SAN MATEO 4

1Lahwi tu' yilaxto Comam Jesús yu Comam Espíritu Santo bey tx'otx' desierto yu yilwelax Comam yu naj matzwalil. 2Caw xin yulbal cawina tz'ayic yeb cawina ak'bal mach wa' Comam, lahwi tu' isn̈ohchacan̈. 3Yapni naj matzwalil yilweno Comam, yalni naj tet Comam: —Ta yeli Isc'ahol Dios hawehi, hal tet huntek'an ch'en ch'en ti' meltzojabico ch'en wahil, ẍi naj. 4Istak'wi Comam tet naj: —Wal xin tz'ibn̈ebilcano yul Yum Comam Dios tato maẍn̈etaj yu tzet chicolo yuxin ay cok'inal, to yupaxo Istzoti' Comam, ẍiayoj, ẍi Comam tet naj. 5Lahwi tu' yinito naj matzwalil Comam yul con̈ob Jerusalén, iscon̈ob Comam Dios, yinato naj Comam yin̈ iswi' yatut Comam bey tu', 6yalni naj tet Comam: —Tato caw yeli Isc'ahol Dios hawehi k'ojayto haba bey ti', yuto tz'ibn̈ebilcano yul Yum Comam Dios haca' ti': Chak'ati Comam Dios yángel chachistan̈e' yun̈e mach chaẍischayo ebnaj sat tx'otx', haxinwal mach chilahwi hawoj yin̈ ch'en ch'en, ẍiayoj, ẍi naj. 7Istak'wi Comam Jesús tet naj: —Tz'ibn̈ebilpaxcanayo yul Yum Comam Dios haca' ti': “Mach chinheyacojan yin̈ ilwebal yuto Heyahawil yeb heDiosal wehan,” ẍiayoj, ẍi Comam. 8Lahwi tu' yinito naj Comam yin̈ iswi' hune' witz caw nahat yecanocan̈, isyeni naj sunilej con̈ob ay yul sat yiban̈k'inal ti' yeb isk'alomal con̈ob tu' tet Comam. 9Yalni naj tet Comam: —Sunil huntek'an chawil ti' chiwak'an tawet, yaj tato chaẍay jahno insatajan cat hawinayo haba wetan, ẍi naj tet Comam. 10Istak'wi Comam: —Ach matzwalil hitzan̈ilo inc'atan̈an yuto chal yul Yum Comam Dios haca' ti': “Iweyo heba tet Comam Dios yuto Heyahawil yeb heDiosal ye Comam, han̈e tet Comam xin cheyije tzet chala,” ẍiayoj, ẍi Comam. 11Yet yalni Comam Jesús haca' tu' isbejnicano naj Comam, yapni huntek'an ebnaj ángel colwal yin̈ Comam. 12Hayet yaben Comam Jesús tato alaxicto naj Juan anican̈ ha' iswi' anma yul preso, isto Comam yul ismajul Galilea. 13Yaja' xin mach cancano Comam yul con̈ob Nazaret, wal xin to Comam yul con̈ob Capernaum, ha' tu' xin ehayo Comam. Hune' con̈ob tu' ayayo isti' ha' mar Galilea, tx'otx' chiyij Zabulón yeb Neftalí. 14Hac tu' yu yijni isba tzet tz'ibn̈ebilcano yu naj Isaías, ischejab Comam Dios yet payat, bay chala: 15Tx'otx' Zabulón yeb tx'otx' Neftalí, tx'otx' ayic'to satac'to ha' Jordán, tx'otx' ayayo isti' ha' mar, yul ismajul tx'otx' Galilea bay ay tx'i'al anma mach Israeloj. 16Huntek'an anma tu' aytic'aco xol k'ejholo yaja' wal tinan̈ xin xaapni issajilk'inal tet. Huntek'an anma tu' iscambalxatic'a, yaja' wal tinan̈ xaapni issajilk'inal yak'lobal yanma, ẍiayoj. 17Ha' bey tu' xin ichico Comam Jesús yalnic'o Istzoti' Comam Dios, chalni Comam: —Bejwecano hewatx'en istx'ojal yuto yocxa Comam Dios ay yul satcan̈ Yahawo teyin̈, ẍi Comam. 18Hayet lan̈an isbelwi Comam Jesús isti' ha' lago Galilea, yapni Comam isc'atan̈ cawan̈ ebnaj ik'omati cay, lan̈an yanayto ebnaj ishac' chiinahti no' cay xol ha'. Ebnaj cawan̈ ti' yuẍta isba ebnaj, ha' ton naj Simón, naj chihallaxpaxo Pedro, yeb xin naj Andrés. 19Yalni Comam tet ebnaj: —Ocan̈we tzujno wintajan, wal tinan̈ haxa anma chexoc heyik'ahtij cat yoc yul ink'aban, ẍi Comam. 20Yet yaben ebnaj yalni Comam haca' tu', isbejnicano ebnaj ishac', yoc tzujno ebnaj yinta Comam. 21Haniq'uixto chito Comam Jesús xin yilnipaxo Comam cawan̈xa ebnaj yuẍta isba, ha' ton naj Jacobo yeb naj Juan, ebnaj isc'ahol icham Zebedeo. Ayahto ebnaj yul isbarco yeb ismam tu', lan̈an xin isbujni ebnaj ishac'. Yalnipaxo Comam tet ebnaj tato chioc tzujno ebnaj yinta Comam. 22Yet yaben ebnaj hune' tu' yanicano ebnaj isbarco yeb ismam, yoc tzujno ebnaj yinta Comam. 23Caw sunil yul ismajul Galilea ec' Comam Jesús, iscuyni Comam anma yul hunun iscapilla ebnaj Israel, yalni Comam tzoti' c'ul yin̈ tzet chu yoc anma yul isk'ab Comam Dios. Yak'ni cawxo Comam anma yin̈ sunilal yabil ayco yin̈, yeb anma chiec'ya' yanma. 24Caw xin pujnacan̈ isk'umal Comam yul ismajul Siria, chiniti anma macta ayco yabil yin̈. Ay mac ch'ec'ya' yanma yu yabil, ay mac ayco ischejab naj matzwalil yin̈, aypaxo mac chilow yaxcamic yin̈, yeb aypaxo mac camnajilo isnimanil. Sunil huntek'an anma tu' yak' cawxo Comam. 25Caw hantan̈e anma oc tzujno yinta Comam; ay anma ah Galilea, ay anma ah Decápolis, ay anma ah Jerusalén yeb anma ah Judea, yebpaxo anma ay isk'axepic'to ha' niman Jordán.

will be added

X\