SAN MATEO 5

1Hayet yilni Comam Jesús tato caw hantan̈e anma apni isc'atan̈, yahto Comam yin̈ istzalanil hune' won̈an, yay tz'on̈no Comam, ishitzico ebnaj iscuywom Comam isc'atan̈. 2Yoc Comam iscuyno ebnaj iscuywom tu', yichico Comam yalni haca' ti': 3—Sak'al yet mac chitxumchalo yu ta mach chu iscolni isba ischuquil, yuxin yin̈n̈e Comam chicawxi isc'ul. Hune' mac tu' yet ay yoc yul isk'ab Comam Dios. 4Sak'al yet mac chiyik' bisc'ulal yu istx'ojal chiswatx'e, yuto chiak'lax yak'lobal isc'ul yu Comam Dios. 5Sak'al yet mac chewchotan̈e chute isba yuto chischah hune' tx'otx' haltebilcano yu Comam Dios. 6Sak'al yet mac choche isc'ul iswatx'e' tzet chal Comam Dios yuto chij isba tzet choche. 7Sak'al yet mac chitz'ay isc'ul yin̈ yet anmahil, yuto hac tu' chu istz'aypaxo isc'ul Comam Dios yin̈. 8Sak'al yet mac sajxa ye yanma yul sat Comam Dios, yuto ha' anma tu' chiapni isc'atan̈ Comam. 9Sak'al yet mac chisayni ak'anc'ulal yuto chal Comam Dios yuninaloj. 10Sak'al yet mac caj chiillaxi yu chiswatx'e istoholal haca' choche Comam, yuto ayxaco yul isk'ab Comam Dios ay yul satcan̈. 11Sak'al heyet yet chexbahlaxi yeb yet chexetalaxi, cat ishoblaxcan̈ lek'ti'al teyin̈ yuto tzujanex wintajan. 12Caw ak'we tzalaho heyanma ta hac tu' chexutelaxi yuto ch'ak'lax ispaj selel teyet bey satcan̈. Yuto haca' heyilni isya'tajil ti', hac tu' yu yec'ya' yanma ebnaj ischejab Comam Dios ec'lena yet payat, ẍi Comam. 13Yalnipaxo Comam Jesús: —Hex ti', haca' atz'am atz'am, hac tu' heye yul sat yiban̈k'inal ti'. K'inalo ta chiel isc'achi'al atz'am matxa chu yoc isc'achi'al atz'am hunelxa, hac' tu' xin matxa tzet ch'ocnico atz'am, to chitirlaxtoj cat isxan̈laxic'o yu anma, ẍi Comam. 14Yalnipaxo Comam Jesús: —Hex ti' haca'paxo sajilk'inal heye yul sat yiban̈k'inal ti'. K'inalo ta ay hunu con̈ob yin̈ iswi' hunu witz, caw haban jilnilto nahat. 15Yet chicotzujbanico k'a' yin̈ hunu cantil, mach chicon̈ohbaco hunu almuh yiban̈, wal xin chicot'un̈bacan̈ yun̈e ismujli yin̈ anma ayicto yul n̈a tu'. 16Hacojab tu' xin istzejla hune' sajilk'inal ayxaco teyin̈ yin̈ sat anma, haxinwal chil anma isc'ulal chewatx'e. Hac tu' xin c'ul istzotel anma yin̈ Comam ay yul satcan̈, ẍi Comam. 17Yalnipaxo Comam Jesús haca' ti': —Tajca chetxumu ta yu intan̈tzenilojan isley naj Moisés yeb cuybanile aycano yu ebnaj ischejab Comam Dios yuxin quinhulan, machoj, walxinto yun̈e wak'nihan ohtan̈elaxilo yin̈ tzet chaliloj yuxin quinhulan. 18Yin̈ caw yeli chiwalan teyet ta caw yilal yijni isba sunil tzet tz'ibn̈ebilcano yul Yum Comam Dios. Yulbal yul sat yiban̈k'inal ti' yeb satcan̈, machi hun tx'inano ayayo yin̈ ley mach ch'ec'to yet yijni isba. 19Yuxin ha' mac mach chiyijen hunu chejbanile ayco yin̈ ley, waxan̈ca machi bin tzet chaliloj, machi xin chiscuypaxo yet anmahil isyijeni, ha' hune' mac tu' machi yelapno chuco xol mac chioc yul isk'ab Comam Dios. Wal mac chiyijen xin cat iscuynipaxo yet anmahil isyijeni, ha' hune' mac tu' caw ay yelapno chuco xol anma ch'oc yul isk'ab Comam Dios. 20Yuxin chiwalan teyet tato mach ec'balto c'ul cheyute heyijen yin̈ tzet halbilcano yu Comam Dios tu' sata ebnaj chicuywa yin̈ ley yeb ebnaj fariseo, mach chexoc yul isk'ab Comam Dios, ẍi Comam Jesús. 21Yalnipaxo Comam Jesús: —Hex ti' heyohtaj tato hallax tet ebnaj jichmam haca' ti': “Mach chepotx'camo heyet anmahil, yuto ha' mac chipotx'ni hunu yet anmahil yilal yilaxto sata naj juez cat yoc yin̈ isya'tajil yu naj,” ẍi. 22Yaja' haninan chiwalan teyet, ha' mac chichiwa isc'ul yin̈ yet anmahil chiay isya'tajil yiban̈ yu Comam Dios. Ha' mac chibuchwa yin̈ yet anmahil xin, ha' ebnaj iswi'ehal yin̈ lahti' yul con̈ob chiilni tzet chielicoj. Haxa mac chibahni yet anmahil cat yak'ni taco isc'ul, ha' hune' mac tu' ay ismay isto xol k'a k'a' mach istan̈bal. 23K'inalo tato yet lan̈an heyinito heyofrenda tet Comam Dios sat altar cat henanitij tato ay hemul tet hunu maca, 24awecano heyofrenda tu' yich ismeẍahil bay chiak'lax xahanbal tu', cat heto heyanoco heba yin̈ ak'anc'ulal yeb hune' mac tu', tzujan tu' xin xaisje heyak'ni heyofrenda tu' tet Comam Dios. 25Tato ay hunu mac chik'anni teyin̈ yu hunu istx'ojal chewatx'e, watx'eweyo hune' tu' yin̈ ak'anc'ulal yeb hune' mac tu' yet yalan̈to maẍto chexto sata naj alcal. Yuto ta chexapni sata naj, chexyaco naj yul isk'ab ebnaj mayor, haxa ebnaj mayor tu' xin chexanicto yul preso. 26Yin̈ caw yeli chiwalan teyet, mach chexelti yul preso tu' ta mach tz'ajano cheyak' hemulta, ẍi Comam. 27Yalnipaxo Comam Jesús: —Hex ti' heyohtaj tato hallax haca' ti': “Mach chexixli,” ẍi. 28Yaja' haninti'an chiwalan teyet, mac xan̈etic'a chiilni hunu ix ix cat isnanico istx'ojal yin̈ ix cat yochenico ix, ha' hune' mac tu' xayanaco ismul yul sat Comam Dios. 29K'inalo tato isbak' hesat yin̈ hewatx'k'ab chexak'ni ayc'ayoj yin̈ hunu istx'ojal, c'ulmi tato cheyilti hune' isbak' hesat tu' cat hek'ojnito nahat. Wal xin ec'bal c'ul tato ayto hunu tzet mach tz'ajano yin̈ henimanil sata ta tz'ajan sunil henimanil cat heyalaxto xol k'a k'a' mach istan̈bal. 30K'inalo tato hewatx'k'ab chexak'ni ayc'ayo yin̈ hunu istx'ojal, c'ulmi ta chetzoq'uilto hune' hek'ab tu', cat hek'ojnito nahat. Wal xin ec'bal c'ul tato matxa hune' hek'ab satato tz'ajan henimanil cat heyalaxto xol k'a k'a' mach istan̈bal, ẍi Comam. 31Yalnipaxo Comam: —Hallaxpaxo yet payat haca' ti': “Ta ay hunu naj chispoh isba yeb yixal, yilal iswatx'icano yumal cat yak'nicano naj hune' hum tu' tet ix,” ẍiayoj. 32Yaja' wal inti'an chiwalan, tato ay hunu naj chispoh isba yeb yixal, yaja' ta mach yuho issayni ix ismul yeb hunuxa winaj, hune' naj tu' lan̈an istubtento naj ix issaya' ismul yik'ni hunuxa yichamil. Ha' xin naj chiik'ni ix chispoh isba yeb yichamil tu', ha' hun naj chahpaxico ismul, ẍi Comam. 33Yalnipaxo Comam Jesús: —Hex ti', heyohtapaxoj tato hallax tet ebnaj jichmam haca' ti': “Ta cheyawte isbi Comam Dios yin̈ hunu tzet chetak'we teyin̈, yilal heyijen hune' tu',” ẍiayoj. 34Yaja' wal inti'an chiwalan teyet, mach cheyak' binaho isbi Comam Dios yin̈ tzet chetak'weco teyiban̈. Mach cheyak' binaho satcan̈ yet chetak'wenico hunu tzet ye tu' teyiban̈, yuto ha' bey tu' tz'on̈an Comam Dios Jahawil. 35Mach cheyak'paxo binaho tx'o tx'otx' yet chetak'wenico hunu tzet ye tu' teyiban̈, yuto tx'o tx'otx' isbatxobal yoj Comam ye tx'otx'. Mach cheyak' binaho isbi con̈ob Jerusalén yet chetak'wenico hunu tzet ye tu' teyiban̈, yuto iscon̈ob Comam Dios Jahawil caw ay yelapno yehi. 36Mach cheyak' binaho hewi' yin̈ tzet chetak'weco teyiban̈, yuto mach chu hesajn̈en maca hek'ejn̈en hunu xil hewi'. 37Wal xin tato cheyal ho', yelojab cheyala, taca machoj ta quexchi, machojabi; yuto ta cheyak' binaho isbi huntek'an tu' yak'ni isba yin̈ tzet cheyala, wal xin yin̈ naj matzwalil chitit huntek'an tu', ẍi Comam. 38Yalnipaxo Comam Jesús haca' ti': —Hex ti' heyohtaj tato hallaxpaxo haca' ti': “Tato ay hunu mac chimak'ni poho isbak'sat hunu maca, mak'laxojabpaxo poho isbak'sat hune' mac tu'. Tato ay hunu mac chimak'nilti yeh hunu maca, mak'laxojabpaxilti yeh hune' mac tu',” ẍiayoj. 39Yaja' wal inti'an chiwalan, mach chu hepajtzen istx'ojal chiswatx'e hunu mac teyin̈. Wal xin tato ay mac chipak'nilto hecotx', meltzowepaxto k'axepxa tet. 40Ta ay hunu mac chik'anni teyin̈ tet naj alcal, cat yinito hecamiẍ yalni, matzet cheyala ta chipaxto hechumpa. 41Yeb xin ta ay hunu mac chalni teyet tato cheyijto yijatz yictajo legua, colwahan̈we yin̈, iweto yijatz tu' hunu legua. 42Ta ay mac chik'anni hunu tzet ye tu' teyet, ak'we tet. Tato ay hunu mac chik'anni hunu tzet ye tu' c'amil teyet, colwahan̈we yin̈ hune' mac tu', ẍi Comam. 43Yalnipaxo Comam Jesús: —Hex ti' heyohtaj tato hallax haca' ti': “Xahan cheyil mac xahan chexilni. Mac ayco ishowal teyin̈ xin, ocojabpaxo hehowal yin̈,” ẍiayoj. 44Yaja' wal inti'an chiwalan teyet, xahan cheyil mac ayco ishowal teyin̈. K'anwe isc'ulal Comam Dios yiban̈ macta chexetani. 45Ta cheyije haca' tu', hac tu' chu heyeniloj tato quexyuninal Comam Dios ay yul satcan̈, yuto ha' Comam Dios chiak'ni aholo tz'ayic yiban̈ anma c'ul yeb yiban̈ anma tx'oj. Lahan chapaxayo Comam ha' n̈ab yiban̈ mac c'ul yeb yiban̈ mac tx'oj. 46Wal xin tato han̈c'an̈e anma xahan chexilni, ha'n̈e xin xahan cheyilpaxoj, ¿mataxca chechah ispaj hune' tu' tet Comam Dios? Machoj, yuto hac tu' chute isbeybaln̈e ebnaj mulum, haca' ebnaj ik'omilo tohlabal chito bey Roma. 47Yeb xin tato han̈c'an̈e tet heyuẍtaj chextioẍli, ¿c'ulmi hune' tu'? Machoj. Wal xin ha' anma mach ohtan̈eho Comam Dios hac tu' chisbeybaln̈e. 48Tz'ajanojab chu hebeybaln̈e sunil isc'ulal, yuto Comam Dios ay yul satcan̈ tz'ajan lahan yehi, ẍi Comam.

will be added

X\