SAN MATEO 28

1Lawi yec'can tz'ayic xewb'al, ha' sajb'iloj yin̈ domingo, yichob'al semana, xto ya' María ah Magdala b'oj hune'xa ya' María yila' b'ay xmuji Comam Jesús. 2Yet maẍto ch'apni heb'ya', xa'ni hune' chixcab', x'ayiloj hune' yángel Comam Jahaw speto satcan̈ b'ay mujinaj Comam tu'. Lawi yiniloj ch'en ch'en aycoj smajiloj x'oc tz'on̈noj yib'an̈ ch'en. 3Haca' sajilk'inal yet ch'ay jepna cayompa, hactu' yilot. Sajxan̈e pok'po xil sk'ap. 4Yet xilni heb'naj soldado tu', toxan̈e ẍc'uyc'un heb'naj xiwquilal, x'ec' pac'na heb'naj. Haca' camom xucan heb'naj. 5Xalni ángel tet heb'ya' cawan̈: —Machex xiwi, wohtajan ta ha' Comam Jesús x'aotcan̈ yin̈ culus che saya, 6yaja' matxac'oj Comam b'eti'. Xax pitzc'acan̈ Comam haca' xu yalni teyet. Ilwej c'anab' b'ay x'ec'le Comam. 7Tinan̈ aswej hal tet heb'ya' ẍcuywi yin̈ to xax pitzc'acan̈ xol hej camom. Ẍb'ab'ojtoj te sataj Galilea. Hat to cheyila' he b'a b'oj. Ha' hune' ti' xquin alaxtij wala' teyetan., ẍi ángel tet heb'ya' cawan̈ tu' 8Man̈e yab'e heb'ya' tzet xal ángel tu' xto heb'ya' yin̈ an̈e. Ẍtajn̈e xiw heb'ya', yaja' caw tzalalal ye pax yanma heb'ya', xto heb'ya' yalnoj tet heb'ya' ẍcuywi yin̈ Comam. 9Yet lan̈an sto heb'ya' tu', syeni sb'a Comam tet heb'ya'. Xtioẍli, lawitu' xhitzicoj heb'ya' sc'atan̈, shak'en heb'ya', x'oc lak'noj heb'ya' yin̈ yoj. 10Xalni Comam tet heb'ya': —Machex xiwi, as halwej tet heb'ya' xax cuywi win̈an tojab' heb'ya' Galilea, hat ẍjila'wej co b'a b'etu'. 11Lawi sto heb'ya' comi' tu'. Xtopax haywan̈ heb'naj soldado ẍtan̈en b'ay mujinaj Comam tu' yala' yul con̈ob' tet heb'naj swi'al yin̈ heb'naj sacerdote. Xalni heb'naj sunil tzet xu b'etu'. 12Lawi yab'en heb'naj tzet xal heb'naj tu', xto heb'naj sk'umlanoj sb'a b'oj heb'naj swi'con̈ob' ta ch'a'lax ch'en melyu tet heb'naj soldado. 13Xalni heb'naj: —Ha' cheyute heyalnoj: Yet ak'b'alil caw ib'ilon̈ yu wayan̈an, x'apni heb'naj ẍcuywi yin̈ naj Jesús tu' yinojtoj snimanil naj, quex chinaoj. 14Ta chab'e'loj naj gobernador hune' ti', mach ẍtac he c'ul, chon̈ toj co monte' najan haxin̈wal matzet ch'elojcoj. 15Lawitu' schanic'oj heb'naj soldado ch'en melyu. Chalnic'oj heb'naj tet anma haca' xute heb'naj swi'al yin̈ heb'naj sacerdote b'oj heb'naj swi'con̈ob' yalni. Yuxin hune' lek'ti'al shob'can̈ heb'naj tu' yehn̈e yalni heb'jetb'i israel ta caw yeli, hactu' x'elicoj. 16Lawitu' xto heb'ya' hunlan̈wan̈ ẍcuywi yin̈ Comam Jesús Galilea b'et hune' witz b'ay halb'ilcan yu Comam ta schab' sb'a b'oj heb'ya'. 17Hat xilayoj sb'a Comam b'oj heb'ya', shak'en heb'ya' Comam, yaja' ay hun cawan̈ heb'ya' ẍb'isb'on sc'ul. 18Lawitu', xhitzicoj Comam sc'atan̈ heb'ya', xalni Comam: —Xquin yacoj Comam Dios Yahawoj yin̈ sunil tzetet ay yul satcan̈an b'oj yin̈ sunil tzetet ay satyib'an̈k'inal ti'. 19Tinan̈ xin, as cuywej anma ay yul hunun con̈ob' yun̈e ya'ni yuluj sc'ul win̈an, cheya'ni ha' yi'a' yin̈ sb'ih Comam Dios Padre, b'oj hayin hin Sc'ahol Comam ti'an, b'oj Comam Espíritu Santo. 20Che cuynuj anma syijyen hantaj tzet xin cuy teyet ti'an. Yin̈ caw yeli, ayinn̈etic'acoj heyetb'iojan masanto ch'apnoj slahub'al tz'ayic.


Copyright
Learn More

will be added

X\