SAN MARCOS 9

1Xalni pax Comam Jesús: —Yin̈ caw yeli ẍwal teyetan, ay mac ay co xol ti' ẍto ilnoj yuluj Comam Dios Yahawoj b'oj scan̈il yeyi yalan̈to maẍto ẍcami. 2Shob'xixa tu', xto Comam Jesús swi' hune' witz nahat yecan̈, han̈c'a ya' Pedro, ya' Jacobo b'oj ya' Juan xitoj Comam yin̈. Yet ay b'etu', shelni sb'a yilot Comam yin̈ sat heb'ya'. 3Sajb'inb'on̈e xuluj xil sk'ap, mach hunuj tx'ahwom chu sajn̈en xil k'ape haca' jilni xuluj tu'. 4Xilni heb'ya', ya' Elías b'oj ya' Moisés, lan̈an stzotel b'oj Comam. 5Stzotelcan̈ ya' Pedro, xalni ya' tet Comam: —Mamin, caw sak'al jewej b'eti', co watx'e' oxeb'oj te' pat b'ay chex ehi, hunuj hawet, hunuj yet ya' Moisés, hunujxa yet ya' Elías. 6Mat nanoj yu ya' Pedro xalni ya' hune' tu' haxca caw xiwnaj heb'ya'. 7Ha'tic'a tu' xwaycan̈ hune' asun, xcan heb'ya' xol. Xol asun tu' x'eliloj hune' tzoti', chalni: —Ha' naj ti' hin C'ahol caw xahan ay wuan. Ha' tzet chal naj, ha' cheyab'etoj. 8Lan̈anto tu' xilni heb'ya' shoyanil, matxa heb'ya' cawan̈, schuquilxan̈e Comam Jesús aycan̈ sc'atan̈ heb'ya'. 9Yet xpaxaytij heb'ya' swi' witz tu', xalni Comam: —Mach b'ay cheyalic'oj hune' xeyil ti' to hato chin pitzc'aojcan̈ xol hej camom hayin Ab'ilintij yu Comam Dios xol jet-anmail ti'an, 10Yuxin mach b'ay xalic'oj heb'ya'. Yaja' naun̈e chalni heb'ya', ¿tzet taxca chaliloj hune' spitzc'acan̈ yin̈ camical chal Comam ti'? ẍi heb'ya'. 11Lawitu' x'oc heb'ya' sk'amb'enoj tet Comam: —¿Tzet yuxin chal heb'naj cuywaom yin̈ sley ya' Moisés ta b'ab'el chul ya' Elías sataj naj Cristo?. 12Xta'wi Comam: —Wal tu' caw yeli, b'ab'el xhul ya' Elías tu' yu st'in̈b'ancoj anma, yun̈e snani sb'a sc'ul. Yaja' ¿tzet chalayoj yul Yum Comam Dios win̈ hayin Ab'ilintij yu Comam Dios xol jet-anmail ti'an? Ha' chala to ch'ec'oj ya' wanmaan cat hin yahlaxojan. 13Yaja' ẍwal teyetan ta xax hulc'uj ya' Elías tu', xa'ni anma ec'oj ya' yanma ya' haca' xal sc'ul, haca' yalni Yum Comam Dios. 14Yet xhul Comam Jesús b'oj heb'ya' oxwan̈ b'ay ay hunk'aanxa heb'ya', caw tx'ihal anma hoyancoj yin̈ heb'ya', lan̈an stzotel heb'ya' b'oj hunk'aan heb'naj cuywaom yin̈ sley ya' Moisés. 15Ha' x'ilottoj Comam yu anma, xc'ayiloj sc'ul, xto yin̈ an̈e schanoj Comam, xtiyoẍli tet. 16Sk'amb'en Comam tet heb'ya': —¿Tzet lan̈an he tzoten b'oj heb'naj tu'?. 17Yaja' ay hune' naj xta'wican̈ xol anma tu', xalni naj: —Mamin, xwitij hin c'ahol ti' tawetan. Aycoj hune' yespíritu naj matzwalil yin̈, yuxin machu stzoteli. 18Yet ẍlowcan̈ yet yu naj, sb'ejayoj naj yin̈ tx'otx' cat yeltij hujuy yul sti', cat sn̈etx'ni yeh, cat scawtejiloj. Xwal tet heb'ya' ẍcuywi tawin̈ ti'an ta chiloj heb'ya' yespíritu naj matzwalil tu' yin̈ in c'aholan, yaja' mach xc'oji heb'ya'. 19Xalni Comam: —Hexti' caw macheya' yuluj he c'ul yin̈ Comam Dios. Ayxana ayincoj te xolan. ¿Hantaj to b'in ayincoj te xolan cat stechaojapnoj wuan? Itij ha c'ahol tu' b'eti'. 20Hactu' xu yiottij naj sc'atan̈ Comam. Ha' xilni yespíritu naj matzwalil tu' Comam, xlowcan̈ yab'il yin̈ naj yu, ichi yec' b'alb'on naj sat tx'otx', ẍtit pax hujuy yul sti' naj. 21Sk'amb'en Comam tet smam naj: —¿B'ak'ini x'ichitij naj ha c'ahol ti'? —Yin̈tax sni'antoal naj. 22Tx'ihal el xb'ejottoj naj xol k'a' b'oj yul ha' ha' yu yespíritu naj matzwalil tu' yun̈e scam naj. Yuxin ta chu hawu, tz'a'ojab' ha c'ul jin̈an Mamin, col naj jetan. 23Xalni Comam tet naj mame tu': —¿Tzet yuxin hactu' hawalni ta chu wuan? Suniltic'a tzet chij sb'a tet mactaj cha' yuluj sc'ul yin̈ Comam Dios. 24Yin̈n̈ena tu', xalnican̈ naj mame tu' yin̈ ip: —Ẍwa' yuluj hin c'ulan. A' yip wanmaan haxin̈wal ẍcam wa' yuluj hin c'ulan. 25Ha' xilni Comam to k'a' ch'oc tennoj anma yin̈, xalni tet yespíritu naj matzwalil tu': —Hach yespíritu naj matzwalil suc b'oj chacan̈, hayin ẍwal tawetan, elan̈ yin̈ naj ti', matxa chach oc yin̈ naj. 26X'ah yaw yespíritu naj matzwalil tu', xtit yab'il yin̈ naj tzeh hunecxa, x'elcan yin̈ naj, haca' camom xucaniloj naj. Tx'ihal mac xhalni ta mak'b'il xu scamiloj naj. 27Hactu' xu yoc Comam yin̈ sk'ab' naj, xinican̈ Comam naj, x'ah lin̈noj naj. 28Lawitu' x'octoj Comam yul n̈ah b'oj heb'ya' ẍcuywi yin̈, sk'amb'en heb'ya' tet Comam yin̈xa schuquil: —¿Tzet yuxin mach xcon̈ c'oji jiniloj yespíritu naj matzwalil tu' yin̈ naj tzeh tu'an?. 29Xalni Comam: —Hunmajan hej yespíritu naj matzwalil ti' oraciónn̈e ẍja' tet Comam Dios cat yel yin̈ anma. 30Yet x'el Comam b'etu' x'ec'toj yul xtx'otx'al Galilea, yaja' mach sje Comam ta ay mac ch'ab'eni. 31Haxca aycoj Comam yalni tet heb'ya' ẍcuywi yin̈ tzet chu yocoj yul sk'ab' camical. Xalni Comam: —Hayin Ab'ilintij yu Comam Dios xol jet-anmail ti'an, chin alaxojcoj yul sk'ab' anmaan cat hin potx'laxojan, yaja' yin̈ sca'fial hin caman, chin pitzc'aojcan̈an. 32Yaja' mach xtxum heb'ya' tzet xal Comam tu'. Ẍnanon heb'ya' sk'amb'eni tzet yelapnoj yeyi. 33Lawi yapni Comam Jesús b'oj heb'ya' yul con̈ob' Capernaum, yet ayxactoj Comam b'oj heb'ya' yul n̈ah, sk'amb'en tet heb'ya': —¿Tzet caw che tzote yet ayon̈coj yin̈ b'eh?. 34Yaja' mach xta'wi heb'ya', haxca tzet stzote heb'ya' yul b'eh tu', ha' mac k'a' ay smay xol heb'ya'. 35X'ay tz'on̈noj Comam, xawtencoj Comam heb'ya' cab'lan̈wan̈ sc'atan̈, xalni tet heb'ya': —Ta ay hunuj mac choche ya'acoj sb'a swi'aloj, ayojab' ni'anb'ail cat yoc schejab'oj hunmajanxa yetb'i. 36Lawitu' xinitij Comam hune' ni'an unin, xanicoj xol heb'ya', xalni Comam: 37—Mac ẍchani hunuj ni'an unin ti' haxca wetan, hacojtam hayin chin ẍchaan. Mac chin chanian, mat hayinojn̈e chin schaan, scha pax Comam Dios xquin anitijan. 38Xalni ya' Juan tet Comam Jesús: —Mam cuywaom, ay hune' naj xjilan, chiloj naj yespíritu naj matzwalil yin̈ anma, scan̈il hawe chawte naj yin̈ chuni naj, yaja' xco cach najan, haxca mat jin̈oj ch'ec' naj. 39Xalni Comam: —Mache cach naj, haxca mac ch'awten hin b'ihan yet chuni hune' c'ayb'alc'ule, machmi chu yalni pax tx'oj win̈an. 40Mac mach on̈ pahni yin̈ co munil cha' sb'a jin̈. 41Tzantic'a mac ẍcolwa teyin̈, waxan̈ca hunujn̈e vaso ha' ch'a'ot teyet haxca cheya' yuluj he c'ul win̈an, yilal ya'laxoj spaj tet. 42Yaja' ta ay hex cheya' lectaoj hunuj mac ch'a'ni yuluj sc'ul win̈an, waxan̈ca caw mach yelapnoj ye hune' tu', c'antajex. K'a' c'ulmi ta ẍc'al-laxcoj hune' niman ch'en yin̈ he nuk' cat he b'ejlaxaytoj yich ha' mar. 43- 44Ta ha k'ab' chach a'ni ayc'ayoj, tzoq'uiltoj, haxin̈wal machach yatoj yin̈ mule. Haxca k'a' c'ul tu' ta hunch'an ha k'ab' chach octoj b'ay k'inal mach stan̈b'al, sataj scab'il ha k'ab' aycoj chach to yul infierno b'ay maẍtic'a stan̈ k'a' k'a'. 45- 46Taca hawoj chach a'ni ayc'ayoj, tzoq'uiltoj, haxca k'a' c'ul tu' ta hunch'an hawoj chach octoj b'ay ay k'inal mach stan̈b'al, sataj scab'il hawoj aycoj chach to yul infierno. 47Taca sb'ak' ha sat chach a'ni ayc'ayoj, iltij, haxca k'a' c'ul tu' ta hunch'an sb'ak' ha sat chach oc yul sk'ab' Comam Dios, sataj scab'il sb'ak' ha sat ayictoj chach to yul infierno, 48b'ay maẍtic'a ẍcam no' haha', b'oj maẍtic'a ẍtan̈ k'a' k'a'. 49Haxca haca' yoc atz'am yin̈ hej xahanb'al, hactu' yocoj k'a' k'a' yin̈ sunil anma. 50Atz'am atz'am c'ul atz'am, yaja' ta sc'aytoj atz'am sc'achi'al, ¿b'aytaxca ẍtitcoj sc'achi'al atz'am? Haca' yalaxcoj yatz'amil tzet ẍlolaxi, hactu' cheyutecoj ak'anc'ulal te xol.


Copyright
Learn More

will be added

X\