SAN MARCOS 5

1Lahwi tu', yapni Comam Jesús isk'axepic'to ha' lago yeb iscuywom yul ismajul Gadara. 2Hayet yel Comam yul te' barco tu', yapni hune' naj ayco ischejab naj matzwalil yin̈ isc'atan̈ Comam. Naj tu' ispeto naj xolaj panteón, 3caw xin ha' bey tu' huneln̈e ye naj. Maẍtic'a xin chak' c'alba isba naj waxan̈ca chic'albalax naj yu ch'en cadena. 4Caw tx'i'al el c'albalax isk'ab naj yeb yoj naj yu ch'en cadena, yaja' chislin̈to naj ch'en, caw machi hunu mac chik'oji yin̈ naj. 5Yet tz'ayical yeb yet ak'balil ch'ec' naj yin̈la istzalanil witz yeb xolaj panteón, caw xin chiel yaw naj yet chiec' naj; chi-xin-ismak'ico isba naj yin̈ej ch'en ch'en yeq'ui. 6Yet nahatto ay naj yilnito naj Comam, istit naj yin̈ an̈e isjahbanayo isba sata Comam. 7- 8Yalni Comam: —¡Hach matzwalil, elan̈ yin̈ naj ti'! ẍi Comam. Yah yaw naj yin̈ caw ip: —¿Tzet hawoc win̈an Jesús, Isc'ahol Dios caw aycano yip? Caw chink'anan tawet, mach chawak' ec'oya' wanmahan, ẍi naj. 9Isk'amben Comam tet naj: —¿Tzet habi? ẍi Comam. Istak'wi naj: —Legión inbihan yuto caw niman jik'ni cobahan̈, ẍi naj. 10Caw xin isk'an ebnaj ischejab naj matzwalil tu' tet Comam tato mach chischejilo Comam ebnaj yul ismajul hune' tx'o tx'otx' bay ay tu'. 11C'uxan xin tzetc'a no' txitam lan̈an islo yin̈ istzalanil hune' witz tu', 12yuxin yal ebnaj ischejab naj matzwalil tu' tet Comam: —Chejon̈tojan̈ yin̈ no' txitam tu' lah, ẍi ebnaj. 13Istak'wi Comam: —Quexwej, ẍi Comam. Hac tu' yu yelcano ebnaj ischejab naj matzwalil yin̈ naj, istocano ebnaj yin̈ no' txitam tu', aymi no' cabo mil. Hayet yapni ebnaj ischejab naj matzwalil yin̈ no' xin, isk'ojnito isba no' sat pahaw yay apno no' yul ha' lago, ishik'nito no' ha'. 14Hayet yilni ebnaj tan̈em txitam hune' tu' yelcan̈ ebnaj, isto ebnaj yalno tet ebnaj lan̈an ismunla iscawilal tu' yeb tet anma ay yul con̈ob tu'. 15Hayet yapni anma isc'atan̈ Comam, yilni anma naj bay aytic'aco ebnaj ischejab naj matzwalil, ayxaco xil isk'ap naj, caw xiw anma yilni hune' tu'. 16Ha' xin anma ilni yin̈ tzet iswatx'e Comam yin̈ naj bay aytic'aco ischejab naj matzwalil tu', yeb yin̈ tzet yu isto no' txitam sat pahaw, ha' ebnaj halni tet huntek'anxa anma apni ilnoj. 17Yichico anma yalni tet Comam tato chiel Comam sat istx'otx' ebnaj. 18Hayet yocto Comam yul te' barco, yet ismeltzoxa, yalni naj bay el ischejab naj matzwalil tet Comam tato chischahto Comam naj yintaj. 19Yaja' xin mach chisje Comam, yalni Comam tet naj: —As paxan̈to hawatut cat hawalni tet sunil mac ayto hawu haba yebi yin̈ tzet mayu hacawxican̈ yeb isc'ulch'anil isc'ul Comam tawin̈, ẍi Comam. 20Hayet yaben naj hune' tu' ispaxto naj, yichico naj ispujbanic'o yulaj con̈ob ay yul ismajul Decápolis yin̈ tzet yu iscawxican̈ naj. Wal anma xin caw chic'ay isc'ul yaben tzet chal naj. 21Hayet yeq'uilo Comam Jesús isk'axepic'to ha' lago, caw hantan̈e anma apni isc'atan̈ Comam, yuxin cancano Comam isti' ha'. 22Lahwi tu', yapni hune' naj chiyij Jairo isc'atan̈ Comam, yahawil yeco naj yin̈ capilla. Ha' yet yapni naj isc'atan̈ Comam yay jahno naj yich yoj Comam. 23Yoc naj isk'anno tet Comam haca' ti': —Mamin, ay hune' nich'an incutz'inan lan̈anxa iscami, estam chachto nino wintajan cat hawanayo hak'ab yiban̈ ix haxinwal chicawxican̈ ix, hac tu' xin mach chicam ix, ẍi naj. 24Hac tu' yu isto Comam yinta naj, caw xin hantan̈e anma ocpaxo tzujno yinta Comam, toxan̈e xin chistenico isba anma yin̈ Comam. 25Xol anma tu' ayco hune' ix cablahon̈ebxa habil yichico yay istx'ahwobal, matxatic'a chilin̈i. 26Caw tx'i'alxa ebnaj doctor bay xaec' ix, caw xaistan̈tzelo ix sunil tzet aya yu yan̈chahi, yaja' maẍtic'a chian̈cha ix; wal xin caw ip yahcan̈ hune' yabil tu' yin̈ ix. 27Yaja' xayabe ix yin̈ ej isc'ulal chiswatx'e Comam, yuxin hitzico ix yinta Comam xol anma tu', istzabni ix xil isk'ap Comam. 28Yuto istxum ix haca' ti': “Waxan̈ca han̈e xil isk'ap Comam chintzaban cat incawxican̈an,” ẍi ix ischuquil. 29Lan̈antotic'a istzabni ix xil isk'ap Comam, islin̈inacan̈ yin̈ ix, iscawxinalo ix. 30Wal Comam Jesús yohtan̈eloj tato ay hune' mac cawxilo yu yip, yuxin ismeltzo isba Comam ist'an̈xito yin̈ anma tu', yalni Comam: —¿Mac maquintzabnihan? ẍi Comam. 31Istak'wi ebnaj iscuywom Comam: —Mamin, ¿tom mach chawila tato caw hantan̈e anma chistenico isba tawin̈ cat hak'ambenpaxoj mac macachtzabni? ẍi ebnaj. 32Yaja' yexn̈e yec' t'an̈t'on Comam yin̈ anma tu' yu yilni mac tzabni Comam. 33Wal ix xin toxan̈e chibayla yah ix yu xiwquilal, ishitzico ix, yay jahno ix sata Comam, yalnilo ix yin̈ tzet yu iscawxican̈. 34Yalni Comam tet ix: —Miyay, macachcawxinacan̈ yu maxawaco hawanma win̈an, paxan̈to yin̈ tzalahilal, cawachxa tinan̈, ẍi Comam. 35Lan̈antotic'a xin, yapni huntek'an ebnaj ispeto bey yatut naj Jairo, ismam ix nich'an ya'ay tu', yalni ebnaj tet naj: —Mam Jairo, wal ix hacutz'in macamna ix, nabxan̈e chawito naj cuywawom ti' tawintaj, ẍi ebnaj. 36Hayet yaben Comam yin̈ tzet yal ebnaj tu', yalni Comam tet naj Jairo: —Mach chawaco yin̈ hac'ul, wal xin aco hawanma yin̈ Comam Dios, ẍi Comam. 37Mach xin isje Comam tato chito anma yintaj, cachann̈e naj Pedro, naj Jacobo yeb naj Juan yito Comam; naj Jacobo yeb naj Juan tu', yuẍta isba ebnaj. 38Hayet yapni Comam yatut naj Jairo tu', yilni Comam tatoxan̈e chiwejcha anma yok' yu bisc'ulal yin̈ ix. 39Yocto Comam yul n̈a tu', yalni Comam tet anma: —¿Tzet yin̈ xin chexwejcha heyok'i? Ix nich'an ti' mach camnajo ix, wal xin ton̈e chiway ix, ẍi Comam. 40Hayet yaben anma yalni Comam haca' tu', yoc anma tzebo yin̈ Comam. Lahwi tu' ischejnilti Comam sunil mac ayicto bey tu', haxan̈e xin ismam yeb ismi' ix yeb ebnaj oxwan̈ tu' octo yinta Comam bay ay ix nich'an tu'. 41Yoc tzabno Comam yin̈ isk'ab ix, yalni Comam tet ix: —Talita cumi, ẍi Comam. Ha' chal yelapno tu': “Hach nich'an tz'ul, haninan chiwalan tawet, ahan̈wanoj.” 42Yin̈n̈ena tu' yahwano ix nich'an tu', yichico ix yeq'ui. Caw xin cablahon̈eb habil ix. Hayet yilni anma hune' tu', caw toxan̈e chic'ay isc'ul. 43Yalni Comam tato chiak'lax wa'o ix, yalnipaxo Comam tato mach bay chihallaxic'o hune' tu'.

will be added

X\