SAN MARCOS 3

1Yocto Comam Jesús yul iscapilla ebnaj Israel hunelxa, c'uxan xin ayicto hune' naj camnajilo hune' isk'ab. 2Ay xin huntek'an ebnaj ayictoj yun̈e yilni ta chak' cawxo Comam hune' naj tu' yin̈ istz'ayical xewilal, cat yoc ebnaj ak'oc'ule yin̈ Comam yalni. 3Yalni Comam tet naj camnajilo isk'ab tu': —Ahan̈wanoj cat hawoc lin̈no coxolti'an̈, ẍi Comam. 4Isk'amben Comam tet ebnaj ayicto yul capilla tu': —¿Baytettaxca chisje cowatx'en yin̈ istz'ayical xewilal heyalni, ham isc'ulal mato istx'ojal? ¿Chimyu jan̈ten anma ya'ay mato machoj? ẍi Comam. Hayet yaben ebnaj yalni Comam haca' tu' machi hunu ebnaj tak'wi. 5Ishowbican̈ Comam, yec' t'an̈t'on yin̈ anma ayicto yul capilla tu'. Caw xin bisc'ulal elpaxico isc'ul Comam yuto mach chisje ebnaj yabeto yin̈ tzet chal Comam. Lahwi tu' xin yalni Comam tet naj camnajilo isk'ab: —Toholban̈elto hak'ab, ẍi Comam. Istoholban̈enilto naj isk'ab, iswatx'icaniloj. 6Haxa yet yelti ebnaj fariseo bey tu' yoc ebnaj islahti'n̈en isba yeb ebnaj ayco yin̈ ispartido naj Herodes yin̈ tzet chu yak'ni camo ebnaj Comam. 7Lahwi tu', isto Comam isti' ha' lago yeb iscuywom. Caw xin hantan̈e anma oc tzujno yinta Comam. Ay anma ay bey ismajul Galilea, aypaxo anma ay bey ismajul Judea, 8aypaxo xin anma ah con̈ob Jerusalén, yeb anma ah Idumea. Aypaxo xin anma ay isk'axepic'to ha' niman Jordán apni. Aypaxo anma tit yul ismajul con̈ob Tiro yeb yul ismajul con̈ob Sidón. Apni sunil anma tu' yuto yabelo sunil c'aybalc'ule xaiswatx'e Comam. 9Caw xin tx'i'al anma apni isc'atan̈ Comam, yuxin yal Comam tet ebnaj iscuywom ta chiti ebnaj hunu te' barco bay chiahto Comam yun̈e machi istenico isba anma yin̈ Comam. 10Yuto caw tx'i'al mac cawxican̈ yu Comam, caw xin tzetc'a anma ya'ay apni yun̈e istzabni anma Comam yalni. 11Xol anma istenba isba isc'atan̈ Comam tu', ay anma ayco ischejab naj matzwalil yin̈. Hayet yilni ebnaj Comam, yay jahno ebnaj sata Comam, yahwi ebnaj yin̈ caw ip: —Hach ti' hach Isc'ahol Comam Dios, ẍi ebnaj. 12Yaja' cachwa Comam yin̈ ebnaj ta mach chalilo ebnaj Comam. 13Lahwi tu' yahto Comam Jesús yin̈ istzalanil hune' won̈an, yawtenti Comam macta chal isc'ul, ishitzico macta yawte Comam tu' isc'atan̈. 14Lahwi tu' issic'lenilo Comam cablahon̈wan̈ ebnaj yu yoccano tzujno yinta Comam yeb yu yalnic'o Istzoti' Comam Dios tet anma. 15Yak'nicano Comam yip ebnaj ischejnilo ischejab naj matzwalil yin̈ anma. 16Hac ti' isbi ebnaj cablahon̈wan̈ tu' haca' ti': naj Simón, Pedro yaco Comam isbiho naj, 17naj Jacobo, yeb naj Juan; ebnaj cawan̈ ti' yuẍta isba ebnaj, isc'ahol icham Zebedeo ye ebnaj, Boanerges yacanico Comam isbiho ebnaj. Hune' bihe tu' chal yelapnoj Yuninal C'uh. 18Yebpaxo xin naj Andrés, naj Felipe, naj Bartolomé, naj Mateo, naj Tomás, naj Jacobo, Isc'ahol icham Alfeo. Naj Tadeo, naj Simón aytic'aco yin̈ hune' partido cananista, 19yeb naj Judas Iscariote, naj anico Comam yul isk'ab camical. Lahwi tu' yapni Comam Jesús yul hune' n̈a yeb ebnaj iscuywom. 20Caw xin tx'i'al anma apnipaxo isc'atan̈ Comam, caw matxatic'a chu iswa' Comam yeb ebnaj iscuywom tu' yu anma. 21Hayet yohtan̈enilo ebnaj yuẍta Comam ta apni Comam bey hune' n̈a tu', yapni ebnaj ik'wal yin̈ Comam yalni, yuto challaxi tato xaetaxto yul iswi' Comam. 22Aypaxo xin huntek'an ebnaj cuywawom yin̈ isley naj Moisés ispeto Jerusalén apni isc'atan̈ Comam, yalni ebnaj yin̈ Comam haca' ti': —Naj ti' chu yinilo naj ischejab naj matzwalil yin̈ anma yuto naj Beelzebú, yahawil ebnaj matzwalil, chiak'ni yip naj, ẍi ebnaj. 23Hayet yaben Comam yalni ebnaj haca' tu', yawten Comam ebnaj, yanico Comam hune' yechel ti' tet ebnaj: —¿Tzettaxca chu yinilo naj matzwalil hunuxa yet matzwalilal yin̈ anma? 24K'inaloj ta ay hunu con̈ob chispoh isba cat yanico howal yin̈ hunun, ta hac tu' caw yin̈ an̈emi chitan̈ilo yip hune' con̈ob tu'. 25Hacpax tu' xin ta ay hunu n̈ahil ebnaj yuẍtan̈e isba chak'le howal, yin̈ an̈emi chipax yip hune' n̈ahil anma tu'. 26Hacmi tu' chu naj matzwalil ta chispoh isba naj yeb ischejab cat yanico naj howal yin̈ ischejab tu', ta hac tu' caw yin̈ an̈emi chipax yip naj cat istan̈ilo naj. 27K'inalo ta ay hunu naj yahaw n̈a caw ay yip, machmi hunu naj elk'om chu yocto yul yatut naj yelk'anolti tzet ay naj, cachann̈e tato chik'oji naj elk'om tu' yin̈ naj cat isc'alban naj naj, hacn̈em tu' chu yelk'anilti naj tzet ay naj. 28Yin̈ caw yeli chiwalan teyet, tzijxan̈e mulehal chaco anma, maca tzijxan̈e tzoti' tx'oj chala, ayto nimanc'ulal yin̈ yu Comam Dios. 29Yaja' wal mac tx'oj istzotel yin̈ Comam Espíritu Santo, hune' mac tu' matxa bak'inal ay nimanc'ulal yin̈ yu Comam Dios, chicanto ismul tu' yin̈ sunilbal tiempo, ẍi Comam. 30Yal Comam haca' tu' yuto yal ebnaj tato ayco ischejab naj matzwalil yin̈ Comam. 31Hayet yapni ismi' Comam Jesús yeb ebnaj yuẍta ilwal yin̈, mach octo yul n̈a, ton̈e ischej ebnaj awtelaxo Comam. 32Xol anma tz'on̈anayo isc'atan̈ Comam tu', ay mac halni: —Mam cuywawom, ayc'o hami' yeb ebnaj hawuẍta isti' n̈a, lan̈an cachissayni ebnaj, ẍi. 33Istak'wi Comam: —¿Mac inmi'an yeb wuẍtajan heyalni? ẍi Comam. 34Yec' t'an̈t'on Comam yin̈ sunil mac tz'on̈anayo isc'atan̈ tu', yalni Comam xin: —Ha' mac ayicti bey ti', ha' inmi'an, ha' wuẍtajan, 35yuto ha' mac chiyijen tzet chal Comam Dios, ha' wuẍtajan, ha' wanaban yeb xin ha' inmi'an, ẍi Comam.

will be added

X\