SAN MATEO 22

1Lawitu' x'ocpax Comam Jesús scuyu' anma, chalni yin̈ hacti': 2—Mactaj ch'oc yul sk'ab' Comam Dios, lahan cha'le' haca' xa'le anma yin̈ hune' k'in̈ xec'tze hune' naj rey yet xmohyi sc'ahol naj. 3Yet watx'inajxa ita, xanitoj naj rey tu' schejab' yawtenoj mac awteb'il yin̈ k'in̈ tu', yaja' mach hunuj mac sjetij. 4Yin̈ scayel nanxa heb'naj chejab' xatoj naj rey tu', xalni naj: Halwej tet anma awteb'il tu': Yilal chex tita haxca watx'inajxa ita. Xax hin chej potx'laxoj no' wacaxan, b'oj hunk'aanxa no nok' b'ak'ichn̈eb'il, sunil watx'inajxa, yuxin aswej yin̈ k'in̈ tu', quex chi, ẍi naj rey tu'. 5Yaja' anma awteb'il tu' mach sjetoj sc'ul. Hune' naj xto naj yila' smunil, hune'xa naj xto naj txon̈oj, 6wal hunk'aanxa heb'naj, x'oc heb'naj smak'a' heb'naj chejab'lom tu', xpotx'ot heb'naj. 7Ha' xab'en naj rey hune' tu' xtit showal naj, xanitoj naj hej soldado spotx'o' heb'naj potx'waom tu', xn̈uslaxiloj scon̈ob' heb'naj. 8Xalni pax naj tet hunk'aanxa heb'naj schejab': Sunil t'in̈anxa yeyi tzet ch'ocnojcoj yin̈ k'in̈, yaja' heb'naj b'ab'el xwa' awte'an, mat yetwanoj heb'naj yeyi haxca spahtoj heb'naj sc'ulal hin c'ulan. 9Yuxin aswej yulaj b'eh. Hantaj mac ẍchalo heyu, iwejtij yin̈ hune' k'in̈ ti', ẍi naj. 10Yuxin xto heb'naj chejab' yulaj hej b'eh yawte' anma chal naj rey tu'. Tx'ihal mac b'ay xal heb'naj. Ay anma c'ul, ay anma tx'oj x'apni yin̈ k'in̈ tu' yu heb'naj. Hunepch'an xnohiloj te' n̈ah b'ay ay k'in̈ tu'. 11Ha' x'ocapnoj naj rey tu' yila' anma xyamicoj yin̈ k'in̈ tu', xnachatij hune' naj machcoj xil k'ape yet ilb'al mohilal yin̈. 12Xalni naj rey tu': Wamigo, machcoj xil k'ape yet ilb'al mohilal tawin̈, ¿tzet xu hawoctij b'eti'? ẍi naj. Yaja' mach sta'wi naj. 13Yuxin xal naj tet heb'naj schejab': C'alwejay naj, cat heyiniltoj naj xol sk'ejalholo. Hat ch'ok'oj naj cat yec'oj ya' yanma naj yu sya'il, ẍi naj. 14Ha' chaliloj hune' cuywab'al ti', to caw tx'ihal mac awteb'il yu Comam Dios, yaja' haywan̈n̈e mac sic'le'iltoj Comam. 15Lawitu' shec'niloj sb'a heb'naj fariseo sk'umlanoj sb'a tzet chu sub'cha Comam Jesús cat yayc'ay yin̈ hunuj stzoti', haxin̈wal chu ya'wic'ule heb'naj yin̈. 16Yuxin xatoj heb'naj haywan̈ heb'naj ẍcuywi yin̈, b'oj hunk'aan heb'naj spartido naj Herodes. Xto heb'naj yilwenoj Comam, xalni heb'naj: —Mam Cuywaom, johtajan to st'in̈anil chawala. Machach nanon hawalni st'in̈anil tzet choche Comam Dios. Mach hawoc yin̈ mac ch'ab'eni. 17¿Tzet chawute hawalni yin̈ ch'en tohlab'al aycoj jib'an̈ yu naj yahaw ay Roma? ¿Tox yet aya ẍja' ch'en mato machoj? . 18Yaja' lemb'il xtxumna Comam tzet ib'il yu sc'ul heb'naj, xalni Comam: —Hexti' caw mach tx'ixwi he sat, ¿tzet yuxin che say tzet chu wayc'ay yul sk'ab' heb'naj yahawan? 19Yewej hunuj ch'en melyu ch'a'lax tet naj yahaw tu' wila'an. Syeni heb'naj hune' ch'en denario tet Comam. 20Sk'amb'en Comam tet heb'naj: —¿Mac ay yechel b'oj sb'ih aycoj yin̈ sat hune' ch'en melyu ti'? . 21—Sb'ih naj César b'oj yechel naj aycoj yin̈ ch'en, Yuxin xal Comam: —Yijyewej heya'ni tet naj yahaw ay Roma b'aytet yet naj,cat heyijyen heya'ni tet Comam Dios b'aytet yet. 22Yet xab'en heb'naj tzet xu sta'wi Comam xc'ayiloj sc'ul heb'naj, shec'niloj sb'a heb'naj sc'atan̈. 23Yin̈tic'a hune' tz'ayic tu' xb'ey hunk'aan heb'naj saduceo yila' Comam Jesús. Heb'naj tu' macha' heb'naj yuluj sc'ul ta ẍpitzc'acan̈ hej camom. Yuxin x'oc heb'naj yala' tzet xa'le hunk'aan heb'naj yuẍtaj sb'a tet Comam: 24—Mam Cuywaom, xalcan ya' Moisés: Ta ay hunuj naj mach yuninal chacan tet yixal yet ẍcami, yilal yi'ni yuẍtaj naj camom tu' ix ixale tu' yun̈e yeh yuninal heb'jetb'i, cat yoc yetoj naj camom tu', ẍi ya' Moisés tu'. 25Hunec, ay hujwan̈ heb'naj yuẍtaj sb'a co xol ti'an. Naj b'ab'el, xmohyinaj, yaja' xcam naj, mach yuninal naj xcani, yuxin xmohyi yuẍtaj naj b'oj ix ix tu'. 26Yaja' xcampax naj scab' tu', mach yuninal naj xcan tet ix. Hactu' xa'lepax naj syox, masanto x'apni yin̈ naj shuj, sunil heb'naj x'i'ni ix. 27Lawi scamtoj heb'naj tu', xcampaxtoj ix. 28Yet ẍpitzc'aojcan̈ hej camom, yin̈ heb'naj hujwan̈ yuẍtaj sb'a tu', ¿mac taxca caw yichamil ix b'etu', haxca shujwan̈il heb'naj xmohyi b'oj ix?. 29Xalni Comam tet heb'naj: —Hexti' c'aynaj he c'ul, haxca mat heyohtajoj tzet chal Yum Comam Dios. Matca heyohtajoj hantaj scan̈il ye Comam. 30Haxca yet ẍpitzc'aojcan̈ hej camom, matxa mac ẍmohyoj, lahanxa chub'canoj anma b'oj hej yángel Comam Dios. 31Yaja' yin̈ spitzc'ab'al hej camom, ¿tox maẍto b'ay cheyil yul Yum Comam Dios yet xalni Comam yin̈ hacti': 32Hayin ti' chin shak'e ya' Abraham, ya' Isaac b'oj ya' Jacob, ẍiayoj? Mataj anma camomxa ẍhak'en Comam Dios, to ha' anma itzitz, ha' ẍhak'en Comam. 33Ha' xab'en anma tzet xal Comam, caw xc'ayiloj sc'ul yab'eni. 34Yet xab'en heb'naj fariseo to x'occan heb'naj saduceo yin̈ sucal yu Comam Jesús, syamb'an sb'a heb'naj sc'atan̈ Comam. 35Xol heb'naj aycoj hune' naj cuywaom yin̈ sley ya' Moisés, x'oc naj yilwe Comam, sk'amb'en naj: 36—Mam Cuywaom, ¿b'aytet chejb'anile k'a' ec'b'alto ye yin̈ sley ya' Moisés?. 37Xta'wi Comam: —Ochewej Comam Dios yin̈ sunil he c'ul, yin̈ sunil heyanma b'oj yin̈ sunil he nab'al. 38Ha' hune' chejb'anil ti' b'ab'el b'oj k'a' ec'b'al xol hunk'aanxa. 39Ay hune'xa scab' lahan b'oj hune' ti', chalni yin̈ hacti': Yilal he xahann̈en mactaj ay he cawilal haca' heyan̈en he b'a, ẍiayoj, ẍi. 40Yet ẍco yijyen cab' chejb'anil ti', lan̈an co yijyen chejb'anil sunil, b'oj tzet tz'ib'n̈eb'il yu heb'ya' schejab'lom Comam Dios. 41Yamantoc'oj heb'naj fariseo tu' yet sk'amb'en Comam Jesús: 42—¿Tzet cheyute heyalni yin̈ naj Cristo? ¿Mac ay yic'al ye naj heyalni? —Yic'al ya' rey David ye naj. 43—¿Tzet yuxin yalnaj ya' David tu' naj Cristo tu' Yahawoj yet iptzeb'il ya' yu Comam Espíritu? Xalni ya' yin̈ hacti': 44Xal Comam Jahaw tet Wahawan: Tz'on̈yan̈ yin̈ hin watx' ti'an, masanto ẍwa'a'coj mac ẍchiwa sc'ul tawin̈ yalan̈ hawojan, ẍi Comam Dios, ẍi ya' David. 45¿Tzet yuxin xal ya' David tu' naj Cristo Yahawoj ta yic'aln̈e ya' ye naj haca' heyalni ti'?. 46Mach hunuj heb'naj xu sta'wi yin̈ tzet xal Comam. Hatax tu' xa nanon heb'naj sk'amb'en hunuj tzetet tet Comam.


Copyright
Learn More

will be added

X\