SAN MATEO 4

1Lawitu' x'iottoj Comam Jesús yu Comam Espíritu b'et tajin̈ witz ac'al yu yilweot yu naj matzwalil yun̈e yanicoj smul. 2Mach xwa' Comam yulb'al cawinaj tz'ayic b'oj cawinaj ak'b'al. Ha' xn̈ohchacan̈, 3xhitzicoj naj matzwalil sc'atan̈ Comam yun̈e yilwen naj yuni Comam xtx'ojal, xalni naj: —Haxca hach Sc'ahol Comam Dios, hal tet hunk'aan ch'en ch'en ti' pac'ojab' ch'en itail. 4Xta'wi Comam: —Tz'ib'n̈eb'il yul Yum Comam Dios: Matoj han̈c'an̈e ita ch'a'ni co k'inal, stzoti' Comam ch'a' pax co k'inal, ẍiayoj, ẍi Comam. 5Lawitu' xinitoj naj Comam swi' yatut Comam Dios b'et Jerusalén, Scon̈ob' Comam. 6Xalni naj tet: —Haxca hach Sc'ahol Comam Dios, b'ejaytoj ha b'a b'eti' haxca tz'ib'n̈eb'il yul Yum Comam Dios:Cha'a'tij Comam hej yángeles hach stan̈e', machach schab'ayoj heb'naj sat tx'otx', yun̈e mach ẍlahwi hawoj yin̈ ch'en ch'en, ẍiayoj. 7Xta'wi pax Comam: —Tz'ib'n̈eb'il pax yul Yum Comam Dios: Machin heyacoj yin̈ ilweb'alan, haxca Heyahaw wean b'oj he Dios, ẍiayoj, ẍi Comam. 8Lawitu' xinitoj naj Comam swi' hune' witz. Ichi syeni naj sunil hej con̈ob' ay sat tx'otx'otx' ti' b'oj hantaj sk'alomal. 9Xalni naj tet Comam: —Sunil tzet lan̈an hin yeni tawet ti'an, ẍwa' tawetan ta chach ay jahnoj wetan cat hin ha hak'enan. 10Xta'wi Comam: —Hitzan̈iloj b'eti Satanás, haxca tz'ib'n̈eb'il yul Yum Comam Dios: Hayinn̈e chin he hak'ean, haxca Heyahaw wean b'oj he Diosal, hayinn̈e chin heyijyean, ẍiayoj, ẍi Comam tet naj. 11Ha' x'elcan̈ naj, xhul hunk'aan ángel ya'a' tzet slo Comam. 12Ha' xab'en Comam Jesús to x'aotcoj ya' Juan presu, xmeltzo Comam scuentail Galilea. 13Yaja' mach xcan Comam Nazaret, to xto yul con̈ob' Capernaum, hat x'ehi. Hune' con̈ob' tu' hat aycoj sti' ha' lago, b'ay ch'ec' xtx'otx'al Zabulón b'oj tx'otx' Neftalí. 14Hactu' xu yijni sb'a tzet tz'ib'n̈eb'ilcan yu ya' Isaías schejab'lom Comam Dios, chalni ya': 15K'axepic'tij ha' niman Jordán yul scuenta Galilea b'ay ay tx'ihal anma mat israeloj, sb'elal ha' mar, hat ay tx'otx' Zabulón b'oj tx'otx' Neftalí. 16Hunk'aan anma tu' aycoj yin̈ sk'ejalholo yaja' tinan̈ ch'apnoj sajilk'inal tet. Anma ay b'etu' scamb'alxatic'a,- yaja' wal tinan̈ ch'apnoj hune' sajilk'inal ch'a'ni yak'lob'al sc'ul yanma. 17Hat xichecoj Comam spujb'anc'oj stzoti' Comam Dios, chalni Comam: —B'ejwejxacan heyuni xtx'ojal, haxca yocojxa mac Yahaw yul satcan̈ Yahawoj b'eti', ẍi Comam. 18Lan̈an yec'toj Comam Jesús sti' ha' lago Galilea, x'apni b'ay ay cawan̈ heb'ya' yuẍtaj sb'a, ya' Simón, ẍhalot Pedroal, b'oj ya' yuẍtaj Andrés. Lan̈an yaniaytoj heb'ya' tx'an̈ xtxim yul ha' ha', haxca iomatij cay heb'ya'. 19Xalni Comam tet heb'ya': —Ocan̈wej cuywuj win̈an, haxca yet schab'toj ti' haxa anma cheyi'a'tij wetan, haca' heyiniatij no' cay yul ha' ha' ti', ẍi Comam. 20Ha' xab'en heb'ya' hune' tu', xaninacan heb'ya' sunil smunlab'al, x'occan tzujnuj heb'ya' yin̈ Comam. 21Lawitu' xto Comam hanic'xa, xilni cawan̈xa heb'ya' yuẍtaj sb'a, ya' Jacobo b'oj ya' Juan, sc'ahol ya' Zebedeo. Aycoj heb'ya' yul sbarco b'oj smam sb'ujni tx'an̈ txim ib'alatij cay; xawten pax Comam heb'ya'. 22Yin̈n̈ena tu' xanican heb'ya' sbarco b'oj smam, x'occan tzujnuj heb'ya' yin̈ Comam. 23Yet hunec' tu' sunil yul shoyanil Galilea b'ay x'ec' Comam Jesús scuyu' anma yul hunun capiya. Spujb'anc'oj Comam tzoti' c'ul jocb'al yul sk'ab' Comam Dios. Xan̈ten Comam anma, xiniloj sunil hej tzet yab'ilal aycoj yin̈, b'oj xcolwa yin̈ mac aycoj sya'tajil yin̈. 24Yuxin xpujna smay Comam sunil yul xtx'otx'al Siria. Xto iotpaxtij yak'b'il yawub' tet Comam, tzantic'a tzet yab'ilal aycoj yin̈. Ay mac aycoj yespíritu naj matzwalil yin̈, ay mac ẍlow yaxcamic yin̈ b'oj mac camnajiloj hanic' snimanil. Sunil hunk'aan tu' xan̈te Comam. 25Tx'ihal anma ah Galilea tzujan yin̈ Comam, b'oj mac ah Decápolis, mac ah Jerusalén b'oj mac ay yul scuenta Judea, b'oj hej mac ay b'et sk'axepal ha' niman Jordán.


Copyright
Learn More

will be added

X\