SAN MARCOS 5

1Yet x'ec'apnoj Comam Jesús b'oj heb'ya' ẍcuywi yin̈ k'axepxa ha' lago, x'apni yul scuenta Gadara. 2Ha' x'eltij Comam yul te' barco, x'apni hune' naj schanoj Comam. Aycoj yespíritu naj matzwalil yin̈, speto naj xol b'ay mujb'il camom. 3Hunel ye naj b'etu', mach mac ẍc'oji sc'alniay naj, ni hasta yu cadena. 4Tx'ihal el xc'al-laxay yoj naj b'oj sk'ab', yaja' lemb'iln̈e slin̈toj naj ch'en ch'en aycoj yin̈ sk'ab', chiniloj naj ch'en cadena aycoj yin̈ yoj, mach hunuj mac ẍc'oji yin̈ naj. 5Tz'ayic ak'b'al, ch'ec' colo naj b'etu' b'oj swi'laj witz. Ch'el yaw naj, chanicoj naj lahwilal yin̈ snimanil yu hej ch'en ch'en. 6Nahatto xilottoj Comam yu naj, xto naj yin̈ an̈e sjahb'anojay sb'a yin̈ sat Comam. 7- 8Xalni Comam tet naj: —Hex yespíritu naj matzwalil, elan̈wej yin̈ naj ti'. X'awican̈ naj yin̈ ip, xalni naj: —¿Tzet hawoc jin̈an Jesús Sc'ahol Comam Dios Ec'b'al Yib'an̈ Sunil tzetet? Yuch'antioẍ ẍco k'an tawetan, machawa' ec'oj ya' janmaan. 9Sk'amb'en Comam tet naj: —¿Tzet ha b'ih?. —Legión co b'ihan, haxca tx'ihalon̈an. 10Caw tx'ihal el sk'an naj tet Comam ta mach schejiloj Comam hej yespíritu naj matzwalil tu' b'etu'. 11Tx'ihal no' txitam lan̈an stan̈elax sti' spahawil ha' lago. 12Sk'anni yespíritu naj matzwalil tu' tet Comam, chalni: —Aon̈toj yin̈ hunk'aan no' txitam tu'an. 13Xalni Comam ta chuhi. Hactu' xu yel hej yespíritu naj matzwalil tu' yin̈ naj tu', x'oc yin̈ no' txitam. Ay mi no' cab'oj mil. Man̈e oc hej espíritu tu' yin̈ no', x'ah b'ulna no', sb'ejniaytoj sb'a no' sat pahaw tu' x'ayapnoj no' yul ha'. Hactu' xu scam no'. 14Heb'naj tan̈eom txitam, xiwcan̈ heb'naj, x'el heb'naj. Xto heb'naj stzotenoj yul con̈ob' b'oj b'aytaj ẍmunla anma, yuxin x'apni anma yila' tzet xui. 15Ha' x'apni anma sc'atan̈ Comam, xilni anma tu' naj aytic'acoj yespíritu naj matzwalil tu' yin̈, ayxacoj xil sk'ap naj yin̈, tz'on̈anay naj, ak'anc'ulalxa ye naj, yuxin caw xiwcan̈ anma. 16Ha' heb'naj x'ilni tzet xu Comam tu', ha' heb'naj xhalni tet hunmajanxa anma x'apni b'etu, tzet xu swatx'i naj, b'oj tzet xu stocan no' txitam sat pahaw. 17Yuxin sk'anni anma tet Comam ta shequiloj sb'a b'etu'. 18Ha' x'octoj Comam yul te' barco, sk'annitoj sb'a naj x'el yespíritu naj matzwalil tu' yin̈. 19Mach sje Comam. Ha' xal Comam tet naj: —Paxan̈toj tawatut, cat hawalni tet mac ayto hawu ha b'a b'oj, hantaj sc'ulal sc'ul Comam Jahaw xu tawin̈. 20Hactu' xu sto naj spujb'anojc'oj yulaj con̈ob' b'et Decápolis, xalni naj tzet xu swatx'i naj yu Comam Jesús. Caw ẍc'ay sc'ul anma yab'eni. 21Lawitu' xmeltzo Comam Jesús sk'axepal ha' lago. Ha' x'el Comam sti' ha', tx'ihal anma x'oc hoynoj yin̈. 22Lan̈anto tu', x'apni hune' ya' swi'al capiya Jairo sb'ih, sc'atan̈ Comam, x'ay jahnoj ya' yin̈ sat. 23Sk'anni ya' tet, chalni ya': —Mamin, lan̈an scam ni'an hin cutz'inan. Ton̈ win̈an, cat hawanicoj ha k'ab' yib'an̈ haxin̈wal ẍwatx'i, yun̈e mach scami. 24Hactu' xu sto Comam yin̈ ya'. Tx'ihal anma x'oc tzujnuj, yuxin caw ẍtenot Comam yu. 25Xol anma tu' aycoj hune' ya' comi' caw tx'oj yeyi, scab'lan̈eb'xa hab'il mach sb'ejcan xtx'ahwi snimanil ya'. 26Tx'ihal b'ay xa' an̈te sb'a ya'. Xax xtan̈iloj tzet ay ya' stoholoj yan̈al, yaja' nab'a'n̈e. Stohn̈etic'a niman ya'. 27Ha' xab'en ya' yalot sc'ulal Comam, xhitzicoj ya' yin̈taj Comam xol anma, stzab'ni ya' xil sk'ap Comam. 28Ton̈e xal ya' yin̈ snab'al: Waxan̈ca ton̈e chin tzab' xil sk'ap Comaman chin watx'ojan. 29Yin̈n̈ena tu' x'an̈chana ya', xab'enna ya' swatx'iloj sc'ul. 30Ha' xab'en Comam to ay mac xwatx'i yu scan̈il yeyi, xmeltzo t'an̈na xol anma sk'amb'eni: —¿Mac stzab'ni xil hin k'ap ti'an? . 31Xalni heb'ya' ẍcuywi yin̈: —Mamin, ¿tox machawila to tx'ihal anma, ẍto ha k'amb'eni: ¿Mac chin tzab'ni ti'an? cachi. 32Yaja' yehn̈e yilni Comam shoyanil, mac tzab'ni. 33Wal ya' comi', xan̈e ẍb'ayb'on ya' xiwquilal, haxca yohtaj ya' to xax watx'i ya' yu Comam. Yuxin xhitzicoj ya', x'ay jahnoj ya' yin̈ sat Comam, xalni ya' sunil tzet ye tu' tet Comam. 34Xalni Comam tet ya': —Miyay, cach watx'i haxca xcawxi ha c'ul win̈an. As pax, xax cach an̈chayi, matxa tzet chawacoj yin̈ ha c'ul. 35Lan̈anto b'in stzotel Comam tet ya' comi' tu', x'apni hunk'aan heb'naj speto yatut ya' yahaw capiya tu', xalni heb'naj: —Nab'a'xan̈e cha k'antoj ya' cuywaom ti'. Xax cam ha cutz'in. 36Yet xab'en Comam tzet xal heb'naj, xalni tet ya' swi'al capiya tu': —Machawacoj yin̈ ha c'ul. Cawxojab' ha c'ul yin̈ Comam Dios. 37Mach sje Comam ta ay mac ẍto yin̈, to han̈c'a ya' Pedro, ya' Jacobo b'oj yuẍtaj Juan xitoj Comam yin̈. 38Ha' x'apni Comam yatut ya', xan̈e ẍb'oc'cha anma b'oj xayanxan̈e yok'i. 39X'octoj Comam yul n̈ah, xalni tet heb'jetb'i: —¿Tzet yuxin xayanexxan̈e heyok'i? Ix ni'an ti' mat camnajoj ix, to ton̈e ẍway ix, . 40Yaja' ton̈e stzeyeot Comam. Lawitu' ẍchejniltij Comam anma, x'octoj Comam b'oj smam smi' ix ni'an tu', b'oj heb'ya' tzujan yin̈, x'apni b'ay ay ix. 41X'oc Comam yin̈ sk'ab' ix, xalni tet ix: —Talita Cumi, Ha' chaliloj: Tz'ula, hayin ẍwal tawetan, ahan̈wanoj. 42Ha' xalni Comam hune' tu', x'ahwanoj ix, ichi yec' ix, cab'lan̈eb' hab'il ix. Caw ẍc'ay sc'ul smam smi' ix. 43Yaja' xcachwa Comam ta mach b'ay chalic'oj heb'jetb'i hune' tu'. Xalni pax Comam ta ch'a'lax wa'oj ix.


Copyright
Learn More

will be added

X\