SAN MATEO 10

1Lahwi tu', iscutxbanico Comam Jesús ebnaj cablahon̈wan̈ iscuywom, yak'ni Comam yip ebnaj yinilo ischejab naj matzwalil yin̈ anma, yebpaxo xin yu yak'ni cawxo ebnaj anma ya'ay, yeb yu yinilo ebnaj tzettaj ya' yu anma. 2Hac ti' xin isbi ebnaj cablahon̈wan̈ ischejab Comam haca' ti': Naj Simón chiyijpaxo Pedro, naj Andrés yuẍta naj Simón, naj Jacobo yeb naj Juan, ebnaj cawan̈ ti' isc'ahol icham Zebedeo ye ebnaj. 3Naj Felipe, naj Bartolomé, naj Tomás, naj Mateo, naj chitic'a inilo ch'en tohlabal chito bey Roma, naj Jacobo isc'ahol icham Alfeo, naj Tadeo. 4Yebpaxo xin naj Simón, aytic'aco yin̈ hune' partido chiyij cananista, yeb naj Judas Iscariote, naj anico Comam yul isk'ab camical. 5Ha' ebnaj cablahon̈wan̈ ti' ischejto Comam Jesús, yalni Comam ischejbanil ebnaj haca' ti': —Mach chexec' yulaj iscon̈ob anma mach Israeloj, yebpaxo xin mach chexec' yulajla con̈ob ay yul ismajul Samaria. 6Cachann̈e xol jet con̈ob Israel chextohi, yuto lahan anma haca' no' me' chic'ayic'oj. 7Asi'we xin, cat heyalni tet anma tato Comam Dios ay yul satcan̈ yocxa yahawo yin̈ anma. 8Ak'we cawxo anma ya'ay, ta ay mac chicami cheyak' hulucan̈ isc'ul, ta ay mac ayco lepra yin̈ cheyak' cawxoj, cat heyinipaxilo ischejab naj matzwalil yin̈ anma. Hune' heyip chiwak'ti'an matanil chechah, yuxin mach chek'an hetohol yet cheyak'ni cawxo anma. 9Yin̈ hebel tu' xin matzet cheyitoj; mach cheyito hemelyu, nitam hunu centavo, 10mach cheyipaxto hetz'ispa, yeb hehelbal, mach cheyipaxto ishelbal hexan̈ab, yebpaxo xin mach cheyik' hek'ojoch. Chiwalan huntek'an ti' teyet yuto naj munlawom chiak'lax tzet chislo naj yin̈ ismunil. 11Hayet chexapni yul hunu con̈ob maca yul hunu aldea chesay mac c'ulch'an isc'ul, ha' tu' xin chexcani masanto yet chexmeltzohi. 12Yet chexapni bey te' n̈a bay chexcancano tu', cheyal tet anma tu' haca' ti': “Ayojab ak'anc'ulal texol,” quexchi. 13Ta choche mac ay yul hune' n̈a tu' ak'anc'ulal, chiak'lax ak'anc'ulal tu' tet, taca mach choche xin, mach chiak'lax tet. 14Yaja' tato mach chexchahlaxi, yeb xin mach chiabelax tzet cheyala, chexel yatut anma tu' maca yul hune' con̈ob tu', cat xin hetzicnilo pojoj yin̈ heyoj yun̈e heyeniloj tato matxa heyoc yin̈ anma tu'. 15Yin̈ caw yeli chiwalan teyet, yet chilni Comam yin̈ tzet chielico anma tu', caw ec'balto isya'tajil chischah sata anma ay bey con̈ob Sodoma yeb con̈ob Gomorra, ẍi Comam Jesús. 16Yalnipaxo Comam Jesús tet ebnaj iscuywom tu': —Chexinchejtojan xol anma haca' no' me' chito xol no' oj. Yuxin helan cheyute heba haca' no' laba, yaja' huncuentan̈e cheyute hec'ul haca' no' cuwis. 17Caw cheyil heba, yuto chexilaxto sata ebnaj iswi'ehal yin̈ lahti' yul con̈ob. Chexmak'lax yulajla capilla. 18Chexalaxico sata ebnaj gobernador, maca sat ebnaj nimeta yahaw, yuto ayexico yul ink'aban. Hac tu' chu quinheyak'nihan yohtan̈elo ebnaj, yeb tet anma mach Israeloj. 19Hayet chexalaxico sata ebnaj yahaw tu', mach cheyaco yin̈ hec'ul yin̈ tzet chu hetzoteli, yuto ha' Comam Dios chiak'ni hehelanil hetzoteli. 20Wal xin maẍtajex chextzoteli, to ha' Yespíritu Comam chitzotel teyin̈. 21Yet chihul hune' tiempohal tu' ay ebnaj chianico yuẍta yul isk'ab camical, aypaxo ebnaj mame chianico isc'ahol yul isk'ab camical, aypaxo xin ebnaj c'ahole chianico howal yin̈ ismam cat ispotx'ni camo ebnaj ismam. 22Sunil anma chichiwa isc'ul teyin̈ yuto ayexxaco yul ink'aban, yaja' wal mac chitecha yu masanto yet islahobal, chicolchahi. 23Hayet chextzumbelaxilo yul hunu con̈ob, chexel bey tu' cat heto yul hunuxa con̈ob, yuto yin̈ caw yeli chiwalan teyet; maẍtotic'a chilahwi heyec' yul sunil con̈ob Israel ti' cat wul lemnahan, Hanin Ak'bilintijan texol yu Comam Dios. 24Machi hunu naj lan̈an iscuylaxi chipalc'onnacan̈ yiban̈ naj chicuyni tu', yeb xin machi hunu naj chejab chipalc'onnacan̈ yiban̈ ispatrón. 25Yaja' tato ay hunu naj chicuywi tu' chiapni yitz'atil iswi' haca' naj cuywawom tu', caw c'ul hune' tu', yeb xin tato ay hunu naj chejab chiapni islahann̈e isba yeb ispatrón, c'ulpaxo hune' tu'. Ta chinhallaxan Beelzebú, naj yahawil yin̈ ebnaj ischejab naj matzwalil, hajexxampaxoj, ¿tzet mach hallaxo teyin̈? ẍi Comam Jesús. 26Yalnipaxo Comam Jesús: —Mach chexxiw tet anma, yuto machi hunu tzet ye tu' ewan mach chiel yen̈el, yeb xin machi hunu tzet chihallax yin̈ ewantajil mach chiabchaloj. 27Sunil tzet chiwalan teyet yin̈ ewantajil tinan̈, pujbawec'o tet anma. Yeb huntek'an ton̈e chinsahan yul hetxiquin, halwec'o yin̈ caw ip yulaj calle. 28Mach chexxiw tet ebnaj chipotx'ni henimanil, yuto wal heyanma mach chik'oji ebnaj ispotx'ni. Wal xin han̈e tet Comam Dios bay wal hexiwi, yuto chu yanito Comam henimanil yeb heyanma xol k'a k'a' mach istan̈bal. 29Chisje hetxumni yin̈ no' niẍte ch'ic tinan̈, cac'on̈ no' chitxon̈lax yin̈ centavo. Yaja' machi hunu no' chicami tato maẍtaj Comam ay yul satcan̈ chihalni. 30- 31Hajxam hex ti' to caw ec'bal heyelapno sata no' niẍte ch'ic tu', caw bisbil xil hewi' yin̈ hununtajil yu Comam. Yuxin chiwalan teyet, mach chexxiwi, ẍi Comam. 32Yalnipaxo Comam Jesús: —Ha' mac mach chitx'ixwi yalni yin̈ sat anma tato wetxahan yehi, haquintu'an mach chintx'ixwihan walnihan tet Inmaman ay yul satcan̈ tato wetan yehi. 33Yaja' wal mac chihalni yin̈ sat anma tato mach wetojan yehi, chiwalpaxojan yin̈ sat Inmaman ay yul satcan̈ tato mach wetojan yehi, ẍi Comam. 34Yalnipaxo Comam Jesús: —Tajca chetxumu tato hulnajinan yu wanicojan ak'anc'ulal xol anma yul sat yiban̈k'inal ti', machoj, walxinto yu yak'lencan̈ howal win̈an. 35Quinhulan yu yak'nican̈ howal naj c'ahole yeb ismam, ix unine chioc ix howal yin̈ ismi', ix alibe chioc ix howal yin̈ ixnam alibe, 36yuxin xoltic'a mac ayto yu isba chiah howal. 37Mac ec'bal chaco yanma yin̈ ismam maca ismi' insatajan, mach istzano yoc wetojan, yeb xin ha' mac ec'bal ayco yanma yin̈ isc'ahol maca iscutz'in insatajan, mach istzano yoc yul ink'aban. 38Ha' mac hinan yak'len isya'tajil win̈an, waxan̈ca chiak'lax camo yin̈ culus, ha' chu yoc wetojan. 39Ha' mac ec'bal chisya'iln̈e isba insatajan, chic'aytoj, mach chik' isk'inal mach istan̈bal. Wal mac hinan iscam win̈an xin chischah isk'inal mach istan̈bal, ẍi Comam. 40Yalnipaxo Comam Jesús: —Ha' mac chexchahni, haninan chinischahan, ha' mac chinchahnihan chischah Mac an̈eintijan. 41Ha' mac chichahni hunu ischejab Comam Dios, lahan ismatan chischah haca' ischejab Comam tu'. Mac chichahni hunu mac isc'ulaln̈etic'a chiswatx'e, lahan ispaj chischah yeb mac isc'ulaln̈etic'a chiswatx'e tu'. 42Haxa mac chiak'ni hunu vaso chewala' tet hunu incuywoman, waxan̈ca caw comon jilni, yin̈ caw yeli chiwalan teyet, hune' mac tu' chischah ispaj selel tet Comam Dios, ẍi Comam.

will be added

X\