SAN MATEO 12

1Yin̈ hune' tz'ayical xewilal ec'to Comam Jesús yeb ebnaj iscuywom yul hune' nich'an beh xol ixim trigo. Caw xin xan̈ohcha ebnaj yuxin oc ebnaj yik'alo iswi' ixim trigo, ischilnilo ebnaj ixim isc'uxu'. 2Hayet yilni ebnaj fariseo hune' tu', yalni ebnaj tet Comam: —Ilc'anab tzet chu ebnaj hacuywom tilah, lan̈an yinilo ebnaj iswi' ixim trigo isc'uxu'. Yaja' xin caw txahul comunla yin̈ istz'ayical xewilal, ẍi ebnaj. 3Istak'wi Comam tet ebnaj: —¿Tom maẍto cheyil yul Yum Comam Dios yin̈ tzet yak'le naj rey David yet caw chin̈ohcha naj yeb ebnaj tzujan yintaj? 4Naj David tu' octo naj yul yatut Comam Dios iswahnito naj ixim pan haltebilxa tet Comam Dios, iswahnipaxo ebnaj tzujan yinta naj tu' ixim. Wal xin han̈c'an̈e ebnaj sacerdote chu iswahni ixim. 5¿Tom maẍto cheyilpaxo yin̈ isley naj Moisés yin̈ tzet yu ebnaj sacerdote ay yul yatut Comam Dios? Ebnaj sacerdote tu' mach chixew ebnaj yin̈ tz'ayic xewilal, yaja' mach chaco ebnaj ismul yul sat Comam Dios yin̈ hune' tu'. 6Yaja' yin̈ caw yeli chiwalan teyet: Haninti'an ec'bal welapnojan sata yatut Comam Dios. 7Tzettam sak'al tato chitxumchalo heyu bay chal yul Yum Comam Dios haca' ti': “Ha' hune' chiwochehan tato chitz'ay hec'ul yin̈ heyet anmahil, maẍn̈etaj hen̈usni no nok' yin̈ xahanbalil wetan,” ẍiayoj. Ta chetxum hune' ti' mach chimcheyala tato ay ismul ebnaj, wal xin mach ismul ebnaj yin̈ hune' ti'. 8Wal Hanin Ak'bilintijan texol yu Comam Dios chu walnihan yin̈ tzet cheyu yin̈ istz'ayical xewilal, ẍi Comam tet ebnaj fariseo tu'. 9Lahwi tu' isto Comam Jesús, yocto Comam yul iscapilla ebnaj Israel, 10ha' tu' xin ayicto hune' naj camnajilo hune' isk'ab. Yun̈e yoc ebnaj fariseo ak'oc'ule yin̈ Comam, yuxin isk'ambe ebnaj tet Comam: —¿Chimyu jak'ni cawxo hunu anma ya'ay yin̈ istz'ayical xewilal? ẍi ebnaj tet Comam. 11Istak'wi Comam tet ebnaj: —K'inalo ta ay hunujex chitohc'ay hunu heme' yul hunu c'uh yin̈ istz'ayical xewilal, ¿mataxca mach chexto heyik'ahti no'? 12Hajxam hunu anma, to ec'balto yelapno sata no' me' tu', yuxin chisje cowatx'en hunu tzet ye tu' c'ul yin̈ istz'ayical xewilal, ẍi Comam. 13Lahwi tu' yalni Comam tet naj camnajilo hune' isk'ab tu': —Toholban̈elto hak'ab, ẍi Comam. Hayet istoholban̈enilto naj isk'ab tu', iswatx'icanilo. 14Hayet yilni ebnaj fariseo hune' tu' yelti ebnaj yul capilla, yoc ebnaj islahti'n̈en isba yin̈ tzet chu yak'ni camo ebnaj Comam Jesús. 15Hayet yabenilo Comam Jesús hune' tu', isto Comam. Caw hantan̈e anma oc tzujno yinta Comam; yak'ni cawxo Comam macta ya'ay. 16Yalni Comam tet anma ta mach chispujbac'o yin̈ tzet iswatx'e Comam. 17Hac tu' yu yijnicano isba tzet tz'ibn̈ebilcano yu naj Isaías, ischejab Comam Dios yet payat, bay chal haca' ti': 18Ha' naj ti' inchejaban sic'bilico wuhan, caw xahan ay wuhan, caw chintzalahan yin̈ naj. Chiwacojan Wespírituhan yin̈ naj cat ispujbanic'o naj tetej con̈ob mach Israelo yin̈ tzet chu isbeybaln̈en istoholal. 19Machi mac yeb chiah howal yu naj, machi xin caw chiel yaw naj yin̈ caw ip, machipaxo chiel yaw naj yulaj calle. 20Ay anma caw c'anch'an haca' te' ah k'ahnatoj, maca haca' te' tah ton̈e chimutz'mun xaj k'a' yin̈ hac tu' yehi. Yaja' ha' naj xin chicolwa yin̈; mach chislah naj yetantoj. Hac tu' chute naj masanta chioc sunil yalan̈ istoholal yu naj. 21Sunilej con̈ob chicawxi isc'ul yin̈ naj, ẍiayoj. 22Yilaxto hune' naj mach chu yilni yeb mach chu istzotel yu ischejab naj matzwalil tet Comam Jesús, yak'ni cawxo Comam naj. Hac tu' xin yu ishajlo isbak'sat naj, istzotelpaxocan̈ naj. 23Sunil anma ilni hune' tu' caw c'ayilo isc'ul, yalni haca' ti': —¿Ham naj ti', titna yin̈ yuninal naj rey David echmabil yul ju? ẍi anma. 24Yaja' hayet yaben ebnaj fariseo yalni anma hune' tu', yalni ebnaj: —Hune' naj ti' chilo naj ischejab naj matzwalil yin̈ anma, yaj yu ayco yip naj Beelzebú, naj yahawil ebnaj ischejab naj matzwalil yin̈ naj, ẍi ebnaj. 25Wal Comam yohtaxa tzet chiec' yin̈ isnabal ebnaj, yuxin yal Comam: —K'inalo ta chispoh isba anma yul hunu niman con̈ob, hune' con̈ob tu' yin̈ an̈emi chipax yip. Maca ta hunu con̈ob maca hunu n̈ahil anma chispoh isba cat yanico howal yin̈ hunun, caw yin̈ an̈emi chitan̈iloj. 26Hac tu' ye naj matzwalil, ta chaco naj howal yin̈ yet matzwalilal, yin̈tic'a naj chaco howal. ¿Tzet xin chu yik'ni yip naj yin̈ haca' tu'? 27Hex ti' cheyala tato yu naj yahawil ebnaj matzwalil yuxin chiwilojan ischejab naj matzwalil yin̈ anma. Ta hac tu', ¿mac xin chiak'ni yip ebnaj tzujan yin̈ hecuybanil yet chinilo ebnaj ischejab naj matzwalil yin̈ anma? Yuxin ha' ebnaj tu' chiyenilo teyet tato mach c'ulo tzet cheyal win̈an. 28Yaja' ta yu Yespíritu Comam Dios chiwilojan ischejab naj matzwalil yin̈ anma, ha' chalniloj tato ayxac'o yip Comam Dios texol. 29K'inalo hunu naj yahaw n̈a caw ay yip, machi hunu mac chu yocto yul yatut naj cat yelk'anilto tzet ay naj. Yaja' ta chic'albalax naj, wal tu' chu yilaxilo tzet ay naj. 30Ha' mac mach ayoco wetbihojan ayco ishowal win̈an. Ha' mac mach chicolwa yanico anma yul ink'aban, ha' istzumbenilo anma tu' ha' chu. 31Yuxin chiwalan teyet, tzijxan̈e istx'ojal yeb ismul anma chacoj, ay nimanc'ulal yin̈ yu Comam Dios. Yaja' tato ay hunu mac tx'oj istzotel yin̈ Comam Espíritu Santo, hune' mac tu' matxa bak'inal ay nimanc'ulal yin̈. 32Tato ay hunu mac tx'oj istzotel win̈an, Hanin Ak'bilintijan texol yu Comam Dios, ayto nimanc'ulal yin̈. Wal mac tx'oj istzotel yin̈ Comam Espíritu Santo matxa nimanc'ulal yin̈, yin̈ hune' cotiempohal ti' yeb yin̈ hune' chihul cosataj, ẍi Comam. 33Yalnipaxo Comam Jesús: —K'inalo hunu te te' c'ul, c'ul sat te' chak'a, wal te' machiswalil, mach c'ulo sat te' chak'a. Yuxin yin̈ sat te te' chicotxumu tzet te'al te'. 34Hex ti' lahanex yeb no' laba, caw tx'ojex. ¿Tzet chu heyalni tzoti' c'ul tato tx'oj ayayto yul heyanma? Wal xin ha' tzet ayayto yul heyanma ha' chal heti'. 35Ha' mac isc'ulal ayayto yul yanma, c'ul tzoti' chala, haxa' mac istx'ojal ayayto yul yanma, ha' istx'ojal chala. 36Yaja' chiwalan teyet, yet chilni Comam Dios yin̈ tzet chielico anma, sunil mac chiilchahoti yin̈ tzettaj tzoti'al chielti yul isti', waxan̈ca comon tzoti'. 37Hatatic'a haca' hetzoteli hac tu' chu yilni Comam Dios yin̈ tzet chexelicoj, ta ay hemul maca machi hemul yin̈ tzet cheyala, ẍi Comam. 38Yet hunel tu', ay huntek'an ebnaj cuywawom yin̈ isley naj Moisés yeb ebnaj fariseo halni tet Comam: —Mam cuywawom chijochehan̈ chaye hunu c'aybalc'ule jila'an̈, ẍi ebnaj. 39Istak'wi Comam tet ebnaj: —Hex ayex yul hune' tiempohal ti' caw tx'ojexcanoj, caw man̈c'omex tet Comam Dios. Chek'an c'aybalc'ule heyila', hune' chiyenilo ishelanil yip Comam Dios. Yaja' hune'n̈e c'aybalc'ule chiak'lax heyila', ha' ton hune' haca' tzet yak'le hune' ischejab Comam Dios yet payat chiyij Jonás, ha' chiak'lax heyila'. 40Naj Jonás tu' oxeb tz'ayic yeb oxeb ak'bal ayayto naj yul isc'ul hune' no' niman cay. Haca' yak'le naj tu', hac tu' chiwak'lehan, Hanin Ak'bilintijan texol yu Comam Dios. Oxeb tz'ayic yeb oxeb ak'bal chinmujihan yul tx'otx'. 41Yet isbey naj Jonás tu' yalno Istzoti' Comam Dios tet anma ay yul con̈ob Nínive isbejnicano anma iswatx'en istx'ojal. Wal tzet chiwalti'an ec'balto yelapno sata tzet yal naj Jonás tu', yaja' mach chebejcano hetx'ojal. Yuxin hayet islahobal tz'ayic ha' hune' con̈obal anma ah Nínive tu' ha' chihalnilo hemul. 42Hacpax tu' yu ix reina ay yul ismajul tx'otx' Sabá, waxan̈ca caw nahat ay ix yaja' masan hul ix yabe yitz'atil iswi' naj rey Salomón. Yaja' wal haninti'an ec'bal welapnojan sata naj rey Salomón tu', yaja' mach cheyaco yin̈ hec'ul yin̈ tzet chiwalan. Yuxin yet islahobal tz'ayic ha' caw ix reina tu' chihalnilo hemul, ẍi Comam. 43Yalnipaxo Comam Jesús: —K'inalo ta ay hunu ischejab naj matzwalil chiel yul yanma hunu anma. Lahwi yel naj tu' cat isto naj bey tx'otx' desierto issaya' bay chixewi, yaja' mach chiilcha bay chixew naj tu' yu. 44Lahwi tu' cat yec' yin̈ isnabal naj haca' ti': “Etzan̈em c'ul inmeltzohan baytic'a ayinan,” ẍi naj. Haxa yet chiapni naj xin cat yilni naj yanma hune' naj tu' haca' hunu n̈a machi yahaw, caw c'ul yecan̈ k'alem yul. 45Hayet chilni naj hune' tu' xin cat isto naj yinoti hujwan̈xa yetbi caw ec'balto istx'ojal sataj, cat yocto ebnaj ehoyo yul yanma hune' naj tu'. Hune' naj bay chiocto ebnaj tu', caw ec'balto tx'oj chielico naj sata yet babelal. Haca' chak'le hune' naj tu' hac tu' chak'le huntek'an anma caw tx'oj ti' tinan̈, ẍi Comam. 46Hayet lan̈an istzotel Comam tet anma tu' xin yapni ismi' Comam yeb ebnaj yuẍta Comam, iscancano isti' ispultahil te' n̈a bay ayicto Comam. Yaja' xin yoche ismi' Comam yeb ebnaj yuẍta tu' tzotelo tet. 47Yuxin yal hune' naj tet Comam: —Mamin, ayc'o hami' yeb ebnaj hawuẍta istin̈a, choche ebnaj tzotelo tawet yalni, ẍi naj. 48Yaja' tak'wi Comam tet naj: —¿Mac xin inmi'an yeb wuẍtatu'an hawalni? ẍi Comam. 49Lahwi tu' isyenito Comam tet ebnaj iscuywom, yalni Comam: —Ha' huntek'an anma ti' ha' haca' inmi'an yeb haca' wuẍtajan. 50Yuto ha' mac chiyijen tzet chal Inmaman ay yul satcan̈, ha' ton wuẍtajan, wanaban yeb inmi'an, ẍi Comam.

will be added

X\