SAN MARCOS 7

1Yet hunec x'oc hoynoj heb'naj fariseo b'oj heb'naj cuywaom yin̈ sley ya' Moisés yin̈ Comam Jesús, speto heb'naj Jerusalén. 2Ha' xilni heb'naj to ay heb'ya' ẍcuywi yin̈ Comam mach xtx'ah sk'ab' yet ch'oc wa'oj haca' syijyeb'anil sley ichmame, x'oc heb'naj steyenoj Comam. 3Haxca heb'naj fariseo tu' b'oj sunil anma israel, caw ch'ec' yi'a' tzet yeb'ilcan yu yichmam, yuxin ta mach xtx'ah sk'ab', mach ẍwa'i. 4Yet ẍmeltzo sb'ey txon̈b'al, mach ẍwa'i ta mach tx'ah sk'ab' b'ab'el. Tx'ihal to tzet syijye anma tu', haca' ẍtx'ahlax vaso, ẍalu b'oj xih ch'en, caw walaj xtx'ahlaxi cat to yoc yu. 5Yuxin sk'amb'e heb'naj tet Comam: —¿Tzet yuxin mach syijye heb'naj ẍcuywi tawin̈ ti' haca' yalni sley heb'ya' jichmam? Haxca mach xtx'ah heb'naj sk'ab' yet ẍwa'i. 6Xta'wi Comam: —T'in̈an yecoj ya' Isaías schejab'lom Comam Dios yet stz'ib'n̈encan ya' ta hexti' he ti'n̈e aya, chalni:Hunk'aan anma ti' sti'n̈e ẍhalni ta chacoj hin mayan, yaja' mat ayinoj chin ec' yin̈ sc'ulan. 7Nab'an̈e chala ta chin shak'ean, yaja' schejb'aniln̈e anma scuyu', mataj hin chejb'anil scuyan, ẍiayoj. 8- 9¡Tzet he sak'al! Che nahuln̈etoj sley Comam Dios che xiquiltajn̈en heyijyen scuywab'al payat ichmame. Haxca yet-xa payat ichmame che cuyu, cheyaniltoj yet Comam Dios yin̈tajiloj. 10Stz'ib'n̈ecan ya' Moisés, chalni: Xahan cheyil he mam he mi'. Ha' mac ẍhalni tx'oj yin̈ smam smi' mak'b'il scami, ẍiayoj. 11Yaja' hexti', cheyala ta chu yalni hune' anma tet smam smi': Machu hin colwa teyin̈an, haxca wal tzet ayin ti'an, yet-xa Comam Dios ye wuan, ta ẍi, 12cheyala ta matxa yilaloj ẍcolwa yin̈ smam smi'. 13Hactu' chu he yin̈tajn̈encan sley Comam Dios, chex ec' heyi'noj scuywab'al payat ichmame, yaja' matn̈etaj tu', to tx'ihalto tzetet haca' hune' ti' cheyu. 14Xawten pax Comam anma hunecxa, xalni yin̈ hacti': —Txumwejiloj tzet ẍwala' ti'an. 15- 16Tzantzet ch'octoj yul co ti', machon̈ yacoj tx'ojal yul sat Comam Dios. Han̈c'a b'aytet tx'oj ẍtit yin̈ janma, ha' chon̈ anicoj tx'ojal yul sat Comam. 17Lawitu' x'el Comam xol heb'naj, x'octoj Comam yul n̈ah b'oj heb'ya' ẍcuywi yin̈, sk'amb'en heb'ya' tet: —¿Tzet yelapnoj ye hune' cuywab'al xawal ti'?. 18Xalni Comam: —¿Ta chaltu' hex hun mache txum tzet ẍwal ti'an? Mach he txumu ta tzet ch'octoj yul co ti' machon̈ yacoj tx'ojal yul sat Comam Dios. 19Haxca mat yin̈oj janma ch'apni, yuln̈e co c'ul ch'eq'ui, cat sto yul txulub'al. (Ha' yelapnoj ye hune' ti', sunil tzet c'ul co loni, machon̈ yacoj tx'ojal yul sat Comam Dios.) 20Xalni pax Comam tet heb'ya': —Tzet ẍtit yin̈ janma, ha' chon̈ anicoj tx'ojal yul sat Comam Dios. 21Haxca hat ẍpitzc'atij xtx'ojal yin̈ yanma anma: Mac tx'oj ch'ec' yin̈ snab'al, mac ch'ixli, mac sayni swinaj, mac ch'elk'ani, mac ẍpotx'wayi, 22mac mohyinaj cat sayni hunxa mac yin̈, mac ch'ochentoj tzet mat yetoj, mac tx'ojaln̈e chu, mac etaln̈e chu, mac squistaliln̈e chu, mac ẍchiwacoj sc'ul yin̈ yetb'i, mac hob'om tzoti', mac caw lolo', b'oj mac halom yajla ab'ix. 23Sunil hunk'aan xtx'ojal tu', yin̈ yanma anma ẍtita, ha' ch'anicoj anma tx'ojal yul sat Comam Dios. 24Lawitu' xto Comam Jesús yul scuenta Tiro. Yet x'apni, x'octoj yul hune' te' n̈ah. Mach sje sc'ul Comam ta chab'eloj anma, yaja' masan x'ab'chayi ta x'apni b'etu'. 25Lemb'il xab'e hune' ix ay hune' ni'an yunin aycoj hune' yespíritu naj matzwalil yin̈, xto ix, x'ay jahnoj ix yin̈ sat Comam. 26Mat israeloj ix, to sirofenicia ix. Sk'anni ix tet Comam ta chiloj Comam hune' yespíritu naj matzwalil tu' yin̈ ni'an yunin ix. 27Xta'wi Comam tet ix, xalni: —Wa'ojab'can uninale b'ab'el, haxca mach yetoj aya ta ẍjiloj tzet slo uninale cat ja'ni tet metx niẍtej tx'i'. 28Xalni ix: —Yeli Mamin, yaja' metx niẍtej tx'i' tu' ẍtic'a slocan̈ metx sk'al sti' uninale ch'ay yalan̈ meẍa yet ẍwa'I. 29Hactu' xu yalni Comam: —Yel haca' hawalni ti', yuxin sje ha paxtoj, xax el yespíritu naj matzwalil yin̈ hawunin tu'. 30Yet x'apni ix yatut, xilni ix ta toxan̈e hilan ix ni'an sat tx'at, xax el yespíritu naj matzwalil tu' yin̈ ix. 31Lawitu' x'el Comam Jesús b'et xtx'otx'al Tiro, x'ec'toj yul xtx'otx'al Sidón b'oj hej con̈ob' aycoj yul xtx'otx'al Decápolis, x'apni sti' ha' lago Galilea. 32Lan̈anto yapni Comam, x'iottoj hune' naj chacan̈ b'oj ẍwa'won stzoteli tet Comam, ta chacoj sk'ab' yin̈ swi' naj. 33Xiniloj Comam naj xol anma, xanictoj Comam yiẍimal sk'ab' yul xtxiquin naj, xanicoj Comam stzub' yin̈ sat yak' naj. 34Lawitu' xt'an̈xican̈ Comam, x'ah sc'ul xalni: —Efata. Ha' chaliloj: Hajloojab'i. 35Hatic'a tu' xhajlo xtxiquin naj b'oj sholnitoj sb'a tzet c'aln̈eay yak' naj, yuxin xwatx'iloj stzotel naj. 36Lawitu' scachni Comam anma ta mach b'ay chalic'oj hune' tu'. Yaja' yet scachwa Comam, k'a' ẍto niman anma spujb'anc'oj. 37Caw xc'ay sc'ul anma chalni: —Hantaj tzet chu Comam, c'ul ch'elicoj. Xhajlo xtxiquin anma chacan̈, xa hu stzotel mac maẍtic'a stzoteli.


Copyright
Learn More

will be added

X\