SAN MATEO 26

1Lawi stan̈canoj yalni Comam Jesús hunk'aan tzetet ti' tet anma, xalni tet heb'ya' ẍcuywi yin̈: 2—Hexti' heyohtaj, cab'exan̈e k'in̈ snab'aniltij yet scolcha anma israel b'et Egipto. Yin̈ k'in̈ tu' hayin Ab'ilintij yu Comam Dios xol jet-anmail ti'an, chin alaxojcoj yul sk'ab' anmaan, cat hin yanojcan̈ yin̈ culusan. 3Yin̈tic'a hune' tz'ayic tu' syamb'a sb'a heb'naj sacerdote b'oj heb'naj swi'con̈ob' yatut naj Caifás, swi'al yin̈ heb'naj sacerdote. 4Sk'umlan sb'a heb'naj tzet chu stzab'noj heb'naj Comam cat spotx'noj heb'naj yalni. 5Yaja' xal heb'naj: —Mat yin̈oj k'in̈ ti', haxca taj ch'ah b'oc'na anma jin̈. 6Yet ay Comam Jesús Betania, xto yatut ya' Simón aytic'acoj lepra yin̈. 7Yet aycoj Comam yin̈ meẍa wa'oj, x'apni hune' ix sc'atan̈. Yetb'i ix hune' limetail perfume nohnaj, caw xuk' sam, alabastro sch'enal b'oj caw ay stohol. Lawitu' shamniatoj ix yin̈ swi' Comam. 8Ha' xilni heb'ya' ẍcuywi yin̈ Comam hune' tu' xchiwacan̈ sc'ul heb'ya' yin̈ ix, xalni heb'ya': —Nab'a' ch'etalaxtoj hune' perfume ti'. 9K'a' c'ul mi ta xu xtxon̈laxtoj yin̈ caw ay stohol yu scolwa yin̈ anma meb'a'. 10Yet xab'en Comam hune' tu' xalni tet heb'ya': —¿Tzet yuxin che ya' tacoj sc'ul hune' ix ti'? Hune' chu ix win̈ ti'an caw c'ul. 11Anma meb'a' cheyal ti' aytic'acoj te xol. Yaja' walinan mat stohb'aloj k'inal ayin te xolan. 12Shamicoj ix hune' an̈ xuk' sam ti' win̈an yun̈e ya'lax listoal hin nimanil ti'an yet chin mujlaxojan. 13Yin̈ caw yeli ẍwal teyetan, b'ayn̈etic'a ẍhal-laxojc'oj tzoti' yet colb'anil ti', ẍhal-laxojpax hune' xu ix win̈ ti' yalb'anilojan. 14Naj Judas ah Queriot aycoj stz'ajoj heb'ya' hunlan̈wan̈ ẍcuywi yin̈ Comam Jesús, xb'ey naj tzoteloj b'oj heb'naj swi'al yin̈ heb'naj sacerdote. 15Xalni naj: —¿Chub'il cheya' wetan ẍwacoj naj Jesús yul he k'ab'an? Lawitu' xanic'oj heb'naj 30 plata ch'en melyu tet naj. 16Yuxin x'oc naj saya' tzet chu yanicoj naj Comam yul sk'ab' heb'naj. 17Yin̈ b'ab'el tz'ayic k'in̈, hune' k'in̈ b'ay ẍwalax ixim pan machcoj yan̈al, sk'amb'e heb'ya' ẍcuywi yin̈ Comam Jesús tet: —¿B'ay chawoche ta ẍco watx'e ita ẍco lob' yin̈ k'in̈ ti'?. 18—Aswej yul con̈ob' yatut hune' naj. Cheyalnoj tet naj: Schej co Cuywaom jala'an ta hat chon̈ huluj jec'tze' k'in̈ tawatut ti'an, k'in̈ snab'aniltij tzet xu scolcha hej jichmam b'et Egipto, haxca hanic'xan̈e ayc'oj ya' co xol yalnian, quex chinaoj. 19Yuxin xto heb'ya' yala' haca' xute Comam yalni tu'. Ha' x'apni heb'ya', swatx'en heb'ya' ita ẍlolax yin̈ k'in̈ tu'. 20Haxa x'oc ak'b'al x'apni Comam b'oj heb'ya', x'oc tz'on̈noj Comam wa'oj b'oj heb'ya'. 21Yet lan̈an swa' b'oj heb'ya', xalni Comam: —Yin̈ caw yeli ẍwal teyetan, co xol ti' ay hune' mac chin anojcoj yul sk'ab' camicalan. 22Caw x'oc b'isc'ulal yu heb'ya' yet xab'en hune' tu'. Yuxin hununtajil xu sk'amb'en heb'ya' tet Comam, chalni heb'ya': —Mamin, toxc'anab' hayinan. 23Xta'wi Comam: —Hatic'a hune' wetb'i hun chin wa' b'ojan, ha' chin anojcoj yul sk'ab' camicalan. 24Yeli, yilaltic'a hin camoj hayin Ab'ilintij yu Comam Dios xol jet-anmail ti'an haca' yalni Yum Comam Dios win̈an. Yaja' c'antaj naj chin anojcoj yul sk'ab' camical tu'an. K'a c'ulmi ta mach xpitzc'ana naj hajxa. 25Naj Judas x'anicoj Comam yul sk'ab' camical tu', xal naj: —Mam Cuywaom, wac'am hayinan, —Ho', hach. 26Yet lan̈an swa' Comam b'oj heb'ya', xican̈ ixim pan, xa'ni yuch'antioẍ tet Comam Dios. Lawitu' sk'axponay ixim, xa'ni tet heb'ya', xalni yin̈ hacti': —Chawej cat he loni, haxca in nimanilan. 27Lawitu' xinican̈ ch'en copa. Xa'nipax yuch'antioẍ tet Comam Dios, xa'ni tet heb'ya', xalni paxoj: —Uc'wej hune' ti' te hunil, 28haxca hune' ti' hin chiq'uilan. Yu hin chiq'uil ẍmalojtojan chija' sb'a slahc'ulal Comam Dios b'ay chu stan̈can smul tx'ihal anma. 29Tinan̈ ẍwalcan teyetan, matxa b'ay ẍwuc'u' vino ti'an, to hato yet ch'ocoj hin Mam Yahawojan cat to wuc'nuj pax vino ac' b'oj hexan. 30Lawi sb'itn̈eniloj heb'ya' hune' b'it tet Comam Dios, xto Comam Jesús b'oj heb'ya' b'et tzalan Olivo. 31Xalni Comam tet heb'ya': —Yet hune' ak'b'alil ti', te hunil ẍcab'conojcan̈ he c'ul win̈an, haxca tz'ib'n̈eb'ilcanoj, chalni yin̈ hacti': Chin potx'o' naj tan̈eom caneluan cat spaxoj tiẍna no' canelu, ẍiayoj. 32Yaja' yet xax quin pitzc'acan̈an chin b'ab'otoj te sataj Galileaan. 33Xalni ya' Pedro: —Mamin, waxan̈ca sunil mac ẍcab'conojcan̈ sc'ul tawin̈, walinan machoj. 34—Yin̈ caw yeli ẍwal tawetan, hune' ak'b'alil ti' yalan̈to maẍto ch'ok' no' chiyo, oxel chawala' ta mat hin hawohtajojan, ẍi Comam tet ya'. 35—Waxan̈ca chin cam tawin̈an Mamin, yaja' machu web'anan ta hach wohtajan, Hactu' yalni heb'ya' yak'b'il. 36Lawitu' xto Comam Jesús b'oj heb'ya' ẍcuywi yin̈ b'et Getsemaní. Xalni Comam tet heb'ya': —Canan̈wej tz'on̈noj b'eti', chin to wa' woración co satajtoj ti'an. 37Han̈c'a ya' Pedro b'oj heb'ya' cawan̈ sc'ahol ya' Zebedeo xitoj Comam yin̈. Hunep tu' ichi staquiloj sc'ul Comam, x'oc b'isc'ulal yu. 38Xalni tet heb'ya': —Ẍwab'e hin camiloj yu b'isc'ulalan, canan̈wej b'eti', iwejiloj ninoj he wayan̈ win̈an. 39Lawitu' xhitztoj Comam hanic'xa. X'ay jahnoj, x'aycan xulnuj sat tx'otx', xalni yin̈ yoración hacti': —Mam, ta chu yec'toj hune' sya'tajil lan̈an yul win̈ ti'an, yaja' mat haca'oj chal hin c'ulan, to haca' chal ha c'ul. 40Lawitu' xhul b'ay xcan heb'ya' oxwan̈, xilni to caw ẍway heb'ya', yuxin xal tet ya' Pedro: —¿Tox machu heyiniloj he wayan̈ hunepoj k'inanil win̈an? 41Iwejiloj he wayan̈, ocan̈wej yin̈ oración, haxin̈wal machex ay yin̈ xtx'ojal, haxca wal heyanma t'in̈an yalni, yaja' wal he nimanil mach ẍtecha yu ta chul ilweb'al. 42Lawitu' xtopax Comam hunecxa, xalni yin̈ yoración hacti': —Mam, ta machu yec'toj hune' sya'tajil lan̈an yul win̈ ti'an, yub'ab' haca' chal ha c'ul. 43Lawitu' xhulpax Comam sc'atan̈ heb'ya' oxwan̈, xilni to yehn̈e sway heb'ya', haxca mach ẍtecha naj wayan̈ yu heb'ya'. 44Lawitu' xtopax ya'noj yoración yin̈ syoxel. Haca'tic'a xal yin̈ sb'ab'elal b'oj scayel hactu' xute yalni. 45Haxa xhul sc'atan̈ heb'ya' xalni tet heb'ya': —¿Tom yehn̈e he wayi, mach ẍtecha wayan̈ heyu? Tinan̈ lan̈an yapni yorail b'ay chin alaxojcoj hayin Ab'ilintij yu Comam Dios xol hej jet-anmail ti' yul sk'ab' heb'naj ahmulan. 46Ahan̈wejwanoj, ton̈wej, haxca lan̈an yul naj chin anojcoj yul sk'ab' heb'naj tu'an. 47Lan̈anto yalni Comam hunk'aan tu' yet x'apni naj Judas yetb'i heb'ya' hunlan̈wan̈. Tx'ihal heb'naj tzujan yin̈ naj, heb'naj xatoj heb'naj swi'al yin̈ heb'naj sacerdote b'oj heb'naj swi'con̈ob'. Yetb'i heb'naj yespada b'oj ste'. 48Naj Judas tu' xax yal naj tet heb'naj mac stzab'a' heb'naj, xalni naj: —Naj chin tz'oho'ayan, ha' naj che tzab'a'ayoj. 49Ha' x'apni naj xhitzicoj naj sc'atan̈ Comam, xalni naj: —Chin tioẍli tawetan Mamin, Stz'ohniayoj naj Comam. 50—Wamigo, yijye b'aytet chul hawub'. ẍi Comam tet naj. Hunep tu' x'oc somna heb'naj stzab'nojay Comam. 51Hune' ya' tzujan yin̈ Comam xihtij ya' yespada, smasniltoj ya' xtxiquin naj schejab' naj swi'al heb'naj sacerdote. 52Yaja' xal Comam tet ya': —Aytoj hawespada tu' yul yatut, haxca mac espada stzab'a, espada ch'i'ni camoj. 53¿Tox machu hin k'anni cab'lan̈eb'oj majan ángel tet hin Maman? Tinan̈n̈em chulna heb'naj. 54K'inaloj ta chin k'an tet Comaman ta chin scolan, machmi chij sb'a tzet tz'ib'n̈eb'ilcan yul Yum Comam Dios win̈an. 55Lawitu' xalni Comam tet heb'naj xb'ey tzab'noj tu': —¿Tox elk'omin teyetan? yuxin ib'il heyespada b'oj he te' chex hul hin he tzab'nojan. Hunun tz'ayic hin cuywa te xol yamak' yatut Comam Diosan, yaja' mach quin he tzab'an. 56Tinan̈ hacti' chute sb'a, yun̈e yijni sb'a tzet tz'ib'n̈eb'ilcan yu heb'ya' schejab'lom Comam Dios, Lawitu' xtin̈chaotcan Comam yu heb'ya' ẍcuywi yin̈, x'el heb'ya'. 57Lawitu' x'iottoj Comam Jesús yatut naj Caifás swi'al heb'naj sacerdote. Hat yaman heb'naj cuywaom yin̈ sley ya' Moisés, b'oj heb'naj swi' con̈ob'. 58Wal ya' Pedro, nahat tzujan ye ya', masanto x'ocapnoj ya' yamak' yatut naj Caifás tu'. X'ay tz'on̈noj ya' xol heb'naj policío yu yilni ya' tzet ẍtan̈ Comam. 59Say heb'naj swi'al yin̈ heb'naj sacerdote b'oj sunil heb'naj swi'con̈ob' lahti'wom mac cha' sb'a yun̈e shob'nican̈ tzoti' yib'an̈ Comam Jesús cat scawxicoj camical yib'an̈ Comam. 60Tx'ihal heb'naj x'octoj yul n̈ah tu' testigoal, shob'nican̈ heb'naj lek'ti'al yib'an̈ Comam, yaja' mat lahanoj xute heb'naj yalni. Lawitu' x'apni cawan̈xa heb'naj. 61Xalni heb'naj: —Hayon̈ ti'an, xjab'e yalni naj ti'an: Hayin ti'an chu hin huchanayoj yatut Comam Dios ti'an, yaja' yin̈ oxeb' tz'ayic ẍwacan̈ selelan, ẍi naj. 62X'ah lin̈noj naj yahaw heb'naj sacerdote xalni naj tet Comam: —¿Tzet yuxin machach ta'wi? ¿Tox machawab'e tzet ẍhalot tawin̈ ti'?. 63Yaja' mach ninoj tzet xal Comam, yuxin xal pax naj: —Hal yin̈ sat Comam Dios itzitz ta hachti' Cristo Sc'ahol Comam Dios haweyi. 64Xta'wi Comam: —Hachtic'a lan̈an hawalni. Yin̈ caw yeli ẍwal teyetan, hayin Ab'ilintij yu Comam Dios xol hej jet-anmail ti'an, ẍto heyila' wocoj tz'on̈noj yin̈ swatx' Comam Dios caw ay scan̈il yean, cat wayojiloj yib'an̈ asunan. 65Yet xab'en naj yahaw tzet xal Comam tu' stzilniloj naj xil sk'ap syeb'aniloj stit showal. Xalni naj tet heb'naj yetb'i: —Naj ti' slahb'a sb'a naj b'oj Comam Dios yalni, ¿tzetto hunujxa ẍco k'an jab'e'? Haxca hayon̈ caw ẍjab'e yalni naj. 66¿Tzet cheyute heyalni yin̈ naj tinan̈? —¡Yet ay scam naj!. 67Lawitu' x'oc heb'naj stzub'n̈enoj sat Comam, ichi smak'ni heb'naj. Ay heb'naj xpak'nicoj sat Comam. 68Chalni heb'naj: —Ta hachti' Cristo hach, haliloj jetan mac cach mak'ni. 69Tz'on̈an ya' Pedro yamak' te' n̈ah tu', yet x'apni hune' ix munlawom b'etu' sc'atan̈ ya'. Xalni ix: —Hachti' hawetb'i ha b'a b'oj naj Jesús ah Galilea ti'. 70Yaja' xeb'a ya' yin̈ sat sunil anma ay b'etu', xalni ya': —Mat wohtajojan tzet chawal tu'. 71Ha' shec'niltij sb'a ya' sti' pulta, xalni hune'xa ix tet heb'naj yamanc'oj tu': —Naj ti' yetb'i sb'a naj b'oj naj Jesús ah Nazaret ti'. 72Yaja' xeb'a ya' hunecxa, xalni ya': —Chil Comam Dios to mat wohtajoj naj tu'an. 73Hunep tu', xalni hunk'aan heb'naj tet ya': —Yin̈ caw yeli, hachti' hawetb'i ha b'a b'oj heb'naj chet ec' naj Jesús ti', haxca ha' tzotelb'al, ha' chach yeniloj. 74Yuxin xal ya': —Mat ninoj wohtajoj hune' naj ti'an. Tijab' stz'acti' Comam Dios wib'an̈an ta ton̈e ẍwalan, Lan̈anto yalniloj ya' hune' tu' yet x'ok' no' chiyo. 75Xtit yin̈ sc'ul ya' tzet xal Comam: Oxel cha b'ala'c'ayoj ta mat hin hawohtajojan, cat yok'oj no' chiyo, . Yuxin ha' xtit hune' tu' yin̈ sc'ul ya', x'oc tx'inna yin̈ yanma ya', x'eltij ya' ok'oj yin̈taj.


Copyright
Learn More

will be added

X\