SAN MATEO 3

1Yet yulb'al ay heb'ya' Nazaret, x'apni ya' Juan Bautista b'et Judea b'ay tx'otx'otx' tajin̈ witz ac'al. Chal ya' stzoti' Comam Dios tet anma ch'apni sc'atan̈. 2Chalni ya': —Awejxacan he xtx'ojal, haxca toxa ch'ocoj Comam Dios Yahawoj b'eti'. 3Ya' Juan ti' chal ya' Isaías schejab'lom Comam Dios yet stz'ib'n̈en ya' chalni: Ay hune' naj ch'awi yin̈ ip b'et tx'otx'otx' tajin̈ witz ac'al, chalni naj:Haca' chu he watx'en b'eh yet chul hunuj naj yahawil, hactu' chu he watx'en he b'eyb'al haxca yulxa Comam Jahaw, ẍinaoj naj. 4Ya' Juan tu', xil no' cameyo chemb'il aycoj xiloj sk'ap ya'. Stz'umal nok' aycoj cinchooj ya'. Hunmajan no' haca' no' k'ul ha' slo ya' yec'b'aloj yu, b'oj no' xoltelajil cab'. 5Anma ay yul con̈ob' Jerusalén b'oj anma ay sunil yul xtx'otx'al Judea, b'oj mac ay sti'laj ha' niman Jordán xb'ey ab'enoj tzet chal ya'. 6Lawi yalniloj anma smul, xi'ni ha' yu ya' Juan yul ha' niman Jordán. 7Ha' xilni ya' Juan to tx'ihal heb'naj fariseo b'oj heb'naj saduceo ch'apni sc'atan̈ ya' yu yi'ni ha', xalni ya' tet heb'naj: —Caw sub'wahomex; lahanex b'oj no' howla lab'ah. ¿Mac xhalni teyet ta yun̈e heyi'ni ha' chex colchaoj tet sya'tajil ẍtit tet Comam Dios toxa chuluj? 8Ta sje he c'ul he cololoj he b'a tet, yilal heyeniloj yu hej tzetet c'ul cheyu yun̈e syeniloj sb'a to xax he b'ejcan heyuni xtx'ojal. 9Taj cheyala: Hayon̈ti' yic'al ya' Abraham jeyi. Mach mi sya'tajil chuluj jib'an̈, taj quex chi, yaja' chu yanicoj Comam hunk'aan ch'en ch'en ti' yic'aloj ya' te heleloj. 10Hune' sya'tajil tu' lahan b'oj yet ayxacoj ch'en eche yich te' te' yu stzoc'laxc'oj. Stzoc'laxc'oj te' mat c'uluj satni, cat sn̈uslaxtoj te'. 11Yin̈ caw st'in̈anil, hayin ti'an ha'n̈e ha' ẍwa' heyi'a'an, yun̈e syeniloj sb'a to xax heyacan he tx'ojal. Yaja' ay hune' mac tzujantij win̈an. Haca' wa'ni ha' heyi'a' ti'an, hactu' ya'noj Comam Espíritu Santo teyet heyib'aloj ha' mato k'a' k'a'. Hune' mac chuluj tu', k'a' ec'b'alto tin satajan, hasta wijnic'oj xan̈ab'an matzet ẍwaliloj ẍwab'ean. 12Hune' mac tu', lahan b'oj naj ch'iniloj sk'al ixim trigo. C'ul chute naj stz'isnican̈ b'ay ch'ayoj ixim sat. Lawitu' cat yocoj naj sc'ub'anojcan̈ ixim yul sc'un̈a, haxa sk'alemal ixim, sn̈usu'toj naj xol k'a' k'a' maẍtic'a ẍtan̈i. 13Yet hunec' tu', speto Comam Jesús Galilea, xhul Comam sti' ha' niman Jordán b'ay ay ya' Juan yu yi'ni ha' tet ya'. 14Yaja' mach sje ya' Juan ya'a' ha' yi'a' Comam. Yuxin xal ya' tet Comam: —Machoj, yet aya hach chawa' ha' wi'a'an, mat yetoj aya ta hayin ẍwa' ha' hawi'a'an. 15Xalni Comam tet ya': —Yilal ha yijyen hune' ti', haxca yetwanoj ay co yijyen tzet chal Comam Dios, ẍi Comam. Hactu' xu syijyen ya' Juan ya'ni ha' yi'a' Comam. 16Man̈e yi' ha' Comam, x'ahtij yul ha' ha', shajnitoj sb'a satcan̈, xilni yayiloj Yespíritu Comam Dios yib'an̈ haca' hune' no' palamuẍ. 17Hunip tu' xab'en heb'ya' hune' tzoti' x'ayiloj yul satcan̈, chalni yin̈ hacti': —Ha' hune' ti' hin C'ahol caw ẍwochean. Caw chin tzala yin̈an.


Copyright
Learn More

will be added

X\