SAN MATEO 19

1Lawi yalni Comam Jesús hunk'aan tzetet ti' x'el b'et Galilea, xto b'et Judea k'axepal ha' niman Jordán. 2Caw tx'ihal anma xto yin̈ Comam. Xan̈ten hej yawub' x'ilaxtoj tet. 3X'apni hunk'aan heb'naj fariseo, x'oc heb'naj yilwe' Comam yun̈e yilni heb'naj ta ay b'ay ẍlec'ta Comam yin̈ stzoti'. Sk'amb'en heb'naj tet: —Mamin, ¿taxca chu spohni sb'a hunuj naj b'oj yixal yin̈ tzann̈etic'a tzet yu? . 4Xta'wi Comam: —¿Tox mach b'ay cheyil yul Yum Comam Dios to yettax swatx'encan Comam anma, mohan xu swatx'eni? 5Chalni Comam yul Yum: Yuxin chacan naj winaj smam smi' tu' yu shunb'ancanoj sb'a naj b'oj yixal. Hune'xan̈e anmail chucan scawan̈il, ẍi. 6Yuxin matxa cawan̈oj, to hune'xan̈e. Haxca mac shunb'acan Comam Dios, matxa mac chu spohnitoj. 7Sk'amb'en pax heb'naj: —¿Tzet yuxin xalcan ya' Moisés ta chu ya'lax yumal pohob'ail tet ix ixale cat yalaxcan ix?. 8Xalni Comam tet heb'naj: —Haxca ẍpalc'on he tx'ojal, yuxin xal ya' hune' tu' ta chu he pohni he b'a b'oj heyixal. Wal yet x'ichitij satyib'an̈k'inal ti', mat hacoj tu' ye yu Comam Dios. 9Yuxin ẍwal teyetan, mac spohtoj sb'a b'oj yixal, cat yi'ni naj hunujxa ix, chacoj naj smul yul sat Comam Dios, han̈c'a ti' ta ay sucal xu ix b'oj hunujxa naj. 10Xalni heb'ya' ẍcuywi yin̈ Comam: —Ta matxa chu co pohni co b'a b'oj jixal, k'a' t'in̈an machon̈ mohyina chaltu'. 11Yuxin xal pax Comam tet heb'ya': —Yaja' mat suniloj mac ch'ijcha hune' cheyal ti' yu, to han̈c'an̈e mactak'tic'a yecanoj yib'an̈. 12Ay heb'naj mat tz'ajanoj snimanil yet ẍpitzc'ayi, yuxin machu yi'ni yixal. Ay heb'naj anmaxa ch'etantoj snimanil, yuxin machu yi'ni yixal. Ay heb'naj yun̈e yocnicoj yu Comam Dios, yuxin machi' yixal. Yuxin mac ch'ijcha yu, majab' chi' yixal. 13Lawitu' x'iottoj haywan̈ niẍtej unin tet Comam Jesús yun̈e yanicoj Comam sk'ab' yin̈, cat ya'ni Comam oración yin̈, yaja' xcachwa heb'ya' ẍcuywi yin̈ Comam, mach sje heb'ya' ẍhitzicoj sc'atan̈ Comam. 14Xalni Comam tet heb'ya': —Mache cach stit niẍtej unin ti' tin c'atan̈an, haxca anma haca' to ye niẍtej unin ti', ha' ch'oc yul sk'ab' Comam Dios. 15Xanicoj Comam sk'ab' yin̈ niẍtej unin tu', lawitu' xto Comam. 16Yet hunec, xb'ey hune' naj tzeh yila' Comam Jesús, sk'amb'en naj: —Mam cuywaom, ¿tzet hunuj c'ul wunian haxin̈wal chin chab' k'inal mach stan̈b'alan?. 17Xalni Comam: —¿Tzet yuxin wet cha k'amb'ean tzetet c'ul? Hune'n̈e mac c'ul. Ta chawoche ha chab' k'inal mach stan̈b'al, yijye hej mandamiento. 18Sk'amb'en naj: —¿B'aytet mandamiento? —Ha' mandamiento yilal ha yijyeni, ha': Machach potx'wayi, machach ixli, machach elk'ani, mach a hob'can̈ lek'tial yin̈ hawet-anmail. 19Ayojab' yelapnoj ye ha mam ha mi' yul ha sat, haca' ha yan̈en ha b'a, hactu' ha xahann̈en mactaj aycoj ha cawilal,. 20—Sunil hunk'aan ti' xin yijyetijan, ¿tzetto hunujxa wal hin yijyenan? . 21Ta chawoche stzujchaapnoj sc'ulal hawu, txon̈iloj sunil tzet ayach cat hawitxk'antoj stohol xol anma meb'a'. Waltu' ay ha k'alomal b'ay ay Comam Dios. Lawitu' cat hawoccan tzujnuj win̈an. 22Ha' xab'en naj hune' tu' caw b'isc'ulal xuluj yanma naj, xpaxtoj naj, haxca caw k'alom naj. 23Lawitu' xalni Comam tet heb'ya' ẍcuywi yin̈: —Yin̈ caw yeli ẍwal teyetan, anma k'alom ti' caw ya'taj yoctoj yul sk'ab' Comam Dios. 24Ẍwalni teyet hunecxaan: K'a' mach niman yec'toj hune' no' cameyo yul sholanil syutz ch'en acuẍa sataj yanicoj sb'a hune' naj k'alom yul sk'ab' Comam Dios. 25Ha' xab'en heb'ya' hune' tu' caw xc'ay sc'ul heb'ya', chalni heb'ya': —Ta hactu' ye hune' tu', ¿mactaxca ẍcolchaoj?. 26Xt'an̈xicoj Comam yin̈ heb'ya', xalni Comam: —Hune' ti' mach ẍc'oji anma yuni, yaja' wal Comam Dios, sunil chu yu Comam. 27Xalni ya' Pedro: —Mamin, chim hawila hayon̈ ti'an, sunil tzet xco tin̈chacanan, xcon̈ occan tzujnuj tawin̈an. ¿Tzet ẍco chab' spajojan?. 28Xalni Comam: —Yin̈ caw yeli ẍwal teyetan, yet hune' tz'ayical tu', yet ch'ac'b'oj sunil tzetet, hayin Ab'ilintij yu Comam Dios xol jet-anmail ti'an chin ocoj tz'on̈noj yul hin tz'on̈ob'al caw ay smayan. Hex cab'lan̈wan̈ tzujan ex win̈ ti'an, chex ocoj yul hunun he tz'on̈ob'al cat heyocoj heyi'noj cuenta yin̈ cab'lahon̈eb' majan anma jet israelal. 29Yuxin mac ch'anican yatut wuan, maca yuẍtaj, yanab', smam, smi', hej yuninal, mato xtx'otx' yu yoccan tzujnuj win̈an, caw tx'ihal spaj schab', b'oj schab' sk'inal mach stan̈b'al. 30Tx'ihal mac caw ay smay tinan̈, yaja' yet ch'apnoj hune' tz'ayic tu', caw matxa yelapnoj chub'canoj. Tx'ihal mac comonaln̈e ye tinan̈ ẍjila, yet ch'apnoj hune' tz'ayic tu' caw ay smay chub'canoj.


Copyright
Learn More

will be added

X\