SAN MATEO 23

1Lawitu', xalni Comam Jesús tet anma b'oj tet heb'ya' ẍcuywi yin̈: 2—Heb'naj cuywaom yin̈ sley ya' Moisés, b'oj heb'naj fariseo, smunil heb'naj ye hex scuyni yin̈ stzoti' Comam Dios haca' xute ya' Moisés. 3Yuxin yijyewej tzet chal heb'naj, yaja' machex ec' heyi'a' tzet chu heb'naj, haxca heb'naj tu' nan chute heb'naj yalni, nan chupax heb'naj. 4Hej chejb'anile swatx'eayoj heb'naj ha' chacoj heb'naj yib'an̈ anma, lahan b'oj hunuj ijatz al, yaja' ¿tox sje sc'ul heb'naj yi'a'can̈ ninoj solic xin? 5Yun̈e yoc smay heb'naj yu anma caw ẍiquiltajn̈e sb'a heb'naj. Nimejal chute heb'naj sat no' tz'um b'ay tz'ib'n̈eb'ilcoj stzoti' Comam Dios, chanicoj heb'naj yin̈ sk'ab' b'oj yin̈ spalan̈. B'oj xil k'ape caw nimej shojo yelaw sti', ha' chacoj heb'naj yin̈. 6Yet ch'awteot heb'naj wa'oj yin̈ hunuj k'in̈, han̈c'a stz'on̈ob'al anma ay smay smajiloj heb'naj b'ay stz'on̈i. Hactu' chute pax heb'naj yulaj capiya. 7Yet ch'ec' heb'naj b'ay syamb'a sb'a anma yocheb'al heb'naj caw xiquiltaj chu stioẍli anma tet heb'naj b'oj choche heb'naj ta ẍhal-lax cuywaom yin̈ heb'naj. 8Wal hexti' mache ta'we' yal-lax cuywaom teyin̈, haxca hune'n̈e mac he cuywaom. Hexti' lahan heyuẍtaj he b'a, mach mac ec'b'al. 9Machca mac cheyal he mamoj satyib'an̈k'inal ti', haxca hune'n̈e mac co Mam, Comam Dios ay satcan̈. 10Machca che ta'we he yal-lax swi'aloj haxca hune'n̈e mac swi'al teyin̈, ha'n̈e Cristo, hune' Cristo tu' hayinan. 11Mac cha' cheja' sb'a xol yetb'i, ha' k'a' ay smay. 12Mac choche yaacoj smay, caw comon ch'utelaxoj, yaja' mac ch'ay ni'anb'ail ch'alaxojcoj smay. 13- 14Hex cuywaom yin̈ sley ya' Moisés b'oj hex fariseo c'antajex. Nab'an̈e cheyal he b'a c'ulal, haxca che cach yoc anma yul sk'ab' Comam Dios, machex oc paxoj, machca che chapaxicoj anma choche ch'oqui. 15Hex cuywaom yin̈ sley ya' Moisés, b'oj hex fariseo c'antajex, nab' cheyal he b'a c'ulal. Sunil shoyanil tx'otx'otx' b'oj ha' mar chex ec' he monte'coj anma yin̈ he religión, waxan̈ca hunujn̈e che yi'a. Mac ẍmonchacoj he yu, ton̈e ẍcam huchatoj yul swi' heyu, cayelto ec'b'al yetwanoj infierno chucan te sataj. 16Hexti' lahanex b'oj anma machu yilni chal sb'a ijb'alomal. C'antajex, haxca cheyala: Mac ch'a'ni b'inaoj sb'ih yatut Comam Dios yin̈ tzet cha'a, mat yeẍtooj syijye. Yaja' ta oro aycoj yin̈ yatut Comam cha' b'inaoj yin̈, waltu' yilal syijye, quex chi. 17¡Tzet he sucal! ¡Lahanex b'oj mac machu yilni! ¿B'aytet k'a' ec'b'al, tox ha' oro mato yatut Comam Dios ch'a'ni smay hune' oro tu'? 18Cheyalnipaxoj: Ta ay mac ch'a'ni b'inaoj sb'ih altar yin̈ tzet cha'a, mach yeẍto syijye, yaja' ta ofrenda ahatoj sat altar tu' cha' b'inaoj yin̈, waltu' yilal syijye, quex chi. 19¡Caw lahanex b'oj mac machu yilni! ¿B'aytet k'a' ec'b'al, tox ha' ofrenda ahatoj sat altar, mato ha' altar ch'a'ni smay hune' ofrenda tu'? 20Mac ch'a'ni b'inaoj altar yin̈, ha'hun tzet ahatoj yib'an̈ altar tu' cha' pax b'inaoj. 21Hactu' mac ch'a'ni b'inaoj yatut Comam yin̈, cha' pax b'inaoj Comam ayictoj b'etu'. 22Hactu' mac ch'a'ni b'inaoj satcan̈ yin̈ tzet cha'a, ha'hun stz'on̈ob'al Comam Dios cha' b'inaoj, b'oj cha' b'inaoj Comam tz'on̈an yul stz'on̈ob'al tu'. 23Hex cuywaom yin̈ sley ya' Moisés b'oj hex fariseo, c'antajex. Nab' cheyal he b'a c'ulal. Sunil che tohla sdiezmoal, hasta sdiezmoal te' alawena, te' aniẍ, b'oj te' comino, yaja' wal hunmajanxa ley k'a' yilal yeyi, mache yijye': Haca'na juni stoholal, stz'a' co c'ul yin̈ jet-anmail, b'oj co yijyen tzet chal Comam Dios. Ha' hunk'aan ti' yilal he yuni, yaja' matoj haxca hactu' machu heyijyen pax hunk'aanxa niẍtej tu'. 24Hexti' ijb'alom hex, machu heyilni, lahanex b'oj mac ya'n̈e yilni ta mach sto hunuj ni'an us xol tzet chuc'u, yaja' machab'e sb'ik'niaytoj hune' no' cameyo. 25Hex cuywaom yin̈ sley ya' Moisés b'oj hex fariseo, c'antajex. Nab'an̈e cheyal he b'a c'ulal. Lahanex b'oj ch'en vaso mato ch'en sec' caw tx'ahb'il yin̈taj, yaja' wal yul, nohnaj yu tz'il. Hactu' heye yu heyelek' b'oj xtx'ojal cheyu. 26Hex fariseo, caw mache txumu, sajn̈ewej heyanma b'ab'el, haxin̈wal sunil tzet heyeyi saj chucanoj. 27Hex cuywaom yin̈ sley ya' Moisés b'oj hex fariseo, c'antajex. Nab'an̈e cheyal he b'a c'ulal. Lahanex b'oj b'ay ch'aotictoj camom ab'ilcoj xtxohal yin̈taj, caw c'ulch'an jilni, yaja' ayictoj sb'ajil camom yul b'oj sunil hej squistalil. 28Hactu' heyeyi, cheyal he b'a c'ulal yin̈ sat anma, yaja' quistalxa ye heyanma yu sub'wal b'oj ec'najil. 29Hex cuywaom yin̈ sley ya' Moisés b'oj hex fariseo, c'antajex. Nab'an̈e cheyal he b'a c'ulal, che watx'encan̈ b'ay mujb'il heb'ya' schejab'lom Comam Dios, b'oj che tz'ahni b'ay mujb'il anma c'ul xhul yub'c'uj. 30Cheyalni: Ta ayon̈c'oj yet x'ehc'oj heb'ya' jichmam, machmi xcon̈ colwa co potx'ni heb'ya' schejab'lom Comam Dios ti', quex chi. 31Ha' yet cheyalni hune' ti' cheyaliloj he b'a to yic'al heb'naj xpotx'ni heb'ya' schejab'lom Comam Dios heyeyi. 32Yuxin b'aytet xichecoj heyichmam yuni, mak'b'il he lahni. 33Caw sub'wahomex; lahanex b'oj no' howla lab'ah. ¿Tzet taxca chu he colchaoj tet sya'il infierno? 34Yuxin ẍto heyila', ẍwa'a'tij haywan̈oj schejab'lom Comam Diosan, mac tz'ajan sc'ul yin̈ yet Comam, b'oj mac helan scuywayi. Yaja' ay heb'naj che potx'o'. Ay heb'naj cheya'a'can̈ yin̈ culus. Ay heb'naj ch'eloj yin̈ he c'ul che hatenoj yulaj hej he capiya, ay heb'naj che tzumb'ec'oj yul hunun con̈ob'. 35Yuxin scamical sunil anma c'ul xhul yub'c'uj tu', ch'a'laxoj he muluj, ch'ichitij yin̈ scamical ya' Abel, tohol yanma, masanto ch'apni yin̈ scamical ya' Zacarías, sc'ahol ya' Berequías potx'b'il yamak' yatut Comam Dios yin̈taj altar. 36Yin̈ caw yeli ẍwal teyetan, scamical sunil heb'ya' ti' ch'occan he muluj hex ayex tinan̈. 37Hex ah Jerusalén ti', che potx'camoj hej schejab'lom Comam Dios, che c'ojnicamoj mac ab'iltij te xol yu Comam. Haca' yutxman no' mi'e chiyo niẍtej yunin yalan̈ xic' yun̈e scolni no', hactu' ẍwoche chex wutean. Tx'ihal el quex wawte'an, yaja' mach sje he c'ul heyab'etoj. 38Ab'ewejcan tinan̈, yatut Comam Dios ay te xol ti' ẍtin̈chalaxojcanoj. 39Ẍwalnicanoj teyetan, matxa chin heyila'an, masanto ch'apnoj tz'ayical b'ay cheyala': Jalawej tzoti' c'ul yin̈ mac Ab'iltij yu Comam Jahaw, quex chinaoj.


Copyright
Learn More

will be added

X\