SAN MARCOS 16

1Haxa yet islahwi istz'ayical xewilal xin, islok'ni ix María ah Magdala yeb ix María ismi' naj Jacobo, yeb ix Salomé huntek'an an̈ caw xuk' sam yu yanico ebix yin̈ isnimanil Comam. 2Haxa yin̈ caw sahab sac'ayal yin̈ babel tz'ayic yin̈ semana xin, isto ebix bay mujlax Comam; ha' caw yahilo tz'ayic yapni ebix bey tu'. 3Yallen ebix tet hunun: —¿Mactaxca chiinilo ch'en ayco ismajilo isti' bay ayicto Comam? ẍi ebix. 4Haxa yet yilniti ebix matxa ayoco hune' ch'en niman ch'en tu' ismajilo bay alaxicto isnimanil Comam. 5Hayet yocto ebix yul ch'en xin, yilni ebix hune' naj tzeh tz'on̈anayo yin̈ cowatx'k'ab yulicto ch'en, caw sajhopon̈e xil isk'ap naj aycoj, caw xin nimajal istel yoj xil isk'ap naj tu'. Caw xiwcan̈ ebix yet yilni ebix naj. 6Yalni naj tet ebix: —Mach chexxiwi, wohtajan tato Comam Jesús ah Nazaret chesayic'oj, Comam alaxcan̈ yin̈ culus. Xaitzitzbican̈ Comam, matxa Comam bey ti'. Ilwec'anab bay alaxicti Comam. 7As halwe tet ebnaj iscuywom Comam yeb tet naj Pedro tato chibabi apno Comam bey Galilea tesataj, ha' bey tu' xin cheyil yin̈ Comam haca'tic'a yu yalnicano teyet, ẍi naj. 8Lahwi tu' xin, yelti lemna ebix bey tu', isto ebix, toxan̈e xin chiluylun ebix yu xiwquilal. Machi mac tet xin yal ebix, yuto caw xiw ebix. 9Hayet yitzitzbican̈ Comam yin̈ caw sahab sac'ayalil yin̈ babel tz'ayic yin̈ semana, ha' tet ix María ah Magdala bay isye isba Comam babel, ix bay yilo Comam hujwan̈ ischejab naj matzwalil. 10Lahwi tu', isto ix yalno tet ebnaj ec' tzujtzun yinta Comam ta isye isba Comam tet ix. Ha' ebnaj tu' caw bisc'ulal ye ebnaj yeb xin caw chiok' ebnaj. 11Hayet yaben ebnaj ta itzitzbican̈ Comam yeb ta isye isba tet ix, caw mach yayto ebnaj yul yanma. 12Tzujan tu' xin, isyenipaxo isba Comam tet cawan̈ iscuywom yet lan̈an isto bey hune' aldea; nan yu isyenipaxo isba Comam tet ebnaj. 13Isto ebnaj cawan̈ tu' yalno tet huntek'anxa ebnaj iscuywom Comam, yaja' maẍtic'a yapaxayto ebnaj yul yanma. 14Haxa yin̈ tzujanilxa xin isyeni isba Comam Jesús tet ebnaj hunlahon̈wan̈ iscuywom yet ayco ebnaj wa'o sat meẍa, iscachlax ebnaj yu Comam yu chicabcon isc'ul ebnaj; mach yayto ebnaj yul yanma yin̈ tzet yal ebnaj xailni ta xaitzitzbican̈ Comam. 15Yalnicano Comam tet ebnaj: —Asi'we sunil yul sat yiban̈k'inal ti' cat heyalnic'o Tzoti' c'ul yet colbanile tet sunil anma. 16Ha' mac chianayto yul yanma cat yahcano ha' iswi', chicolchahi, yaja' wal mac mach chianayto yul yanma, chiay isya'tajil yiban̈. 17Ha' huntek'an c'aybalc'ule ti' chioc yechelo tet mac chianayto yul yanma, chiyilo ebnaj ischejab naj matzwalil yin̈ anma yin̈ inbihan, cat istzotel ebnaj yin̈ nan abxubal. 18Waxan̈ca chistzab ebnaj no' laba, waxan̈ca chiak'lax veneno yuc'u' ebnaj, matzet chu ebnaj. Hayet chanayo ebnaj isk'ab yiban̈ anma ya'ay, cat iscawxicanocan̈, ẍi Comam. 19Lahwi yalnicano Comam Jesús sunil huntek'an tu' tet ebnaj iscuywom, yilaxto Comam satcan̈, yoc tz'on̈no Comam yin̈ iswatx'k'ab Comam Dios. 20Lahwi tu' xin, isto ebnaj iscuywom Comam tu' yalnoc'o Istzoti' Comam Dios sunil yul sat yiban̈k'inal. Caw xin ayco Comam Dios yetbiho ebnaj, yeb caw chioc yip tzoti' chalic'o ebnaj tu' yu ej c'aybalc'ule yeb yu yechel yip Comam chisye ebnaj.

will be added

X\