1 Ha' icham Abraham yeb naj rey David, ha' yichmam Comam Jesucristo. Hac ti' ye istxolal yichmam Comam haca' ti': 2 Icham Abraham, ha' icham ismam naj Isaac, naj Isaac ha' naj ismam naj Jacob, naj Jacob, ha' naj ismam naj Judá yeb huntek'anxa yuẍtaj. 3 Naj Judá, ha' naj ismam naj Fares yeb naj Zara, ha' xin ismi' ebnaj cawan̈ tu' ha' ton ix Tamar. Naj Fares ha' naj ismam naj Esrom, naj Esrom ha' naj ismam naj Aram. 4 Naj Aram, ha' naj ismam naj Aminadab, naj Aminadab, ha' naj ismam naj Naasón, naj Naasón, ha' naj ismam naj Salmón. 5 Naj Salmón, ha' naj ismam naj Booz, wal ismi' naj Booz, ha' ton ix Rahab. Naj Booz, ha' naj ismam naj Obed, wal ismi' naj Obed tu', ha' ton ix Rut. Naj Obed, ha' naj ismam naj Isaí. 6 Naj Isaí, ha' naj ismam naj rey David. Haxa naj David, ha' naj ismam naj Salomón, ismi' naj Salomón tu' xin, ha' ton ix yixaltic'a naj Urías yet yalan̈tocanoj. 7 Wal naj Salomón, ha' naj ismam naj Roboam, naj Roboam, ha' naj ismam naj Abías, naj Abías, ha' naj ismam naj Asa. 8 Naj Asa, ha' naj ismam naj Josafat, naj Josafat ha' naj ismam naj Joram, naj Joram, ha' naj ismam naj Uzías. 9 Naj Uzías, ha' naj ismam naj Jotam, naj Jotam, ha' naj ismam naj Acaz, naj Acaz ha' naj ismam naj Ezequías. 10 Naj Ezequías, ha' naj ismam naj Manasés, naj Manasés, ha' naj ismam naj Amón, naj Amón ha' naj ismam naj Josías. 11 Naj Josías, ha' naj ismam naj Jeconías yeb huntek'anxa yuẍtaj. Ha' yin̈ istiempohal naj Jeconías tu' ilaxto ebnaj Israel preso yul con̈ob Babilonia. 12 Hayet yelti ebnaj yalan̈ yip Babilonia tu' xin ha' naj Jeconías, ha' naj ismam naj Salatiel, naj Salatiel, ha' naj ismam naj Zorobabel. 13 Naj Zorobabel, ha' naj ismam naj Abiud, naj Abiud, ha' naj ismam naj Eliaquim, naj Eliaquim, ha' naj ismam naj Azor. 14 Naj Azor, ha' naj ismam naj Sadoc, naj Sadoc ha' naj ismam naj Aquim, haxa naj Aquim, ha' naj ismam naj Eliud. 15 Naj Eliud, ha' naj ismam naj Eleazar, naj Eleazar, ha' naj ismam naj Matán, haxa naj Matán, ha' naj ismam naj Jacob. 16 Naj Jacob, ha' naj ismam naj José, naj José tu' ha' naj yichamil ix María. Ix María tu' ha' ix ismi' Comam Jesús, ha' ton Comam Cristo. 17 Wal xin ay can̈lahon̈wan̈ mame yin̈ istxolal yichmam Comam Jesucristo chiichiti yin̈ icham Abraham masanta yin̈ naj rey David. Tzujanilo yinta naj rey David tu' yichipaxti can̈lahon̈wan̈ mame istxolal yichmam Comam masanta yet yilaxto ebnaj Israel preso bey Babilonia. Tzujanxa yet yilaxto ebnaj Israel preso yul con̈ob Babilonia tu' yichipaxti can̈lahon̈wan̈xa ebnaj mame yin̈ istxolal yichmam Comam Jesucristo masanto yin̈ istiempohal yet ispitzc'a Comam. 18 Hac ti' ye istzoti'al yin̈ yet ispitzc'a Comam Jesucristo. Wal ix María tak'webilxa yu ix ismohyi yeb naj José, yaja' yet maẍto chiyik' isba, ispitzc'ati' nich'an unin yin̈ ix yu yip Comam Espíritu Santo. 19 Wal naj José waxan̈ca caw yijem naj tet isley naj Moisés, yaja' mach isje isc'ul naj isk'ana' yin̈ ix María tu', yoc yin̈ isnabal naj isbejnicano ix yin̈ ewantajil. 20 Hayet lan̈an yec' hune' tu' yin̈ isnabal naj, isyeni isba hune' yángel Comam Dios tet naj yul iswayic; yalni naj ángel tu' haca' ti': —José, hach titnajach yin̈ yuninal naj rey David, mach chinanon hac'ul hamohyi yeb ix María, yuto ha' nich'an unin ijbilico yu ix yet Comam Espíritu Santo. 21 Nich'an unin chipitzc'a tu', Jesús chawaco isbihoj, yuto ha' naj chicolnilti yet con̈ob yalan̈ ismul, ẍi naj ángel. 22 Hac tu' yu yijni isba tzet yalcano Comam Dios tet hune' ischejab yet payat, yet istz'ibn̈encano haca' ti': 23 Ay hune' ix k'opo maẍto hunu winaj chik'le, yaja' chipitzc'ati nich'an winaj unin yin̈ ix, nich'an unin chipitzc'a tu' Emanuel chiyij isbi, ẍiayoj. Emanuel, ha' chaliloj ayco Comam Dios coxol. 24 Lahwi tu' yel iswayan̈ naj José, isyijen naj yin̈ tzet yal yángel Comam Dios, ismohyi naj yeb ix María. 25 Yaja' mach ishunba isba masanto yet ispitzc'a nich'an yunin ix. Ha' nich'an unin pitzc'a tu' xin, Jesús yaco naj isbihoj.
