SAN MATEO 11

1Lawi ya'nican Comam Jesús schejb'anil heb'ya' cab'lan̈wan̈ ẍcuywi yin̈, xto Comam cuywaoj b'oj yalac'oj stzoti' Comam Dios yulaj hej con̈ob' aycoj shoyanil tu'. 2Ha' xab'en ya' Juan Bautista hej tzetet chu Comam Cristo, xanitoj ya' cawan̈ heb'ya' ẍcuywi yin̈ sk'amb'e' tet Comam, haxca ayxactoj ya' yul presu. 3Xalni heb'ya': —¿Tom hachti' naj Cristo ẍjechma yulan, mato ayto hunujxa mac ẍjechmaan? . 4Xta'wi Comam: —Aswej hal tet ya' Juan tu' tzet xeyab'e b'oj tzet xeyil ti'. 5Halwej tet ya': Mac maẍtic'a chu yilni, tinan̈ xa yila, mac machu yeq'ui, tinan̈ xa eq'ui. Mac aycoj yab'il lepra yin̈, ch'an̈chacanoj. Mac chacan̈, tinan̈ xa yab'e. Ay mac xax cami, yaja' ẍpitzc'acan̈. Tinan̈ lan̈an yal-laxc'oj tzoti' yet colb'anil tet anma meb'a'. 6Sak'al yet mac mach ẍcab'concan̈ sc'ul win̈an. 7Lawi sto heb'ya', x'oc Comam yalnoj tzet yelapnoj ye ya' Juan tet anma ay sc'atan̈. Chalni Comam: —¿Tzet xb'ey heyila' b'ay ton̈e chulec' anma? ¿Tom hune' te' ah ẍb'ili yu cak'e' xb'ey heyila'? 8¿Mato hune' naj caw c'ul yecoj xil sk'ap xb'ey heyila'? Hexti' heyohtaj to heb'naj caw k'aptzeb'il sb'a yu, yul yatut heb'naj rey ay heb'naj. 9Yuxin, ¿tzet xb'ey heyila'? ¿Mato hune' naj schejab'lom Comam Dios? Yeli ya' Juan tu' ec'b'al schejab'lom Comam Dios ye ya'. 10Ya' Juan tu' chal Yum Comam Dios: Ẍwatoj hin chejab' ta satajan yun̈e swatx'entoj b'eh yalan̈to maẍto chach apni, ẍiayoj. 11Yin̈ caw yeli ẍwal teyetan, xol hantaj anma ay satyib'an̈k'inal ti' maẍto hunuj mac k'a' ec'b'al sataj ya' Juan Bautista. Yaja' mactaj ch'ocoj yul sk'ab' Comam Dios, waxan̈ca comonaln̈e yeyi, ec'b'alto sc'ulal chil sataj ya'. 12Yettax x'ichitij ya' Juan ya'ni ha' yi'a' anma masanto tinan̈, tx'ihal mac choche ya'a yip howal yun̈e yoc Comam Dios Yahawoj b'eti', yip heb'naj chala cat yi'wa heb'naj yalni. 13Haxca hantaj tzet xal heb'ya' schejab'lom Comam Dios b'oj sley ya' Moisés stzote tzet chu yocoj Comam Dios Jahawoj, yalan̈to maẍto chul ya' Juan. 14Ta sje he c'ul he chab' tzet yalnaj ya' Juan, ha' ya' ti' Elías halb'il ta chuli. 15Maquex cheyab'e hune' ti', a'wej heyanma he txumniloj. 16¿Mac b'oj chu hin lahb'an anma ay tinan̈an? Lahan b'oj niẍtej unin tz'on̈anay sajchoj yul txon̈b'al, ch'awi tet yet-uninal chalni: 17Nab'n̈e ẍjeta co b'a jok'tzen te' su'an, yaja' machex can̈alwi. Nab'an̈e tz'ab'alc'ule co b'itnian, yaja' machex ok'i, ẍi. 18Ẍwal hune' ti'an haxca yulb'al ayc'oj ya' Juan Bautista, mach'ec' ya' yin̈ hej k'in̈, yuxin chal anma ta aycoj yespíritu naj matzwalil yin̈ ya'. 19Hayin Ab'ilintij yu Comam Dios xol jet-anmail ti'an, haxca chin ec' yin̈ hej k'in̈an, chalni anma win̈an: Naj Jesús ti' caw tzet swa' naj b'oj caw ch'uc' naj. Stzan naj yoc xol heb'naj iomiloj melyu yet tohlab'al b'oj mac mat c'uluj yec'oj, ẍi anma win̈an. Yaja' wal mac aycoj stz'ajanil sc'ul Comam Dios yin̈, hab'an syeniloj sb'a yu hej tzetet c'ul chu. 20Yet hunec x'oc Comam Jesús yala' xtx'ojal anma ay yul hej con̈ob' b'ay k'a' tx'ihal c'ayb'alc'ule sye, haxca maẍtic'a sb'ejcan heb'jetb'i yanicoj smul. Xalni Comam: 21—C'antajex hex ah Corazín, b'oj hex ah Betsaida, c'antajex, haxca ta yul con̈ob' Tiro b'oj yul con̈ob' Sidón xu hej c'ayb'alc'ule xu te xol ti', ayxam ichi yanicoj heb'jetb'i xil k'ape ehom yin̈, b'oj xam yahtoj heb'jetb'i tan̈ xol xil swi' syeb'aniloj to sb'ejcan yanicoj smul. 22Yaja' ẍwal teyetan, yet ch'apnoj tz'ayic b'ay chi'a'tij Comam Dios scuenta yin̈ anma, k'a' ec'b'alto ch'a'laxoj ec'oj ya' he yanma sataj anma ah Tiro b'oj ah Sidón tu'. 23B'oj hex ah Capernaum, ham he yalni ta chex b'atxlaxojcan̈ satcan̈. Hajxa, ha' heyalaxojaytoj yul b'ay ay hej camom ha' cheyechma. Haxca ta b'et Sodoma xu hej c'ayb'alc'ule xu te xol ti', mam sb'ejcan anma yanicoj smul, machmi xc'aylaxiloj hune' con̈ob' tu'. 24Yuxin ẍwal teyetan, yet chuluj tz'ayic b'ay chi'a'tij Comam Dios scuenta yin̈ anma, k'a' ec'b'alto ch'a'laxoj ec'oj ya' he yanma sataj anma ah Sodoma tu'. 25Yet hunec' tu', xal Comam Jesús yin̈ yoración yin̈ hacti': —Mam, Yahaw satcan̈ b'oj tx'otx'otx', ẍwa' yuch'antioẍ tawetan haxca xaweb'a hunk'aan ti' tet anma tz'ajan sc'ul b'oj anma cuywinaj, xa yeniloj tet anma huncuentan̈e sc'ul. 26Ho' Mam, haxca hactu' chal ha c'ul ta chu hune' ti'. 27Lawitu' xalni paxoj: —Sunil tzetet xac'oj hin Mam wetan. Mach hunuj mac ohtajn̈e hinan, to han̈c'a hin Mam ohtajn̈e hinan. Machca hunuj mac ohtajn̈e hin Mam tu'an, to hayinn̈e hin Sc'ahol ti'an, b'oj mac chal hin c'ulan ta ẍwa' yohtajn̈e'an. 28Hex ẍtib'ay heyu haxca al heyet, catwej wetan, hayin ẍwa' yak'lob'al he c'ulan. 29Ijwej hune' ijatz ẍwa' teyet ti'an. Cuywan̈wejiloj win̈an, haxin̈wal xew heyanma, haxca hayin ti'an huncuentan̈e wean, b'oj niman hin c'ulan. 30Hune' ijatz ẍwa' heyi'a' ti'an mat aloj, matca ya'tajoj heyijyeni.


Copyright
Learn More

will be added

X\