SAN MATEO 2

1Lawi spitzc'a ni'an unin Jesús yul con̈ob' Belén b'et Judea, x'apni hunk'aan heb'naj tz'ajan sc'ul b'et Jerusalén, speto heb'naj yetc'ulal b'ay ch'ahiloj tz'ayic. Yet hunec tu', aycoj naj Herodes reyal b'et Judea. 2Sk'amb'en heb'naj: —¿B'ay ay naj ni'an sreyal con̈ob' Israel ti'? Haxca xjil yahiloj hune' tx'umel b'ay ch'ahiloj tz'ayican, ha' xin xyeniloj ta xpitzc'a naj. Yuxin chon̈ hul co hak'e' najan. 3Yet xab'en naj rey Herodes hune' tu', somchatoj yul swi' naj, b'oj sunil anma ay Jerusalén. 4Yuxin xawte naj heb'naj swi'al sacerdote Israel, b'oj heb'naj cuywaom yin̈ sley ya' Moisés. Sk'amb'en naj tet heb'naj: —¿B'aytaxca ẍpitzc'a naj Cristo tu'? ẍi naj. 5Xalni heb'naj: —Yul con̈ob' Belén aycoj b'et Judea ti', hat ẍpitzc'anaj yeyi, hactu' xu stz'ib'n̈encan hune' ya' schejab'lom Comam Dios, chalni ya' yin̈ hacti': 6Con̈ob' Belén k'a' ni'anch'an sataj hunk'aanxa con̈ob' ay b'et Judea, yaja' k'a' ayto yelapnoj ye sataj hunk'aanxa hej con̈ob', haxca hat ẍpitzc'aoj hune' naj yahaw. Ha' naj ch'ocoj stan̈eomaloj hin con̈ob' Israel ti'an, ẍi Yum Comam Dios. 7Lawitu' ewantaj xawte naj Herodes tu' heb'naj tz'ajan sc'ul, spich'n̈iloj naj heb'naj b'ak'in̈ xa ichi yilni heb'naj hune' tx'umel tu'. 8Lawi yab'eniloj naj, xalni naj: —Aswej Belén tu', cat he k'amb'eni b'ay ay naj ni'an tu'. Lawi schalooj naj heyu, chex ec'oj heyala' wetan, haxin̈wal chin toj hin hak'e' pax najan, ẍi naj. Lawitu' xchejottoj heb'naj yul con̈ob' Belén yu naj. 9Lawitu' xto heb'naj xin. Hune' tx'umel ẍtic'a yil heb'naj yetc'ulal b'ay ch'ahiloj tz'ayic, b'ab'el sataj heb'naj, masanto x'apni yib'an̈ b'ay ay naj ni'an, hat xcani. 10Ha' xilni heb'naj hune' tx'umel tu' hunecxa, caw stzala heb'naj. 11Yet x'apni heb'naj b'etu', x'octoj heb'naj yul n̈ah, xilni heb'naj ni'an unin b'oj smi'. X'ay jahnoj heb'naj tet, shak'en heb'naj. Lawitu' shajni heb'naj sc'uanb'al, xa'ni heb'naj oro, hunmajan incienso, b'oj hunk'aan mirra caw xuk'sam tet. 12Lawitu' xhalot tet heb'naj yul swayic ta mach'ec' heb'naj yala' tet naj Herodes b'ay ay ni'an unin tu'. Yuxin nanxa b'ehal xi'toj heb'naj, yet xmeltzo heb'naj yul scon̈ob'. 13Lawi smeltzo heb'naj tz'ajan sc'ul tu', syenipaxcan̈ sb'a yángel Comam Jahaw tet ya' José yul swayic. Xalni tet ya': —Cha'a'tij naj Herodes sayomal yet ni'an unin ti' cat spotx'noj naj yalni. Yuxin itoj naj b'oj smi' b'et Egipto. Canan̈wej b'etu' masanto ẍwala' ta wetan b'ak'in̈ chex meltzooj. 14Yuxin hatic'a hune' ak'b'al tu' sk'uycan̈ sb'a ya' José, xinitoj ya' ni'an unin b'oj smi', xto heb'ya' Egipto. 15Hat x'eh heb'ya' b'etu' masanto xcam naj Herodes. Hactu' xu yijni sb'a tzet halb'ilcan yu Comam Jahaw yu hune' ya' schejab'lom, chalni ya': B'et Egipto xwawtetij hin C'aholan. 16Ha' xilni naj Herodes to matxa x'ec' heb'naj tz'ajan sc'ul yala' tet naj, x'etaot naj yu heb'naj chab'e, yuxin caw xtit showal naj. Schejni naj potx'laxoj niẍtej winaj unin maẍto ch'el scab' hab'il yul con̈ob' Belén b'oj shoyanil tu' haxca hactu' ch'elicoj yet sk'amb'en naj tet heb'naj tz'ajan sc'ul. 17Hactu' xu yijni sb'a tzet tz'ib'n̈eb'ilcan yu ya' Jeremías schejab'lom Comam Dios, chalni ya': 18X'ab'elax hune' aw yul con̈ob' Ramá. Caw ay ok'il b'oj nimej b'isc'ulal. Ya' Raquel ch'ok' ya' yin̈ yunin. Mach sje sc'ul ya' ta ch'a'lax snimanil sc'ul ya' haxca matxac'oj. 19Yet xcam naj Herodes, xalnipax yángel Comam Jahaw tet ya' José yul swayic yet ay ya' Egipto: 20—Tinan̈ meltzoan̈ b'oj ni'an unin ti' b'oj smi', paxan̈wejtoj sat xtx'otx' heyetcon̈ob' israel, haxca heb'naj xal potx'noj ni'an unin ti', xax cam heb'naj. 21Lawitu' xpaxtij heb'ya' sat xtx'otx' yetcon̈ob' israel. 22Ha' yet xab'en ya' José ta naj Arquelao sc'ahol naj Herodes, xcan yahawoj b'et Judea seleloj smam tu', xnanon ya' yapni b'etu'. Yuxin xal Comam Dios yul swayic ya' tzet wal yuten sb'a ya', hactu' xu sto heb'ya' b'et Galilea. 23Lawi yapni heb'ya' b'etu', hat x'eh heb'ya' yul con̈ob' Nazaret. Hactu' xu yijni sb'a tzet halb'ilcan yu hune' schejab'lom Comam Dios chalni ya': Nazareno ẍhal-laxoj yin̈.


Copyright
Learn More

will be added

X\