SAN MATEO 21

1Yet ayto yapni Comam Jesús b'oj heb'ya' ẍcuywi yin̈ yul con̈ob' Jerusalén, x'apni b'et hune' wayan̈b'al Betfagé yin̈taj tzalan Olivo. Xanitoj Comam cawan̈ heb'ya' ẍcuywi yin̈, xalni tet heb'ya': 2—Aswej b'ay ay hunk'aan te n̈ah co sataj ti'. Yet chex apnoj, cheyila' hune' no' ixnam burro xecan yin̈ te' te', aycoj yunin no' sc'atan̈. Puhwejiloj no' cat heyinitij no' wetan. 3Ta ay mac ay tzet ẍhalnoj teyet, cheyala': Ch'ocnicoj no' yu Comam, quex chi', hactu' chu yalnoj naj yahaw tu' ta cheyitij no'. 4Hactu' xu yijni sb'a tzet halb'ilcan yu hune' schejab'lom Comam Dios, chalni ya': 5Halwej tet anma ah Sión: Ab'ewej, to chul he Rey te xol, ahayoj ni'anb'ail, chul yib'an̈ hune' no' burro, yunin hune' no' ixnam yet ijatz. 6Lawitu' xto heb'ya' cawan̈ tu', tzujan heb'ya' yin̈ tzet xute Comam yalni. 7Ha' x'apni heb'ya', spuhniloj heb'ya' no' ixnam tu' b'oj yunin. Xinitoj heb'ya' no' tet Comam. Xaniatoj heb'ya' xil sk'ap yib'an̈ no', lawitu' x'ahtoj Comam yib'an̈ no'. 8Yet x'oc b'el yu Comam b'oj heb'ya', tx'ihal anma xayoj xil sk'ap yul b'eh b'ay ch'ec'otoj Comam, ay mac stzoc'niloj sk'ab' te' te' chaniayoj yul sb'eh. 9Hantaj mac b'ab'el sataj Comam b'oj mac tzujan, ch'awi, chalni yin̈ hacti': —Ja'a'wej yuch'antioẍ tet yic'al naj rey David. Jala'wej tzoti' c'ul tet mac Ab'iltij yu Comam Dios. Ja'a'wej yuch'antioẍ tet Comam. 10Yet x'ocapnoj Comam yul con̈ob' Jerusalén, x'ah b'oc'na anma, xalni heb'jetb'i: —¿Mac hune' chul ti'?. 11Xta'wi hunmajanxa heb'jetb'i, chalni yin̈ hacti': —Ha' naj ti' schejab'lom Comam Dios, Jesús ah Nazaret ay b'et Galilea. 12Lawitu' x'octoj Comam Jesús yamak' yatut Comam Dios, x'oc Comam yinojiltij sunil anma xtxon̈i b'oj mac ẍlok'i yamak' tu'. Stennic'oj pac'na Comam smeẍa heb'naj helom melyu b'oj ẍila heb'naj txon̈om palamuẍ. 13Chalni Comam: —Chal Yum Comam Dios: Watut ti'an, ẍhal-laxi ta yatut oraciónal yeyi, yaja' hex, haca' n̈ach'en b'ay cheb'a sb'a elk'om ye heyu, ẍi Comam. 14Hatic'a tu', x'apni hunk'aan heb'naj machu yilni b'oj heb'naj tx'oj ye yoj, xan̈ten Comam heb'naj. 15Caw xchiwacan̈ sc'ul heb'naj swi'al sacerdote, b'oj heb'naj cuywaom yin̈ sley ya' Moisés, yu hej c'ayb'alc'ule chu Comam, b'oj haxca ch'awi niẍtej unin yamak' yatut Comam Dios chalni: Jala' tzoti' c'ul yin̈ yic'al comam rey David. 16Yuxin xal heb'naj tet Comam: —¿Chim hawab'e tzet chal niẍtej unin ti'? Xta'wi Comam: —Ho', ẍwab'ean, yaja', ¿tom maẍto cheyil yul Yum Comam Dios tzet chala: Xawa' yala niẍtej unin, b'oj niẍtej ẍto txutxwi ta chacoj ha may yin̈ caw c'ul, ẍiayoj? . 17Lawitu' shec'niloj sb'a Comam, x'el yul con̈ob' Jerusalén, xto yul con̈ob' Betania. Hat x'ec' yak'b'al Comam b'etu'. 18Haxa sab'sahc'alil yet hunxa tz'ayic x'apni pax Comam Jesús yul con̈ob' Jerusalén. Yet aytocoj yin̈ b'eh xn̈ohchacan̈. 19Ha' xilni Comam hune' te' higuera aycoj sti' b'eh, xto yich te', yilnoj ta ay sat te', yaja' nab'a' xajn̈e te' aycoj, yuxin xal Comam tet te': —¡Matxa b'ak'in̈ chach satnoj! . Huneptu' x'ichi stajiloj te'. 20Ha' xilni heb'ya' ẍcuywi yin̈ Comam hune' tu', xc'ayiloj sc'ul heb'ya', chalni heb'ya' tet hunun: —¿Tzet xu stajnaloj te' yin̈ lemb'il?. 21Xalni Comam: —Yin̈ caw yeli ẍwal teyetan, ta caw cheya' yuluj he c'ul, mach ninoj chex cab'coni, matn̈emtaj xwu yin̈ te' higuera ti' cheyuan, to chim heyal tet hune' witz ti': Heq'uiloj ha b'a b'eti' cat ha b'ejniaytoj ha b'a yul ha' mar, ta quex chi, lemb'iln̈e syijye'. 22Yuxin sunil tzet che k'ana yet che ya'ni heyoración, ta mach cab'con he c'ul che k'anni, che chab'. 23Lawi yapni Comam Jesús yul con̈ob' Jerusalén x'apni yamak' yatut Comam Dios. Yet lan̈an scuyni anma, xhitzicoj heb'naj swi'al sacerdote b'oj heb'naj swi'con̈ob', sk'amb'en heb'naj: —¿Mac x'a'ni ha chejb'anil xawiniltoj anma b'eti' yet ewi? ¿Mac ẍchejni hawub'? . 24Xta'wi Comam: —Haquinan ay hune' chin k'amb'e teyetan. Ta che pajtze, ẍwaliloj teyetan mac x'a'ni hin chejb'anil wuni hune' tu'an. 25¿Mac ẍchejni ya'a' ya' Juan ha' yi'a' anma? ¿Tom Comam Dios, mato anma ẍchejni yub' ya'? Yaja', x'oc heb'naj yin̈ sucal, ichi yalni heb'naj tet hunun: —Ta ẍjala ta Comam Dios x'a'ni schejb'anil naj Juan tu', chim yala' naj ti' jet: ¿Tzet yuxin mach xeya' yuluj he c'ul yin̈ tzet xal naj? ẍim naj. 26Taca ẍjala ta anma x'a'ni schejb'anil naj, chon̈ xiw tet anma, haxca sunil mac ẍhalni ta schejab'lom Comam Dios ye naj., ẍi heb'naj tet hunun 27Yuxin xal heb'naj tet Comam: —Mat johtajojan. —Haquinan, mach ẍwaliloj teyetan mac ẍchejni wub' hune' tu'an. 28Xalni pax Comam Jesús tet heb'naj: —¿Tzet cheyute heyalni yin̈ hune'xa ti'? Ay hune' naj cawan̈ sc'ahol. Xalni naj tet naj b'ab'el: C'ahol, as uxu' uva xol wetan, ẍi naj. 29Xta'wi naj c'ahole tu': Machoj, machin toan, ẍi naj. Yaja' tzujanxa xtic'a to naj munlaoj. 30Lawitu' x'apni naj mame tu' sc'atan̈ naj scab', xalni naj ta ẍto pax naj munlaoj. Xta'wi naj: C'ultic'a mam, chin tojnaan, ẍi naj. Yaja' mach xto naj. 31Yin̈ heb'naj cawan̈ tu', ¿mac heb'naj xyijyen tzet xal naj mame heyalni? —Naj b'ab'el. Xalni Comam tet heb'naj: —Yin̈ caw yeli ẍwal teyetan, heb'naj iomiloj melyu yet tohlab'al b'oj heb'ix tx'oj ye swi' ẍb'ab'ojcoj yul sk'ab' Comam Dios te sataj. 32Haxca xhul ya' Juan Bautista hex scuyu' tzet chu heyehc'oj yin̈ c'ul, yaja' mach xeya' yuluj he c'ul yin̈ tzet xal ya'. Wal heb'naj iomiloj melyu yet tohlab'al b'oj heb'ix tx'oj ye swi', xa' heb'jetb'i yuluj sc'ul, yaja' hexti' waxan̈ca xeyil hune' tu' mach xmeltzo he nab'al xeya'ni yuluj he c'ul yin̈ tzet xal ya'. 33Ab'ewej hune'xa ti: Hune' naj yahaw munil, x'oc naj stz'unu' te' uva sat xtx'otx'. Lawitu' speni naj shoyanil, swatx'en naj b'ay ẍpitz'laxoj yal te', xanipaxcan̈ naj hune' n̈ah nahat aycan̈ b'ay stan̈elax te'. Lawitu' xanitoj naj smunil tu' smunlan̈e hunk'aan heb'naj, xto naj yin̈ hune' b'el yul hunxa con̈ob'. 34Yet x'apni tz'ayical yuxlax te' uva xanitoj naj yahaw tu' hunk'aan heb'naj schejab' schanoj yet. 35Yaja' x'oc heb'naj munlawom tu' stzab'a'ayoj heb'naj chejab' tu', smak'ni heb'naj hune' naj, hune'xa naj mak'b'il xu xpotx'ni heb'naj, hune'xa naj sc'oj heb'naj yu ch'en ch'en. 36Yin̈xa scayel, ec'b'alxa heb'naj chejab' xatoj naj yahaw munil tu', yaja' hactu' x'uteotpax heb'naj yu heb'naj munlawom tu'. 37Yin̈xa stzujanxa haxa sc'ahol naj xatoj, xalni naj: Wal hin c'ahol ti'an, xa syijye' heb'naj tzet chala', ẍi naj. 38Yaja' yet xilni heb'naj yapni naj c'ahole tu', xalni heb'naj tet hunun: Ha' naj ti' ẍcanojcan yin̈ tx'otx'. Co potx'o' naj haxin̈wal ẍcanoj tx'otx' jetoj, ẍi heb'naj. 39Yuxin stzab'ayoj heb'naj naj c'ahole tu', x'iottoj naj yin̈taj peyab' yu heb'naj, xpotx'ot naj, 40Lawitu' sk'amb'en Comam tet heb'naj swi'con̈ob' tu': —Yet chuluj naj yahaw tx'otx' tu' ¿tzet taxca chute' naj heb'naj munlawom aycoj sat tx'otx' tu' heyalni?. 41Xta'wi heb'naj: —Maẍtic'a sk'ahul chu spotx'noj naj yahaw tu' heb'naj, cat ya'laxoj tx'otx' tet hun majanojxa heb'naj yijyom ya'ni hantaj yetwanoj ay schani naj yahaw tx'otx' tu' yet ch'uxlaxoj te' uva tu'. 42Yuxin xal Comam: —Maẍto cheyil yul Yum Comam Dios b'ay chalayoj: Ha' ch'en ch'en sb'ejiloj heb'naj aomcan̈ n̈ah, ha ch'en x'oc scawxeb'aniloj te' n̈ah. Hune' ti' swatx'eb'al Comam Dios yeyi, caw c'ayb'alc'ule ye yul co sat, ẍiayoj. 43Yuxin ẍwal teyetan, to nanxa con̈ob'al ch'ocoj yul sk'ab' Comam Dios te heleloj, mac yijyom chute sb'a tet Comam. 44Wal hune' ch'en ch'en chaltu', ta ay mac ch'ayc'ay yib'an̈ ch'en, hayk'ahiltam chucantoj, taca ha' ch'en ch'ayc'ay yib'an̈, ẍquich'chaojcantoj yu ch'en. 45Yet xab'en heb'naj swi'al sacerdote b'oj heb'naj fariseo tzet xal Comam tu', xtxumniloj heb'naj to yet heb'naj ye tzet xal Comam. 46Xal heb'naj stzab'a'ayoj Comam, yaja' xiw heb'naj tet anma, haxca wal anma chala to schejab'lom Comam Dios ye Comam.


Copyright
Learn More

will be added

X\