SAN MATEO 23

1Lahwi tu' yalni Comam Jesús tet anma yeb tet ebnaj iscuywom: 2—Ebnaj fariseo yeb ebnaj cuywawom yin̈ ley, ha' ismunil ebnaj tu' ha' ton quexiscuyni yin̈ isley Moisés. 3Yuxin sunil tzet chal ebnaj teyet yijewej, yaja' mach chebeybaln̈eto tzet chiswatx'e ebnaj, yuto ha' tzet chal ebnaj mach chisbeybaln̈e ebnaj. 4Ha' cuybanil chak' ebnaj tet anma, lahan haca' hunu ijatz caw al, machi mac chik'oji yinican̈. Wal ebnaj xin nitam hunu yiximal isk'ab ebnaj chishitzico yin̈. 5C'ul yub ebnaj, caw yijem chute isba ebnaj, yaja' yun̈e yillax ebnaj yu anma. Caw nimej chute ebnaj sat no' tz'um bay tz'ibn̈ebilico Istzoti' Comam Dios cat yanico ebnaj no' yin̈ isk'ab, maca yin̈ ispalan̈. Chanipaxico ebnaj huntek'an xil isk'ap nimej ishojo isti'. 6Yet chiawtelax ebnaj wa'o yin̈ k'in̈, ha' huntek'an tz'on̈obal caw ay yelapnoj ha' chismajilo ebnaj, hac tu' chutepaxo ebnaj yulaj capilla. 7Hayet chiec'paxo ebnaj yulaj calle yochebal ebnaj caw c'ul chu istioẍli anma tet ebnaj, yeb xin caw choche ebnaj yabe' tato chihallax cuywawomal yin̈ ebnaj. 8Wal hex ti' xin, machojab cheyoche chihallax cuywawomal teyin̈, yuto hune'n̈e mac hecuywawom, wal xin heyuẍtan̈e heba. 9Machi hunu mac cheyal hemamo yul sat yiban̈k'inal ti', yuto hune'n̈ech'an Hemam, ha' ton Comam Dios ay yul satcan̈. 10Machojab cheyoche chihallax iswi'ehal teyin̈, yuto hune'n̈e mac iswi'ehal yeco teyin̈, ha' ton Comam Cristo. 11Wal xin ha' mac ec'bal yelapno yehi, yak'abico isba chejabo texol. 12Yuto ha' mac chican̈ isba, chiilaxayoj, wal mac chiyiyo isba xin, chiilaxcan̈. 13Hex cuywawom yin̈ isley naj Moisés yeb hex fariseo hex ti', cheyal heba c'ulal, ¡caw c'anch'anex! yuto checach yoc anma yul isk'ab Comam Dios. Mach cheyaco heba, machi xin chejépaxo chioc mac choche yak'aco isba yul isk'ab Comam Dios. 14Hex cuywawom hex ti' yeb hex fariseo hex ti', cheyal heba c'ulal, ¡caw c'anch'anex! yuto cheyilo yatut ebix hun ix, chilahwi tu' caw nimej cheyute yoj hetxah, haca'tan̈e mach istx'ojal chewatx'e. Wal xin caw ec'balto isya'tajil chiay teyiban̈. 15Hex cuywawom yin̈ ley yeb xin hex fariseo hex ti' cheyal heba c'ulal. ¡Caw c'anch'anex! yuto sunil yul sat yiban̈k'inal ti' yeb yiban̈ ha' mar chelahwilo heyeq'ui yun̈e hemontenico anma teyintaj. Ha' mac chimoncha heyu tu' xin chisomchacanto yul iswi' heyu, cayel ec'balto chischah isya'tajil xol k'a k'a' tesataj. 16Hex ti' lahanex haca' hunu mac mach chu yilni, yaja' cheyaco heba ijbalomal. ¡Caw c'anch'anex! Cheyalnipax haca' ti': “Ta ay mac chiak'ni binaho yatut Comam Dios yet chistak'wenico hunu tzet ye tu' yin̈, mach yilalo chisyije. Yaj ta isbi ch'en oro ayicto yul yatut Comam chak' binaho yin̈ hunu tzet ye tu', caw yilal isyijeni,” quexchi. 17¡Caw suc hex! Lahanex haca' anma mach chu yilni. ¿Baytet ec'bal yelapno yehi? ¿Tom ch'en oro mato yatut Comam Dios? Wal xin, yu yatut Comam Dios yuxin ay yelapno ye ch'en oro ayicto yul yatut tu'. 18Cheyalnipaxoj: “Ta ay hunu mac chiak'ni binaho altar yet chistak'wenico hunu tzet ye tu' yiban̈, mach yilalo chisyije. Yaja' ta isbi xahanbal ayahto yiban̈ altar tu' chak' binahoj, caw yilal chisyije,” quexchi. 19¡Caw lahanex yeb anma mutz'an sat! ¿Baytet caw ec'bal yelapno yehi? ¿Tom ha' xahanbal ayahto yiban̈ altar tu', mato ha' altar hune' chianico ismay xahanbal tu'? 20Wal xin ha' mac chiak'ni binaho altar yin̈ tzet chala, ha' hun tzet ayahto yiban̈ altar tu' chak' binahoj. 21Hacpax tu' mac chiak'ni binaho yatut Comam Dios yin̈ tzet chala, ha' hun Comam Dios ay bey tu' chak' binahoj. 22Hacpax tu' mac chiak'ni binaho satcan̈ yin̈ tzet chala, ha' hun istz'on̈obal Comam Dios chiyak' binahoj, cat yak'nipaxo binaho Comam tz'on̈an yul yehobal tu'. 23Hex cuywawom yin̈ isley naj Moisés yeb hex fariseo hex ti', cheyal heba c'ulal. ¡C'anch'anex! cheyak' isdiezmohal te' alawena, te' aniẍ, yeb te' comino, yaja' machi cam hec'ul heyijen chejbanile caw ay yelapno aycano yu Comam Dios; ha' ton hewatx'en istoholal, yeb istz'ay hec'ul yin̈ heyet anmahil, yeb xin heyijen tzet chal Comam Dios, yeb heyanico heyanma yin̈ Comam, ha' ton huntek'an ti' yilal heyijeni, machi xin chebejpaxo heyijen huntek'anxa tu'. 24¡Hex ti' lahanex yeb anma mutz'an sat, yaja' cheyaco heba ijbalomal yin̈ hunuxa maca. Hex ti' caw cheyila tato machi hunu no' nich'an us chito xol heyitah, yaja' mach cheyabe hebik'nito no' camello! 25Hex cuywawom yin̈ isley naj Moisés yeb hex fariseo hex ti', cheyal heba c'ulal, ¡caw c'anch'anex! yuto caw c'ul cheyute hetx'ahni yinta hevaso yeb hesec', yaja' wal yul xin, nohnayto yu istz'ilal heyelek' yeb yu heyec'najil. 26Hex fariseo hex ti', lahanex haca' hunu mac mutz'an issat. Wal xin tx'ahwe babel yul hevaso yeb hesec', haxinwal saj chielpaxico yintaj. 27Hex cuywawom hex yin̈ isley naj Moisés, yeb hex fariseo hex ti', cheyal heba c'ulal. ¡Caw c'anch'anex! yuto lahanex haca' hunu panteón caw c'ul yehico istxohal; caw c'ulch'an jilni, yaja' wal yul xin, nohna yu isbajil camom yeb tz'il. 28Haca' huntek'an panteón tu' haquex tu'. Han̈e yin̈ sat anma caw c'ul cheyute heba, wal heyanma xin nohna yu lek'ti'al yeb yu istx'ojal. 29Hex cuywawom yin̈ isley naj Moisés yeb hex fariseo hex ti', cheyal heba c'ulal. ¡Caw c'anch'anex! yuto checayen̈e hetzantencan̈ bay mujan ebnaj ischejab Comam Dios. Chetzantenpaxo bay mujan ebnaj c'ul iswatx'e, 30cheyalni haca' ti': “Tato ayon̈ic'o yin̈ hune' tiempohal yet ispotx'lax ebnaj ischejab Comam Dios yu ebnaj jichmam, mach chimjaco coba copotx'ni ebnaj,” quexchi. 31Hayet cheyalni haca' tu', hex caw ex cheyaliloj tato yin̈ yuninal ebnaj potx'ni camo ebnaj ischejab Comam tu' quextita. 32¡Wal xin ha' tzet ichebilxa yu ebnaj heyichmam tu', lahwecanoj! 33Hex ti', lahanex yeb no' laba yuto caw helanex yin̈ istx'ojal. ¿Tzettaxca chu hecolni heba tet isya'tajil xol k'a k'a' mach istan̈bal? 34Chinchejtojan ischejab Comam Dios texol yeb mac itz'at iswi' yin̈ yet Comam, yeb ebnaj cuywawom. Yaja' xin ay ebnaj chepotx' yul hecapilla, ay ebnaj cheyacan̈ yin̈ culus, aypaxo ebnaj chemak' yul hecapilla, yeb xin ay ebnaj chetzumbec'o yul hunun con̈ob. 35Teyiban̈ xin chititcano isya'tajil yu iscamical sunil ebnaj potx'bil; ebnaj c'ul tzet iswatx'e chiichiti yin̈ iscamical naj Abel masanta yin̈ iscamical naj Zacarías, isc'ahol icham Berequías, potx'bil xolbal yatut Comam Dios yeb bay chiak'lax xahanbal. 36Yin̈ caw yeli chiwalan teyet, chititcano isya'tajil yiban̈ anma yin̈ hune' tiempohal ti' yu iscamical ebnaj tu', ẍi Comam. 37Yalnipaxo Comam Jesús: —¡Hex ah Jerusalén ti' chepotx' camo ebnaj ischejab Comam Dios, cat hek'ojni camo ebnaj ischejti Comam texol! ¡Tx'i'al el quexwawtecojan yul ink'aban, haca' chu yawtenico no' mi'e chiyo niẍte yunin yalan̈ isxic', yaja' machi heje! 38Abewecano tzet chiwalti'an, hune' hecon̈ob ti' chebeja'canoj, chicancano man̈ anmahil. 39Tinan̈ xin chiwalcanojan teyet tato matxa chinheyilan masanto yet cheyalni haca' ti': “¡Jak'awe tzalaho coc'ul yin̈ mac chul coxol yu Comam Dios!” quexchi, ẍi Comam.

will be added

X\