SAN MATEO 3

1Yet hune' tiempohal tu' xin apni naj Juan anican̈ ha' iswi' anma bey tx'otx' desierto, yul ismajul Judea. 2Yalni naj tet anma apni bey tu': —Bejwecano hewatx'en istx'ojal, yuto yocxa Comam Dios ay yul satcan̈ yahawo teyin̈, ẍi naj. 3Ha' ton yin̈ naj Juan ti' bay yal naj Isaías, hune' ischejab Comam Dios yet payat, yet istz'ibn̈encano naj haca' ti': Ay hune' naj chiawi yin̈ caw ip bey hune' tx'otx' desierto, chalni naj: “Watx'eweco heyanma yuto chihul Comam Dios Jahawil. Haca' chu istoholban̈elax hunu beh yet chihul hunu naj jahaw, hac tu' cheyute hayanma,” ẍi naj, ẍi yul Yum Comam Dios. 4Wal naj Juan tu', xil no' camello watx'ebilayo xilo isk'ap naj, tz'um no' xin ayco istx'ambalo naj. Ha' tzet chislo naj ha' ton no' niẍte nok' haca' no' lit' yeb no' cab ay xolaj telaj. 5Hantan̈e xin anma yul con̈ob Jerusalén yeb yul ismajul Judea, yebpaxo anma ayayo istila ha' niman Jordán apni abeno tzet yal naj. 6Yet chalnati anma ismul xin, cat yahcano ha' iswi' yu naj Juan yul ha' niman Jordán. 7Hayet yilni naj Juan tato tx'i'al ebnaj fariseo yeb ebnaj saduceo apni isc'atan̈ yu yah ha' iswi', yalni naj tet ebnaj: —Hex ti' caw haca'tan̈e heyic'al heba yeb no' laba, caw helanex hecolni heba. ¿Mac halni teyet ta yun̈e ch'ah ha' hewi' yuxin chexcolcha tet hune' isya'tajil chati Comam Dios? 8Tato caw yeli xaheyacano sunilal istx'ojal, yilal heyenilo yu isc'ulal chewatx'e. 9Tajca chetxum haca' ti': “Han̈on̈ti'an̈ jichmaman̈ ye icham Abraham, yuxin xacon̈colchahan̈ yalan̈ isya'tajil chati' Comam Dios, tajca quexchi. Wal xin chiwalan teyet, tato choche Comam Dios chu yanico Comam huntek'an ch'en ch'en ti' yuninalo icham Abraham heseleloj. 10Cawilxa yeti hune' isya'tajil chati Comam Dios, lahan haca' yet yocxa ch'en eche yich xe' hunu te te' yu istz'oc'laxayo te'. Yuxin sunil te te' mach c'ulo issatni chitzoc'laxayo te' cat isk'ojlaxto te' yul k'a'. 11Yin̈ caw yeli haninti'an han̈e ha ha' chiwak'an yahbalo ha' hewi' yun̈e isyenicanilo isba tato caw yeli xahebejcano istx'ojal. Yaj ay hune' naj tzujan yul wintajan, naj tu' chiyacan̈ naj ha' hewi', yaj yu isk'ak'al yip Comam Espíritu Santo. Ha' naj tu' caw ec'balcano yelapno ye naj insatajan, walinan xin caw matzet welapnojan chiwabehan, nitam int'un̈nihan isxan̈ab naj. 12Naj chul tu' lahan naj haca' hunu naj chixunilo isk'al ixim trigo, nan chak' naj ixim sat, nan chak'paxo naj ixim yoj, wal ixim sat tu' chisc'ubato naj ixim yul isc'un̈a, haxa ixim yoj tu' xin chisk'ojto naj ixim xol k'a k'a' mach istan̈bal,” ẍi naj Juan tu'. 13Yet hune' tiempohal tu' el Comam Jesús bey Galilea, isto Comam isti' ha' niman Jordán isc'atan̈ naj Juan, yu yah ha' iswi' Comam yu naj. 14Wal naj Juan tu' mach chisje naj yak'a'can̈ ha' iswi' Comam. Yalni naj tet Comam: —Machoj, wal xin ha' hawet hach yilal hawanican̈ ha' inwi'an, maẍtajach chachhul inc'atan̈an yu wanican̈an ha' hawi', ẍi naj. 15Yaja' tak'wi Comam tet naj: —Mach chu haman̈c'on hune' ti', wal xin yilal coyijen tzet chal Comam Dios, ẍi Comam. Hac tu' xin yu isyijen naj Juan yanican̈ ha' iswi' Comam Jesús. 16Yet lahwi yah ha' iswi' Comam tu', yahti Comam xol ha', yin̈n̈ena tu' ishajni isba satcan̈. Yilni Comam yayilo Comam Espíritu Santo yiban̈ haca' hunu no' cuwis. 17Yabelax hune' yul nuk'e satcan̈, halni haca' ti': —Ha' naj ti' Inc'aholan, caw xahan ay wuhan, caw chintzalahan yin̈ naj, ẍiaytij.

will be added

X\