SAN MATEO 28

1Lahwi yec'canto istz'ayical xewilal, haxa yet issajbilo yin̈ babel tz'ayic yin̈ semana, caw sahab to ix María ah Magdala yeb hune'xa ix chiyij María tu' yila' bay mujan Comam. 2Hayet lan̈an isto ebix tu' yec' hune' niman chixcab yuto ayilo hune' yángel Comam Dios bay mujan Comam tu'. Yinilo naj hune' ch'en ch'en ayco ismajilo isti' bay mujan Comam, yay tz'on̈no naj yiban̈ ch'en. 3Caw chijepla yin̈ naj haca' isjepla c'uh. Wal xil isk'ap naj xin caw sajhopon̈e. 4Hayet yilni ebnaj soldado hune' tu' isluyluncan̈ ebnaj yu xiwquilal, yah pac'na ebnaj haca' camom. 5Yalni naj ángel tet ebix cawan̈ tu': —Mach chexxiwi, wohtajan tato ha' Comam Jesús alaxcan̈ yin̈ culus, ha' lan̈an hesayni. 6Wal xin matxa Comam ayicti bey ti', to xaitzitzbican̈ haca' yu yalni teyet. Ilwec'anab bay ec'le Comam. 7Tinan̈ xin as halwe tet ebnaj iscuywom tato maitzitzbican̈ Comam xol camom. Chibabito Comam tesata bey Galilea, ha' bey tu' cheyila' Comam. Ha' huntek'an ti' manhul wala'an teyet, ẍi naj ángel tu' tet ebix. 8Hayet yaben ebix huntek'an tu', isto ebix yalno yin̈ an̈e tet ebnaj iscuywom Comam; caw xiw ebix, yaja' xin caw tzalapaxo ebix yaben hune' tu'. 9Hayet ayco ebix yin̈ isbel tu' xin, isyeni isba Comam tet ebix, istioẍli Comam tet ebix. Ishitzico ebix isc'atan̈ Comam, yay jahno ebix sata Comam, yoc lak'no ebix yin̈ yoj Comam. 10Yalni Comam tet ebix: —Mach chexxiwi, as halwe tet ebnaj wuẍtajan tato chito bey Galilea, ha' bey tu' chinyila'an ebnaj, ẍi Comam. 11Yet lahwi isto ebix tu', isto haywan̈ ebnaj soldado ayco istan̈eno Comam tu' yul con̈ob. Yalni ebnaj tet ebnaj iswi'ehal yin̈ ebnaj sacerdote yin̈ tzet yuhi. 12Yet yaben ebnaj hune' tu' isto ebnaj islahti'n̈eno isba yeb ebnaj ichamta winaj iswi'ehal con̈ob Israel. Yak'ni ebnaj niman melyu tet ebnaj soldado tu', 13yalni ebnaj tet ebnaj: —Hac ti' cheyute heyalni haca' ti': “Yet lan̈an cowayan̈ yet ak'balil yul ebnaj iscuywom naj yelk'anoto isnimanil naj,” quexchi. 14Yaja' ta chabelo naj gobernador hune' tu' matzet chal hec'ul, chon̈ocan̈ tzotelo teyin̈ tet naj haxinwal matzet chitit teyiban̈, ẍi ebnaj. 15Lahwi tu' ischahnilo ebnaj ch'en melyu tet ebnaj yahawil yeco yin̈ ebnaj sacerdote yeb ebnaj cuywawom yin̈ ley. Yalni ebnaj soldado tet anma haca'tic'a yute yalni ebnaj tet ebnaj. Hune' lek'ti'al isnacan̈ ebnaj tu', yexn̈eto yallax xol anma Israel tinan̈. 16Lahwi tu', isto ebnaj hunlahon̈wan̈ iscuywom Comam Jesús bey Galilea yin̈ istzalanil hune' won̈an bay yal Comam ta chiapni ebnaj. 17Ha' bey tu' xin yil ebnaj Comam, yoc ebnaj yanoco ismay Comam, yaja' xin ay hun cawan̈ ebnaj cabcon isc'ul. 18Ishitzico Comam isc'atan̈ ebnaj iscuywom tu', yalni Comam: —Quinyacojan Comam Dios Yahawo yin̈ tzet ay yul satcan̈ yeb yin̈ tzet ay yul sat yiban̈k'inal ti'. 19Tinan̈ xin as cuywe anma yul hunun con̈ob yul sat yiban̈k'inal ti' cat yoc yul ink'aban. Cheyacanocan̈ ha' iswi' yin̈ isbi Comam Dios Mame, yeb yin̈ inbihan, hanin Isc'ahol Comam Dios inti'an, yeb yin̈ isbi Comam Espíritu Santo. 20Checuyni anma isyijen sunil cuybanile xawak'an teyet. Walinan xin ayinn̈etic'acojan heyetbiho yin̈ sunilbal tiempo masanto yet chilahwi hune' yul sat yiban̈k'inal ti', ẍicano Comam Jesús tet ebnaj iscuywom.

will be added

X\