SAN MARCOS 4

1Haxa yet hunelxa xin oc Comam Jesús iscuyu anma isti' ha' lago, yaja' yu caw hantan̈e anma yuxin ahto Comam yul hune' te' barco ayco iscawilal, wal anma xin cancano isti' ha' lago tu'. 2Yichico Comam iscuyni anma, caw xin tx'i'al tzet yaco Comam yecheloj yet chicuywahi. Yet iscuywa Comam tu' yalni Comam hune' ti': 3—Tinan̈, abewe tzet chiwalan: Ay hune' naj to txiho trigo. 4Hayet lan̈an istxihnayo naj ixim, ay ixim apni c'atna yul beh, yul no' ch'ic islohnoto ixim. 5Aypaxo xin ixim apni c'atna xolaj ch'en ch'en bay machi bin tx'o tx'otx', caw xin pet ahilo ixim yu k'axan xolaj ch'en, mach nahatto yehayto yich tx'otx'. 6Yaja' yet yahilo tz'ayic yet yik'nican̈ yip k'a' istajayo ixim, yuto machi bay yayto xe' ixim yu ch'en ch'en. 7Aypaxo xin ixim apni xolaj yin̈atil te' tx'ix, hayet isch'ibcan̈ ixim isch'ibpaxocan̈ te', yuxin tz'onbayo ixim, machi xin sat ixim yacoj. 8Wal ixim apni c'atna xol tx'o tx'otx' caw c'ul, caw sak'al yu isch'ibcan̈ ixim yeb caw yak' sat ixim. Ay ixim treinta yuteco sat yin̈ hunun iswi', ay bay sesenta, aypaxo bay cien yuco sat ixim yin̈ hunun iswi'. 9Maquex cheyabe hune' ti' ak'we heyanma hetxumniloj, ẍi Comam. 10Hayet haxan̈e iscuywom Comam Jesús cancano isc'atan̈ yeb mac chi-tic'a-aben tzet chal Comam, yoc ebnaj isk'ambeno tet Comam yin̈ tzet chal yelapno hune' yechel yaco Comam yet iscuywahi. 11Istak'wi Comam tet ebnaj: —Teyetn̈e chak' Comam Dios heyohtan̈elo huntek'an ewantic'a yehi, yun̈e hetxumni yin̈ tzet chu yoc anma yul isk'ab Comam Dios. Wal tet comon anma xin yecheln̈e chak' Comam tet. 12Waxan̈ca hajan isbak'sat, yaja' mach chila, waxan̈ca chabe, yaja' mach chitxumchalo yu, yuxin mach chaco isba yul isk'ab Comam Dios cat yak'lax nimanc'ulal yin̈ ismul, ẍi Comam. 13Yalnipaxo Comam tet iscuywom: —Ta machi txumchalo heyu yin̈ naj txihom trigo wacojan yechelo teyet, ¿tzic'anab xin chu hetxumnilo huntek'anxa yechel chiwalan chal tu'? 14Naj txihom trigo tu', yechel yeco naj yin̈ mac chihalnic'o Istzoti' Comam Dios. 15Ixim hin̈at apni yul beh, yechel yin̈ anma chiaben Istzoti' Comam Dios, yaja' lahwi yabeni cat yul naj matzwalil yinolo yin̈ yanma. 16Ixim ayc'ay xolaj ch'en ch'en, yechel yin̈ anma chiaben Istzoti' Comam Dios cat ischahni yin̈ tzalahilal yul yanma. 17Yaja' yu maẍto yip yanma yin̈ Comam yuxin hayet chul ilwebal yiban̈ yeb yet chicajlax yu Istzoti' Comam, caw yin̈ an̈e chilo yanma yin̈ Comam. 18Ixim hin̈at apni xolaj yin̈atil te' tx'ix yechel yin̈ mac chiaben Istzoti' Comam Dios, 19yaja' yu ec'bal chaco yin̈ isc'ul yin̈ tzet ay yul sat yiban̈k'inal ti' cat yanico yanma yin̈ k'alomal, chochenpaxto sunil tzet ye tu'. Ha' sunil huntek'an tu' chiak'ni c'ayolo Istzoti' Comam yul yanma, hac tu' xin mach chich'ib yin̈ yet Comam. 20Haxa ixim hin̈at apni xol tx'o tx'otx' caw c'ul, yechel yin̈ anma chiaben Istzoti' Comam Dios cat ischahni yul yanma. Lahan anma tu' haca' ixim caw niman sat yak'a; haca' ixim yaco treinta sat yin̈ hunun iswi', haca' ixim sesenta yeb ixim yaco cien sat yin̈ hunun iswi', ẍi Comam. 21Yalnipaxo Comam Jesús: —Yet chicotzujbanico k'a' yin̈ hunu cantil, mach chicon̈ohbaco hunu cahon yiban̈, mach chijapaxicto yalan̈ tx'at. Wal xin nahat chicot'un̈bacan̈ yun̈e ismujli. 22Hacpax tu' xin sunil tzet ewan yehi, chiixtan̈wiloj yeb sunil tzet ye tu' mach ohtabiloj chiohtan̈elaxi. 23Maquex cheyabe hune' ti', ak'we heyanma hetxumniloj, ẍi Comam. 24Yalnipaxo Comam: —Cam cheyabe tzet chiwalti'an yuto haca' heyanico yin̈ heyanma heyabeni, hac tu' chu yak'ni Comam Dios hetxumu', caw xin ec'balto chu yak'ni Comam hetxumu'. 25Yuto ha' mac chak' yanma istxumni, chak'paxo Comam yak'bil tet, yaja' wal mac mach chicam isc'ul istxumni, ha' nich'an etza chitxumchalo yu chiilaxilo tet, ẍi Comam. 26Yalnipaxo Comam Jesús: —Anma chioc yul isk'ab Comam Dios, lahan haca' hunu naj chitxihnayo ixim trigo sat tx'o tx'otx'. 27Waxan̈ca chiway naj ak'balil cat yahwano naj tz'ayical, yaja' ixim hin̈at tu' chul isc'ul ixim cat isch'ib ixim; mach yohtajo naj yin̈ tzet chu isch'ib ixim. 28Yul tx'otx' chiswatx'e isba ixim; ha' yin̈ babelal chiahilo ixim, haxa yin̈ tzujanilxa xin cat ispoh ixim, lahwi tu' cat yoc yul ixim. 29Haxa yet chik'anbilo ixim, cat yul naj isc'upnocan̈ ixim yuto istiempohalxa yah ixim, ẍi Comam. 30Yalnipaxo Comam Jesús: —¿Tzettaxca chiyu isch'ib isbisil anma chioc yul isk'ab Comam Dios chute hetxumni? 31Wal xin lahan haca' nich'an yin̈atil te' mostaza chitz'unlaxi. Te' hin̈at mostaza tu', ha' te' caw nich'anch'an xol sunilej te' hin̈at, 32yaja' yet chitz'unlax te' xin cat isch'ibcan̈ te', ha' xin te' ec'bal nimajal chu sata sunilej te' itah. Caw nimej chu isk'ab te' yuxin chiapni no' ch'ic iswatx'e yatut xol isk'ab te', ẍi Comam. 33Hac tu' yu iscuyni Comam Jesús anma yin̈ Istzoti' Comam Dios yet yanico Comam huntek'an yechel tet anma. Caw tx'i'al yechel yaco Comam, hatatic'a hanta chik'oji anma istxumni. 34Sunil cuybanile yak' Comam, yecheln̈e yaco Comam tet anma. Wal tet ebnaj iscuywom Comam xin, yal Comam yin̈ haban yin̈ tzet chal yelapnoj. 35Yet k'ejbiyalil yin̈tic'a hune' tz'ayic tu', yalni Comam Jesús tet ebnaj iscuywom: —Ton̈we isk'axepic'to ha' lago ti', ẍi Comam. 36Hac tu' yu iscancano anma isti' ha', yinito ebnaj Comam yul te' barco ayayo bey tu'. Aypaxo xin huntek'an te' barco oc tzujno yinta te' bay ayicto Comam. 37Hayet ayco te' yiban̈ ha ha' istit hune' niman jak'ek', yichico jak'ek' ismak'nicto ha' yul te' barco tu', caw xin nohayto ha' yul te'. 38Wal Comam xin wayo chu yin̈ilto isyutz te', k'eyanayo yiban̈ hune' isk'an̈ wi'e. Yoc ebnaj yinolo iswayan̈ Comam, yalni ebnaj: —Mam cuywawom, caw matzet chal nino hac'ul, lan̈an coto yich ha' lah, ẍi ebnaj. 39Hayet yaben Comam hune' tu' yahwano Comam, iscachni Comam jak'ek' yeb ha ha': —Matxa chexbili, lin̈bawe heba, ẍi Comam. Yin̈n̈ena tu' islin̈ban isba jak'ek' yeb ha ha', ispaxtz'in̈nahi. 40Yalni Comam tet ebnaj iscuywom tu': —¿Tzet yin̈ xin caw chexxiwi? Caw mach chicawxi hec'ul yin̈ Comam Dios, ẍi Comam. 41Wal ebnaj iscuywom Comam tu' caw xiw ebnaj, yalni ebnaj tet hunun: —¿Mac anmahil ya' ti' yuxin chisyije jak'ek' yeb ha ha' yin̈ tzet chal ya'? ẍi ebnaj yin̈ Comam.

will be added

X\