SAN MATEO 25

1Ẍwalni pax teyetan tzet cha'le' anma yet ch'ocoj Comam Dios Yahawoj b'eti'. Lahan b'oj tzet xa'le lahun̈wan̈ heb'ix k'opotaj xto yin̈ mohilal xu yet ak'b'alil. Xi' heb'ix scandil, xto heb'ix smajnoj yapni naj ẍmohyi tu'. 2Yaja' howan̈ heb'ix, suc ya'ni heb'ix, wal howan̈xa heb'ix, caw itz'at xute sb'a heb'ix. 3Heb'ix suc ya'ni tu' mach xitoj heb'ix yak'b'il yaceite ocnojcoj yu. 4Wal heb'ix tz'ajan sc'ul, itz'at xute sb'a heb'ix, xinitoj heb'ix yak'b'il yaceite. 5Ha' x'ec'nitoj yulb'al naj ẍmohyi tu', xax ah ak'b'al, yuxin xtib'ay wayan̈ yu heb'ix, xwayc'oj heb'ix sunil. 6Haxa yin̈ chuman ak'b'al ay hune' mac ch'awi, chalni: Lan̈an yul naj ẍmohyi, as chawej naj, ẍi. 7X'ahwanoj heb'ix, stzujb'an heb'ix scandil. 8Xalni heb'ix suc ya'ni tu' tet heb'ix tz'ajan sc'ul: A'wej ninoj heyaceite jetan, haxca ẍtan̈iloj k'a' yin̈ co candilan, ẍi heb'ix. 9—Machu ja'nian, haxcataj mach ẍc'uxannoj jin̈ co lahun̈wan̈il. K'a' t'in̈an chex to he lok'o' heyet, ẍi heb'ix howan̈ tz'ajan sc'ul. 10Yuxin xto heb'ix tu' slok'o' yet. Hawalto sto heb'ix yet xhulcan̈ lemna naj ẍmohyi tu'. Heb'ix tz'ajan sc'ul tzujan xu yoctoj heb'ix yin̈ naj mohyom yin̈ hune' k'in̈ tu', lawitu' xpeb'alax pulta. 11Hunep tu' x'apni heb'ix xb'ey slok'o' yaceite, ch'awictoj heb'ix: Mamin, Mamin, haj pulta jetan, ẍi heb'ix. 12Xta'wiiltij naj mohyom tu': Machoj, mat hex wohtajojan, ẍi naj. 13Hactu' wean. Yuxin nann̈e heyu haxca mat heyohtajoj tzet stz'ayical b'oj tzet orail chin hulujan. 14Wala' teyetan tzet cha'le' anma yet ch'ocoj Comam Dios Yahawoj b'eti'. Lahan b'oj tzet xa'le schejab' hune' naj yahaw munil xto yul hune' con̈ob' caw nahat. Lan̈anxa sto naj, xawten naj schejab', caw tx'ihal ch'en melyu xa' naj tet heb'naj. 15Tet hune' naj xac'oj naj howeb' talento ch'en, tet hune'xa naj cab' talento, tet naj syox, hune' talento. Hantajtic'a stz'ajanil sc'ul heb'naj smunla b'oj ch'en, hactu' xu ya'ni naj ch'en tet hunun heb'naj. Lawitu' xto naj. 16Naj xchani ch'en howeb' talento, man̈e schac'oj naj ch'en, x'oc naj munlaoj b'oj ch'en, yuxin howeb'to talento xi' naj yin̈ ch'en. 17Hactu' xute pax naj schani ch'en camajan, cab'to majan ch'en xi' naj yin̈ ch'en. 18Yaja' naj xchani ch'en hune', swatx'e naj hune' holan smujni naj ch'en xac'oj naj yahaw munil tet. 19Yet ayxana tu' xin, xhul naj yahaw munil, x'oc naj yilnoj hantaj ch'en melyu xi heb'naj munlawom tu'. 20Naj xchani ch'en howeb' talento, ha' naj xb'ab'icoj yin̈ sat naj. Xanic'oj naj ch'en howeb' x'a'ot tet b'oj howeb'xa talento xi' yin̈ ch'en. Xalni naj: Mamin, howeb' talento xawac'oj wetan, xto wi' howeb'xa talento yin̈ ch'enan, ẍi naj. 21Xalni naj yahaw munil: Caw c'ul xu ha munla b'oj hin melyuan; haxca tz'ajan xawute ha c'ul yin̈ ni'an solic, yuxin caw tx'ihalto tzet ẍwa'a'coj yul ha k'ab'an. Tinan̈, ocan̈ oche sc'ulch'anil win̈an, ẍi naj tet schejab' tu'. 22Lawitu' x'ec'toj naj xchani ch'en cab' talento, xalni naj hacti': Mamin, cab' talento xawa' wetan, tinan̈ cab'to ch'en xwi'an, ẍi naj. 23Xalni pax naj yahaw munil tu' tet naj: Caw c'ul xu ha munla b'oj hin melyuan. Haxca tz'ajan xawute ha c'ul yin̈ ni'an solic, yuxin caw tx'ihalto tzet ẍwa'a'coj yul ha k'ab'an. Tinan̈ ocan̈ oche sc'ulch'anil win̈an, ẍi naj tet hunxa schejab' tu'. 24Haxa x'ec'toj naj syox ẍchani ch'en hune' talento yin̈ sat naj, xalni naj: Mamin, wohtajan to mach ha k'ahb'anil, cha hatx'can̈ tzetet mat hachoj xa tz'unu. Ton̈e chawoche ha wi'acan̈ tzet stz'un hunujxa anma. 25Yuxin xquin xiwcan̈an, xin mujni ha melyuan. Tinan̈ tz'ajan ẍwa'c'oj ch'en tawetan, ẍi naj chejab' tu'. 26Xalni naj yahaw tu' tet naj: Chejab'lom tx'oj, isa. Ta hawohtaj ta ton̈e ẍwoche chin hatx'wi b'ay matzet chin tz'unan, b'oj ton̈e ẍwican̈ tzet stz'un hunujxa anmaan, 27¿tzet yuxin mach xawa' hin melyu tu' c'amil tet hunuj mac ẍmunla b'oj ch'enan? Haxin̈wal ha' xquin hulan, xin chani ch'en b'oj yalan, ẍi naj tet schejab' tu'. 28Lawitu' xalni naj tet yak'b'il heb'naj chejab': Tinan̈ iwejiloj ch'en talento tet naj ti', cat heya'ni ch'en tet naj i'n̈e ch'en lahun̈eb'. 29Haxca mac ay tzet aya, ch'a'lax yak'b'il tet, yun̈e yak'b'iln̈en sb'a yet. Mac matzet aya, hasta ni'an ay tet ch'ilaxiloj. 30Hune' naj chejab' matzet ch'ocnicoj ti', b'ejwejiltoj naj xol sk'ejalholo, hat ch'ok'oj naj cat yec'oj ya' yanma naj, ẍi naj yahaw munil tu'. 31Hayin Ab'ilintij yu Comam Dios xol jet-anmail ti'an, chin huluj yahawoj b'oj sunil hej wángelan, cat wocoj tz'on̈noj yul hin tz'on̈ob'al ch'a'ni hin mayan. 32Hantaj anma ay yul hunun con̈ob' ẍyamb'alaxojcoj yin̈ hin satan, cat spohlaxoj xol haca' chute naj tan̈eom canelu spohniloj no' canelu xol no' caplaẍ. 33Ẍwanojcoj anma c'ul yin̈ hin watx'an, cat wanojcoj anma tx'oj yin̈ hin mecan. 34Hayin Reyin ti'an, ẍwala' tet mac aycoj yin̈ hin watx'an: Hex ab'il sc'ulch'anil teyet yu hin Maman, ochewej win̈ tzet watx'eb'ilcan teyet yu hin Maman yettax swatx'encan hune' satyib'an̈k'inal ti'. 35Haxca yet xquin n̈ohchaan xquin heya'ni wa'ojan, xtaj hin ti'an xeya'ni ha' wuc'uan, xquin ec' k'ana' b'ay chin ehan, xquin he chani yul heyatutan. 36Man̈ xil k'apeal wean, xeya' xil hin k'apan, xtx'ojb'i hin c'ulan, xquin he tan̈enan. Xquin alaxictoj yul presuan, xquex b'ey hin heyilnojan, quin chinaoj tet anma tu'an. 37Yaja' wal anma c'ul tu', ẍta'woj wetan chalnoj: Mamin, ¿b'ak'ini xcach n̈ohchayi xcach ja'ni wa'ojan? ¿Xtaj ha ti' xja'ni ha' hawuc'u'an? 38¿Xcach ec' a k'ana' b'ay chach ehi, xcach co chanian? ¿B'ak'ini man̈ xil k'apeal haweyi, xja'ni xil ha k'apan? 39¿Xtx'ojb'i ha c'ul mato ayachictoj yul presu xcon̈ b'ey hach jilnojan? ẍinaoj anma tu' wetan. 40Ẍwalnojan: Yin̈ caw yeli ẍwal teyetan, yet xquex colwa yin̈ hunuj wuẍtajan, wanab'an, waxan̈ca caw comonaln̈e yeyi, haca'tic'a win̈ xquex colwaan, quin chinaojan. 41Lawitu' ẍwalnoj tet mac aycoj yin̈ hin mecan: Hitzan̈wejiloj yin̈ hin satan, hex tz'acti'n̈eb'ilxa yu hin Maman. Aswejcanoj xol k'a' k'a' maẍtic'a ẍtan̈i, watx'eb'ilcan tet naj matzwalil b'oj yángeles. 42Haxca yet xquin n̈ohchaan mach xquin heya' wa'ojan, xtaj hin ti'an mach ninoj ha' xeya' wuc'uan. 43Xquin ec' in k'anoj b'ay chin ehan, mach xquin he chaan, man̈ xil k'apeal wean, mach xeya' xil hin k'apan. Xtx'ojb'i hin c'ulan mato ayinictoj yul presuan, mach xquex b'ey hin heyila'an, quin chinaoj tet anma tu'an. 44Yaja' ẍta'woj wetan cat yalnoj: Mamin, ¿b'ak'in̈ xin xcach n̈ohchayi, mato xtaj ha ti', mato xcach ec' a k'ana' b'ay chach ehi, mato man̈ xil k'apeal haweyi, mato xtx'ojb'i ha c'ul, mato ayachictoj yul presu? ¿Tox mach xcon̈ colwa tawin̈an ta cach jilan? ẍinaoj anma tu' wetan. 45Yaja' chin ta'wojan: Yin̈ caw yeli ẍwal teyetan, yet mach xquex colwa yin̈ hej wuẍtaj ti'an, wanab' ti'an, waxan̈ca comonaln̈e yeyi, win̈ mach xquex colwaan, quin chinaojan. 46Heb'jetb'i tu' ẍtojcan yin̈ sya'tajil mach stan̈b'al. Wal mac st'in̈anil xu, schab' sk'inal mach stan̈b'al.


Copyright
Learn More

will be added

X\