SAN MARCOS 3

1X'octoj Comam Jesús hunecxa yul capiya. Ayictoj hune' naj camnajiloj hune' sk'ab'. 2Aypaxictoj hunk'aan heb'naj ẍc'atni ta chan̈te' Comam sk'ab' naj tu' yin̈ tz'ayic xewb'al. Haxca ta chan̈te' Comam naj, ẍtoj heb'naj a'wojc'ule. 3Xalni Comam tet naj tu': —Ahan̈ lin̈noj co xol ti'an. 4Xalni Comam tet heb'naj ayictoj yul capiya tu': —¿B'aytet taxca k'a c'ul juni yin̈ tz'ayic xewb'al cheyab'e? ¿Tom chu juni hej tzetet c'ul mato hej tzetet tx'oj? ¿Tom chu jan̈ten anma, mato co chani camoj? Ha' xab'en heb'naj tzet xal Comam, mach mac xta'wi. 5Lawitu' xt'an̈xicoj Comam yin̈ mactaj ayictoj b'etu', lemantij chil Comam b'oj ẍtac sc'ul, haxca mat sje heb'naj yab'e'toj. Lawitu' xalni Comam tet naj camnajiloj sk'ab' tu': —Toholb'an̈eltoj ha k'ab', Ha' stoholb'an̈eniltoj naj sk'ab', xwatx'inacanoj. 6Ha' x'eltij heb'naj fariseo yin̈taj, x'oc heb'naj sk'umlanoj sb'a b'oj heb'naj spartido naj rey Herodes, tzet chu spotx'noj heb'naj Comam. 7Yuxin xto Comam Jesús sti' ha' lago Galilea b'oj heb'ya' ẍcuywi yin̈. Tx'ihal anma ah Galilea x'oc tzujnuj yin̈ Comam. 8Ay anma ah Judea, ah con̈ob' Jerusalén, ah Idumea, anma ay k'axepal ha' niman Jordán. Ay anma ah Tiro b'oj Sidón x'apni haxca xab'e hej tzetet c'ayb'alc'ule xu Comam. 9Haxca caw tx'ihal anma tu', yuxin xal Comam tet heb'ya' ẍcuywi yin̈, ta c'un ya' itz'at heb'ya' hunuj te' barco yun̈e mach caw ẍtenot Comam. 10Haxca caw tx'ihal anma tx'oj ye sc'ul xax watx'i yu Comam, caw ayto pax yawub' ch'apni ya'a'coj sk'ab' yin̈ Comam yalni. 11Ay pax anma aycoj yespíritu naj matzwalil yin̈, ha' xilnitoj espíritu tu' Comam, x'ay jahnoj anma b'ay aycoj tu' yin̈ sat Comam x'awi yin̈ ip: —Hachti' hach Sc'ahol Comam Dios. 12Yaja' xcachwa Comam ta mach b'ay chal espíritu tu' tzet yelapnoj ye Comam. 13Lawitu' xto Comam stzalanil hune' won̈an, xawteniloj Comam mactaj chal sc'ul, x'apni heb'ya' sc'atan̈ Comam. 14Sic'leniltoj Comam cab'lan̈wan̈ heb'ya' ch'occan apóstolal, yun̈e yoccan heb'ya' yin̈ Comam b'oj yu yalaxtoj heb'ya' yalnoj stzoti' Comam Dios. 15X'a'lax scan̈il ye heb'ya' schejniloj yespíritu naj matzwalil yin̈ anma. 16Ha' sb'ih heb'ya' cab'lan̈wan̈ tu': Ya' Simón, xacoj Comam Pedro sb'ihoj. 17Ya' Jacobo b'oj yuẍtaj Juan, heb'ya' cawan̈ ti' sc'ahol ya' Zebedeo. Boanerges xacoj Comam sb'ihoj heb'ya', ha' chaliloj Yuninal C'u Scan̈i. 18Ya' Andrés, ya' Felipe, ya' Bartolomé, ya' Mateo, ya' Tomás, ya' Jacobo, sc'ahol ya' Alfeo, ya' Tadeo, ya' Simón aytic'acoj yin̈ partido Cananista, 19b'oj naj Judas ah Queriot, x'anicoj Comam yul sk'ab' camical. 20Lawitu', x'apni pax Comam Jesús yatut b'oj heb'ya' ẍcuywi yin̈. Tx'ihal anma xyamicoj hunecxa sc'atan̈ Comam, yuxin hasta matxa xu swa' b'oj heb'ya'. 21Yet xab'entij mac ay yu sb'a b'oj Comam, x'apni heb'ya' yi'a'toj Comam yalni, haxca xhalot ta xax somk'atoj yul swi'. 22Ay hunk'aan heb'naj cuywaom yin̈ sley ya' Moisés speto Jerusalén, x'apni b'etu', xalni pax heb'naj: —Naj ti' chu yiniloj naj yespíritu naj matzwalil yin̈ anma haxca naj Beelzebú, yahaw yespíritu naj matzwalil tu' aycoj yin̈ naj. 23Hactu' xu yawten Comam heb'naj, xalni Comam: —¿Tom chu spohnitoj sb'a naj matzwalil cheyab'ecoj? 24K'inaloj hune' con̈ob' spohtoj sb'a cha'nican̈ howal, ta chaltu' hune' con̈ob' tu' chim c'ayiloj. 25B'oj hune' n̈ahil anma stzab'coj ya'ni howal, ẍpaxoj yip. 26Hacmitu' ye naj matzwalil, ta yin̈tic'a yetb'i naj cha'coj howal, pohb'ilay sb'a naj chaltu', chim paxoj yip naj cat stan̈ojiloj scan̈il ye naj. 27K'inaloj ay hunuj naj caw ay yip, machmi hunuj naj elk'om chu yoctoj yul yatut naj cat yelk'aniltij tzet ay naj. Hatcachan ti' ta ẍc'oji naj elk'om tu' sc'alniay naj yahaw n̈ah tu', waltu' chim yu yelk'aniltij naj tzet ay naj. 28Yin̈ caw yeli ẍwal teyetan, tzan tzet hunuj muleal chu anma, b'oj ta ay tx'oj chala, ẍto yu ya'ni tan̈oj Comam Dios smul. 29Yaja' mac ẍhalni tx'oj yin̈ Comam Espíritu Santo, matxa cha'a' tan̈oj Comam Dios smul hune' tu'. Chi'a'cantoj smul yin̈ stohb'alk'inal. 30Xal Comam hune' tu', haxca chal heb'naj tu' ta aycoj naj matzwalil yin̈ Comam. 31Ha' x'apni smi' Comam Jesús b'oj hej yuẍtaj ilwal yin̈, mach x'octoj heb'ya' yul n̈ah, ton̈e xactoj heb'ya' ab'ix ta ch'eltij Comam. 32Xol tx'ihal anma tz'on̈anictoj sc'atan̈ Comam tu', ay mac xhalni: —Mam Cuywaom, ayictij ha mi', hej hawuẍtaj b'oj hej hawanab' sti' pulta, chul heb'ya' hach yila'. 33Xta'wi Comam: —¿Mactaxca hin mi' cheyab'ecojan, mactaxca wuẍtajan?. 34X'ec' sat Comam yin̈ anma tz'on̈an shoyanil tu', xalni Comam: —Ha' mac ayictij ti', ha' hin mi'an, ha' wuẍtajan. 35Haxca mac ẍyijyen tzet choche Comam Dios, k'a' wuẍtajtoan, k'a' wanab'toan b'oj k'a' hin mi' toan, .


Copyright
Learn More

will be added

X\