SAN MATEO 12

1Yet hune' tz'ayic xewb'al, x'ec'toj Comam Jesús b'oj heb'ya' ẍcuywi yin̈ xol ixim trigo. Caw ẍn̈ohcha heb'ya', yuxin sk'ahiloj heb'ya' sb'ohanil ixim, schilni heb'ya' sat ixim slob'. 2Yaja' c'uxan x'il hunk'aan heb'naj fariseo schilni heb'ya' sat ixim slob', xalni heb'naj tet Comam: —¿Tzet yuxin ẍmunla heb'naj ẍcuywi tawin̈ ti' yin̈ tz'ayic xewb'al? ¿tom mach yohtajoj heb'naj to xiquiltaj co munla yin̈ hune' tz'ayic ti'?. 3Xalni Comam tet heb'naj: —¿Tom maẍto cheyil yul Yum Comam Dios tzet xute ya' David yet ẍn̈ohcha ya', b'oj heb'naj tzujan yin̈? 4X'octoj ya' yul yatut Comam Dios. X'oc ya' swanojtoj ixim pan halteb'il tet Comam Dios, swanipax heb'naj tu' ixim, wal yeyi han̈c'a heb'naj sacerdote sje swani ixim. 5¿Mato maẍto cheyil sley ya' Moisés, tzet xute heb'ya' sacerdote ay yul yatut Comam Dios? Heb'ya' tu' machu syijyen heb'ya' tz'ayic xewb'al, yaja' mat xahanoj hune' chu heb'ya' tu'. 6Yin̈ caw yeli ẍwal teyetan: Hayin ti'an k'a' ec'b'alto we sataj yatut Comam Diosan. 7Oẍimi che txum tzet chal yul Yum Comam Dios b'ay chala': Mat han̈c'aoj heya'ni no' nok' ẍn̈uslaxoj wetan, ha' chal hin c'ulan. Wocheb'alan, tz'a he c'ul yin̈ heyet-anmail, ẍiayoj. Oẍimi che txum hune' ti', mach mi cheyala ta ay smul heb'ya' ẍcuywi win̈ ti'an, haxca mach smul heb'ya'. 8B'oj hunxa, hayin Ab'ilintij yu Comam Dios xol jet-anmail ti'an, yahaw hin yin̈ tz'ayic xewb'alan, hayin chu walnian tzet ẍju yin̈ hune' tz'ayic ti', ẍi Comam tet heb'naj fariseo tu'. 9Lawitu' xto Comam Jesús, x'apni yul scapiya hej yet con̈ob'. 10Ayictoj hune' naj camnajiloj hune' sk'ab'. Yaja' yun̈e ya'wojc'ule heb'naj fariseo yin̈ Comam yalni, yuxin sk'amb'e heb'naj: —¿Tom sje yan̈telax hunuj anma yin̈ tz'ayic xewb'al?. 11Xta'wi Comam: —K'inaloj ta ay hunuj no' he canelu ẍtohc'ay yul hunuj xab' yin̈ tz'ayic xewb'al, ¿taxca machex to heyi'a'tij no' waxan̈ca tz'ayic xewb'al? 12Hajxam hunuj anma to k'a' ec'b'al ye sataj hune' no' canelu. Yuxin ẍtic'a sje juni hunuj tzetet c'ul yin̈ jan̈ten anma yin̈ tz'ayic xewb'al. 13Lawitu' xalni Comam tet naj tx'oj ye sk'ab' tu': —Toholb'an̈eltoj ha k'ab'. Ha' stoholb'an̈eniltoj naj sk'ab', xwatx'icanoj, lahan xucan b'oj hune'xa sk'ab' naj. 14Ha' xilni heb'naj fariseo hune' tu' x'eltoj heb'naj, x'oc heb'naj sk'umlanoj sb'a tzet chute heb'naj spotx'noj Comam. 15Ha' xtxumniloj Comam Jesús tzet nab'il yu heb'naj, shec'niloj sb'a Comam b'etu', yaja' caw tx'ihal anma xto yin̈ Comam, xan̈ten mactaj tx'oj ye sc'ul. 16Lawitu' xalni tet anma: —Nann̈e heyu, macheyalic'oj tzet ẍwu ti'an. 17Hactu' xu yijni sb'a tzet stz'ib'n̈eb'il yu ya' Isaías schejab'lom Comam Dios, chalni ya': 18Ha' naj ti' hin chejab' sic'leb'il wuan. Caw ocheb'il naj wuan, caw chin tzala yin̈ najan. Ẍwa'a' Wespíritu tet najan, spujb'anojc'oj naj tet anma nan con̈ob'al, chinojtij naj cuenta yin̈ anma, yaja' yin̈ stoholal. 19Mach b'ay steye' sb'a naj b'oj anma, machca nahat aw chub' naj, mach b'ay ch'awoj naj yulaj calle. 20Ay anma aycoj yin̈ sc'antajil, haca' hune' te' ah capajan yeyi, mato haca' mecha etza ẍtan̈ k'a' yin̈. Yaja' ha' naj ẍcolwaoj yin̈, mach slaha' naj yetantoj. Hactu' chute' naj, masanto ch'ocoj naj Yahawoj yin̈ stoholal. 21Sunil mac nan con̈ob'al ẍcawxoj sc'ul yin̈ naj. 22X'iottoj hune' naj machu yilni tet Comam Jesús, machca stzotel naj haxca aycoj yespíritu naj matzwalil yin̈ naj. Xan̈ten Comam naj. Lawitu' xa yil naj b'oj xa stzotel naj. 23Sunil anma x'ilni hune' tu' xc'ayiloj sc'ul chalni: —¿Tom ha' naj ti' yic'al naj rey David ẍjechma yuli?. 24Ha' xab'en heb'naj fariseo tzet chal anma, xalni heb'naj: —Naj ti' chu yiniloj naj hej yespíritu naj matzwalil yin̈ anma, haxca aycoj naj Beelzebú yahaw yespíritu naj matzwalil yin̈ naj. 25Yaja' yohtajxa Comam tzet chal heb'naj yin̈ sahwil, yuxin xala: —K'inaloj pohb'iltoj sb'a anma yul hunuj nación, chim c'ayiloj. B'oj hune'xa, ta ay hunuj con̈ob' mato hunuj n̈ahil anma capohil yeyoj, machu yehcoj yin̈ c'ul. 26Hactu' ye naj matzwalil, ta cha' naj howal yin̈ hej yet-matzwalilal, yin̈tic'a naj cha'coj howal chaltu'. ¿Tox ch'ehojc'oj scan̈il ye naj heyalni? 27Hexti' cheyala ta yu scan̈il ye naj Beelzebú yahaw yespíritu naj matzwalil ẍwiloj yespíritu naj matzwalil yin̈ anmaan. Ta hactu' heyalni, ¿mac aycoj yin̈ heb'naj ẍcuywi teyin̈ yet chiniloj hej yespíritu naj matzwalil yin̈ anma? Yuxin hatic'a heb'naj ẍyeniloj to c'aynajextoj. 28Yaja' ta yu Yespíritu Comam Dios ẍwiloj hej yespíritu naj matzwalil yin̈ anmaan, ha' ẍyeniloj to yocxa Comam Dios Yahawoj te xol. 29K'inaloj ta ay hunuj naj yahaw n̈ah caw ay yip, mach hunuj naj elk'om chu yoctoj yul yatut naj yinojiloj tzet aya. Yaja' ta ch'apni hunuj naj k'a' ayto yip, cat sc'alniayoj naj naj yahaw n̈ah tu', waltu' chu yiniloj naj tzet ay naj. 30Mac mat wetb'iojan, paq'uinajcoj win̈ chaltu'an. Mac mach ẍcolwa win̈ syamb'an anmaan, ha' spohnitoj, ha' chu. 31Yu hune' tzet xeyal win̈ tu'an ẍwal teyetan, tzantzet tx'oj chal hunuj anma chanicoj smul, ẍto sje sb'ut'nitan̈oj Comam Dios smul, yaja' mac ẍhalni tx'oj yin̈ Comam Espíritu, hune' tu' matxa b'ak'in̈ chu sb'ut'laxojtan̈oj smul. 32Ta ay mac xhalni tx'oj win̈ hayin Ab'ilintij yu Comam Dios xol jet-anmail ti'an, ẍto hu sb'ut'laxtan̈oj smul, yaja' mac ẍhalni tx'oj yin̈ Comam Espíritu Santo, matxa chu ẍb'ut'laxojtan̈oj smul tu', tinan̈, mato yet b'ak'in̈aloj. 33Hune' te' satnom te' mach syab'il, c'ul sat te' cha'a. Hune' te' satnom te' aycoj syab'il, mat c'uluj sat te' cha'a. Yin̈ sat te' chu co txumni ta mach syab'il te', mato ay syab'il te'. 34Hexti' lahanex b'oj no' howla lab'ah, sub'um anmaex. ¿Tzet chu heyalni tzoti' c'ul to mat hex c'uluj? Haxca ha' co tzoti' ẍyeniloj tzet ib'il yu janma. 35Hune' anma c'ul, hej tzetet c'ul chala, haxca c'ul ib'il yu yanma. Anma tx'oj, hej tzetet tx'oj chala, haxca tx'oj ib'il yu yanma. 36Yuxin ẍwal teyetan, yet chinojtij Comam Dios scuenta yin̈ anma, yilal sta'woj anma yin̈ hej tzoti' tx'oj chala, hasta yin̈ hej tzoti' comonaln̈e yeyi. 37Haca' he tzoteli, hactu' yinojtij Comam Dios scuenta teyin̈. Hato Comam ẍhalnoj ta ay he c'ulal, mato machoj. 38Yet hunec tu', xal hunk'aan heb'naj cuywaom yin̈ sley ya' Moisés b'oj heb'naj fariseo tet Comam Jesús: —Mam Cuywaom, ẍjochean ta cha ye hunuj c'ayb'alc'ule jila'an. 39Xta'wi Comam: —Hex ayex tinan̈, caw mach he walil, mat yijyomoj hex tet Comam Dios. Yuxin che k'an heyila' hunuj c'ayb'alc'ule ẍyeni scan̈il ye Comam. Hune'n̈e c'ayb'alc'ule ẍyelaxoj heyila', hune' tzet xa'le ya' Jonás schejab'lom Comam Dios, ha' ch'a'laxoj heyila'. 40Ya' tu' oxeb' tz'ayic, oxeb' ak'b'al ayictoj ya' yul sc'ul hune' no' niman cay. Haca' xa'le ya' tu', hactu' ẍwa'le' hayin Ab'ilintij yu Comam Dios xol jet-anmail ti'an. Oxeb' tz'ayic, oxeb' ak'b'al chin ayotoj yul tx'otx'otx' ti'an. 41Yet xb'ey ya' Jonás tu' yala' stzoti' Comam Dios yul con̈ob' Nínive, sb'ejcan anma yanicoj smul. Wal hinan, hayin caw lan̈an hin tzotel teyetan, k'a ec'b'alto yelapnoj we sataj ya' Jonás tu'an, yaja' mach sje he c'ul he ya'acan he tx'ojal. Yuxin yet chinojtij Comam Dios scuenta yin̈ anma, hune' con̈ob'al anma ah Nínive tu', chi'a'can̈ sb'a cat syenojiloj he tx'ojal. 42Hactu' xa'le ix reina ah Sabá, caw nahat speto ix xhul ix yab'enoj stz'ajanil sc'ul ya' rey Salomón. Wal hinan, hayin caw lan̈an hin tzotel teyetan, k'a ec'b'alto yelapnoj we sataj ya' Salomón tu'an, yaja' mach sje he c'ul heyab'etoj. Yuxin yet chinojtij Comam Dios scuenta yin̈ anma, chi'a'can̈ sb'a ix reina tu' cat syenojiltoj ix he tx'ojal tu'. 43K'inaloj yet ch'el hune' yespíritu naj matzwalil yin̈ yanma hunuj anma cat sto ec'oj colo yul tajin̈ witz ac'al, sayni b'ay chu yoc xewoj, yaja' mach xchalo yu. 44Lawitu' chalni hune' espíritu tu': K'a' t'in̈an chin meltzo b'ay xquin titan, ẍi. Haxa ch'apni, chilnicoj yanma hune' anma tu', lahan b'oj hune' n̈ah machc'oj yahaw, caw c'ul yecan̈ k'alem yul, caw watx'eb'il. 45Ha' chilni hune' tu' cat sto yinojtij hujwan̈xa yespíritu naj matzwalil k'a' tx'ojto sataj, cat yoctoj yespíritu naj matzwalil tu' ehoj yin̈ yanma hune' anma tu'. Yuxin k'a' tx'ojto ch'elicoj hune' anma tu' sataj yet x'ichitij. Haca' xa'le hune' anma tu', hactu' cheya'le' hexti'. 46Lan̈anto stzotel Comam Jesús b'oj anma tu', yet x'apni smi' Comam b'oj hej yuẍtaj. Xcan lin̈noj heb'ya' sti' pulta, stzotel heb'ya' b'oj Comam yalni. 47Yuxin xhalot tet Comam: —Mamin, xhul ha mi' b'oj hej hawuẍtaj hach yila'. 48Xta'wi Comam: —¿Mac hin mi' tu' b'oj hej wuẍtaj tu' heyalnian? 49X'oc Comam syenoj heb'ya' ẍcuywi yin̈, xalni Comam: —Heb'ya' ti', haca' hin mi'an haca' wuẍtajan. 50Haxca mac ẍyijyen tzet chal sc'ul hin Mam ay satcan̈an, caw yeli wuẍtajan, k'a' wanab'an, b'oj k'a' hin mi'an.


Copyright
Learn More

will be added

X\