SAN MATEO 24

1Yet x'eltij Comam Jesús yamak' yatut Comam Dios, lan̈an yi'nitoj Comam sb'elal witz Olivo yet xhitzicoj heb'ya' ẍcuywi yin̈ sc'atan̈, syeni heb'ya' hej te' n̈ah watx'en̈eayoj yatut Comam Dios. 2Yaja' xal Comam tet heb'ya': —Yin̈ hantaj cheyil ti', yin̈ caw yeli ẍwal teyetan, ch'apnoj stz'ayical b'ay ẍmak'laxojc'oj huynayi, matxa hunuj ch'en ẍcanoj yib'an̈ hune'xa. 3Ha' x'apni Comam Jesús swi' tzalan Olivo, x'ay tz'on̈noj, xhitzicoj haywan̈ heb'ya' ẍcuywi yin̈ sc'atan̈, xalni heb'ya' tet: —Ẍjochean ta chawal jetan b'ak'in̈ chuuj hune' xawal tu'. ¿Tzet ẍyenoj yet toxa chach huluj, yet cha helnoj tzet ye satyib'an̈k'inal ti'?. 4Xta'wi Comam: —Nann̈e heyu, mach mac tet cheya' sub'u' he b'a. 5Haxca tx'ihal mac ẍhob'nojcoj hin b'ih yin̈an cat yalnoj: Hayin ti' Cristo hinan, ẍinaoj. Tx'ihal anma sub'chaoj yu heb'naj. 6Ha' cheyab'enoj yichojcan̈ howal hej b'eti' b'oj yul hunk'aanxa con̈ob', machex xiwojcan̈, haxca yilal yuuj hunk'aan tu', yaja' maẍto slahub'aloj. 7Haxca ay hej con̈ob' cha'a'can̈ howal b'oj hunujxa nancon̈ob'al, heb'naj yahaw hej hunun con̈ob' cha'a'can̈ heb'naj howal. Tx'ihal b'ay ch'ayoj wahil. Nananxan̈e b'ay ch'ec'oj chixcab'. 8Hantaj sya'tajil chuuj tu' yichob'anilixto yeyi. 9Yet hunk'aan tz'ayical tu' ch'a'laxoj ec'oj ya' heyanma. Hasta chex potx'laxoj. Etza sunil anma chex cajnoj haxca cheya' yuluj he c'ul win̈an. 10Yin̈ hunk'aan tz'ayical tu', tx'ihal mac ẍpaxoj yin̈taj. Scajque'can̈ sb'a anma, cat yanojcoj sb'a yul sk'ab' sya'tajil. 11Tx'ihal mac ẍhalnoj ta schejab'lom Comam Dios yeyi, tx'ihal anma sub'chaoj yu. 12Yuxa hantaj xtx'ojal ch'ichojcan̈ tu', ec'b'al anma matxa choche' sb'a. 13Yaja' mac ẍtechaojapnoj yu masanto chija'can sb'a sunil, ẍcolchaoj. 14Wal tzoti' c'ul tzet chu yoc anma yul sk'ab' Comam Dios yilal spujb'alaxoj sunil b'aytu'alicoj, yun̈e yab'elaxoj yulaj hej con̈ob'. Hato tu' chija'can sb'a sunil tzetet halb'ilcan yul yum Comam Dios. 15Stz'ib'n̈ecan ya' Daniel schejab'lom Comam Dios yin̈ naj chuluj etanojtoj yatut Comam Dios yu hej tzetet tx'oj chub'. (Mac ẍcuyni hune' ti' xtxumab'i.) Ha' cheyilnoj yocojtoj naj yul yatut Comam Dios, elan̈wejcan̈. 16Hex ay hex Judea, aswej yichlaj witz. 17Mac ahatoj yac'alil swi' yatut, matxa ch'aytij yi'altij hunuj tzetet yul yatut, to b'eh yelcan̈. 18Mac aytoj munil xol telaj, ni matxa meltzo yi'a' tz'ispa. 19Yet chuuj hune' tu', c'antaj heb'ix ayxa tzet yeyi, b'oj heb'ix aytocoj niẍtej yunin yin̈ im. 20Yuxin k'anwej tet Comam Dios ta mat n̈ab'iloj ye b'ay chex elojcan̈, b'oj ta mat yin̈oj tz'ayic xewb'al, 21haxca hune' sya'tajil chuluj yin̈ hunk'aan tz'ayical tu' caw aycan̈ smalil. Maẍto hunecoj chu hune' tzetet chuuj tu' yichotax swatx'en Comam Dios satyib'an̈k'inal ti', machaca b'ak'in̈ chuuj hunecojxa. 22Yaja' ta mach sc'otzb'a' Comam yoj hunk'aan tz'ayic tu', mach mi mac ẍcolchaoj. Wal xin, sc'otzb'a' Comam yoj yu scolnoj mactaj sic'leb'ilxa yu. 23Ta ay mac ẍhalni teyet: Ab' ay naj Cristo b'eti', mato, Ay naj b'etu', ta ẍi, macheya' yuluj he c'ul. 24Haxca chuluj heb'naj sub'um anma cat yalnoj sb'a heb'naj Cristoal, to schejab'lom Comam Dios ye heb'naj yalni. Syeb' heb'naj c'ayb'alc'ule yun̈e sub'chaoj sunil anma yu heb'naj. Etza ẍc'atzla sub'chaoj mac sic'leb'ilxa yu Comam. 25Yuxin yalan̈to ẍwalnican teyetan yun̈e macheya' sub'u' he b'a. 26Ta ay mac ẍhalni teyet: As ilwej, hat ay naj Cristo b'et hune' lugar b'ay mach anma, ta ẍi, machex to heyila'. Maca ẍhal-laxoj: Ayxac'oj naj, ewan ye naj, ta ẍi, macheya' yuluj he c'ul. 27Haxca haca' yay jepna cayompa b'ay ch'ahiloj tz'ayic masanto b'ay ẍto tz'ayic, hactu' chu yil-laxoj yet chin huluj hayin Ab'ilintij yu Comam Dios xol jet-anmail ti'an. 28Cajxam yalni anma: B'aytic'a ay camnaj nok', hat ch'apni somna no' usmij. 29Chin̈e ec'ojcan hunk'aan sya'tajil tu' matxa caw ẍmujluj tz'ayic, ni matxa xmujluj x'ahaw yin̈ c'ul. Ẍb'ilojcan̈ nimejtaj tx'umel satcan̈, hasta ay ẍtitc'ayoj. 30Lawitu' ch'il-laxoj wuluj satcan̈an, hayin Ab'ilintij yu Comam Dios xol jet-anmail ti'an. Yul hunun con̈ob' satyib'an̈k'inal ti' toxan̈e smohb'a'can̈ anma sk'ab' xiwquilal yu yilnoj wuluj yib'an̈ asunan, b'oj sunil scan̈il wehan, b'oj hin may hin k'ak'alan. 31Ch'ok'oj ch'en trompeta, ẍwanojtij hej wángel syamb'a'coj sunil mac sic'leb'ilxa wu sunil satyib'an̈k'inal ti'an. 32Iwejiloj heyet yin̈ te' higo: Ta cheyila to syaxb'ixatij b'ay ẍtij xaj te', che txumu' to yocojxa ha' n̈ab'. 33Hactu' ye ti', ha' cheyilnoj yijnoj sb'a sunil tzet ẍwal ti'an, che txumu' to cawilxa yetij b'ay chin hulujan, haca' mac lin̈anxacan̈ sti' pulta. 34Yin̈ caw yeli ẍwal teyetan, sunil ti' chija' sb'a yalan̈to maẍto ẍcam hun con̈ob'al anma ti'. 35Ẍtan̈ojiloj satcan̈ b'oj tx'otx'otx' ti', yaja' wal tzet xax walan, mach yec'b'anil yijnoj sb'a. 36Yaja' wal tzet tz'ayical b'oj tzet orail chub' hune' tu', mach mac ohtajn̈e, ni hej ángel ay satcan̈, ni hayin Sc'ahol Comam Dios ti'an, to han̈c'a hin Mam ohtajn̈ean. 37Haca' xa'le anma yet x'ehc'oj ya' Noé, hactu' cha'le'pax anma yet chin huluj hayin Ab'ilintij yu Comam Dios xol jet-anmail ti'an. 38Haxca yalan̈to maẍto ẍmajlotoj sat tx'otx'otx' ti' yu ha ha', nahul ye anma. Sak'al swa'i, yi'ni heb'naj winaj yixal b'oj yi'ni heb'ix ix yichamil masanto x'apni stz'ayical b'ay x'octoj ya' Noé yul te' arca. 39Matzet chacoj anma yin̈ sc'ul, hato yet xnohcan̈ sat tx'otx'otx' ti' yu ha' niman ha' tu', hato tu' xtxumniloj heb'jetb'i, yaja' matxa yan̈al, sunil mac xtan̈iloj. Haca' xa'le anma tu', hactu' cha'le' pax anma yet chin hulujan. 40Yet chuuj hune' tu', cawan̈ heb'naj hun ẍmunlayi, hune' naj ch'ilaxojtoj, hune'xa naj ch'alaxojcanoj. 41Cawan̈ heb'ix lan̈an scawni, hune' ix ch'ilaxojtoj, hune'xa ix ch'alaxojcanoj. 42Yuxin nann̈e heyu, haxca mat heyohtajoj tzet tz'ayical chin huluj hayin hin heyahaw ti'an. 43K'inaloj ta yohtaj hune' naj yahaw n̈ah tzet orail ch'apnoj naj elk'om yatut ak'b'alil, tan̈eb'il mi yu naj yun̈e mach'octoj naj elk'om tu' yelk'a'iltij tzet ay naj. 44Yuxin nann̈e heyu, haxca hayin Ab'ilintij yu Comam Dios xol jet-anmail ti'an, yet mat hun nanoj heyu cat wulujcan̈ lemnaan. 45K'inaloj ay hunuj naj yahaw munil ay haywan̈oj schejab'. Ham naj k'a' yijyom b'oj k'a' tz'ajan sc'ul chacan naj sheleloj yu ya'ni stohol heb'naj yak'b'il munlawom yet ch'apni stz'ayicalil stohlalax heb'naj. ¿Mactaxca hune' naj caw yijyom tu' heyalni? 46Sak'al yet naj chejab'lom lan̈an syijyen tzet xalcan yahaw yet chuluj. 47Yin̈ caw yeli ẍwal teyetan, ch'alaxojcoj naj chejab' tu' stan̈eomaloj tzet ay naj yahaw n̈ah tu'. 48Yaja' ta mach swalil ye yul swi' naj chejab' tu': Matoj wal chulujna ya' wahaw ti'an, ta ẍi naj, 49cat yoc naj smak'noj heb'naj yetb'i, ẍto naj wa'oj, uc'uj xol heb'naj uc'umte', 50mat hun nanoj yu naj cat yulcan̈ lemna naj yahaw tu'. 51Haca' ch'utelaxoj heb'naj ec'naj sc'ul chal sb'a c'ulal, hactu' chu ya'laxoj tz'aoj sat naj yin̈ c'ul yu naj yahaw tu'. Hat ch'ok'oj naj yin̈, cat yec'oj ya' yanma naj yu sya'il.


Copyright
Learn More

will be added

X\