1 Yalnipaxo Comam Jesús tet ebnaj iscuywom: —Anma chioc yul isk'ab Comam Dios lahan haca' hunu naj yahaw munil to yin̈ caw sahab sac'ayal issaya' isc'amte' chimunla xol te' uva. 2 Hayet yilcha huntek'an ebnaj yu naj, yalni naj tato hune' denario chak' naj yin̈ tz'ayic tet hunun ebnaj, lahwi tu' isto ebnaj munlaho xol yuva naj. 3 Yin̈mi ch'en balon̈eb yin̈ yet yalan̈ chuman isto naj yul txon̈bal, yilni naj huntek'anxa ebnaj mach ismunil. 4 Yalni naj tet ebnaj: “Ay munil inc'atan̈an, chexintohlahan haca'tic'a caw yehi,” ẍi naj. Istopaxo ebnaj munil xol yuva naj. 5 Naj yahaw munil tu' elpaxto naj yin̈ chumanil, yeb yin̈ ch'en oxeb, hactic'apax tu' yute yalni naj tet huntek'anxa ebnaj ilcha yu. 6 Yin̈xa ch'en howeb xin, istopaxo naj txon̈bal hunelxa, yilni naj huntek'an ebnaj chiec' bey tu' mach ismunil. Isk'amben naj tet ebnaj: “¿Tzet yin̈ xin ton̈e chiec' tz'ayic teyiban̈ bey ti'?” ẍi naj. 7 Istak'wi ebnaj: “Mamin, to machi mac chiak'ni yet comunilan̈,” ẍi ebnaj. Yalni naj tet ebnaj: “Ta chisje hec'ul asi'we munil wintajan, chexintohlahan haca' caw yehi,” ẍi naj. Isto ebnaj munil yinta naj. 8 Haxa yin̈ k'ejbiyal xin, yalni naj yahaw munil tu' tet naj chiilni ismunil haca' ti': “Awte sunil ebnaj munlawom cat hatohlan ebnaj. Ebnaj maoc munil yin̈ islahobal, ha' ebnaj chatohla babel. Wal ebnaj caw sahab maichico ismunla xin, islahobal chatohla ebnaj,” ẍi naj yahaw munil tu'. 9 Lahwi tu' xin yawtelax ebnaj oc munil yin̈ ch'en howeb, ha' ebnaj babel tohlalaxi, hune' denario ak'lax tet hunun ebnaj. 10 Haxa yet yawtelax ebnaj ichico munil yin̈ caw sahab sac'ayal, ham yalni ebnaj tato ec'bal istohol ebnaj chiak'laxi, yaja' machoj, hune'n̈e denario ak'laxpaxo tet hunun ebnaj. 11 Hayet ischahni ebnaj istohol tu' yichico ebnaj isbuchwa yin̈ naj yahaw munil tu', 12 yalni ebnaj: “Ebnaj mahul yet islahobalxa ti' hunxan̈e hora mamunla ebnaj, ¿tzet yin̈ xin lahan cotoholan̈ maxawak' yeb ebnaj? Han̈on̈ti'an̈ ec'bal macon̈munlahan̈, yeb xin caw majak' janmahan̈ xol k'a',” ẍi ebnaj. 13 Istak'wi naj yahaw munil tu' tet hune' naj haca' ti': “Hach wet anmahil, mach chinetlihan tawin̈ yuto majala tato hune' denario chintohlahan hatz'ayic. 14 Wal xin mawak'an hatohol, paxan̈toj. Ta chiwochehan ta lahan chik' ebnaj lan̈oxa maoc munil yebex, mach hawoc yin̈ hune' tu'. 15 Haninti'an chu wak'nihan inmelyuhan tet mac bay chiwochehan, ¿mato chichiwa hac'ul yu c'ul inc'ulan?” ẍi naj yahaw munil tu'. 16 Yuxin ha' mac babel tinan̈, ha' chicancano yin̈ islahobal, wal mac islahobal ye tinan̈, ha' chioc yin̈ babel. Hantan̈e mac awtebil yu Comam Dios, yaja' haywan̈n̈e mac sic'bililoj, ẍi Comam. 17 Yet ayxaco Comam Jesús yeb anma yin̈ isbel bey Jerusalén, yawtenilo Comam ebnaj cablahon̈wan̈ iscuywom, yalni Comam tet ebnaj: 18 —Tinan̈ xin lan̈an coto bey Jerusalén, yaja' Hanin Ak'bilintijan texol yu Comam Dios, chinálaxicojan yul isk'ab ebnaj yahawil yin̈ ebnaj sacerdote yeb ebnaj cuywawom yin̈ isley naj Moisés cat isk'anni ebnaj camical wiban̈an. 19 Chilahwi tu' cat quinyanicojan ebnaj yul isk'ab ebnaj mach Israeloj, cat isbuchwa ebnaj win̈an, cat quinismak'nihan ebnaj. Chilahwi tu' cat quinyanican̈an ebnaj yin̈ te' culus, yaja' yin̈ yox tz'ayic cat witzitzbican̈an hunelxa, ẍi Comam. 20 Yet hune' tiempohal tu' apni ismi' ebnaj isc'ahol icham Zebedeo ilwal yin̈ Comam Jesús. Tzujan xin ebnaj cawan̈ tu' yinta ismi', yay jahno ixnam sata Comam yuto ay hune' tzet choche ixnam isk'ana'. 21 Isk'amben Comam tet ixnam: —Miyay, ¿tzet chawoche hak'ana' wetan? ẍi Comam. Istak'wi ixnam: —Mamin, yet chachoc Yahawoj chink'anan tawet tato cawan̈ wuninti'an chioc tac'atan̈. Hunu naj chioc tz'on̈no yin̈ hawatx'k'ab, hunuxa naj chioc tz'on̈no yin̈ hameck'ab, ẍi ixnam. 22 Istak'wi Comam: —Hex ti' mach heyohtajo tzet chek'ana. ¿Chimyu heyuc'ni hune' vaso ha ha' caw c'ah haca' hune' chiwuc'an? ẍi Comam. Istak'wi ebnaj: —Ho', chu juc'nihan̈, ẍi ebnaj. 23 Yalni Comam tet ebnaj xin: —Yeltoni chu heyuc'ni hune' vaso ha ha' caw c'ah chiwalti'an, yaja' wal haninti'an mach wetojan walnihan mac chiay tz'on̈no yin̈ inwatx'k'aban yeb yin̈ inmeck'aban, to han̈e Inmaman ohtan̈e mac tet chak'a, ẍi Comam. 24 Hayet yaben ebnaj lahon̈wan̈xa iscuywom Comam, caw tit ishowal ebnaj yin̈ ebnaj cawan̈ tu'. 25 Yet yilni Comam hune' tu', yawtenico Comam ebnaj isc'atan̈, yalni Comam: —Hex ti' caw heyohtaj tato ebnaj ayco yahawo con̈ob, ay yip ebnaj yiban̈ con̈ob tu'. Haxa ebnaj nime winaj yul con̈ob yahawxa chute isba ebnaj yin̈ anma. 26 Wal texol xin mach c'uluj tato hac tu' cheyute, wal xin ta ay hunu mac ec'bal yelapno ye chabe, ahojab chioc chejaboj. 27 Haxa mac choche ec'bal yelapno chuco texol xin, yak'abico isba chejaboj. 28 Hac tu' wehan Hanin Ak'bilintijan texol yu Comam Dios, mach hulnajojinan yu inchejnihan anma, walxinto haca' chejab wecojan xol anma, cat wak'ni camo inbahan hac tu' xin chu intohlanan ismul tx'i'al anma, ẍi Comam. 29 Hayet yel Comam Jesús yeb ebnaj iscuywom yul con̈ob Jericó, caw hantan̈e anma oc tzujno yinta Comam. 30 Ay xin cawan̈ ebnaj mach chu yilni, tz'on̈anayo isti' beh. Hayet yaben ebnaj tato ha' Comam Jesús lan̈an yec'toj, yahwi ebnaj tet Comam yin̈ caw ip haca' ti': —Mamin, yuninal isc'ahol naj rey David, caw tz'ayojab hac'ul jin̈an̈, ẍi ebnaj. 31 Yaja' xin oc anma iscacha' ebnaj yun̈e isbejni ebnaj yel yaw, yaj caw islahico ebnaj yahwi, yalnipaxo ebnaj: —Mamin, isc'ahol jichmam David, caw tz'ayojab hac'ul jin̈an̈, ẍi ebnaj. 32 Yet yaben Comam Jesús hune' tu' yoc lin̈noj, yawtenti Comam ebnaj isc'atan̈, isk'amben Comam tet ebnaj: —¿Tzet cheyoche chinwatx'ehan? ẍi Comam. 33 Istak'wi ebnaj: —Mamin, chijochehan̈ chawak' hajlo cosatan̈, ẍi ebnaj. 34 Istz'aycan̈ isc'ul Comam yin̈ ebnaj; yanico Comam isk'ab yin̈ isbak'sat ebnaj, yin̈n̈ena tu' xin ishajlo issat ebnaj, yoc tzujno ebnaj yinta Comam.
