SAN MARCOS 8

1Yet hunec' tu' tx'ihal anma xyamicoj sc'atan̈ Comam Jesús, mach tzet slo. Yuxin xawte Comam heb'ya' ẍcuywi yin̈, xalni tet heb'ya': 2—Caw stz'a' hin c'ul yin̈ anma ti'an, haxca oxeb'xa tz'ayic ay co c'atan̈, matzet slo yetb'i. 3Ta mach ẍwa'i cat co chejnitoj paxoj, taj xti'b'ay n̈ohchalal yu yul b'eh, haxca ay mac nahat speto. 4—¿Tzet taxca chu ja'ni wa'oj sunil anma ti', haxca b'eti' mach b'ay chon̈ toj jiatij tzet ẍja' slob' anma?. 5—¿Hayeb' ixim pan heyetb'i? ẍi Comam. —Hujeb' ixim. 6Schejni Comam tz'on̈b'anoj sb'a anma sat tx'otx'. Xinic'oj ixim hujeb' pan, xa'ni yuch'antioẍ tet Comam Dios. Xitniayoj ixim, xanic'oj ixim tet heb'ya', x'oc heb'ya' yitxk'anoj ixim tet anma. 7Ay pax hayc'on̈ no' niẍtej cay yetb'i heb'ya', xa'ni pax Comam yuch'antioẍ yu no', xalni Comam ta ch'itxk'alax no' yin̈ anma. 8Sunil mac xwa'i, xnoh yin̈ c'ul. Ha' xlahwi swa' anma, hujeb' to motx ixim scutxican̈. 9Can̈eb' mil heb'naj winaj xwa'i. Lawitu' xtak'li Comam tet anma, 10x'octoj yul hune' te' barco b'oj heb'ya', xtoh yul xtx'otx'al Dalmanuta. 11Lawitu' x'apni hunk'aan heb'naj fariseo teyewal yin̈ Comam Jesús. X'oc heb'naj sk'annoj hunuj c'ayb'alc'ule ẍyeni ta yeli schejab' Comam Dios ye Comam. 12X'ah sc'ul Comam, xalni tet heb'naj: —¿Tzet yuxin che k'an he yila' scan̈il ye Comam Dios? Yin̈ caw yeli ẍwal teyetan, matzet ẍyelaxoj teyet. 13Lawitu' x'el Comam xol heb'naj, x'octoj yul barco b'oj heb'ya' ẍcuywi yin̈, xk'axponic'toj heb'ya' sk'axepal ha' lago. 14Mach xtit yin̈ sc'ul heb'ya' ẍcuywi yin̈ Comam Jesús yinitoj tzet slo yul barco, hunq'uitann̈e ixim pan yetb'i heb'ya'. 15Xalni Comam tet heb'ya': —Ab'ewej hune' ti'. Nann̈e heyu tet yan̈al span heb'naj fariseo b'oj yan̈al span naj Herodes, haxca taj cheyetatoj he b'a yu. 16Yuxin x'oc heb'ya' sk'amb'enoj tet hunun tzet xal Comam: —Tita haxca mach ixim pan jetb'i, yuxin chal ya'. 17Ha' xab'en Comam tzet chal heb'ya', xalni Comam: —¿Tzet yuxin hactu' heyalni, ta yu mat heyetb'ioj ixim pan yuxin ẍwal hune' ti'an? ¿Tox machex c'oji he txumni? Maẍto cheyohtajn̈eloj. ¿Tom cawto heyanma? 18- 19Ay sb'ak' he sat yaja' macheyila, ay he txiquin yaja' macheyab'e. ¿Mach ẍtit yin̈ he c'ul yet xwitxk'an ixim howeb' pan yin̈ howeb' mil anmaan? ¿hayeb'to motx ixim xe cutxb'acoj? —Cab'lan̈eb' motx ixim, 20—B'oj yet xwitxk'an ixim hujeb' pan yin̈ can̈eb' mil anmaan, ¿hayeb' motx nohnaj xe cutxb'acoj? —Hujeb' to motx ixim. 21—Maẍtoc'a che txumcuj, ẍi Comam tet heb'ya'. 22Lawitu' x'apni Comam Jesús b'oj heb'ya' yul con̈ob' Betsaida. Xinitoj heb'naj ay b'etu' hune' naj machu yilni, sk'anni heb'naj tet Comam ta chacoj sk'ab' yin̈ naj. 23X'oc Comam yin̈ sk'ab' naj, xiniloj Comam naj xtxam n̈ah. Xanicoj Comam stzub' yin̈ sb'ak' sat naj, xanicoj sk'ab' yin̈ swi' naj. Sk'amb'en Comam ta xa yil naj. 24Shajnitoj naj sat, xalni naj: —Xa wil yec' anmaan, yaja' haca' te' te' yec' ẍwilan. 25Ha' xanicoj Comam sk'ab' yin̈ sb'ak' sat naj hunecxa, xcam watx'iloj yilni naj. Hab'anxa yilni naj sunil hej tzetet. 26Lawitu' xchejotoj naj yatut yu Comam, xalni tet naj: —Taj cach ec' ha yeb' ha b'a yul con̈ob', ẍi Comam tet naj. 27Lawitu', xto Comam Jesús b'oj heb'ya' ẍcuywi yin̈ b'et hunk'aan wayan̈b'al aycoj yul xtx'otx'al Cesarea Filipos. Yet aycoj heb'ya' yin̈ b'eh, sk'amb'en Comam tet heb'ya': —¿Tzet chute anma yalni win̈an?. 28Xalni heb'ya': —Ay mac ẍhalni ta Juan Bautista hach. Ay mac ẍhalni ta hachti' Elías. Ay mac ẍhalni ta hunujxa heb'ya' schejab'lom Comam Dios haweyi. 29—Haca' hex, ¿mac hin heyalnian? Xta'wi ya' Pedro: —Hachti' Cristo hach, hune' mac echmab'il juan. 30Lawitu' xalni Comam ta mach b'ay chalic'oj heb'ya'. 31Lawitu' x'ichi Comam Jesús yalni tet heb'ya' ẍcuywi yin̈: —Hayin Ab'ilintij yu Comam Dios xol jet-anmail ti'an, yilal yec'oj ya' wanmaan. Caw chin cajlaxoj yu heb'naj swi'con̈ob'an, b'oj yu heb'naj swi'al yin̈ heb'naj sacerdote, b'oj heb'naj cuywaom yin̈ sley ya' Moisés. Lawitu' chin potx'laxojan, yaja' yin̈ sca'fial chin pitzc'aojcan̈an. 32Caw hab'an xu yalni Comam hunk'aan ti'. Yaja' x'iottoj Comam schuquil yu ya' Pedro, x'oc ya' scachnoj Comam yu hune' xal tu'. 33Xmeltzo t'an̈na Comam yin̈ heb'ya' yak'b'il, x'oc Comam smaynoj ya' Pedro, xalni tet ya': —Hach Matzwalil, hitzan̈iloj yin̈ hin satan, haxca hachti' mataj tzet nab'il yu Comam Dios ha' nab'il hawu, to ha' snab'al anma ib'il hawu. 34Lawitu' xawten Comam heb'ya' b'oj sunil anma, xalni Comam: —Ta ay hunuj mac choche ch'occan tzujnuj win̈an ya'ab'can b'aytet choche yub' cat yec' yi'noj tzet ẍwuan, waxan̈ca cha'a' camoj sb'a yin̈ culus. 35Haxca mac ay yala' ẍcolchacan sk'inal, sc'aya'toj sk'inal mach stan̈b'al. Wal mac hinan scam win̈an, b'oj yin̈ stzoti' yet colb'anil, schab' sk'inal mach stan̈b'al. 36¿Tzet taxca cha'a hune' satyib'an̈k'inal ti' jet ta ẍjoche ch'occan sunil jetoj, ẍco c'aynitoj co k'inal mach stan̈b'al? 37¿Tox ay tzet chu ja'noj seleloj co k'inal ẍco c'aytoj tu'? ¡Matzet! 38Mac xtx'ixwi yoc tzujnuj win̈an b'oj yin̈ hin cuywab'al yin̈ sat hunk'aan anma caw matzwalil ti'an b'oj mach Dios sat, haquinan hayin Ab'ilintij yu Comam Dios xol jet-anmail ti'an, chin tx'ixwoj walnoj anma tu' wetb'iojan yet chin huluj yin̈ scan̈il ye hin Maman, b'oj tzujan pax yángel sic'leb'ilxa yu win̈an.


Copyright
Learn More

will be added

X\