SAN MATEO 16

1X'apni hunk'aan heb'naj fariseo b'oj heb'naj saduceo yila' Comam Jesús. Yu yilwen heb'naj Comam, sk'anni heb'naj ta sye hunuj c'ayb'alc'ule ẍyeniloj ta aycoj Comam Dios yin̈. 2Yuxin xal Comam tet heb'naj: —Yet cheyilni stz'a' asun yet sk'ejb'alil, cheyala: Macha cha'a n̈ab', stz'a asun, quex chi. 3Ta stz'a' asun sahc'alil cheyala: Tinan̈, cha'a' ha' n̈ab', haxca xmoyc'aloj satcan̈, quex chi. Caw helanex he txumni tzet chute sb'a yib'an̈k'inal, yaja' wal c'ayb'alc'ule sye Comam heyila' mache txumu tzet yelapnoj yeyi. 4Hex ayex tinan̈, caw machewalil, mat yijyomojex tet Comam Dios. Che k'an heyila' hunuj c'ayb'alc'ule ẍyeni ta schejab' Comam Dios wean, yaja' hune'n̈e c'ayb'alc'ule ch'a'laxoj heyila'. Haca' xa'le ya' Jonás schejab'lom Comam Dios, hactu' hune' chija' sb'a win̈an, Lawitu' shec'niloj sb'a Comam. 5- 7Yet x'ec'toj Comam Jesús b'oj heb'ya' ẍcuywi yin̈ sk'axepal ha' lago, xalni Comam tet heb'ya': —Ab'ewej tzet ẍwal ti'an, nann̈e heyu yin̈ yan̈al span heb'naj fariseo b'oj heb'naj saduceo Haxca mach xtit yin̈ sc'ul heb'ya' yinitoj tzet chila, yuxin x'ichi yalni heb'ya' tet hunun: —Tita haxca mach ixim pan jetb'i, yuxin hactu' yalni ya'. 8Yaja' yohtaj Comam tzet chal heb'ya' tet hunun, yuxin xala: —¿Tzet yuxin ẍtac he c'ul? ¿tom haxca mach tzet ẍco loh ib'il ju? Mach ẍcawxi he c'ul yin̈ Comam Dios chaltu'. 9¿Mato maẍto che txumu? ¿matxa ẍtit yin̈ he c'ul yin̈ ixim howeb' pan xc'uxanni yin̈ howeb' mil anma? Tijab' yin̈ he c'ul hayeb' motx ixim xto cani. 10Pax ixim hujeb' pan swa can̈eb' mil anma, ¿hayeb'to motx ixim xe cutxb'acoj? 11¿Tzet yuxin mache txumu to mataj ixim pan ẍwalax ẍwalan? Yuxin, nann̈e heyu yin̈ yan̈al span heb'naj fariseo b'oj heb'naj saduceo. 12Yet xalni Comam hune' tu', xtxumniloj heb'ya' to mataj yan̈al pan chal Comam, to scuywab'al heb'naj fariseo b'oj heb'naj saduceo chala. 13Yet x'apni Comam Jesús b'oj heb'ya' ẍcuywi yin̈ b'et Cesarea yul scuentail Filipo, sk'amb'en Comam tet heb'ya': —¿Tzet chal anma win̈ hayin Ab'ilintij yu Comam Dios xol jet-anmail ti'an? ¿mac anmailin yalnian?. 14Xalni heb'ya': —Ay mac ẍhalni ta ya' Juan Bautista hach, ay mac ẍhalni ta ya' Elías, ay mac ẍhalnipaxoj ta ya' Jeremías maca hunujxa heb'ya' schejab'lom Comam Dios. 15—¿Haca' hex, mac anmailin he yalnian? 16Xalni ya' Simón Pedro: —Hachti' Cristo Sc'ahol Comam Dios itzitz haweyi. 17Xalni Comam tet ya': —Simón sc'ahol ya' Jonás, tzet sak'al hawet, haxca hune' xawal ti', mat anmaoj x'a'ni hawohtajn̈e, to hin Mam ay satcan̈an, ha' x'a'ni ha txumu'. 18Haquinan, ẍwal tawetan Pedro xa chawija (Pedro tu' chaliloj ch'en). Yib'an̈ hune' ch'en niman ch'en ti' ẍwa'a'can̈ wiglesiaan. Hune' wiglesia ti'an, machu stan̈ojiloj yu camical. 19Ẍwa'a'c'oj lawe tawetan yun̈e chu yoc anma yul sk'ab' Comam Dios. B'aytet mat t'in̈anoj ye sat tx'otx'otx' ti' hawalni, mat t'in̈anoj ye yul sat Comam Dios. B'aytet t'in̈an ye sat tx'otx'otx' ti' hawalni, hune' tu' t'in̈anxa ye yul sat Comam Dios. 20Lawitu' scachnican Comam heb'ya' ta machalc'oj heb'ya' ta ha' Comam Cristo. 21Hatax tu' ichi yalni Comam Jesús tet heb'ya' ẍcuywi yin̈ ta ay sya'tajil chuluj yin̈, chalni Comam: —Yilal hin toj Jerusalénan. Caw ch'ec'oj ya' wanma yu heb'naj swi'con̈ob'an, heb'naj swi'al sacerdote b'oj heb'naj cuywaom yin̈ sley ya' Moisés. Chin spotx'o' heb'najan, yaja' yin̈ syox tz'ayic chin pitzc'aojcan̈an. 22Yaja' nan x'iottoj Comam yu ya' Pedro, x'oc ya' scachnoj Comam, chalni ya': —Mamin, mat yetoj aya chawal hune' tu', mat sk'ana' sc'ul Comam Dios ta chul hune' tu' tawin̈. 23Xt'an̈xicoj Comam yin̈ ya', xalni tet ya': —Hitzan̈iloj yin̈ hin satan, Matzwalil, haxca hachti' ha' hin hawa'ni lectaojan, ha' chawu. Mataj tzet nab'il yu Comam Dios ha' nab'il hawu, to ha' tzet nab'il yu anma, ha' nab'il hawu. 24Lawitu' xalni tet heb'ya' yak'b'il: —Ta ay hunuj mac choche ch'occan tzujnuj win̈an, ya'ab'can b'aytet choche yub' cat yec' yi'noj tzet ẍwuan, waxan̈ca cha'a' camoj sb'a yin̈ culus. 25Haxca mac ay yala' ẍcolchacan sk'inal, sc'aya'toj sk'inal mach stan̈b'al. Wal mac hinan scam win̈an, schab' k'inal mach stan̈b'al. 26¿Tzet chaliloj yoccan sunil tzetet ay satyib'an̈k'inal jetoj ta sc'aytoj co k'inal mach stan̈b'al? ¿Tzet taxca ẍja' seleloj co k'inal ẍco c'aytoj tu'? ¡Matzet! 27Hayin Ab'ilintij yu Comam Dios xol jet-animail ti'an, aycoj smay hin Mam win̈an chin huluj b'oj wángelan, cat wa'noj spaj tet hunun anma haca'tic'a xhul yub'c'uj. 28Yin̈ caw yeli ẍwal teyetan, ay mac ay co xol ti', ẍto ilnoj wulujan, yet chin ocoj Yahawojan yalan̈to maẍto ẍcami.


Copyright
Learn More

will be added

X\