SAN MARCOS 4

1Yet hunecxa x'oc Comam Jesús scuyu' anma sti' ha' lago. Caw tx'ihal anma xyamicoj b'etu', yuxin x'ahtoj Comam yul hune' te' barco ayictoj yul ha' ha', x'ay tz'on̈noj yul te', x'oc scuynuj anma. 2Tx'ihal cuywab'al xal Comam, chalni yin̈ hacti': 3—Ab'ewej tzet ẍwal ti'an: Ay hune' naj xto stz'unu' strigo. 4Ay ixim x'ay yul b'eh, x'apni no' ch'ic, slonican̈ no' ixim. 5Ay pax ixim x'ay sat tx'otx' b'ay cawil yehtij samch'en yalan̈. Lemb'il xhulna ixim yu sk'axanil tx'otx' haxca mat tx'ihaloj xtx'otx'al. 6Yaja' yet x'apni yin̈ chuman, xpohcan̈ k'a', xtajiloj ixim haxca xtan̈toj schac'anil tx'otx' b'oj mat nahatoj ahaytoj xe' ixim. 7Ay hanic'xa ixim x'ay xol te' txoy. Ha' xhul ixim xb'ab'ican̈ te' yib'an̈ ixim, yuxin xb'ajb'itoj ixim, matxa xa' ixim sat yu yen̈elal te'. 8Wal ixim x'ay b'ay c'ul sat tx'otx', c'ul xu yul ixim b'oj sak'al xu sch'ib' ixim. Ay ixim 30 sat xacoj, ay ixim 60 sat, ay ixim 100 sat xacoj. 9Maquex cheyab'e hune' ti', a'wej heyanma he txumniloj tzet chaliloj. 10Lawi spaxtoj spimal anma, x'oc heb'ya' ẍcuywi yin̈ Comam Jesús sk'amb'e' b'oj haywan̈xa heb'ya' ẍtic'a ab'entoj tzet chala: —¿Tzet chaliloj hune' cuywab'al xawal jet ti'an? . 11Xta'wi Comam: —Teyetn̈e cha' Comam Dios he txumuluj tzet yelapnoj ye hin cuywab'al xalni yin̈ tzet chu yoc Comam Dios Yahawoj. Yaja' wal hunmajanxa anma han̈c'a ejemplo ẍwal tetan 12yun̈e mach xtxumiloj. Chila, yaja' haca'tic'a matzet chila. Chab'e, yaja' mach xtxumu. Ta xtxumu, ẍmeltzojcoj yin̈ Comam Dios, cat sb'ut'laxtan̈oj smul. 13Ta mache txum tzet yelapnoj ye naj tz'unum trigo, ¿tzet chu he txumnuj hunk'aanxa ejemplo ẍwala'an? 14Naj tz'unum trigo, yechel mac ẍpujb'anc'oj stzoti' Comam Dios ye naj. 15Ixim hin̈at x'ay yul b'eh, yechel anma ch'ab'en stzoti' Comam Dios ye ixim, yaja' hantaj tzoti' chab'e tu', lemb'il chul naj matzwalil yi'a'loj yin̈ yanma. 16Ixim hin̈at x'ay yib'an̈ ch'en ch'en, yechel anma stzalayi schani stzoti' Comam Dios ye ixim. 17Yaja' mat lin̈anoj yanma yin̈ Comam, yuxin yet chul ilweb'al yin̈, mato ẍcajlaxi haxca xa' yuluj sc'ul yin̈ stzoti' Comam Dios, lemb'il ẍcab'concan̈ sc'ul. 18Hactu' ixim hin̈at x'ay xol te txoy, yechel anma ẍchanic'oj stzoti' Comam Dios ye ixim. 19Yaja' k'a' ẍto yacoj tzetet ay satyib'an̈k'inal ti' yin̈ sc'ul. Ha' tu' ch'a'ni somchaojtoj snab'al haxca choche ẍk'alomb'i. Nananxan̈e tzet chacoj yin̈ sc'ul, yuxin machu syijyen stzoti' Comam Dios. Lahan ch'elcoj b'oj ixim trigo mach satni. 20Wal ixim hin̈at x'ay b'ay c'ul sat tx'otx', yechel anma ch'ab'entoj stzoti' Comam ye ixim. Lahan anma tu' b'oj ixim 30 sat, mato 60 sat, mato 100 sat xacoj. 21Xalni pax Comam Jesús tet anma: —Yet ẍco tzujb'an co candil, ¿tox lawi yoc k'a' yin̈ cat janojictoj yalan̈ hunuj cahon? Machca chu janictoj yalan̈ co tx'at, to yib'an̈ hunuj tzetet ẍjahtoj yun̈e smujli tet anma. 22Haxca sunil tzetet c'uan tinan̈, yilal yal-laxojatij. Hantaj tzet ewan yeyi, yilal yal-laxojatij yin̈ hab'an. 23Maquex cheyab'e ti', a'wej heyanma he yijyeni. 24Xal Comam hunecxa: —Cam cheyab'ecan tzet ẍwal ti'an, haxca haca' heyanicoj yin̈ heyanma heyab'eni, hactu' chu ya'noj Comam Dios he txumu', hasta ec'b'alto chu ya'noj Comam. 25Mac chacoj yin̈ sc'ul xtxumni, cha'a'pax Comam yak'b'il tet, yaja' mac mach cam sc'ul xtxumni, hasta ni'an solic xtxumu ch'i'laxojiloj tet. 26Xal pax Comam Jesús tet anma: —Lahan chu yoc anma yul sk'ab' Comam Dios b'oj haca' hune' naj xb'ey txihnojay yin̈at sat xtx'otx'. 27Waxan̈ca waynaj naj, mato itzitz naj, waxan̈ca tz'ayical mato ak'b'alil, wal ixim hin̈at sak'al sch'ib' ixim. Yaja' mat yohtajoj naj tzet chu sch'ib' ixim. 28Haxca ha' tx'otx' ch'a'ni ch'ib'oj, b'ab'el awalto yeyi, lawitu' ẍpohiloj, lawitu' cat stz'ajnacoj sat. 29Haxa ẍk'anb'iloj ixim, cat yocoj naj sc'upnojcan̈ ixim, haxca x'apni tz'ayical b'ay ẍyamb'alaxcoj ixim. 30Xal pax Comam Jesús tet anma: —¿Tzet chu ẍch'ib' sb'isil anma ch'oc yul sk'ab' Comam Dios cheyab'ecoj? 31Lahan b'oj hune' ni'an yin̈atil te' mostaza stz'unlaxi. K'a' ni'an ch'an sataj hunujxa tzet hin̈atil, 32yaja' yet stz'unlaxi cat ẍch'ib'can̈, k'a' ec'b'al chu sataj hunujxa yet-itail. Hasta sk'ab' te' caw nimej chu, yuxin chu yen̈len sb'a no' ch'ic yalan̈. 33Yet xalni Comam Jesús stzoti' Comam Dios tet anma, haca' hunk'aan ejemplo ti' xu yalni Comam hantaj ẍc'oji anma xtxumni. 34Mach hunuj tzetet ta mat ejemplooj xacoj Comam yet scuyni anma. Wal tet heb'ya' ẍcuywi yin̈, stihiloj Comam yin̈ hab'an tet heb'ya'. 35Hatic'a hune' sk'ejb'alil tu', xal Comam Jesús tet heb'ya' ẍcuywi yin̈: —Ton̈wej sk'axepal ha' lago. 36Hactu' xu yanican heb'ya' anma sti' ha' lago, xto heb'ya' b'oj Comam yul te' barco. Ay pax hunk'aanxa te' barco x'oc tzujnuj yin̈ heb'ya'. 37Hunep tu' x'ichican̈ hune' niman cak'e' smak'nican̈ ha', ichi snohaytoj ha' yul te' barco. 38Wal Comam, wayoj chu yib'an̈ hune' tz'on̈ob'al ay yocapnoj tu'. Ha' xilni heb'ya' tu', spitzc'ancan̈ heb'ya' Comam, xalni heb'ya': —Mamin, lan̈an co to yul ha', ¿mato mach hawoc yin̈ ta chon̈ camoj?. 39X'ahwanoj Comam, x'oc scachnoj cak'e' b'oj ha' lago tu', xalni Comam: —B'ejcanoj, paxan̈ tz'innayi. Hactu' xu sb'ejnican cak'e' tu', b'oj sb'ejnican ha' lago yec' job'layi. 40Xalni Comam tet heb'ya': —¿Tzet yuxin caw chex xiwi? ¿Tom mach ẍcawxi he c'ul yin̈ Comam Dios? . 41Yaja' caw xc'ay sc'ul heb'ya', xalni heb'ya' tet hunun: —¿Mac anmail hune' ya' ti', yuxin somanta cak'e' b'oj ha' ha' ẍyijyen tzet chal ya'?.


Copyright
Learn More

will be added

X\