SAN MATEO 18

1Yet hunec' tu' sk'amb'e heb'ya' ẍcuywi yin̈ Comam Jesús tet: —Yin̈ hantaj anma aycoj yul sk'ab' Comam Dios, ¿mac k'a' ec'b'al? . 2Xawtentij Comam hune' ni'an unin, xanicoj yin̈ sat heb'ya', xalni Comam: 3—Yin̈ caw yeli ẍwal teyetan, ta mache yiloj lolo'al yin̈ heyanma, che yiniay he b'a haca' ni'an unin ti', machu heyoc yul sk'ab' Comam Dios. 4Mac chiyoj sb'a haca' hune' ni'an unin ti', ha' k'a' ec'b'al xol anma aycoj yul sk'ab' Comam Dios. 5Mac ẍchani hunuj ni'an unin yu hin yochenan, hayin chin schaan. 6Ta ay hunuj mac ch'a'ni lectaoj hunuj ni'an unin cha' yuluj sc'ul win̈ ti'an, c'antaj. K'a' c'ulmi ta ẍc'al-laxcoj hunuj ch'en niman ch'en yin̈ snuk' cat sb'ejlaxaytoj yich ha' mar. 7Caw b'isc'ulal tet anma yu hej tzetet ch'a'ni lectaoj. Waltu' yeli, stohb'alk'inal ay tzet chon̈ a'ni lectaoj, yaja' c'antaj mac ch'a'ni lectaoj hunujxa yetb'i. 8Yuxin ta he k'ab' mato heyoj chex a'ni lectaoj, yetmi aya che tzoq'uiltoj. Waxan̈ca mat tz'ajanoj he nimanil che chani he k'inal mach stan̈b'al, ec'b'alto k'a' c'ul sataj tz'ajancoj he nimanil cat he tojcan xol k'a' k'a' maẍtic'a ẍtan̈i. 9Ta sb'ak' he sat chex a'ni lectaoj, yetmi aya cheyiltij. Waxan̈ca hunch'an sb'ak' he sat che chanoj he k'inal mach stan̈b'al, ec'b'alto k'a' c'ul sataj ayictoj scab'il sb'ak' he sat chex toj yul camb'al xol k'a' k'a'. 10- 11Nann̈e heyu heyahni hunuj ni'an unin ti', haxca ẍwal teyetan ta sunilb'al k'inal aycoj yángel stan̈eomal yet yin̈ sat hin Mam ay yul satcan̈an. 12K'inaloj ta ay hunuj naj ay 100 scanelu lan̈an slow sat witz, yaja' ẍc'aytoj hunuj no', ¿taxca machacan naj no' 99 cat sto naj saynoj no' xc'ayayoj tu'? 13Ha' ẍchalo no' yu naj, hantam stzala naj yin̈ no', sataj yin̈ no' 99 mach b'ay ẍc'ahayoj. 14Hactu' Comam Dios, machal sc'ul ta ay hunuj ni'an ti' ẍc'aytoj. 15Ta ay hunuj heyetb'i ẍcan tx'ojal teyet, aswej tzoteloj b'oj he chuquil, cheyalni tet tzet xu ya'ni tacoj he c'ul. Ta chab'etoj tzet cheyala, c'ul. 16Taca machab'etoj, iwejtoj hunuj, maca cawan̈oj mac teyin̈, ẍto tzoteloj b'oj hune' mac tu', yun̈e' ta yu tzet chal cawan̈ mato oxwan̈ cha' sb'a tu' ch'ilaxtij cuenta yin̈ hune' mac tu', haca' yalni Yum Comam. 17Yaja' ta maẍtic'a cha' watx'e sb'a yin̈ sat heb'ya' tu', halwej tet iglesia. Taca machab'etoj tzet chal iglesia, haca' hune' mac mat ohtajn̈eoj Comam Dios chucanoj, maca haca' hunuj naj ihomiloj melyu yin̈ anma. 18Yin̈ caw yeli ẍwal teyetan, b'aytet mat t'in̈anoj ye sat tx'otx'otx' ti' heyalni, mat t'in̈anoj ye yul sat Comam Dios. B'aytet t'in̈an ye sat tx'otx'otx' ti' heyalni, ha' hune' tu', t'in̈anxa ye yul sat Comam Dios. 19Ẍwal pax teyetan, ta ay cawan̈ojex hun che k'an hunuj tzetet yet che ya'ni heyoración, ẍtic'a a'laxoj teyet yu co Mam Dios. 20Haxca b'ay yaman cawan̈ maca oxwan̈oj hex yu he watx'encoj hunuj tzetet yin̈ b'aytet chal hin c'ulan, ayincoj te xolan. 21Lawitu' xhitzicoj ya' Pedro, xalni ya': —Mamin, ta ay hunuj wuẍtaj cha' tacoj hin c'ulan, ¿hayel taxca chin nahuln̈etoj smulan? ¿hujel mi el? 22Xta'wi Comam: —Matn̈em hujeloj el, to matxam xb'ischa ju. 23Ẍwalnipax teyetan tzet chute Comam Dios anma aycoj yul sk'ab'. Lahan b'oj hune' naj rey ch'ilni hantaj sc'as heb'naj smunlawom. 24Lan̈an yichencoj naj sb'isb'antoj hantaj sc'as heb'naj tu', x'iottoj hune' naj caw tx'ihalxa smilal sc'as tet naj rey tu'. 25Haxca mach ẍc'oji naj stohlan sc'as tu', yuxin schej naj rey tu' txon̈laxojtoj naj, b'oj yixal, yuninal, b'oj sunil tzet aya yun̈e stan̈ hanic'oj sc'as naj. 26X'ay jahnoj naj yin̈ sat naj rey tu', xalni naj: Mamin, niman chawute ha c'ul hanic'ojxa, ẍk'uychaoj ch'en melyu wuan, cat wa'noj sunil hin c'as tu'an, ẍi naj. 27Stz'a'can̈ sc'ul naj rey tu' yin̈ naj, sb'ut'nicantan̈oj naj sc'as naj, matxa x'octoj naj yul presu. 28Yet xpaxtoj naj, c'uxan xilayoj naj hune'xa naj yet-munlawomal ay sc'as tet, yaja' hanic'n̈e. X'ocna yuch'nuj naj yin̈ snuk' scamiẍ naj, etza xmaji shak'o naj yu naj, xalni naj: Tinan̈ acanayoj ha c'as wetan, ẍi naj. 29X'ay jahnoj naj ay sc'as tu' yin̈ sat naj, chalni naj: Niman chawute ha c'ul win̈ hanic'ojxaan, ẍk'uychaoj ch'en wuan, cat wa'nojan, ẍi naj. 30Yaja' mach xab'etoj naj tu', to x'iottoj naj tet naj juez yu naj, x'alaxictoj naj yul presu masanto xayoj naj sunil sc'as tu'. 31Yaja' c'uxan xil hunk'aanxa heb'naj yet-munlawomal naj tzet x'uteot naj yu naj tu', ẍtac sc'ul heb'naj, xto heb'naj yalnoj tet naj rey. 32Xawten naj rey naj, xalni naj tet naj: Hachti' ẍpalc'on ha tx'ojal. Xin b'ut'tan̈oj ha c'asan haxca xa k'an nimanc'ulal wetan. 33Wal ach xin, mach xawa' nimanc'ulal yin̈ hawet-munlawomal haca' xu wa'ni nimanc'ulal tawin̈an, ẍi naj rey. 34Caw xchiwacan̈ sc'ul naj rey tu', schejni naj alaxojictoj naj tx'oj tu' yul presu masanto xacanay naj sunil sc'as. 35Hactu' chex yute' hin Mam ay satcan̈an ta mat suniloj he c'ul che nahuln̈etoj smul heyet-anmail ẍcan tx'ojal teyet.


Copyright
Learn More

will be added

X\