1 Lahwi tu' yel Comam Jesús yul con̈ob Capernaum, yapni Comam yul iscon̈ob, ha' ton xin Nazaret; tzujanpaxo xin ebnaj iscuywom Comam yintaj. 2 Haxa yin̈ istz'ayical xewilal, yoc Comam iscuyno anma yul capilla. Hayet yaben anma iscuywa Comam caw c'ayilo isc'ul, yalni anma tu' haca' ti': —¿Baytu'wal bey naj ti' iscuyu huntek'an ti'? ¿Baytu'wal chiti naj ishelanil yeb yip iswatx'en huntek'an c'aybalc'ule chisye ti'? 3 ¿Tom maẍtaj naj ti' naj hutx'um te', naj yunin ix María? yeb ¿tom mach yuẍtajo isba naj yeb naj Jacobo, naj José yeb naj Judas, yeb naj Simón? ¿Tom xin maẍtaj coxol ti' aypaxo yanab naj? ẍi ebnaj. Yu hune' tu' yuxin mach isje ebnaj yabe' yin̈ tzet chal Comam. 4 Yalni Comam tet ebnaj: —Sunil ischejab Comam Dios yul hunuxa nan con̈obal caw xahan chiillaxi, wal yul iscon̈ob xin mach xahano chiillax yu yet con̈ob, yeb yu mac ayto yu isba yebi yeb yu ej yuẍtaj, ẍi Comam. 5 Mach tx'i'alo c'aybalc'ule isye Comam bey tu', cachann̈e haywan̈n̈e mac ya'ay bay yayo Comam isk'ab, iscawxiloj. 6 Caw xin c'ay isc'ul Comam yuto huntek'an anma ay bey tu' mach yayto yul yanma yin̈ Comam. Lahwi tu' xin, isto Comam Jesús iscuyno anma yin̈ Istzoti' Comam Dios yulaj con̈ob ayco yin̈ ishoyanil tu'. 7 Yawten Comam ebnaj cablahon̈wan̈ iscuywom yanito Comam ebnaj yin̈ catawan̈. Yak'ni Comam yip ebnaj yinilo ischejab naj matzwalil yin̈ anma. 8 Yet yalan̈to maẍto chito ebnaj tu', yalnicano Comam ischejbanil ebnaj haca' ti': —Matzet cheyito yin̈ hebel, mach cheyito hetz'ispa yeb tzet chelo, yebpaxo hemelyu. Wal xin han̈c'an̈e hek'ojoch cheyitoj, 9 yeb han̈e hexan̈ab ayco yin̈ heyoj ha'n̈ech'an cheyitoj, machi xin cheyipaxto hehelbal. 10 Hayet chexapni yul hunun con̈ob, ha' te' n̈a bay chek'an bay chexwayi, han̈e bey tu' chexapni wayoj masanta yet chexmeltzohi. 11 Yaja' tato ay hunu con̈ob bay mach chexchahlax yu anma yeb mach choche yabe tzet cheyala, chexel yul hune' con̈ob tu', cat hetzicnicanilo ispojojal iscon̈ob anma tu' yin̈ heyoj, yun̈e heyeniloj tato matxa heyoc yin̈ huntek'an anma tu', ẍi Comam. 12 Lahwi tu' xin, isto ebnaj iscuywom Comam tu' yalno tet anma ta chisbejcano iswatx'en istx'ojal, cat yanico isba yul isk'ab Comam Dios. 13 Caw xin tx'i'al mac bay yilo ebnaj ischejab naj matzwalil, tx'i'al mac ya'ay ismasico ebnaj aceite yin̈, iscawxicanocan̈. 14 Yabelo naj rey Herodes isk'umal Comam Jesús yuto sunilxan̈e bay c'ul istzotel anma yin̈ Comam. Yalni naj Herodes haca' ti': —Ha' hune' naj tu', ha' ton naj Juan anican̈ ha' iswi' anma xaitzitzbican̈, yuxin ay yip naj iswatx'en c'aybalc'ule, ẍi naj. 15 Aypaxo mac chalni: —Etzan̈em naj Elías hune' tu', ẍi. Aypaxo mac chalni: —Hune' naj tu' ischejab Comam Dios ye naj, haca' ebnaj ec'lena yet payat, ẍi anma. 16 Hayet yaben naj rey Herodes hune' tu' xin, yalni naj: —Ha' hune' naj tu' ha' ton naj Juan anican̈ ha' iswi' anma xaitzitzbican̈, naj inchejan eloto iswi', ẍi naj. 17 Yuto yu ix Herodías, yuxin ischej naj Herodes tzablaxoyo naj Juan, isc'albalax naj yu ch'en cadena, yalaxicto naj yul preso. Ix Herodías tu', yixal yuẍta naj rey Herodes ye ix, ha' ton naj Felipe. Yaja' yik'can̈ naj rey Herodes tu' yixal yuẍtaj. 18 Yu hune' tu', yuxin cachwa naj Juan yin̈ naj Herodes haca' ti': “Mach c'ulo hawik'ni yixal hawuẍtaj,” ẍi naj. 19 Hayet yaben ix Herodías hune' tu', caw oc ishowal ix yin̈ naj Juan, yuxin yoche ix ispotx'o naj, yaja' machi yu yu ix, yuto ayco istan̈emal naj yu naj Herodes yu chixiw naj yin̈ naj. 20 Wal naj Herodes caw yohta naj tato caw tohol isbeybal naj Juan tu', yeb ta machi nino istx'ojal yin̈ naj. Hayet chitzotel naj Juan tu' caw chabe naj Herodes yin̈ tzet chal naj, yaja' mach chitxumcha yu naj yin̈ tzet wal yuten isba. 21 Yaja' yet hunel xin yec'tze naj Herodes hune' k'in̈ yuto tz'ajna naj yin̈ ishabilal, yawten naj ebnaj nimeta winaj chimunla yinta wa'o yin̈ hune' k'in̈ tu'. Yawtenpaxo naj ebnaj yahawil yin̈ ebnaj soldado yeb ebnaj iswi'ehal yin̈ con̈ob Galilea. Ha' tu' xin apni istz'ayical bay chu iswatx'en ix Herodías istx'ojal yin̈ naj Juan. 22 Ix yunin ix Herodías tu', octo ix can̈alwo yin̈ hune' k'in̈ tu', caw xin c'ul yu iscan̈alwi ix yin̈ sat naj Herodes yeb yin̈ sat ebnaj ayco wa'o isc'atan̈ naj Herodes tu', yuxin yal naj tet ix: —K'an tzet chawoche wetan chiwak'an tawet. 23 Caw chiwalan yabe Comam Dios tato chiwak'an tzet chak'ana, waxan̈ca yicta tzet ayco yul ink'aban, ẍi naj. 24 Hayet yaben ix hune' tu', yelto ix, isto ix isk'ambeno tet ismi': —¿Tzettaxca chink'anan mi'? ẍi ix. Yalni ix Herodías tet yunin tu': Ha' iswi' naj Juan anican̈ ha' iswi' anma chak'ana, ẍi ix. 25 Isto ix yin̈ an̈e isc'atan̈ naj Herodes tu', yalni ix: —Tinan̈ chiwochehan chawak' iswi' naj Juan yul hunu plato wetan, naj anican̈ ha' iswi' anma, ẍi ix. 26 Hayet yaben naj rey Herodes hune' tu' caw bisc'ulal elico isc'ul naj, yaja' matxa yu isman̈c'on naj yuto yal naj yin̈ sat ebnaj cutxanico tu' ta chak' naj tzijxan̈e tzet chisk'an ix. 27 - 28 Ischejni naj hune' naj soldado yik'alo iswi' naj Juan. Isto naj soldado tu' yinolo iswi' naj Juan yul preso, yinito naj yul hune' plato, yak'ni naj tet ix k'opo tu'. Lahwi tu' xin isto ix yak'no tet ismi'. 29 Hayet yaben ebnaj iscuywom naj Juan hune' tu', yul ebnaj isk'anno isnimanil naj, isto ebnaj ismujnocanoj. 30 Hayet ismeltzoto ebnaj ischejab Comam Jesús isc'atan̈, yichico ebnaj yalni tet Comam yin̈ tzet iswatx'e yeb yin̈ tzet bey ebnaj yak'a' iscuyu' anma. 31 Lahwi tu' xin yalni Comam tet ebnaj: —Ton̈we xewo bay machi anma chieq'ui, ẍi Comam. Yal Comam haca' tu' yutoxan̈e chitenxi anma yin̈ Comam, ay anma chitohi, aypaxo anma chihuli. Matxatic'a xin ishamanil Comam iswa' yeb ebnaj iscuywom yu anma tu'. 32 Yuxinto octo Comam yeb ebnaj ischejab yul hune' te' barco, isto Comam bay machi anma chieq'ui. 33 Yaja' tx'i'al mac ilni isto Comam yeb ebnaj, istxumnilo anma bay chiapni Comam, yuxin sunil anma ay yul huntek'an con̈ob ayayo isti' ha' tu', to yu yoj bay chiapni Comam. Babel xin apni anma tu' sata Comam yuxin hayet yapni Comam wejanxato anma yechmani. 34 Hayet yelti Comam yul te' barco tu', yilni Comam anma tenanayo tu', istz'aycan̈ isc'ul Comam yin̈ anma yuto lahan anma tu' haca' no' me' machi mac chitan̈eni. Hac tu' yu yocpaxo Comam yalni tx'i'al cuybanile tet anma. 35 Haxa yin̈ k'ejbiyal xin ishitzico ebnaj iscuywom Comam isc'atan̈, yalni ebnaj xin: —Mamin, caw k'ejbixa lah, machi xin te' n̈a bay ayon̈ ti'; 36 estam chachejto anma bay ayej te' n̈a, maca yulaj aldea ayco cohoyanil ti' cat islok'ni tzet chislo, ẍi ebnaj. 37 Yalni Comam tet ebnaj: —Ak'we tzet chislo anma hex ti, ẍi Comam. Istak'wi ebnaj tet Comam: —¿Tom chon̈tohan̈ colok'ohan̈ cab ciento denario ixim pan chiswah anma ti' chal tu'? ẍi ebnaj. 38 Yalni Comam tet ebnaj: —¿Hayeb ixim pan ay texol? Ilwej hayeb ixim, ẍi Comam. Hayet yilni ebnaj, yalni ebnaj tet Comam: —Mamin, howebn̈e ixim yeb cac'on̈ no' niẍte cay, ẍi ebnaj. 39 Yalni Comam tet anma tato chiay tz'on̈no sat chek'an tu' yin̈ hunta majan. 40 Yuxin ay tz'on̈no anma yin̈ cincuenta yeb cien yin̈ hunun majan. 41 Lahwi tu' xin yinican̈ Comam ixim howeb pan yeb no' cac'on̈ cay, ist'an̈xican̈ Comam satcan̈, isk'anni Comam isc'ulal Comam Dios yiban̈ tzet chilolax tu'. Lahwi tu' yoc Comam isk'axponoyo ixim pan, yak'ni Comam ixim tet ebnaj iscuywom, yoc ebnaj yitxk'anoto ixim yin̈ anma; yitxk'anpaxto ebnaj no' cac'on̈ cay yin̈ anma. 42 Sunil anma wa'i hantatic'a caw yoche isc'ul. 43 Hayet lahwi iswa'canilo sunil anma tu', yoc ebnaj iscuywom Comam iscutxbanocan̈ ixim pan yeb no' cay matxa lahwi yu anma; caw xin cablahon̈ebto motx nohcan̈. 44 Howeb mil ebnaj wa' yu Comam bey tu'. 45 Lahwi tu' ischejnito Comam Jesús ebnaj iscuywom yul te' barco, yun̈e isbabito ebnaj sata Comam bey con̈ob Betsaida isk'axepic'to ha' lago tu', wal Comam xin cancano tak'lo tet anma. 46 Lahwi tu' isto Comam yin̈ isc'ul hune' won̈an yu istxahli. 47 Haxa yet yah ak'bal xin yictabalxa ha' ayco te' barco tu', wal Comam aytocano yin̈ isc'ul hune' won̈an tu' ischuquil. 48 Yilnito Comam tato caw ya'ta chak'le ebnaj iscuywom tu' ismak'ni ha' yu yinic'o te' barco tu' yiban̈ ha ha', yuto caw ay yip istit jak'ek' sata te' barco tu'. Haxa yet lan̈anxa issajbilo xin isto Comam istzujnoyo ebnaj, isbelwito Comam yiban̈ ha', yaja' isyelo Comam haca'tan̈e palan̈ yec'to Comam sata ebnaj iscuywom tu'. 49 Hayet yilni ebnaj isbelwi Comam yiban̈ ha ha' tu', ispixanmi camom yalni ebnaj, yuxin ah yaw ebnaj yin̈ caw ip. 50 Caw sunil ebnaj ilni, isxiwcan̈ ebnaj, yaja' yal Comam tet ebnaj: —¡Ayojab yip heyanma, mach chexxiwi yuto haninan! ẍi Comam. 51 Lahwi tu' yahto Comam yul te' barco, hayet ayxahto Comam yul te' islin̈i yec' jak'ek', caw xin c'ayilo isc'ul ebnaj iscuywom Comam yilni hune' tu'. 52 Waxan̈ca yil ebnaj yet iswatx'en Comam hune' c'aybalc'ule yin̈ ixim pan, yaja' xin machi txumchalo yu ebnaj, yuto maẍto chihajcha isnabal ebnaj. 53 Hayet isk'axponic'to Comam Jesús yiban̈ ha' lago yeb ebnaj iscuywom, yapni Comam yul ismajul Genesaret, isxecbancano ebnaj isbarco isti' ha'. 54 Yet yelti Comam yeb ebnaj iscuywom yul te' barco yohtan̈enilo anma ta ha' Comam apni bey tu'. 55 Caw xin sunil yul ismajul hune' con̈ob tu' pujbalaxic'oj ta apni Comam. Hayet yabenilo anma bay ay Comam yinito anma macta ya'ay sat batxte' isc'atan̈ Comam. 56 Sunil aldea yeb con̈ob yeb bay pujanto yatut anma bay ec' Comam, yilaxilti anma ya'ay yulaj calle bay chiec'to Comam tu', chisk'anni anma tet Comam ta chistzab anma ya'ay tu' Comam, waxan̈ca han̈e isti' xil isk'ap Comam chistzaba. Sunil anma tzabni Comam tu' cawxicanocan̈.
