SAN MATEO 2

1Bey yul con̈ob Belén ayco yul ismajul tx'otx' Judea, ha' tu' pitzc'a nich'an Jesús. Yet hune' tiempohal tu' ha' naj Herodes ayco isreyalo tx'otx' Judea. Ay xin huntek'an ebnaj caw ay ishelanil chicuyni yin̈ tzettaj ye tx'umel, ispeto ebnaj yin̈ yetc'ulal bay chiahilo tz'ayic. Yet yapni ebnaj bey con̈ob Jerusalén, 2isk'amben ebnaj: —¿Baytu'wal ay hune' naj nich'an xapitzc'ahi, naj chioc isreyalo anma Israel ti'? Jilan̈ yahilo hune' tx'umel yin̈ yetc'ulal bay chiahilo tz'ayic, ha' xin ak'ni cotxumulojan̈ tato xapitzc'a naj. Yuxin macon̈titan̈ jik'ayo cobahan̈ tet naj, ẍi ebnaj. 3Yet yaben naj rey Herodes hune' tu', caw somchacan̈ yul iswi' naj yeb sunil anma ay yul con̈ob Jerusalén. 4Yuxin yawte naj Herodes tu' ebnaj yahawil yin̈ ebnaj sacerdote Israel, yeb ebnaj cuywawom yin̈ isley naj Moisés; isk'amben naj tet ebnaj: —¿Baytaxca tu' chipitzc'a naj Cristo? ẍi naj. 5Istak'wi ebnaj tet naj: —Yul con̈ob Belén yul ismajul Judea chipitzc'a naj, yuto hac tu' yu istz'ibn̈elaxcanayo yul Yum Comam Dios yu hune' ischejab yet payat, bay chal haca' ti': 6Con̈ob Belén, ha' caw nich'anch'an sata hunuxa con̈ob ay yul ismajul tx'otx' Judea, yaja' caw ec'balto yelapno ye sata huntek'an con̈ob tu', yuto ha' bey tu' chipitzc'a hune' naj yahaw. Ha' naj xin chioc tan̈eno con̈ob Israel, ẍiayoj, ẍi ebnaj. 7Lahwi tu' xin, yawten naj rey Herodes ebnaj mago yin̈ ewantajil, yoc naj isk'ambeno tet ebnaj yin̈ tzet tiempohal isye isba hune' tx'umel tu' tet ebnaj. 8Lahwi tu' xin ischejnito naj Herodes tu' ebnaj bey con̈ob Belén, yalni naj tet ebnaj: —Asiwe bey Belén tu', caw xin chek'ambe yin̈ tzet caw ye nich'an unin tu'. Lahwi yilcha naj heyu cat heyul heyalno wetan cat intopaxojan winayo inbahan tet naj, ẍi naj. 9Lahwi yalni naj Herodes hune' tu' isto ebnaj. Wal hune' tx'umel yil ebnaj yin̈ yetc'ulal bay chiahilo tz'ayic babel sata ebnaj, yoc lin̈no bay ay nich'an Jesús tu'. 10Hayet yilni ebnaj hune' tx'umel tu' caw tzalacan̈ ebnaj. 11Hayet yapni ebnaj xin yocto ebnaj yul n̈a. Yilni ebnaj nich'an nene' tu' yeb ismi', yay jahno ebnaj sata nich'an nene' tu', yalni ebnaj c'ulla tzoti' yin̈. Lahwi tu' ishajni ebnaj isc'uwanbal, yak'ni ebnaj ch'en oro, yeb te' pom, yeb huntek'an an̈ caw xuk' sam chiyij mirra sabehal tet nich'an Jesús tu'. 12Yaja' xin hallax tet ebnaj yul iswayic tato matxa ch'ec' ebnaj yala' tet naj rey Herodes yin̈ nich'an Jesús tu', yuxin nan behalxa bay to ebnaj yet ispaxto ebnaj bey iscon̈ob. 13Haxa yet xapaxto ebnaj mago hulic'o ilno nich'an Jesús, isyeni isba hune' yángel Comam Dios tet naj José yul iswayic, yalni naj ángel tu': —Ahan̈wano yin̈ an̈e, ito nich'an unin ti' yeb ismi' cat hato bey Egipto. Wal haweh bey tu' masanto haninan chiwalan tawet bak'in chachmeltzohi, yuto chati naj Herodes issayomal nich'an unin ti' cat ispotx'ni naj yalni, ẍi naj ángel tet naj José. 14Lahwi tu' yahwano naj José, yinito naj nich'an Jesús tu', isto naj yin̈ isbel yeb ix María bey Egipto yin̈ ak'balil. 15Ha' bey tu' xin ehayo naj yeb ix masanto cam naj rey Herodes. Hac tu' yu yijnicano isba tzet halbilcano yu Comam Dios tet hune' ischejab yet payat yet istz'ibn̈encano naj haca' ti': “Bey Egipto chiwawteti Inc'aholan,” ẍiayoj. 16Hayet yilni naj rey Herodes tato matxa ec' ebnaj mago yala' tet naj yin̈ naj nich'an Jesús, caw tit ishowal naj yuto etli ebnaj yin̈ naj yabe. Ischejni naj potx'laxo sunil niẍte winaj unin, nene' masanta niẍte yin̈ cab habil ay yul con̈ob Belén yeb huntek'anxa con̈ob ayco yin̈ ishoyanil, yuto hac tu' chielico istiempohal yin̈ tzet yal ebnaj mago tet naj. 17Hac tu' yu yijnicano isba tzet tz'ibn̈ebilcano yu naj Jeremías, hune' ischejab Comam Dios yet payat bay chala: 18Abelax hune' aw yul con̈ob Ramá, caw ay ok'il yeb nimeta bisc'ulal. Ha' ton ix Raquel chiok' yin̈ej yunin, machi xin chisje ix chiak'lax isnimanbal isc'ul ix, yuto camnaxa ej yunin ix tu', ẍiayoj. 19Haxa yet xacam naj rey Herodes, isyeni isba hune' yángel Comam Dios tet naj José yul iswayic bey Egipto, yalni naj ángel tu': 20—Ahan̈wanoj cat hameltzo yeb nich'an unin ti' yeb ismi' bey hacon̈ob Israel, yuto xacam ebnaj ochen potx'no camo nich'an unin ti', ẍi naj ángel. 21Haxa yet yaben naj José hune' tu' yahwano naj, yinito naj naj nich'an Jesús tu' yeb ismi', ispaxti naj sat tx'otx' Israel hunelxa. 22Yaja' yabelo naj tato naj Arquelao, isc'ahol naj rey Herodes tu' oc reyalo selelo bey Judea, yuxin xiw naj yapni bey tu'. Yaja' xin hallax tet naj yul iswayic yu Comam Dios tato chito naj yul ismajul Galilea. 23Yet yapni naj bey tu' yehayo naj yeb ix María yeb naj nich'an Jesús yul con̈ob Nazaret. Hac tu' yu yijni isba tzet tz'ibn̈ebilcano yu ebnaj ischejab Comam Dios yet payat bay chala tato nazareno chihallax yin̈ Comam Jesús.

will be added

X\