SAN MATEO 17

1Wajebxa tz'ayic xin, ishec'nilo isba Comam Jesús xol anma yinito Comam naj Pedro, naj Jacobo yeb yuẍtaj, ha' ton naj Juan, yin̈ iswi' hune' witz caw nahat yecan̈. 2Ha' bey tu' xin ishel isba yillax yin̈ Comam, caw toxan̈e chitzejtzon sat Comam haca' tz'ayic. Wal xil isk'ap Comam xin, caw sajhopon̈e elicoj. 3Lan̈antotic'a xin yilni ebnaj naj Elías yeb naj Moisés, lan̈an istzotel ebnaj yeb Comam. 4Yalnican̈ naj Pedro tet Comam Jesús: —Mamin, caw c'ul ta wal je bey ti', ta chisje hac'ul chu cowatx'enan̈ oxebo niẍte pat; hunu hawet, hunu yet naj Moisés, yeb hunu yet naj Elías ti', ẍi naj Pedro. 5Hayet lan̈an yalni naj Pedro hune' tu' xin, yayilo hune' moyan caw sajhopon̈e, yoc hoyno yin̈ ebnaj yeb Comam. Yaben ebnaj iscuywom Comam tu' hune' yul nuk'e xol moyan tu' yalni haca' ti': —Ha' naj ti' Inc'aholan caw xahan ay wuhan, caw chintzalahan yin̈ naj; abewe tzet chal naj, ẍiayti xol moyan. 6Hayet yaben ebnaj oxwan̈ iscuywom Comam hune' tu', caw xiwcan̈ ebnaj, yaycano xulno ebnaj sat tx'otx'. 7Lahwi tu', ishitzico Comam isc'atan̈ ebnaj, yanayo Comam isk'ab yiban̈ ebnaj, yalni Comam: —Ahan̈wewanoj, mach chexxiwi, ẍi Comam. 8Hayet yilniti ebnaj xin, matxa mac lin̈ancan̈ isc'atan̈ Comam. 9Haxa yet lan̈an yayti Comam yin̈ iswi' hune' witz tu' yeb ebnaj iscuywom, yalni Comam: —Machi bay cheyal hune' maxeyil ti' masanto yet chinitzitzbican̈an xol camom, Hanin Ak'bilintijan texol yu Comam Dios, ẍi Comam tet ebnaj. 10Lahwi tu' isk'amben ebnaj tet Comam: —¿Tzet yin̈ xin chal ebnaj cuywawom yin̈ isley naj Moisés tato yilal babel chul naj Elías sata naj Cristo? ẍi ebnaj tet Comam. 11Istak'wi Comam tet ebnaj iscuywom tu': —Yeli hac tu', yilal yul naj Elías tu' babel yun̈e isnani isba anma cat yoc yin̈ istoholal. 12Yaja' chiwalan teyet tato xahul naj Elías tu' yaja' mach txumchalo naj yu ebnaj, yuxin iswatx'e ebnaj baytet yal isc'ul yin̈ naj Elías tu'. Hac tu' xin chinutelaxan Hanin Ak'bilintijan texol yu Comam Dios, chiec'ya' wanmahan yu ebnaj, ẍi Comam. 13Lahwi tu' xin, istxumchalo yu ebnaj tato ha' yin̈ naj Juan anican̈ ha' iswi' anma tzotel Comam. 14Yet yayilo Comam yeb iscuywom xol anma xin, ishitzico hune' naj isc'atan̈ Comam, yay jahno naj sata Comam, yalni naj tet Comam: 15—Mamin, caw tz'ayojab hac'ul yin̈ inc'aholti'an yuto caw chilow hune' yaxcamic yin̈ naj, caw chiec'ya' yanma naj yu. Tx'i'alxa el chito naj yul k'a' yeb xol ha ha'. 16Mawitijan naj tet ebnaj hacuywom ti', yaja' xin machi yu yak'ni cawxo ebnaj naj, ẍi naj tet Comam. 17Istak'wi Comam: —Hex ti', caw mach cheyaco heyanma yin̈ Comam Dios, caw tx'ojexcanoj. Caw nimanxa tiempo ayinic'ojan texol. ¿Hantatoc'anab tiempo chextecha wuhan? Caw ya'xa wanmahan heyu. Iweti naj bey ti', ẍi Comam. 18Ischejnilo Comam ischejab naj matzwalil ayco yin̈ naj tzeh tu'. Lan̈antotic'a xin iscawxilo naj. 19Haxa yet ischuquilxan̈e Comam Jesús yeb ebnaj iscuywom tu', isk'amben ebnaj tet Comam: —Mamin, ¿tzet yin̈ xin machi mayu jinilojan̈ ischejab naj matzwalil yin̈ naj tzeh ti'? ẍi ebnaj. 20Istak'wi Comam tet ebnaj: —Yuto hex ti' ayto mach chiapni heyanico heyanma yin̈ Comam Dios. Yin̈ caw isyelal chiwalan teyet ta chicawxi hec'ul yin̈ Comam Dios waxan̈ca txann̈e yeco heyanma yin̈ Comam haca'n̈e hunu nich'an yin̈atil te' mostaza, chu heyalni tet hunu witz haca' ti': “Heq'uilo haba bey ti', asi' hunuxa bayah,” ta quexchi, chisyije hune' witz tu' tzet cheyala. Sunil chu hewatx'eni ta ayco heyanma yin̈ Comam Dios. 21Yuto huntek'an ischejab naj matzwalil ti', machi el yin̈ anma ta mach chextxahli yeb heyak'len wahil hetxahli tet Comam Dios, ẍi Comam Jesús. 22Hayet yec' Comam Jesús yeb ebnaj iscuywom yul ismajul Galilea, yalni Comam tet ebnaj: —Hanin Ak'bilintijan texol yu Comam Dios chinálaxicojan yul isk'ab anma. 23Chinak'lax camojan, yaja' yin̈ yox tz'ayic xin cat witzitzbican̈an hunelxa, ẍi Comam. Hayet yaben ebnaj hune' tu' caw occano bisc'ulal yin̈ yanma ebnaj. 24Hayet yapni Comam Jesús yeb ebnaj iscuywom bey con̈ob Capernaum, yapni ebnaj chiinilo ch'en tohlabal yin̈ yatut Comam Dios isc'atan̈ naj Pedro. Isk'amben ebnaj tet naj: —¿Chimyak' naj chachcuyni istohlabal yin̈ yatut Comam Dios? ẍi ebnaj. 25Istak'wi naj Pedro: —Ho' chitohlawi ya', ẍi naj. Hayet yocto naj Pedro tu' yul n̈a ha' Comam babel k'amben tet naj: —Simón, ¿tzet chu hatxumni yin̈ hune' ti'? Mac tet chisk'an ebnaj yahaw con̈ob ch'en tohlabal, ¿ham tet yet con̈ob ebnaj, mato tet anma nan con̈obal? ẍi Comam. 26Istak'wi naj Pedro: —Ha' anma nan con̈obal, ha' ch'ak'ni ch'en, ẍi naj. Yalni Comam: —Ta hac tu', ha' mac yuninaltic'a con̈ob yehi mach yilalo chak' ch'en. 27Yaja' yun̈e mach ch'oc ishowal ebnaj jin̈, asi' isti' ha' lago cat hawanayto ch'en ik'omati cay xol ha'. Ha' xin yul isti' no' babel cay chiahti hawu ayicto hune' ch'en melyu c'uxan isk'oji istohlan hawet yeb wetan. Chawiti ch'en cat hato hawak'nocano ch'en tet ebnaj chichahni ch'en tohlabal tu', ẍi Comam tet naj Pedro.

will be added

X\