SAN MATEO 14

1Yet hunec' tu', xab'e naj Herodes gobernador b'et Galilea sk'umal Comam Jesús. 2Yuxin xal naj tet heb'naj ayictoj sc'atan̈: —Hune' naj ẍhalot tu', ham naj Juan Bautista xpitzc'acan̈ xol hej camom, yuxin ay scan̈il ye naj yuni hej c'ayb'alc'ule. 3- 4Ha' tzet yuxin xal naj Herodes hune' tu', to ib'ililoj ix Herodías yixal naj Felipe yuẍtaj naj yu. Yuxin tx'ihal el xal ya' Juan tet naj: —Mat yetoj ay hawiniloj yixal hawuẍtaj. Yu hune' tu' schej naj tzab'laxoj ya', x'alaxcoj scadenail ya', x'alaxictoj ya' yul presu. 5Ay yala' naj mak'b'il xu scam ya', yaja' xiw naj haxca sunil anma ẍhalni to schejab'lom Comam Dios ye ya'. 6Haxa yet xec'tzen naj stz'ayic b'ay xpitzc'ayi, tx'ihal anma syamb'a naj. Yulb'al ye k'in̈ x'octoj ix yunin ix Herodías can̈alwoj yin̈ sat naj b'oj yin̈ sat sunil anma. Caw c'ulch'an xu scan̈alwi ix chil naj. 7Yuxin sta'we naj yul sti', xalni naj tet ix ta tzantzet sk'an ix cha'a' naj. 8Haxca x'a'ot sc'uluj ix yu smi', yuxin xal ix: —Ha' swi' naj Juan Bautista chawa' wet yul hunuj pulatoan. 9Ha' xab'en naj Herodes hune' tu', x'oc b'isc'ulal yu naj. Yaja' xax sta'we naj yib'an̈ yin̈ sat anma, yuxin xal naj ta ch'a'lax b'aytet sk'an ix. 10Xalni naj ta ẍtoj ilaxojiltoj swi' ya' Juan yul presu. 11Yuxin xb'ey heb'naj yi'a'iltoj swi' ya' Juan, xanic'oj heb'naj tet ix yul hune' pulato, xinitoj ix tet smi'. 12Lawitu' x'apni heb'ya' ẍcuywi yin̈ ya', xinitoj heb'ya' snimanil ya' mujlaxoj, xto heb'ya' yalnoj tet Comam Jesús to xpotx'ot ya'. 13Ha' xab'en Comam Jesús hune' tu', x'octoj yul hune' te' barco b'oj heb'ya' ẍcuywi yin̈, xto sk'axepal ha' lago Galilea b'ay mach anma. Ha' xab'en anma ay yul hej con̈ob' to xto Comam, xto anma tu' yu yoj sti'laj ha' lago b'ay ch'apnoj Comam. 14Ha' x'eltij Comam yul barco, xilni to tenanxatoj anma yechmani. Stz'a'can̈ sc'ul Comam yin̈, x'oc yan̈tenoj hej yawub' ib'il yu. 15Haxa xk'ejb'itoj, xalni heb'ya' ẍcuywi yin̈ Comam: —Mam Cuywaom, tinan̈ lan̈an sto tz'ayic, yaja' mach con̈ob' co hoyanil ti', k'a' c'ul mi ta cha chejtoj anma ti' yul hej wayan̈b'al slok'o' tzet slo. 16—Mach yeẍto ẍto slok'o' tzet slo. Hex cheya' wa'oj. 17—Yaja', ¿b'ay chon̈ to ji'a'tijan? To howeb'n̈e niẍtej pan jetb'ian b'oj cac'on̈ niẍtej cay. 18—Iwejtij ixim b'eti', b'oj no' cay tu'. 19Lawitu' xalni Comam tet anma ta ch'ay tz'on̈noj sat chak'an̈, xinican̈ ixim howeb' pan b'oj no' cac'on̈ cay. Xt'an̈xican̈ satcan̈, xa'ni yuch'antioẍ tet Comam Dios yu ixim. Sk'axponay ixim, xanic'oj tet heb'ya' ẍcuywi yin̈, x'oc heb'ya' yitxk'anojtoj ixim tet anma. 20Sunil anma xwa'i, xnoh sc'ul. Lawitu' scutxb'ancoj heb'ya' ẍcuywi yin̈ Comam ixim xcani, cab'lan̈eb'to motx ixim. 21Yin̈ hantaj anma xwa' tu', howeb' mil heb'naj winaj, machcoj heb'ix ix b'oj niẍtej unin yul b'isb'al. 22Lawitu' xalni Comam Jesús tet heb'ya' ẍcuywi yin̈ ta ch'ahtoj heb'ya' yul te' barco, cat sb'ab'itoj heb'ya' k'axepxa ha' lago, c'un tak'lican Comam tet anma. 23Lawi stak'lican Comam tet anma, xto swi' witz tu' ya'noj oración schuquil. Hat x'oc ak'b'al yu. 24Wal heb'ya' ẍcuywi yin̈, nahat-xa xcan sti' ha' lago yu heb'ya'. Yaja' hune' niman cak'e' xmak'nican̈ ha' ha' sataj te' barco. 25Toxa sajb'ojiloj stzujcha heb'ya' yu Comam, b'elwoj chu yib'an̈ ha'. 26Ha' xilni heb'ya' to ẍb'elwi yib'an̈ ha' x'awican̈ heb'ya' xiwquilal, xalni heb'ya': —Hune' ti' pixan camom. 27Xalni Comam: —Machex xiwi, hayinan. 28Ha' xilni ya' Pedro to ha' Comam, xalni ya': —Mam Wahaw, ta hach hune' tu', hala ta chin b'elwi yib'an̈ ha' ha' ti'an cat hin to b'ay ayach tu'an. 29—C'ultic'a, titan̈, Ha' xab'en ya' tzet xal Comam tu', x'aytij ya' yul te' barco, x'oc ya' b'elwoj yib'an̈ ha ha' xto ya' sc'atan̈ Comam. 30Yaja' ha' xilni ya' to ẍb'ili sat ha' yu yip cak'e', xiwcan̈ ya', haxca lan̈an sto ya' yich ha' chab'e, x'awican̈ ya' yin̈ ip, xalni ya': —Mam Wahaw, colinan. 31Lemb'il stzab'ayoj Comam sk'ab' ya', xalni tet ya': —¿Tzet yuxin xcab'con ha c'ul? Mach ẍcawxi ha c'ul win̈an. 32Man̈e octoj heb'ya' yul te' barco, xtuquican cak'e'. 33Yuxin sunil heb'ya' ayictoj yul te' barco tu' xhak'en Comam, xalni heb'ya': —Yin̈ caw yeli hachti' Sc'ahol Comam Dios. 34Man̈e k'axpon Comam Jesús b'oj heb'ya' x'apni heb'ya' b'et Genesaret, x'el heb'ya' yul te' barco. 35Xtxumnina anma ta ha' Comam, xpujnana tzoti' tet anma ay shoyanil tu', yuxin tx'ihal hej yawub' x'iottij tet Comam. 36Sk'annina anma tet Comam ha'ojtamn̈e sti' xil sk'ap Comam stzab' yawub' tu'. Yuxin hantaj mac stzab'ni sti' xil sk'ap Comam tu', x'an̈chacanoj.


Copyright
Learn More

will be added

X\