ta yu hin c'ayniloj sley ya' Moisésan b'oj scuywab'al heb'ya' schejab'lom Comam Dios yuxin xquin hulan. Machoj, to yun̈e k'a' hab'an xtxumlaxi. 18Yin̈ caw yeli ẍwal teyetan, yilal yijnoj sb'a sunil tzet tz'ib'n̈eb'il yul Yum Comam Dios. Yulb'al ch'ehc'oj satyib'an̈k'inal ti' b'oj satcan̈, mach hunuj stz'ib' ahayoj yin̈ sley Comam Dios, ta machija' sb'a. 19Ay hej chejb'anil ahayoj yin̈ ley mach yelapnoj ye ẍjab'e, yaja' ta ay mac mach ẍyijyeni, cat ya'ni sc'uluj hunujxa anma ta mach syijye, hune' mac tu' caw mach yelapnoj chub' xol mac ch'ocoj yul sk'ab' Comam Dios. Wal mac ẍyijyen sunil tzet tz'ib'n̈eb'il yin̈ ley, chalni tet anma ta yilal syijye, hunk'aan tu' caw ay yelapnoj chub' xol anma ch'ocoj yul sk'ab' Comam Dios. 20Yuxin ẍwal teyetan, ta mat k'a' yijyeomoj cheyute he b'a yin̈ sley Comam Dios sataj heb'naj cuywaom yin̈ sley ya' Moisés b'oj heb'naj fariseo, machex ocoj yul sk'ab' Comam Dios. 21Xcuylax tet hej jichmam: Mache potx' anma, haxca mac potx'om anma, yilal yilaxtoj tet ley cat yilaxtij cuenta yin̈, ẍi. 22Yaja' ẍwal teyetan, yin̈n̈e ẍchiwacoj he c'ul yin̈ hunuj heyet-anmail, chi'a'tij Comam Dios cuenta teyin̈. Mac ẍhalni quewa' yin̈ yet-anmail, chi'a'tij heb'naj yahaw cuenta yin̈. Mac ẍb'ahni yet-anmail ch'a'ni tacoj sc'ul, sub'utaj sto yul camb'al xol k'a' k'a'. 23K'inaloj ta chex to heya'a' heyofrenda tet Comam Dios, yaja' ẍtit yin̈ he c'ul to ay hune' mac aycoj showal teyin̈, 24awejcan heyofrenda yich altar cat he to heyanojcoj he b'a yin̈ ak'anc'ulal b'oj anma tu', catto he meltzo heya'noj heyofrenda tu' tet Comam Dios. 25Ta ay hunuj mac ẍk'anni teyin̈ yu hunuj tx'oj cheyu, k'a' c'ul mi ta yet ayextocoj yin̈ b'eh che watx'en he b'a b'oj hune' mac tu', haxca taj chex ilaxtoj tet naj juez, cat hex yanic'oj naj tet naj policío cat heyalaxictoj yul presu. 26Yin̈ caw yeli ẍwal teyetan, machex eltij yul presu ta mat tz'ajanoj cheya' he multa. 27Xcuylaxi: Machex ixli, ẍi. 28Yaja' ẍwalan, yin̈n̈e heyochentoj hunuj ix ix, xax heyanacoj he mul yul heyanma. 29K'inaloj sb'ak' he sat yin̈ he watx' chex a'ni lectaoj, k'a' c'ul mi ta cheyiltij, cat he b'ejnitoj nahat, haxca k'a' c'ul mi ta hunch'ann̈e sb'ak' he sat cat he yapni satcan̈, sataj tato tz'ajan lahan ye he nimanil chex to yul camb'al xol k'a' k'a'. 30Ta he watx' k'ab' chex a'ni lectaoj, k'a' c'ul mi ta che tzoq'uiltoj, cat he b'ejnitoj nahat, haxca k'a' c'ul mi ta mach hune' he k'ab' chex apni satcan̈, sataj tz'ajan lahan ye he nimanil chex to yul camb'al xol k'a' k'a'. 31Xcuylax pax hune' ti' yet payxa: Ta ay hunuj naj spoh sb'a b'oj yixal, yilal swatx'ican yumal cat ya'ni naj tet ix, ẍiayoj. 32Yaja' ẍwalan, ta ay hunuj naj spoh sb'a b'oj yixal, han̈c'a ti' ta ay hunuj tx'oj say ix yin̈, ta machoj, lan̈an yanitoj naj ix yin̈ yanicoj smul. Taca ay hunujxa naj ch'i'nojpax ix, ha' hun naj ch'anicoj smul yin̈ hactu'. 33Xcuylax tet hej jichmam: Ta che ya' b'inaoj sb'ih Comam Dios yin̈ tzet cheyala, yilal heyijyeni, ẍiayoj. 34Yaja' ẍwalan, mache loctij sb'ih Comam Dios yin̈ tzet cheyala. Mach cheya' b'inaoj satcan̈ haxca hat tz'on̈an Comam Dios Yahawoj. 35Mach cheya' b'inaoj tx'otx'otx' yin̈ tzet cheyala haxca xan̈ob'al yoj Comam Dios ye tx'otx'. Machca che loctij con̈ob' Jerusalén haxca scon̈ob' Comam Rey caw ay smay yeyi. 36Machca cheya' b'inaoj he wi' yin̈ tzetet cheyala haxca mat hexojn̈e ay heyet, haxca machu he sajn̈eni mato he k'ejn̈en hunuj xil he wi'. 37Yuxin yet chex tzoteli: Ho' hactu' yeyi, quex chi. Machoj, mat hacojtu' yeyi, quexchin̈e. Haxca ta che loctij hunuj tzetet, yet-xa naj matzwalil yeyi. 38Xcuylaxi: Ta ay mac ẍmak'ni pohoj sb'ak' sat hunuj maca, mak'laxojab' pax pohoj sb'ak' sat hune' mac tu'. Ta ay mac ẍmak'niiltij yeh hunuj maca, mak'laxojab'paxiltij yeh hunexa tu', ẍiayoj. 39Yaja' ẍwalan, machex pajni yin̈ mac chuni tx'oj teyin̈. Ha' yet ay heyuni, ta ay mac ẍpak'nicoj he k'otx, awejtoj k'axepxa. 40Ta ay mac ẍk'anni teyin̈ tet naj alcal, chiniloj he camiẍ yalni, a'wejpax yet yib'an̈ he camiẍ tet, 41b'oj ta ay mac ẍchilb'an heyinitoj yijatz yictajoj legua, iwejtoj hunuj legua. 42Ta ay mac ẍhalni c'am teyet, a'wej sc'ame' anma tu', mach cheyute echemal. 43Xcuylaxi: He xahann̈en mactaj ay he cawilal; mac schiwacoj sc'ul teyin̈, caj cheyila, ẍi. 44Yaja' ẍwalan, yilal heyochen mac caj chex ilni. Sc'ulch'anil sc'ul Comam Dios che k'antij yib'an̈ mac chex a'ni ec'oj ya'. 45Hactu' chu he yeni to hex yuninal Comam ay satcan̈. Haxca cha' Comam ahojiloj tz'ayic yib'an̈ anma c'ul b'oj yib'an̈ anma tx'oj; lahan chayoj Comam ha' n̈ab' yib'an̈ anma c'ul snab'al b'oj anma tx'oj snab'al. 46Ta han̈c'a anma chex ochen cheyoche, ¿tox che chab' spaj hune' tu' tet Comam Dios? Hasta heb'naj ch'iniloj ch'en melyu yet tohlab'al hactu' chute pax heb'naj. 47Pax hune'xa, ta han̈c'a anma c'ul stzotel teyet ha' c'ul he tzotel tet, ¿taxca c'ul yin̈ hactu'? Hune' tu' hasta anma mat ohtajn̈eoj Comam Dios hactu' chute. 48Tz'ajan che yijye hej tzetet c'ul, haca' co Mam ay satcan̈ tz'ajan lahan yeyi.


Copyright
Learn More

will be added

X\