SAN MATEO 13

1Yet hune' tz'ayic tu', x'eltij Comam Jesús yul n̈ah, xto stz'on̈b'anoj sb'a sti' ha' lago. 2Haxca caw tx'ihal anma x'apni sc'atan̈, yuxin x'octoj yul hune' te' barco, x'ay tz'on̈noj. Wal anma xcan sti' ha' lago. 3Tx'ihal cuywab'al xal Comam tet anma, chalni yin̈ hacti': —Yet hunec xto hune' naj stz'unu' strigo. 4Yet lan̈an xtxihni naj ixim hin̈at, ay ixim sat x'ay yul b'eh, yuxin slocan̈ no' ch'ic ixim. 5Ay ixim x'ay sat tx'otx'otx' cawil yehtij samch'en yalan̈, lemb'il xhulna ixim yu sk'axanil tx'otx' haxca mat tx'ihaloj xtx'otx'al. 6Yaja' yet xpohiloj k'a' xin, xtajiloj ixim haxca mat nahatoj aytoj xe ixim. 7Ay ixim hin̈at tu' x'ay xol te' txoy, sak'al xu yahiloj ixim, yaja' lemb'il xch'ib'can̈ te' txoy tu' yib'an̈ ixim, yuxin xb'ajb'itoj ixim, matxa xa' ixim sat. 8Wal ixim hin̈at x'ay b'ay c'ul sat tx'otx', caw sak'al xu sch'ib' ixim. Yet x'oc sat ixim, ay yoj ixim x'a'ni 100 q'uitan sat, ay 60, ay ixim x'a'ni 30. 9Maquex cheyab'e hune' ti', a'wej heyanma he txumniloj tzet chaliloj. 10Xhitzicoj heb'ya' ẍcuywi yin̈ Comam Jesús, sk'amb'en heb'ya': —¿Tzet yuxin han̈c'a ejemplo chawala cha cuyni anma?. 11Xta'wi Comam: —Cha' Comam Dios heyohtajn̈e hej tzetet mach ẍtxum anma, yun̈e he txumni tzet yelapnoj ye hin cuywab'al xalni yin̈ tzet chu yoc Comam Dios Yahawoj. Wal yak'b'il anma, machu ya'lax yohtajn̈e'. 12Haxca mac ayxa tzet yohtaj, ẍcam a'lax yak'b'il tet, yun̈e k'a' tx'ihal ay tet. Mac matzet yohtaj, hasta ni'an yohtaj, ch'ilaxojiloj tet. 13Yuxin han̈c'a ejemplo ẍwa' scuyb'aniloj anmaan. Waxan̈ca chila, yaja' lahantic'a b'oj machila, waxan̈ca chab'e, haca'tic'a machab'e, mach txumu. 14Haxca lan̈an yijni sb'a tzet tz'ib'n̈eb'il yib'an̈ anma ti' yu ya' Isaías schejab'lom Comam Dios, chalni ya': Yeli waxan̈ca chab'e' tzet ẍwala'an, yaja' mach xtxumu'. Waxan̈ca chila', yaja' mach nachaojiloj yu. 15Haxca anma ti' caw ayxacoj ec'najil yin̈ yanma. Haca' smajche xtxiquin yun̈e machab'e. Haca' smutz'ayoj sat yun̈e machila. Yuxin maẍtic'a ninoj xtxumu, maẍtic'a xmeltzocoj yanma win̈an, yuxin mach sje hin colnian, ẍi Comam yul Yum. 16Wal hexti', sak'al heyet, haxca hab'an heyilni b'oj hab'an he txumni tzet cheyab'e. 17Yin̈ caw yeli ẍwal teyetan, tx'ihal heb'ya' schejab'lom Comam Dios b'oj anma tohol ya'ni, xoche yila' tzet lan̈an heyilni ti', yaja' mach xila. Xoche yab'e' tzet lan̈an heyab'en ti' yaja' mach xab'e. 18Cam cheyab'ecanoj tzet chaliloj cuywab'al yin̈ naj tz'unum trigo. 19Haca' ye ixim hin̈at x'ay yul b'eh, hactu' ye anma ch'ab'en tzet chu joc yul sk'ab' Comam Dios, yaja' mat c'uluj chu schani yin̈ yanma, yuxin sub'utaj yiniloj naj matzwalil yin̈ sc'ul tzet xab'e tu'. 20Haca' ixim x'ay yib'an̈ ch'en samch'en, hactu' ye anma stzala sc'ul ẍchani stzoti' Comam Dios yin̈ lemb'il. 21Yaja' mat hunelojn̈e ẍcancan yin̈ yanma, yuxin hanic'ch'ann̈e xacoj yin̈ sc'ul. Ha' chul sya'tajil yin̈ haxca ẍcajot yu stzoti' Comam Dios, lemb'il ẍcab'concan̈ sc'ul cat spax yin̈taj. 22Haca' ye ixim x'ay xol te' txoy, hactu' ye anma ch'ab'en stzoti' Comam Dios, yaja' k'a' chacoj hej tzetet ay satyib'an̈k'inal ti' yin̈ sc'ul, k'a' choche k'alomal sat tx'otx'otx' ti', yuxin ch'etaxtoj yul swi'. Lahan hunk'aan tu' b'oj ixim trigo xb'ajb'itoj mach sat cha'a. 23Wal ixim x'ay b'ay c'ul sat tx'otx', lahan ixim b'oj anma ch'ab'en stzoti' Comam Dios, c'ul chu xtxumni. Ay mac haca' yoj ixim cha' hune' 100 sat, ay mac haca' yoj ixim cha' 60 sat, ay mac haca' yoj ixim 30 sat cha'a. 24Xal Comam Jesús hune'xa ejemplo tet heb'ya' ẍcuywi yin̈, xalni yin̈ hacti': —Wala' teyetan tzet ẍtan̈ojcan anma yet ch'ocoj Comam Dios Yahawoj. Chu co lahb'an b'oj tzet xa'le hune' naj yahaw munil caw c'ul strigo xb'ey stz'unu' sat xtx'otx'. 25Yaja' yet lan̈an sway anma ak'b'alil, xto hune' naj aycoj showal yin̈ naj yahaw munil tu', xtxiniayoj hunk'aan sat te' ch'im haca' trigo xol ixim trigo, lawitu' xto naj. 26Yaja' yet xpohiloj ixim trigo tu' syeniloj sb'a to ay hunk'aan te' ch'im x'ahiloj xol ixim. 27Ha' xilni heb'naj munlawom hune' tu' xto heb'naj yalnoj tet naj yahaw munil: Mamin, ixim hin̈at trigo xcon̈ b'ey ja'ayojan, c'ul ixim, yaja' ¿b'ay xtiticoj hunk'aan te' ch'im aycan̈ xol ixim? ẍi heb'naj. 28Ham hunuj naj aycoj showal win̈an xb'ey txihnojay hunk'aan tu' xol ixim, ẍi naj yahaw tu' tet heb'naj. Ta sje ha c'ul chon̈ to co hoc'o'can̈ te'an, ẍi heb'naj. 29Machoj, taj ha' che hoc'nican̈ te' ch'im tu' che hoc'nipaxcan̈ ixim trigo yin̈ te'. 30Wal ye te'. Hato yet ẍc'uplaxoj ixim trigo, ẍwalnoj tet heb'naj hin munlawoman, ta siq'uiltoj heb'naj te' ch'im tu' cat syamb'alax te', cat sn̈uslaxtoj te'. Wal ixim trigo, ch'ilaxtoj ixim yul hin c'un̈aan, ẍi naj yahaw munil. 31Lawitu' xalni Comam Jesús hune'xa cuywab'al: —Ẍwal teyetan tzet chu sch'ib' sb'isil anma ch'oc yul sk'ab' Comam Dios. Lahan b'oj hune' ni'an sat yin̈atil te' mostaza stz'un hune' naj sat xtx'otx'. 32Hune' ni'an hin̈at tu' k'a' ni'anch'an sataj hunk'aanxa hin̈at, yaja' yet ẍch'ib'can̈, k'a' nimejal ch'elicoj sataj hej te' ita stz'unlaxi. Nimej chu sk'ab' te', yuxin chu yapni no' ch'ic ehoj xol sk'ab' te'. 33Xal Comam Jesús hune'xa cuywab'al tet heb'ya' ẍcuywi yin̈: —Wala' pax teyetan tzet chu sch'ib' sb'isil anma ch'oc yul sk'ab' Comam Dios. Lahan chub' b'oj ni'an solic yan̈al pan xacoj hune' ix xol oxeb' arroba harina. Ha' somni ix, sipc'aloj ixim harina yu ni'an solic yan̈al pan tu'. 34Yet stzotel Comam Jesús xol anma, han̈c'a ejemplo xal Comam, 35yun̈e yijni sb'a tzet tz'ib'n̈eb'il yu hune' ya' schejab'lom Comam Dios, chalni ya': Yin̈n̈e ejemplo chin tzoteloj tet anmaan. Ẍwala'a'tij hej tzetet maẍto hunuj anma ohtajn̈ean yichotax yichitij satyib'an̈k'inal 36Lawi stak'li Comam Jesús tet anma, x'octoj yul n̈ah b'oj heb'ya' ẍcuywi yin̈, sk'amb'en heb'ya': —Haliloj jetan tzet chaliloj cuywab'al yin̈ te' ch'im tu'. 37Xalni Comam: —Naj xtxihniay ixim trigo wechel hayin Ab'ilintij yu Comam Dios xol jet-anmail ye najan. 38Tx'otx'otx' b'ay xtxihlaxay ixim, yechel hune' satyib'an̈k'inal ti' ye tx'otx'. Ixim hin̈at c'ul, yechel anma c'ul ch'oc yul sk'ab' Comam Dios ye ixim. Te' ch'im sch'ib' xol ixim trigo, yechel anma yet naj matzwalil ye te'. 39Naj xtxihniay te' ch'im tu', yechel naj matzwalil ye naj. Yet ẍc'uplaxcan̈ ixim trigo tu', yechel yet ẍtan̈oj satyib'an̈k'inal ti' yeyi. Heb'naj ẍc'upni ixim, yechel ángel ye heb'naj. 40Haca' sic'laxiltoj te' ch'im cat sn̈uslaxtoj te', hactu' ch'utelaxoj anma yet ẍtan̈ojcan satyib'an̈k'inal ti'. 41Hayin Ab'ilintij yu Comam Dios xol jet-anmail ti'an, ẍwa'a'tij hej wángel syamb'a'coj hantaj mac ch'a'ni lectaoj anma, pax mac xtx'ojaln̈e chu, walaj ch'ilaxojiloj b'ay chin ocoj yahawojan. 42Hat ẍb'ejlaxojaytoj xol k'a' k'a', hat ch'ok'oj cat yec'oj ya' yanma yu sya'il. 43Wal mac c'ul chute sb'a ch'ixtan̈woj yul sk'ab' Comam b'ay satcan̈ haca' ẍmujli tz'ayic. Maquex cheyab'e hune' ti' a'wej heyanma he txumniloj. 44Anma ch'oc yul sk'ab' Comam Dios, lahan b'oj hune' k'alomal mujb'il yul tx'otx' xchalo yu hune' naj, yaja' smujcan naj hunecxa. Caw stzala naj xto naj xtxon̈nojiloj sunil tzet aya, slok'nic'oj naj tx'otx'otx' b'ay ay hune' k'alomal tu'. 45Anma ch'oc yul sk'ab' Comam Dios, lahan b'oj hune' ch'en perla caw c'ulch'an xchalo yu hune' naj lok'om perla. 46Ha' xchalo ch'en yu naj, xto naj xtxon̈nojiloj sunil tzet aya, slok'ni naj ch'en. 47Wala' hune'xa cuywab'al teyetan tzet cha'le' anma ch'oc yul sk'ab' Comam Dios. Lahan b'oj no' cay ch'octoj yul tx'an̈ txim ib'alatij cay. Tx'ihal majan no' ch'octoj yul tx'an̈. 48Haxa yet ẍnohiloj tx'an̈, chiniatij heb'naj tx'an̈ sti' ha' ha' cat yay tz'on̈noj heb'naj sic'nojiloj no' cay c'ul, chaniaytoj heb'naj no' yul smotx, sb'ejniloj heb'naj no' mat c'uluj. 49Hactu' cha'le' anma yet ẍtan̈oj satyib'an̈k'inal ti'. Chuluj hej ángel sic'altoj anma tx'oj xol anma c'ul. 50Anma tx'oj ch'alaxojaytoj xol k'a' k'a'. Hat ch'ok'oj cat yec'oj ya' yanma yu sya'il. 51Lawitu' sk'amb'en Comam Jesús tet heb'ya' ẍcuywi yin̈: —¿Chim he txum hunk'aan cuywab'al ti'? —Ho' Mamin, ẍco txuman. 52Yuxin xal Comam: —Ha' chaliloj hune' ti', ta ay hunuj cuywaom cuyb'ilxa yin̈ tzet chu joc yul sk'ab' Comam Dios, lahan naj b'oj hune' naj yahaw n̈ah ch'iniltij hej tzetet ac' b'oj hej tzetet xil yul sc'uanb'al. 53Lawi stzoten Comam Jesús hunk'aan cuywab'al ti', xto Comam. 54X'apni yul scon̈ob', x'oc scuynuj anma yul capiya. Hantaj mac x'ab'en stzoteli, xc'ayiloj sc'ul, chalni heb'jetb'i: —¿B'ay ẍtiticoj stz'ajanil sc'ul hune' naj ti', b'oj scan̈il ye naj yuni hunk'aan c'ayb'alc'ule ti'? 55¿Tox mataj naj ti' sc'ahol naj hosomte'? ¿Tox mat Maríaoj sb'ih smi' naj? Hat ay pax heb'naj yuẍtaj naj co xol ti': Naj Jacobo, naj José, naj Simón, b'oj naj Judas, 56b'oj heb'ix yanab' naj, hat ay heb'ix co xol ti'. ¿B'ay ẍtiticoj stz'ajanil sc'ul naj? . 57Yuxin mach scha heb'jetb'i tzet xal Comam. Hactu' xu yalni Comam tet heb'jetb'i: —Sunil b'ay ch'aotcoj smay hune' schejab'lom Comam Dios yu anma, han̈c'a yul scon̈ob' b'oj yul yatut comonaln̈e ye yul sat anma. 58Mat tx'ihaloj c'ayb'alc'ule xu' Comam yul scon̈ob' tu', haxca mach xa' heb'jetb'i yuluj sc'ul yin̈ Comam.


Copyright
Learn More

will be added

X\