SAN MARCOS 6

1Lawitu' x'el Comam Jesús Capernaum, xto yul scon̈ob' b'oj heb'ya' ẍcuywi yin̈. 2Yin̈ tz'ayic xewb'al, x'oc Comam scuynuj anma yul capiya. Tx'ihal mac yamanc'oj, ha' xab'en tzet xal Comam, xc'ayiloj sc'ul, xalni heb'jetb'i: —¿B'ay xb'ey naj ti' scuyu' sunil tzet chalti'? ¿B'ay xb'ey naj yi'a'tij stz'ajanil sc'ul b'oj c'ayb'alc'ule chuti'? 3¿Tox mataj naj ti' hosomte', yunin ix María, yuẍtaj sb'a naj b'oj naj Jacobo, naj José, naj Judas b'oj naj Simón? B'oj ayc'oj heb'ix yanab' naj co xol ti', ẍi heb'jetb'i. Mach sje sc'ul heb'jetb'i schab' tzet xal Comam. 4Yuxin xal Comam tet heb'jetb'i: —Sunil b'ay ch'aotcoj smay schejab'lom Comam Dios, han̈c'a yul scon̈ob' mach spixan yul sat anma b'oj mac ayto yu sb'a b'oj. 5Mat tx'ihaloj c'ayb'alc'ule xa' Comam b'etu', haywan̈n̈e yawub' xacoj Comam sk'ab' yib'an̈ xwatx'i. 6Xc'ay sc'ul Comam haxca mach cha' anma yuluj sc'ul yin̈.Lawitu' xto Comam Jesús scuyu' anma yul hej wayan̈b'al aycoj shoyanil scon̈ob' tu'. 7Xawten Comam heb'ya' cab'lan̈wan̈, catajwan̈ xu yanitoj Comam heb'ya' yul hunun con̈ob'. Xa'ni Comam scan̈il ye heb'ya' yiniloj hej yespíritu naj matzwalil yin̈ anma. 8Yaja' yalan̈to maẍto ẍto heb'ya', xalni Comam: —Mach he tz'ispa cheyitoj, ni heyoch ni he melyu. Han̈c'a he c'ojoch, 9b'oj he xan̈ab' cheyi'a'. Mach he helb'al cheyitoj. 10Yet chex apni yul hunun con̈ob' hune'n̈e n̈ahil b'ay chex ehi masanto chex meltzoyi. 11Ta ay b'ay machex chalax yu anma, machca chab'etoj tzet cheyala, pan̈wejiloj spojojal hune' con̈ob' tu' yin̈ heyoj, syeb'aniloj to xax heyiloj heyijatz heyalni tet anma tu'. Lawitu' cat he to b'et hunujxa con̈ob'. 12Xto heb'ya', yalac'oj tet anma ta sb'ejcan sayni smul. 13Tx'ihal anma xiloj heb'ya' yespíritu naj matzwalil yin̈, tx'ihal pax mac tx'oj ye sc'ul, aceite sucuj heb'ya' yin̈, xwatx'i. 14Yet hunec tu' xab'e naj rey Herodes tzet stzote anma yin̈ Comam Jesús, haxca ay smay stzoten anma Comam. Ay mac chalni: —Walti', naj Juan Bautista xpitzc'acan̈, yuxin k'a' ayxa smay naj yuni tzet ẍjab'e ti'. 15Ay mac ẍhalni ta ya' Elías. Ay mac ẍhalnipaxoj ta schejab'lom Comam Dios ye Comam, haca' heb'ya' x'ec'le yet payxa. 16Ha' xab'en naj Herodes hune' tu', xalni naj: —Ham naj Juan Bautista xin chej elojtoj swi'an, ham naj xpitzc'acan̈ xol camom. 17- 19Ha' ti' stzoteb'anil tzet yuxin xcam ya' Juan. To yu ix Herodías yixal naj Felipe yuẍtaj naj Herodes tu'. Yet xochencoj naj Herodes tu' ix, xi'ni naj ix yixaloj. Ha' xab'en ya' Juan hune' tu', tx'ihal el xb'ey ya' scacha' naj, chalni ya': —Mat sleyaloj hawiniloj yixal hawuẍtaj. Hactu' xu yoc showal ix Herodías tu' yin̈ ya' Juan. Xa'ni ix sc'uluj naj Herodes, yuxin xmaji ya' yul presu. Ay yala' ix, mak'b'il xu scam ya', yaja' mach ẍc'oji ix, haxca aycoj stan̈eomal ya' yu naj Herodes tu'. 20Haxca yohtaj naj ta tohol syijyen ya' stzoti' Comam Dios, yuxin xiw naj tet ya'. Yet stzotel ya', waxan̈ca ya' ch'oc chab'e naj, yaja' ẍtic'a sk'an naj yab'e' tzet chal ya'. 21Ha' x'apni stz'ayical yec'tzen naj b'ay xpitzc'ayi, xawten naj heb'naj nimej chejab' wa'oj sc'atan̈, b'oj heb'naj swi'al yin̈ heb'naj soldado b'oj heb'naj swi'con̈ob' ay Galilea. Ha' hune' tu' x'oc stz'ab'ob'aloj ix Herodías tzet chu spotx'lax ya' Juan. 22- 23Ha' x'octoj ix yunin ix can̈alwoj yin̈ sat naj Herodes tu', b'oj yin̈ sat mactaj awteb'il yu, caw xoche naj yila' b'oj yetb'i tu' tzet xu scan̈alwi ix, yuxin xal naj tet ix: —Tzantzet cha k'an wetan, ẍwa'aan, waxan̈ca yictajoj tzet aycoj yul hin k'ab' ti'an, ẍwa'a tawetan, Hactu' xu sta'wen naj ya'ni tzet sk'an ix. 24Yuxin xto ix sk'amb'e' tet smi': —¿Tzettaxca chin k'anan? . Xta'wi smi' ix tet: —Ha' swi' naj Juan Bautista cha k'ana. 25Lemb'iln̈e x'ocnatoj ix b'ay ay naj Herodes tu', xalni ix: —Yin̈n̈ena tinan̈ chawa' swi' naj Juan Bautista yul hunuj pulato wetan. 26Ha' xab'en naj hune' tu', x'oc b'isc'ulal yu naj. Yaja' matxa chu shec'ni naj stzoti' haxca xta'we naj yin̈ sat Comam Dios yin̈ sat sunil anma yamanc'oj tu'. 27- 28Lawitu' xanitoj naj hune' naj soldado yi'a'iltoj swi' ya' Juan b'ay majan yul presu. Xto naj, xiniltoj naj swi' ya', xaniatoj naj yul hune' pulato, xa'ni naj tet ix. Lawitu' xto ix ya'noj tet smi'. 29Ha' xab'en heb'ya' ẍcuywi yin̈ ya' Juan tu' to xcam ya', xb'ey heb'ya' sk'annoj snimanil ya', xto heb'ya' smujnuj. 30Ha' yet xmeltzo heb'ya' ẍcuywi yin̈ Comam Jesús sc'atan̈, x'oc heb'ya' yalnoj tzet xb'ey yub' b'oj tzet xb'ey scuyu' tet anma. 31Lawi' yab'en Comam, xalni tet heb'ya': —Ton̈wej ninoj xewoj b'ay mach anma. Haxca caw ay anma hoyancoj yin̈ Comam, ay ẍpaxtoj, ay chulcanoj, hasta matxa shamanil Comam swa' b'oj heb'ya'. 32Yuxin x'oc Comam yul hune' te' barco b'oj heb'ya', xto b'ay mach anma. 33Yaja' x'ilot sto Comam b'oj heb'ya', tx'ihal mac xtxumni b'ay ch'apnoj Comam. Yuxin yel sc'ul anma tu' xto yu yoj sti'laj ha', x'ec' yi'noj anma ay yulaj con̈ob' ay shoyanil ha' lago tu', yuxin hat-xa ay anma b'etu' yet x'apni Comam. 34Ha' x'eltij Comam yul barco, xilni to tx'ihal anma tenantoj, yuxin stz'a'can̈ sc'ul Comam yin̈, haxca lahan b'oj no' canelu mach stan̈eomal yet. Hactu' xu yoc pax Comam scuynuj, caw hunay to xa' Comam scuyni. 35Ha' xilni heb'ya' ẍcuywi yin̈ Comam to k'ejb'ixa, xhitzicoj heb'ya' sc'atan̈ Comam, xalni heb'ya': —Lan̈an sto tz'ayic, mach anma b'eti'. 36K'a' c'ul mi ta cha chejtoj anma ti' b'aytaj ay te' n̈ah, maca yulaj wayan̈b'al ay co hoyanil ti', cat slok'ni tzet slo. 37Xta'wi Comam: —Hex cheya' wa'oj anma ti'. Xalni pax heb'ya' tet Comam: —¿Tom chon̈ to co lok'o' cab'oj ciento denario ixim panan, cat ja'ni wa'oj anma ti'an? . 38—Ilwej hayeb' ixim pan heyetb'i, ẍi Comam tet heb'ya'.Ha' xilni heb'ya', xalni heb'ya': —Howeb'n̈e ixim b'oj cac'on̈ no' cay ẍchalo juan. 39Lawitu', xchejni Comam ayoj tz'on̈noj anma yin̈ stan̈quiẍtajil sat chak'an̈. 40Yuxin x'ay tz'on̈noj anma yin̈ cientaj b'oj yin̈ cincuentataj. 41Lawitu' xinican̈ Comam ixim pan b'oj no' cay tu', xt'an̈xican̈ Comam, xa'ni yuch'antioẍ tet Comam Dios. X'oc Comam xitnojay ixim, xa'ni tet heb'ya' ẍcuywi yin̈, x'oc heb'ya' yitxk'anoj ixim tet anma. Hactu' xu yitxk'an pax heb'ya' no' cac'on̈ cay. 42Sunil anma caw xnoh sc'ul. 43Ha' xlahwi anma swa'i, x'oc heb'ya' scutxb'anojc'oj ixim pan b'oj no' cay, cab'lan̈eb' to motx xilsb'a ixim xto cani. 44Howeb' mil heb'naj xwa' yu Comam yet hunec tu'. 45Lawitu' xalni Comam Jesús tet heb'ya' ẍcuywi yin̈ ta ch'octoj heb'ya' yul te' barco cat sb'ab'itoj heb'ya' yul con̈ob' Betsaida. Wal Comam, xto can tak'loj tet anma. 46Lawi stak'licanoj, xto ya'noj yoración tet Comam Dios yichlaj witz. 47C'uxan ayxacoj sbarco heb'ya' yictajb'al ha' lago yet x'ay numnayi. Wal Comam aytocan sti' ha' schuquil. 48Xilnitoj Comam to siquiloj heb'ya' smak'ni ha' haxca caw ay yip stit cak'e' yul sb'eh heb'ya'. Lan̈anxa caw sajb'ojiloj x'apni Comam scawilal heb'ya', b'elwoj chu yib'an̈ ha'. B'eh yec'toj Comam yalni. 49Yaja' ha' xilni heb'ya', to ẍb'elwi hune' tu' yib'an̈ ha', x'ec' yin̈ snab'al heb'ya' ta spixan camom, yuxin x'awican̈ heb'ya' yin̈ ip. 50Sunil heb'ya' x'ilni hune' tu', caw xiw heb'ya', yaja' xal Comam tet heb'ya': —Machex nanoni, hayinan. Machex xiwi, . 51Ha' x'ahtoj Comam yul te' barco xtuquinacan cak'e', k'a' xto cam oc c'ayc'ulal yin̈ heb'ya' yilni. 52Waxan̈ca xil heb'ya' tzet xute Comam yanicoj spixan ixim howeb' pan, yaja' maẍto xtxum heb'ya' tzet yelapnoj ye Comam, haxca cawto yanma heb'ya'. 53Ha' xk'axpon Comam b'oj heb'ya' yul ha' lago, x'apni yul con̈ob' Genesaret, xecb'an heb'ya' sbarco sti' ha' tu'. 54Man̈e eltij Comam b'oj heb'ya' yul te' barco xilni anma to ha' Comam. 55Hactu' xu sto anma spujb'anojc'oj sunil b'aytu'alic'oj, yuxin xitoj anma syawub' sat b'atxb'al b'ayn̈etic'a chab'e' ta ay Comam. 56Sunil b'ay x'ec' Comam, yulaj wayan̈b'al, yulaj con̈ob', b'oj b'ay pujantoj yatut anma, xitoj anma syawub' yulaj calle. Sk'anni heb'jetb'i tet Comam ta stzab' anma tx'oj ye sc'ul tu' Comam, waxan̈ca sti'n̈e xil sk'ap Comam stzab'laxi. Sunil mac stzab'ni sti' xil sk'ap Comam tu', ch'an̈chacanoj.


Copyright
Learn More

will be added

X\