SAN MATEO 15

1Yet hunec, x'apni hunk'aan heb'naj fariseo b'oj hunk'aan heb'naj cuywaom yin̈ sley ya' Moisés speto Jerusalén, xb'ey ilnoj Comam Jesús, sk'amb'en heb'naj: 2—¿Tzet yuxin mach syijye heb'naj ẍcuywi tawin̈ ti' scuywab'al heb'ya' jichmam, haxca mach xtx'ah heb'naj sk'ab' ch'oc heb'naj wa'oj? . 3Xalni Comam: —Haquex, ¿tzet yuxin che man̈c'o chejb'anil ab'il yu Comam Dios che yijyen scuywab'al anma? 4Haxca xal Comam Dios: Xahan cheyil he mam he mi'. Mac stz'acti'n̈en smam maca smi', ẍcami, ẍi Comam Dios. 5- 6Yaja' hexti', cheyala ta mat yilaloj ẍcolwa anma yin̈ smam smi'. Machu hin colwa tawin̈an, haxca tzet ayin ti'an yet xa Comam Dios ye wuan, ta ẍi. Yaja' txumwejc'anab'i to lan̈an he man̈c'on schejb'anil Comam Dios yin̈ hactu', yun̈e he yijyen scuywab'al anma. 7Nab'n̈e c'ulex heyalni. T'in̈an yecoj ya' Isaías schejab'lom Comam Dios yet xalni ya' teyin̈: 8Hunk'aan anma ti', sti'n̈e ẍhalni ta chin yochean, yaja' wal yanma nahat yeloj win̈an. 9Nab'n̈e chala ta chin shak'ean, haxca scuywab'al anma schej syijye yetb'i, ẍi Comam Dios yul Yum. 10Lawitu' xawten Comam anma sc'atan̈, xalni tet: —Ab'ewej cat he txumni tzet ẍwal ti'an. 11Mataj tzet ch'octoj yul co ti', ha' chon̈ etantoj yul sat Comam Dios, to ha' tx'oj ch'eltij yul co ti', ha' chon̈ etantoj. 12Heb'ya' ẍcuywi yin̈ Comam, xhitzicoj heb'ya' sc'atan̈, xalni heb'ya' tet Comam: —¿Tzimi ta xa txumu, caw xchiwa sc'ul heb'naj fariseo tawin̈ yu tzet xawala? . 13Xalni Comam: —Hantaj tzet mataj hin Mam ay satcan̈ stz'unnian, yilal ẍhoc'laxcan̈, hactu' cha'le' heb'naj ti'. 14Yila' heb'naj. Lahan heb'naj b'oj anma machu yilni. Pohomb'eh heb'naj yalni, swab'antoj heb'naj hune'xa anma machu yilni, yuxin hun ẍtojcan syamanil yul tz'unew. 15Lawitu' xalni ya' Pedro: —Haliloj jetan Mamin tzet chaliloj hune' tzet xawal tet heb'naj fariseo tu'. 16Yuxin xal Comam: —¿Tom hex hun, mache txum tzet xwal ti'an? 17¿Tom mache txumu to b'aytet ch'octoj yul co ti', yul co c'ul ch'aytoj, lawitu' cat sto yul txulub'al? 18Yaja' tzoti' ch'eltij yul co ti' yin̈ janma ẍtita, ha' chon̈ etantoj yul sat Comam Dios. 19Haxca yin̈ janma ch'ichican̈ hej tzetet tx'oj chon̈ initoj yin̈ potx'wal, ixloj, mac sayni swinaj, elek', lek'ti'al b'oj hob'o' tzoti' yin̈ anma. 20Ha' hunk'aan ti' ch'etantoj anma yul sat Comam Dios. Yaja' hune' chal heb'naj tu' ta xahan ta mach ẍco tx'ah co k'ab' chon̈ oc wa'oj, mat yeloj, mataj tu' chon̈ etantoj yul sat Comam Dios. 21Lawitu' xto Comam Jesús yul shoyanil Tiro b'oj Sidón. 22B'etu' ay hune' ix mat Israeloj, to ah Canaán ix, x'apni ix yila' Comam, chalni ix yin̈ ip: —Mamin, yic'al ya' rey David, tz'a'ojab' ha' c'ul win̈an. Ay hune' ni'an wunin ch'etaot yu hune' yespíritu naj matzwalilan, caw ch'ec'ya' yanma ix yu, 23Yaja' mach xta'wi Comam tet ix, yuxin xal heb'ya' ẍcuywi yin̈: —Mamin, mak'b'il ha chejnitoj ix pax, cat sb'ejnican ix yawicoj jin̈,. 24Xta'wi Comam: —Tetn̈e hej jetcon̈ob' Israel xquin schejtij Comam Diosan, haxca haca' no' canelu c'aynajtoj yeyi. 25Yaja' xhitzicoj ix sc'atan̈ heb'ya', x'ay jahnoj ix yin̈ sat Comam, xalni ix: —Mamin, colwaan̈ win̈an. 26—Yaja' mat yetoj aya ch'ilaxiloj yita niẍtej uninale, cat ya'lax tet metx niẍtej tx'i'. 27Xalni ix: —Ho' yeli Mamin, yaja' ẍtic'a yipaxcan̈ metx sk'al sti' niẍtej unin yalan̈ meẍa yet lan̈an swa'I. 28Hactu' xu yalni Comam tet ix: —Haxca chawa' yuluj ha c'ul yin̈ Comam Dios, yuxin yub'ab' haca' chal ha c'ul, Lemb'iln̈ena tu' xwatx'iloj sc'ul ix ni'an yunin ix tu'. 29Lawitu' x'el Comam Jesús b'etu', x'ec'toj sti'laj ha' lago Galilea. X'ahapnoj swi' witz, hat xb'ey stz'on̈b'a sb'a. 30Caw tx'ihal anma x'apni sc'atan̈ Comam. Yetb'i heb'jetb'i hej syawub', b'oj mac machu yeq'ui, mac machu yilni, mac tx'oj ye sk'ab' b'oj mac machu stzoteli. Sunil hej yawub' tu' xwatx'icanoj yu Comam. 31Ha' xilni anma hune' tu' xc'ayiloj sc'ul, haxca xa tzotel mac maẍtic'a stzoteli, ẍwatx'ican mac tx'ojtic'a ye sk'ab', ẍwatx'ican mac maẍtic'a ch'eq'ui, c'ulxa yilni mac maẍtic'a chila; yuxin xacoj anma smay Comam Dios sDiosal Israel. 32Lawitu' xawten Comam Jesús heb'ya' ẍcuywi yin̈, xalni tet heb'ya': —Stz'a' hin c'ul yin̈ hunk'aan anma ti'an, haxca syoxxa tz'ayic ayc'oj co c'atan̈, mat yetb'ioj tzetet slo. Mach sje hin c'ul hin cheja'toj paxoj yin̈ man̈tzetalan, haxca taj ẍtib'ay yu yul b'eh. 33Yaja' caw tx'ihal anma, mach b'ay chon̈ to ji'a'tij tzet slo yul hune' tajin̈ witz ac'al ti', 34—¿Hayeb' ixim pan heyetb'i? —Hujeb' ixim b'oj hayc'on̈ niẍtej cay. 35Xalni Comam tet anma ta ch'ay tz'on̈noj. 36Lawitu' xinic'oj Comam ixim hujeb' pan, b'oj no' cay tu', xa'ni yuch'antioẍ tet Comam Dios, xanic'oj ixim tet heb'ya' ẍcuywi yin̈, haxa heb'ya' x'itxk'an ixim tet anma. 37Sunil anma xwa'i, xnoh sc'ul. Lawi swa'iloj, hujeb'to motx ixim scutxb'acoj heb'ya'. 38Yin̈ hantaj anma xwa' tu' can̈eb' mil heb'naj winaj, machcoj heb'ix ix b'oj niẍtej unin yul b'isb'al. 39Lawitu', xtak'li Comam tet anma tu', x'octoj yul hune' barco, x'apni b'et Magadán.


Copyright
Learn More

will be added

X\