SAN MATEO 1

1Stzoteb'anil Comam Jesucristo yic'al ya' rey David b'oj ya' Abraham. Ha' ti' xtxolil sb'ih hej yichmam Comam. 2- 6Ya' Abraham, ya' Isaac, ya' Jacob, ya' Judá b'oj heb'naj yuẍtaj, ya' Fares (b'oj yuẍtaj Zara yunin ya' Tamar). Ya' Esrom, ya' Aram, ya' Aminadab, ya' Naasón, ya' Salmón, ya' Booz (yunin ya' Rahab). Ya' Obed (yunin ya' Rut), ya' Isaí, ya' David sreyal Israel. 6Yin̈tax ya' David masanto yet x'iottoj heb'ya' Israel b'et Babilonia hato heb'ya' ti' yichmam Comam ẍb'ina sb'i: Ya' Salomón (yunin yixaltic'a ya' Urías), ya' Roboam, ya' Abías, ya' Asa. Ya' Josafat, ya' Joram, ya' Uzías, ya' Jotam, ya' Acaz, ya' Ezequías, ya' Manasés, ya' Amón, ya' Josías, ya' Jeconías (b'oj hej yuẍtaj). Lawitu' x'iottoj heb'ya' israel b'et Babilonia. 12- 16Yet lawi yi'ottoj heb'ya' b'et Babilonia tu' masanto yet xpitzc'a Comam Jesús hato heb'ya' ti' yichmam Comam ẍb'ina sb'i: Ya' Salatiel sc'ahol ya' Jeconías, ya' Zorobabel, ya' Abiud, ya' Eliaquim, ya' Azor, ya' Sadoc, ya' Aquim, ya' Eliud, ya' Eleazar, ya' Matán, ya' Jacob, ya' José, yichamil ya' María; ha' ya' ti', smi' Comam Jesús ẍhal-lax Cristoal. 17Ha' ti' stzoteb'anil can̈lan̈eb' majan yichmam Comam Jesús, x'ichitij yin̈ ya' Abraham masanto xhul yin̈ ya' David. X'ichitij yin̈ ya' David masanto xhul yin̈ yet x'iottoj heb'ya' israel b'et Babilonia, can̈lan̈eb' pax majan. Lawi yiottoj heb'ya' Babilonia masanto xhul stz'ayical b'ay xpitzc'a Comam Cristo, can̈lan̈eb'to pax majan. 18Ha' ti' stzoteb'anil tzet xu spitzc'a Comam Jesucristo. T'in̈anxa smohyi ya' José b'oj ya' María, yaja' yet k'anab'eto ye ya' María maẍto chi' sb'a heb'ya', ta'an ayxa tzet ye ya', haxca schacan ya' ni'an yunin yin̈ snimanil yu Comam Espíritu Santo. 19Haxca caw c'ul ch'an sc'ul ya' José, mach sje sc'ul ya' yi'aloj spixan ya' María, yuxin ton̈e stin̈chacan ya' ya' yin̈ ewantaj yalni. 20Lan̈an yec' hune' tu' yin̈ sc'ul ya', x'apni yángel Comam Dios yalnoj tet ya' yul swayic, chalni ángel tu': —José, yic'al ya' rey David, machach nanon ha mohyi b'oj ix María, haxca ni'an unin xwaycan̈ yin̈ snimanil ix, yu Comam Espíritu Santo xwaycan̈. 21Ni'an unin ẍpitzc'aoj tet ix tu', winaj unin. JESÚS chawa'a'coj sb'ihoj, haxca ha' ẍcolnoj scon̈ob' tet smul. 22Hactu' xu yijni sb'a tzet xal Comam Jahaw yu hune' schejab'lom xalni yin̈ hacti': 23Ay hune' ix k'opo, maẍto shunb'a sb'a b'oj hunuj naj winaj, yaja' ay hune' ni'an unin schab' ix yin̈ snimanil. Ni'an unin ẍpitzc'aoj tet ix tu' winaj unin. Emanuel ẍhal-laxoj yin̈, ẍi Yum Comam Dios. (Ha' chaliloj Emanuel tu': Aycoj Comam Dios co xol.) 24Lawi yel swayan̈ ya' José, syijyen ya' tzet xal yángel Comam Jahaw, xmohyi ya' b'oj ya' María, 25yaja' mach shunb'a sb'a heb'ya' masanto xpitzc'a ni'an b'ab'el yunin ya'. Yet xpitzc'a ni'an unin tu' xanicoj ya' José JESÚS sb'ihoj.


Copyright
Learn More

will be added

X\