SAN MATEO 17

1Yet-xa swaj tz'ayic shec'niloj sb'a Comam Jesús xol anma, xinitoj Comam ya' Pedro b'oj heb'ya' cawan̈ yuẍtaj sb'a, ya' Jacobo b'oj ya' Juan. Xto Comam b'oj heb'ya' swi' hune' niman witz. 2Hat shel sb'a yilot Comam yin̈ sat heb'ya'. Caw ch'elwan sat haca' tz'ayic, xil sk'ap caw saj pok'pon̈e xuluj. 3Hunip tu' xilni heb'ya' yul ya' Moisés b'oj ya' Elías, x'oc heb'ya' tzoteloj b'oj Comam. 4Lawitu' xalni ya' Pedro: —Mamin, caw sak'al ta wal je b'eti'. Ta sje ha c'ul chu wanican̈ oxeb'oj niẍtej patan, hune' hawet, hune' yet ya' Moisés, hunujxa yet ya' Elías. 5Lan̈anto b'in yalni ya' Pedro hune' tu', x'ayiloj hune' asun caw sajb'inb'on̈e jilni, xpichottoj Comam b'oj heb'ya' yu. Xab'en heb'ya' oxwan̈ hune' tzoti' x'eliloj xol asun tu', chalni yin̈ hacti': —Ha' naj ti' hin C'ahol caw xahan ay wuan, caw chin tzala yin̈ najan, ab'ewejtoj tzet chal naj. 6Ha' xab'en heb'ya' oxwan̈ hune' tzoti' tu', caw xiwcan̈ heb'ya', x'aycan xulnuj heb'ya' sat tx'otx'. 7Lawitu' xhitzicoj Comam sc'atan̈ heb'ya', xanicoj sk'ab' yib'an̈ heb'ya', xalni Comam: —Ahan̈wejwanoj, machex xiwi. 8Ha' xt'an̈xican̈ heb'ya', xilni to han̈c'a Comam lin̈ancan̈ sc'atan̈ heb'ya'. 9Yet lan̈an yaytij Comam b'oj heb'ya' yin̈ witz tu', xalni tet heb'ya': —Mach b'ay cheyalic'oj hune' xeyil ti', masanto chin pitzc'aojcan̈ xol hej camom, hayin Ab'ilintij yu Comam Dios xol jet-anmail ti'an. 10Lawitu' sk'amb'en heb'ya' tet Comam: —¿Tzet yuxin chal heb'naj cuywaom yin̈ sley ya' Moisés ta b'ab'el chuluj ya' Elías sataj naj Cristo?. 11Xta'wi Comam: —Yeli hactu' yeyi, yilal yul ya' Elías tu', yun̈e smeltzoncoj ya' anma yin̈ Comam Dios. 12Yaja' ẍwal teyetan to xax hul ya' Elías tu', ton̈e mach xtxum anma ta ha' ya', yuxin x'etlicoj heb'jetb'i yin̈ ya'. Hactu' chin utelaxojan, ch'ec'oj ya' wanma yu heb'jetb'ian, hayin Ab'ilintij yu Comam Dios xol jet-anmail ti'an. 13Hato tu' xtxumniloj heb'ya' to ya' Juan Bautista chal Comam. 14Yet x'ayiloj Comam Jesús b'oj heb'ya' sc'atan̈ anma, x'apni hune' naj, x'ay jahnoj naj yin̈ sat Comam, xalni naj: 15—Mamin, tz'ahojab' ha c'ul yin̈ hune' ni'an hin c'ahol ti'an, ẍlow yaxcamic yin̈, caw ch'etaot yu. Tx'ihal el ẍto yul k'a' k'a', b'oj yul ha' ha'. 16Xax witij tet heb'ya' ẍcuywi tawin̈ ti'an, yaja' mach xc'oji heb'ya' yan̈ten naj. 17Xalni Comam: —Hexti' caw macheya' yuluj he c'ul yin̈ Comam Dios, caw tx'oj hexcanoj. Ayxana ayinc'oj te xolan. ¿Hantajtaxcato chex techaoj wuan? Itij naj b'eti'. 18Yet xhul naj ni'an tu', xchejniloj Comam yespíritu naj matzwalil aycoj yin̈ naj, lemb'iln̈e xwatx'ican naj yu Comam. 19Yet xcan Comam schuquil b'oj heb'ya' ẍcuywi yin̈, sk'amb'en heb'ya' tet Comam: —Mamin, ¿tzet yuxin mach xu jiniloj yespíritu naj matzwalil tu' yin̈ naj ni'an tu'an?. 20- 21—Haxca ayto mach'ahapnoj heya'ni yuluj he c'ul yin̈ Comam Dios. Yin̈ caw yeli ẍwal teyetan, ta cheya' yuluj he c'ul yin̈ Comam Dios, waxan̈ca hanic'ojch'ann̈e haca' sat te' mostaza, chim hu heyalni tet hune' witz ti' yin̈ hacti': Heq'uiloj ha b'a b'eti' cat ha to b'etu', ta quexchi, syijye hune' witz tu' tzet cheyala. Sunil tzet chu heyuni ta caw cheya' yuluj he c'ul yin̈ Comam Dios. 22Yet ch'ec' Comam Jesús b'oj heb'ya' ẍcuywi yin̈ b'et Galilea, xalni tet heb'ya': —Hayin Ab'ilintij yu Comam Dios xol jet-anmail ti'an, yilal walaxojcoj yul sk'ab' anmaan. 23Chin spotx'o'an, yaja' yin̈ sca'fial hin caman, chin pitzc'aojcan̈an, Yet xab'en heb'ya' hune' tu' caw x'oc b'isc'ulal yu heb'ya'. 24Yet x'apni Comam Jesús b'oj heb'ya' yul con̈ob' Capernaum, x'apni heb'naj ch'inican̈ ch'en melyu ch'ocnicoj yin̈ yatut Comam Dios. Sk'amb'en heb'naj tet ya' Pedro: —¿Chim tohlawi he cuywaom ti' yin̈ ch'en melyu ch'ocnicoj yin̈ yatut Comam Dios?. 25—Ho', ẍtohlawi ya'. Yet x'ocapnoj ya' yul n̈ah, ha' Comam b'ab'el xk'amb'en tet ya': —Simón, ¿tzet chawute hawalni? ¿Mac yet ay stohlawi tet heb'naj yahaw, tom hayon̈ ah con̈ob'on̈ ti', mato anma nancon̈ob'al? . 26—Anma nancon̈ob'al yet ay ya'ni ch'en. Yuxin xal Comam tet ya': —Ta hactu' hayon̈ ah con̈ob'on̈ ti' mat yilaloj ẍja' ch'en. 27Yaja' yun̈e mach tzet chal heb'naj jin̈, as sti' ha' lago cat hawaniaytoj ch'en lujb'al yul ha'. No' b'ab'el cay ch'ahojtij hawu ayictoj hune' ch'en melyu yul sti' no', ha' ch'en ẍtohlanoj hawet b'oj wetan. Iltij ch'en yul sti' no' cat ha to hawa'noj ch'en tet heb'naj.


Copyright
Learn More

will be added

X\