SAN MATEO 16

1Ay huntek'an ebnaj fariseo yeb ebnaj saduceo apni ilno Comam Jesús yun̈e yilwen ebnaj Comam. Yalni ebnaj tet Comam ta chisye hunu c'aybalc'ule chiyeniloj tato caw yeli ha' Comam Dios chejn̈eti Comam Jesús. 2Istak'wi Comam tet ebnaj: —Yin̈ k'ejbiyalil yet cheyilni istz'ay moyan, cheyal haca' ti': “Wal tinan̈ yeloxa hajan, yuto lan̈an istz'ay moyan,” quexchi. 3Taca yet sac'ayal xin cheyal haca' ti': “Wal tinan̈ yocxa ha' n̈ab yuto caw k'ej moyan,” quexchi. Hex ti' caw helanex hetxumni yin̈ tzet chute isba tiempo, ta chak' ha' n̈ab maca machoj. Yaja' wal yin̈ hune' tiempohal bay ayex ti', mach chitxumchalo heyu. 4Anma yin̈ hune' tiempohal ti', caw tx'ojcanoj yeb caw mach yijemoj. Chisk'an c'aybalc'ule yila', yaja' hune'n̈ech'an c'aybalc'ule chiak'lax yila', haca' hune' isye Comam Dios yin̈ naj Jonás, ẍi Comam Jesús. Lahwi tu' yel Comam isc'atan̈ ebnaj, isto Comam. 5Yet yec' apno Comam Jesús yeb ebnaj iscuywom isk'axepic'to ha' lago isnaniti ebnaj tato mach yito tzet chislo. 6Yalni Comam tet ebnaj: —Cheyil heba tet yan̈al ispan ebnaj fariseo yeb ebnaj saduceo, ẍi Comam. 7Yet yaben ebnaj hune' tu', yichico ebnaj yalni tet hunun: —Chal Comam hune' ti' yumi machi majiti tzet chicolo, ẍi ebnaj. 8Yet yabenilo Comam hune' tu', yalni Comam tet ebnaj: —¿Tzet yin̈ xin cheyala ta machi hepan ik'bil heyu? Caw mach chicawxi hec'ul yin̈ Comam Dios. 9¿Tom mach chinachalo heyu? yeb ¿tom matxa chitit yul hec'ul yin̈ ixim howeb pan yabe yin̈ howeb mil ebnaj winaj? Tijab yin̈ henabal hayeb motx ixim matxa lahwi yu anma. 10Yeb xin, ¿tom matxa chenati yin̈ ixim hujeb pan yabe yin̈ ebnaj can̈eb mil? Yeb xin, ¿tom matxa chenapaxtij hayeb motx ixim matxa lahwi yu anma tu'? 11¿Tzet yin̈ xin machi matxumchalo heyu tato maẍtaj yin̈ ixim pan mantzotelan yet mawalnihan teyet ta cheyil heba tet yan̈al ispan ebnaj fariseo yeb ebnaj saduceo? ẍi Comam. 12Lahwi tu' istxumnilo ebnaj tato maẍtaj yin̈ yan̈al ixim pan tzotel Comam, to yin̈ cuybanile chak' ebnaj fariseo yeb ebnaj saduceo. 13Yet yapni Comam Jesús yeb ebnaj iscuywom bey Cesarea yul ismajul Filipo, isk'amben Comam tet ebnaj iscuywom tu' haca' ti': —Hanin Ak'bilintijan texol yu Comam Dios, ¿mac anmahilinan yalni anma? ẍi Comam. 14Istak'wi ebnaj: —Ay mac chalni ta hach ti' naj Juan anican̈ ha' iswi' anma, aypaxo mac chalni tato Elías hach, aypaxo mac chalni tato hach ti' naj Jeremías, maca to hunuxa ischejab Comam Dios ec'lena yet payat, ẍi ebnaj. 15Isk'ambenpaxo Comam tet ebnaj: —Haxaca hex ti', ¿mac anmahilinan heyalni? ẍi Comam. 16Istak'wi naj Simón Pedro: —Hach ti', Cristo hach, Isc'ahol Comam Dios itzitz, ẍi naj. 17Yalni Comam tet naj: —Simón, isc'ahol naj Jonás, caw sak'al hawet yuto hune' maxawal ti' mach anmaho chiyenilo tawet. Walxinto ha' Inmaman ay yul satcan̈, ha' chiak'ni hatxumu'. 18Haquinpaxtu'an chiwalan tato Pedro chijcano habi. Yiban̈ hune' ch'en niman ch'en ti' chiwacan̈an wiglesiahan, machi xin chik'oji camical istan̈tzeniloj. 19Chiwacanicojan lawe tawet yun̈e chu yoc anma yul isk'ab Comam Dios. Ha' tzet mach t'in̈ano yeco yul sat yiban̈k'inal ti' hawalni, mach t'in̈ano chucano yul satcan̈. Haxa tzet t'in̈an yeco sat tx'o tx'otx' ti' hawalni, hune' tu' t'in̈an chucano yul satcan̈, ẍi Comam. 20Lahwi yalni Comam huntek'an tu' xin, yalnicano Comam tet ebnaj iscuywom tato machi bay chalic'o ebnaj tato ha' Comam Jesús ha' ton Cristo. 21Ha' yin̈ hune' tiempohal tu' ichico Comam yalni tet ebnaj iscuywom tato yilal yul isya'tajil yiban̈, yalni Comam haca' ti': —Caw yilal intohan bey Jerusalén, cat xin yec'ya' wanmahan yu ebnaj ichamta winaj iswi'ehal con̈ob Israel, yeb yu ebnaj iswi'ehal yin̈ ebnaj sacerdote yeb ebnaj cuywawom yin̈ isley naj Moisés. Chinispotx'an ebnaj, yaja' yin̈ yox tz'ayic cat witzitzbican̈an hunelxa, ẍi Comam. 22Hayet yaben naj Pedro hune' tu', yawtenilo naj Comam Jesús, iscachwa naj yin̈ Comam haca' ti': —Mamin, ¡ha'ojab Comam Dios chachcolni yin̈ hune' isya'tajil tu'! Machojab chachyaco yul isk'ab, ẍi naj. 23Ist'an̈xico Comam yin̈ naj, yalni Comam: —Ach matzwalil, elan̈ yin̈ insatan yuto chachoc quinhawak'a' ayc'ayojan, wal xin maẍtaj ha' tzet nabil yu Comam Dios chiec' yin̈ hanabal, walxinto haca' tzet chisna anma ha' chiec' yin̈ hanabal, ẍi Comam. 24Lahwi tu' yalni Comam tet ebnaj iscuywom: —Tato ay hunu mac choche chioc incuywomojan, caw matxahojab yeto isba ischuquil, yeb xin caw hinanojab yaben isya'tajil win̈an. Ta hinan yetan yanma haca' tu' ec'ojab tzujtzun wintajan. 25Yuto ha' mac mach hinan iscam win̈an yul sat yiban̈k'inal ti', chisc'ayto isk'inal mach istan̈bal. Wal mac chishin isba iscam win̈an xin chischah isk'inal yin̈ huneln̈e. 26K'inalo ta ay hunu mac chik'oji ismajnilo sunil tzet ay yul sat yiban̈k'inal ti', yaj ta chisc'ayto isk'inal mach istan̈bal, ¿tzettaxca chischah hune' mac tu' selelo isk'inal chisc'ayto tu'? 27Hanin Ak'bilintijan texol yu Comam Dios chinhulan yeb isk'ak'al yip Inmaman yeb ebnaj ángel, cat wak'nihan ispaj selel tet hunun anma, hatatic'a tzet chiswatx'e. 28Yin̈ caw yeli, chiwalan teyet, ay haywan̈ mac texol ti' maẍto chicami masanto chiyil wulan cat wocan Yahawoj, Hanin Ak'bilintijan texol yu Comam Dios, ẍi Comam Jesús.

will be added

X\