SAN MARCOS 2

1Lawi yec'toj hayeb' tz'ayic, x'apnipax Comam Jesús yul con̈ob' Capernaum. X'ab'eot ta ay Comam yul yatut, 2yuxin tx'ihal anma xyamicoj. Caw xnohiloj yul n̈ah, hasta sti' pulta tenantoj anma. Chalni Comam stzoti' Comam Dios tet mac yaman tu'. 3X'apni can̈wan̈ heb'naj i'n̈e hune' naj mach sb'ili snimanil, 4yaja' machu yoctoj heb'naj b'ay ay Comam. Haxca caw nohnaj te n̈ah tu' yu anma, yuxin x'ahtoj heb'naj yac'alil swi' te' n̈ah. Sholnican̈ heb'naj hanic' swi' te' yetc'ulal b'ay ay Comam, snon̈chanaytij heb'naj naj yawub' tu' b'oj swayb'al b'ay ay Comam tu'. 5Xilni Comam ta caw ẍcawxi sc'ul heb'naj yin̈, xalni tet naj yawub' tu': —Wal tinan̈ xtan̈can ha mul. 6C'uxan ayictoj hunk'aan heb'naj cuywaom yin̈ sley ya' Moisés yul n̈ah tu'. Ha' xab'en heb'naj tzet xal Comam, xb'isb'on yanma heb'naj, chalni: 7¿Tzet yuxin hacti' yalni naj ti'? Hune' naj ti' slahb'ac'oj sb'a naj yin̈ Comam Dios. Mach mac chu ya'nican tan̈oj co mul, hatcachan Comam Dios. 8Yaja' yohtajxana Comam tzet nab'il yu heb'naj, yuxin xala: —¿Tzet yuxin sb'isb'oncoj he c'ul win̈an? 9¿B'aytet k'a' sub'utaj jalni cat yijni sb'a tet naj tx'oj ye ti' cheyab'e: Xtan̈can ha mul, mato Ahan̈ lin̈noj ican̈ ha wayb'al cat ha paxtoj? ta con̈chi. 10Tinan̈ chin yeb' heyila'an ta Hayin Ab'ilintij yu Comam Dios xol jet-anmail ti'an, chu wa'nican tan̈oj smul anma satyib'an̈k'inal ti'an. 11Lawitu' xalni Comam tet naj tu': —Ahan̈ lin̈noj, ican̈ ha wayb'al, cat ha paxtoj ta watut. 12Ha' xab'en naj hune' tu' x'ah lin̈noj naj yin̈ lemb'il, xi'ni naj swayb'al yin̈ sat anma, xpaxtoj naj. Ha' xilni anma hune' tu', xc'ayiloj sc'ul, ichi yanicoj smay Comam Dios, chalni: —Mach hunecoj chu hune' haca' lan̈an jilni ti'. 13Lawitu', xto Comam Jesús ti' ha' lago Galilea. Tx'ihal anma x'apni sc'atan̈, scuyni anma tu'. 14Yet x'ec'toj Comam sc'atan̈ naj Leví, sc'ahol naj Alfeo, tz'on̈anayoj naj b'ay chiloj naj ch'en melyu yet tohlab'al yin̈ anma. Xalni Comam tet naj: —Ocan̈ tzujnuj win̈an. Hatic'a tu' x'ah lin̈noj naj, x'oc tzujnuj naj yin̈ Comam. 15Yet tz'on̈an Comam wa'oj yatut naj Leví b'oj heb'ya' ẍcuywi yin̈, tx'ihal pax heb'naj iomiloj melyu yet tohlab'al yin̈ anma, xawte naj wa'oj, b'oj hunmajanxa heb'naj mat c'uluj yecoj. Caw tx'ihal anma tzujan yin̈ Comam. 16Ay hunk'aan heb'naj cuywaom yin̈ sley ya' Moisés, fariseo heb'naj. Ha' xilni heb'naj to ẍwa' Comam b'oj heb'naj tu', xalni heb'naj tet heb'ya' ẍcuywi yin̈ Comam: —¿Tzet yuxin ẍwa' he cuywaom ti' b'oj heb'naj mat c'uluj yecoj?. 17Ha' xab'en Comam yalni heb'naj, xta'wi Comam: —K'inaloj hune' naj an̈lom tinan̈, ¿tox anma c'ul ye chan̈te naj? To ha' anma tx'oj ye sc'ul chan̈te naj. Mach xquin hul wawte' anma chalan ta t'in̈an yecoj. To yu anma xtxumniloj ta ahmul, yuxin xquin hulan. 18Yet hunec, aycoj heb'ya' ẍcuywi yin̈ ya' Juan syijyen tz'ayic ayuno, b'oj heb'naj fariseo. Yuxin x'apni hunk'aan heb'naj sk'amb'e' tet Comam Jesús: —Syijye heb'naj tzujan yin̈ ya' Juan b'oj heb'naj fariseo ayuno. ¿Tzet yuxin mach syijye heb'naj ẍcuywi tawin̈ ti'?. 19Xta'wi Comam: —K'inaloj ta ay hunuj mohilal. ¿Tox mach ẍwa'oj heb'naj awteb'il tu' ta aycoj naj mohyom xol heb'naj? 20Ẍto apnoj tz'ayicalil b'ay ch'ilaxojiloj naj ẍmohyi tu' xol heb'naj, waltu' ch'ocoj heb'naj syijye' ayuno. 21Haca' hunuj xil k'ape caw matxa yip, aycoj hunuj holan yin̈, machu yalaxcoj hunuj k'ape ac' sb'ujiloj, haxca ha' ẍchac'anb'oj b'uj tu' cat smoc'oj, k'a' nimejal tom chub'cuj hopan yin̈. 22Machca mac ch'aniaytoj vino matto howb'inajoj yul no' xil tz'um tx'uy yeyi, haxca ha' ẍhowb'ojiloj, ẍlin̈moojtoj no' xil tz'um tu' yu, cat yetaxojtoj scamajanil, ha' ye vino, ha' ye no' tz'um. Yuxin yuln̈e no' ac' tz'um ch'aytoj vino matto howb'inajoj. 23Yet hune' tz'ayic xewb'al, x'ec'toj Comam Jesús b'oj heb'ya' ẍcuywi yin̈ yul hune' b'eh ch'ec'toj xol ixim trigo, sk'ahniloj heb'ya' b'ay aycoj sat ixim slob'. 24Yuxin xal heb'naj fariseo tet Comam: —¿Tzet yuxin ẍmunla heb'naj hawetb'i ti' schilni heb'naj ixim trigo slob' yin̈ tz'ayic xewb'al? Haxca heyohtaj to mat sleyaloj juni hune' ti' yin̈ tz'ayic xewb'al. 25- 26Xta'wi Comam: —¿Tox maxto cheyil tzet tz'ib'n̈eb'il yin̈ tzet xa'le ya' David yet aycoj naj Abiatar swi'aloj yin̈ heb'naj sacerdote? Ha' xn̈ohchacan̈ ya' b'oj mactaj tzujan yin̈, x'octoj ya' yul yatut Comam Dios swanitoj ya' ixim pan xahann̈eb'ilxa b'oj yetb'i. Wal yeyi han̈c'a heb'naj sacerdote sje swani ixim tu'. 27Xacan Comam Dios tz'ayic xewb'al yu sc'ulaloj yet anma, matoj yu yocnicoj anma tet tz'ayic xewb'al, yuxin xcani. 28Hayin ti'an chu walni tzet wal juni yin̈ tz'ayic xewb'alan, haxca hayin Ab'ilintij yu Comam Dios xol jet-anmail ti'an, yahaw hin yin̈ hune' ti'an.


Copyright
Learn More

will be added

X\