SAN MATEO 25

1Yalnipaxo Comam Jesús: —Yet chioc Comam Dios Yahawo bey ti', lahan chak'le anma haca' yu lahon̈wan̈ ebix k'opo to yin̈ hune' mohyilal yin̈ ak'balil. Yito ebix iscantil, isto ebix chahwal yin̈ naj mohyom tu'. 2Yaja' xin ay howan̈ ebix mach helanoj, wal howan̈xa ebix xin caw helan ebix. 3Ebix mach helano tu', han̈e te' aceite ayayto yul iscantil ebix, han̈e te' yito ebix. 4Wal ebix helan xin isnohtze ebix iscantil, yinipaxto ebix yak'bilxa yaceite yul islimeta. 5Yaja' xin ec'to yorahil yulbal naj chimohyi tu', caw xin k'ahan yechman ebix, matxa chitecha wayan̈ yu ebix yuxin waycan̈ ebix sunil. 6Haxa yin̈ chuman ak'bal, yaben ebix yallax haca' ti': “¡Ahan̈wewanoj! ¡Lan̈an yul naj chimohyi lah! Elan̈weti hechaba naj,” ẍi. 7Yet yaben ebix hune' tu' yahwano ebix, yanico ebix k'a' yin̈ iscantil. 8Yalni ebix howan̈ mach helano tu' tet ebix helan haca' ti': “Ak'we nino heyaceite jetan̈ yuto lan̈an istan̈ilo k'a' yin̈ cocantilan̈ lah,” ẍi ebix. 9Istak'wi ebix helan tet ebix mach helano tu': “Mach chu jak'nihan̈ heyet, yuto ta chijak'an̈ hanic'o heyet mach chimchabe hanic' ti' teyin̈, mach chimchabepaxocan̈ jetan̈. Wal xin, c'ul ta chexto helok'o heyet,” ẍi ebix. 10Yet ayto ebix howan̈ lok'o aceite tu', yapni naj chimohyi. Wal ebix caw helan tu' octo ebix yinta naj yin̈ mohyilal tu', lahwi tu' xin ispebalaxcanilti te' pulta. 11Hunepxatic'a xin yapni ebix howan̈ to lok'o aceite, yoc ebix awocto sat pulta, yalni ebix: “Mamin, Mamin, haj pulta jetan̈,” ẍi ebix. 12Istak'wilti naj mohyom tu' tet ebix: “¡Machoj! Yin̈ caw yel chiwalan, mach quexwohtajojan,” ẍi naj. 13Yuxin chiwalcanojan teyet, caw helan cheyute heba yuto mach heyohtajoj tzet tz'ayical yeb tzet orahil chinhulan, ẍi Comam. 14Yalnipaxo Comam Jesús: —Yet chul Comam Dios Yahawoj, lahan chak'le anma haca' yu ebnaj ischejab hune' naj yahaw munil. Oc yin̈ isnabal naj isto bey hune'xa nan con̈obal caw nahat, yaja' yet yalan̈to maẍto chito naj, yawten naj ebnaj ischejab yu yanicano naj ismelyu yul isk'ab ebnaj. 15Tet hune' naj, howeb mil quetzal yacano naj yul isk'ab naj, wal tet hunxa naj xin, cab mil quetzal yacano naj, haxa tet hunxa naj xin mil quetzaln̈e yacano naj. Hatatic'a ishelanil hunun ebnaj, hac tu' yu yanicano naj ch'en tet ebnaj. Lahwi tu' isto naj. 16Naj chejab chahnicano ch'en howeb mil quetzal, oc naj munil yeb ch'en, caw xin howebto mil ch'en yik' naj yiban̈ilo ch'en howeb mil tu'. 17Hacpax tu' naj chahnicano ch'en cab mil, cab milto ch'en yik'paxo naj yiban̈ilo ch'en cab mil tu'. 18Wal naj chahnicano ch'en hune' mil, ishol naj tx'o tx'otx' ismujni naj ch'en alaxcano tet yu naj yahaw tu'. 19Yet caw nimanxa tiempo chielto xin, yul naj yahaw melyu tu', yawten naj ebnaj ischejab yu yilni naj hantaxa ismelyu. 20Naj chahnicano ch'en howeb mil, ha' naj oc babel yin̈ sat naj yahaw melyu tu'. Yanicano naj ch'en howeb mil ak'lax tet yeb ch'en howeb mil yik' naj, yalni naj: “Mamin, howeb mil ch'en hawacano wetan, yaja' xin howebxa mil ch'en chiwik'an yiban̈ilo ch'en,” ẍi naj. 21Yalni naj yahaw melyu tu' tet naj: “Caw c'ul mayu hamunlahi, yeb caw yijem maxawute haba. Yu caw c'ul maxawute haba yin̈ hanic' wacanojan tawet, yuxinto caw hantan̈eto tzet chiwacanicojan yul hak'ab. Tinan̈ xin ocan̈, ak' tzalaho hac'ul inc'atan̈an,” ẍi naj tet naj. 22Lahwi tu' xin yapni naj chahnicano ch'en cab mil, yalni naj tet naj yahaw melyu tu': “Mamin, cab mil ch'en hawacano wetan, yaja' xin cabtopaxo mil ch'en wik'an yiban̈ilo ch'en,” ẍi naj. 23Yalni naj yahaw melyu tu' tet naj: “Caw c'ul mayu hamunlahi, yeb caw yijem maxawute haba. Yu caw c'ul hawute haba yin̈ hanic' wacanojan tawet, yuxin caw nimanto tzet chiwacanojan yul hak'ab. Wal tinan̈ ocan̈, ak' tzalaho hac'ul inc'atan̈an,” ẍi naj. 24Haxa yet yapni naj chahni ch'en hune' mil xin, yalni naj tet naj yahaw melyu tu': “Mamin, wohtajan tato hach ti' caw how hach, yuto chahatx' tzet ye tu' maẍtajach tz'unn̈e; chawinipaxocan̈ tzet ye tu' maẍtajach watx'en̈eloj. 25Wal xin quinxiwan, yuxin inmujan hamelyu yalan̈ tx'otx', yaja' tinan̈ xin chiwak'canojan ch'en tawet,” ẍi naj. 26Yalni naj yahaw melyu tu' tet naj haca' ti': “Hach ti' caw mach c'ulo hamunlahi, caw isa hach. Ta hawohtaj tato chinhatx'can̈an tzet ye tu' maẍtajinan tz'unn̈e, yeb ta chiwican̈an tzet ye tu' maẍtajinan watx'en̈eloj, 27estam hawacto inmelyuti'an yul banco. Hayet maquinhulti'an xin, manchahnihan ch'en yeb yal,” ẍi naj tet ischejab tu'. 28Lahwi tu' xin yalni naj tet ebnaj ischejab: “Iwelo ch'en mil quetzal tet naj cat heyak'ni ch'en tet naj ik'n̈e ch'en lahon̈eb mil. 29Yuto ha' mac ay tzet aya chiak'lax yak'bil tet, hac tu' xin caw ec'balto tzet ay hune' mac tu'. Wal mac matzet ay xin, ha' nich'an ay yul isk'ab tu', chiilaxilo tet. 30Hune' naj chejab matzet chiel yin̈ ti' hawelto naj xol k'ejholo, ha' bey tu' xin chiok' naj yin̈, cat isn̈etx'la yeh naj yu isya'tajil,” ẍi naj yahaw tu', ẍi Comam. 31Yalnipaxo Comam Jesús: —Hanin Ak'bilintijan texol yu Comam Dios, chinhulan Yahawilo yeb isk'ak'al wipan, cat yulpaxo ebnaj ángel wintajan, cat way tz'on̈nojan yul incapilan. 32Wal anma ay yul hunun con̈ob yul sat yiban̈k'inal ti', chicutxico insatajan, cat inpohnihan xol, haca' chu ispohni naj tan̈em me', no' me' xol no' chiw. 33No' me' tu' yin̈ iswatx'k'ab naj chaco no', wal no' chiw xin yin̈ ismeck'ab naj ch'oc no'. 34Hanin Yahawil inti'an chiwalan tet anma ayco yin̈ inwatx'k'aban haca' ti': “Hex xahechah isc'ulal Inmaman, ocan̈we yul hune' ehobal watx'ebil teyet yu Inmaman. Hune' ti' watx'ebil yettax iswatx'i hune' yul sat yiban̈k'inal ti'. 35Yuto hayet inn̈ochahan, heyak'ni tzet chinlohan. Yet istaj inti'an heyak'ni ha' wuc'u'an, yet wec'an ink'ana'an bay chinwayan, heyak'ni bay quinwayan. 36Yet lan̈anxa wel t'ilnojan, heyak'ni xil ink'apan; yet ya'ayinan, hebey quinhetuclenojan. Yet ayinictojan yul preso, hebey quinheyilnojan,” quinchin̈etic'ahan tet anma tu'. 37Ha' anma watx'en istoholal tu' xin, chisk'ambe wetan haca' ti': “Mamin, ¿bak'ini cachn̈ohcha tu' jak'nihan̈ tzet chalo? yeb ¿bak'ini taj hati' jak'nihan̈ ha' hawuc'u? 38¿Bak'ini xin hak'an bay cachway jetan̈, jak'nihan̈ bay cachwayi? yeb ¿bak'ini matxa xil hak'ap, jak'nihan̈ xil hak'ap? 39¿Bak'ini cachyabilnipaxoj, cobeyan̈ cachcotuclenojan̈, yeb yet hawocto yul preso, con̈beyan̈ cachjilnojan̈?” ẍi anma tu'. 40Chiwalnihan tet haca' ti': “Yin̈ caw yeli chiwalan teyet, yet hecolwa yin̈ hunu ebnaj wuẍtajan, waxan̈ca caw comon yeq'ui, win̈an hewatx'e sunil huntek'an tu',” quinchin̈etic'ahan tet. 41Lahwi tu' xin chiwalnihan tet anma ayco yin̈ inmeck'aban: “Elan̈we yin̈ insatan hex tz'acti'n̈ebilexxa ti', asi'we xol k'a k'a' mach istan̈bal watx'ebilxa tet naj matzwalil yeb tet ebnaj ischejab naj. 42Yuto yet inn̈ohchahan, maẍtic'a heyak' nino tzet inlohan, yet istaj inti'an, maẍtic'a heyak' nich'ano ha' wuc'u'an. 43Yet wec'an ink'ana'an bay chinwayan, maẍtic'a heyak' bay quinwayan. Yet matxa xil ink'apan maẍtic'a heyak' hunu xil ink'apan. Yet ya'ayinan yeb yet ayinictojan yul preso, maẍtic'a quinhetuclehan,” quinchin̈etic'ahan tet. 44Yaja' chisk'ambe anma tu' wetan: “Mamin, ¿bak'ini cachn̈ohchahi, yeb istaj hati', cachec'paxo hak'ana' bay cachwayi, yeb yet matxa xil hak'ap, machi xin con̈colwahan̈ tawin̈? Yebpaxo, ¿bak'ini cachyabilni yeb hawocto yul preso? ¿Machi xin con̈colwapaxojan̈ tawin̈ hawalni?” ẍi anma tu'. 45Yaja' chintak'wihan tet: “Yin̈ caw yeli chiwalan teyet, yet mach quexcolwa yin̈ hunu ebnaj wuẍtajan, yeb ebix wanaban, waxan̈ca caw comonn̈e yeq'ui, win̈an mach quexcolwa tu',” quinchin̈etic'ahan tet. 46Ha' huntek'an anma tu' xin, chitocano yin̈ isya'tajil yin̈ huneln̈e. Wal anma watx'en isc'ulal, chischah isk'inal mach istan̈bal, ẍi Comam Jesús.

will be added

X\