SAN MARCOS 15

1Ha' sajb'iloj, syamb'an sb'a heb'naj swi'al yin̈ heb'naj sacerdote b'oj heb'naj icham winaj swi' con̈ob' b'oj heb'naj cuywaom yin̈ sley ya' Moisés. Sunil heb'naj ti' swi'al con̈ob' lahti'wom. Hatic'a heb'naj ẍchejni c'al-laxojayoj Comam, xinitoj heb'naj yin̈ sat naj Pilato. 2Sk'amb'en naj tet Comam: —¿Tom yeli srey anma Israel haweyi? Xta'wi Comam: —Hachtic'a lan̈an hawalni. 3Heb'naj swi'al yin̈ heb'naj sacerdote, tx'ihal tzet schilb'a heb'naj yib'an̈ Comam. 4Lawitu' sk'amb'en pax naj Pilato tet Comam: —¿Tox mach hawab'e hantaj tzet schilb'a heb'naj ha muluj? ¿Tzet yu machach ta'wi?. 5Yaja' maẍtic'a xta'wi Comam, yuxin caw xc'ayiloj sc'ul naj. 6Ẍtic'a sb'ejtzo naj Pilato hunuj naj presuwom yin̈ hunun k'in̈ b'ay ẍnalaxtij tzet xu yel con̈ob' israel b'et Egipto, mac chal sc'ul anma ha' ẍb'ejtzolaxi. 7Ay hune' naj Barrabás sb'ih, aycoj presu b'oj hunk'aanxa yetb'i. Heb'naj ti' xpaq'uicoj yin̈ naj yahaw con̈ob', b'oj ay scamom heb'naj x'oqui. 8Xyamicoj anma, x'oc sk'annoj tet naj Pilato ta sb'ejtzo' naj hunuj naj presuwom haca' chute yin̈ hunun k'in̈. 9Xta'wi naj tet anma: —¿Chim sje' he c'ul chin b'ejtzo' naj Jesús he reyal ti'an?. 10Hactu' xute naj yalni, haxca yohtaj naj ta ton̈e ẍchiwacoj sc'ul heb'naj swi'al yin̈ heb'naj sacerdote yin̈ Comam, yuxin xacoj heb'naj Comam yul sk'ab' naj. 11Heb'naj swi'al yin̈ heb'naj sacerdote tu', x'oc heb'naj ya'a' sc'uluj sunil anma, yun̈e sk'anni heb'naj ta naj Barrabás b'ejtzolaxi. 12Hactu' xu sk'amb'en pax naj Pilato tu' tet anma: —¿Tzet ẍtan̈ naj xhal-lax he reyal ti' chaltu'?. 13X'ah xayna anma xalni yin̈ hacti': —¡Acan̈ naj yin̈ culus! . 14Xalni pax naj Pilato: —¿Tzet tx'ojal xu naj?. Yaja' xcam ah xayna anma xalni heb'jetb'i: —¡Acan̈ naj yin̈ culus! . 15Naj Pilato tu', k'a' ẍto yoche naj scan c'ulal yin̈ sat anma, yuxin syijye naj sb'ejtzon naj Barrabás, schejni naj hatelaxoj Comam, xanic'oj naj Comam yul sk'ab' heb'naj soldado yu yalaxcan̈ yin̈ culus. 16Lawitu' xinitoj heb'naj soldado tu' Comam yamak' cuartel, syamb'ancoj heb'naj yak'b'il heb'naj soldado ay b'etu'. 17Xanicoj heb'naj hune' k'ape yin̈ Comam haca' chacoj heb'naj rey yin̈. Shalni heb'naj hune' corona tx'ix, xanicoj heb'naj yin̈ swi' Comam. 18Stzab'nicoj heb'naj yetlicoj yin̈ Comam, chalni heb'naj: —Tzalaan̈ hach sreyal anma Israel. 19Cha'ni heb'naj hune' te' ah yin̈ swi' Comam, stzub'n̈en heb'naj. Ch'ec' jahla heb'naj yin̈ sat, shak'en heb'naj. 20Lawi yetlicanoj heb'naj yin̈ Comam, xiniloj heb'naj hune' k'ape xacoj yin̈ tu', xanicoj heb'naj xil sk'ap yin̈. Lawitu' xinitoj heb'naj Comam ya'a'can̈ yin̈ culus. 21Ay hune' naj Simón sb'ih ah Cirene naj, smam naj Alejandro b'oj naj Rufo, ye naj, speto naj sb'ey munil. Ha' x'ec'toj naj yin̈ sat heb'naj i'n̈e Comam, schilb'an heb'naj yinitoj naj sculus Comam yin̈. 22Xinitoj heb'naj Comam b'et hune' lugar Gólgota sb'ih, ha' chaliloj sb'ih hune' tx'otx'otx' tu', Sb'ajil Swi' Camom. 23X'a'lax vino calb'il b'oj hunk'aan te' an̈ mirra sb'ih, yuc'u Comam, yaja' mach xuc'u. 24Lawitu' xanican̈ heb'naj Comam yin̈ culus, x'oc heb'naj soldado yilwenoj mactaj heb'najil ch'i'nojcan hunun majan̈ xil sk'ap Comam. 25Yin̈ yahtz'ayical, xacan̈ heb'naj Comam yin̈ culus. 26Spahnicoj heb'naj hune' ni'an ak'in yin̈ swi' sculus Comam, b'ay tz'ib'n̈eb'ilcoj tzet yuxin ẍcami, chalni: Srey anma israel, chalicoj yin̈. 27- 28Ay cawan̈ heb'naj elk'om xet ah Comam yin̈ culus, hune' naj yin̈ swatx' Comam hunxa naj yin̈ smec. 29Anma ch'ec' b'etu' sb'ile swi', ẍpohli yin̈ Comam, chalni heb'naj: —Hachti' cha huchayoj yatut Comam Dios cat hawanican̈ selel yin̈ oxeb' tz'ayic, hawalni. 30Colaytij ha b'a yin̈ culus ti' jila'an. 31Hactu' heb'naj swi'al yin̈ heb'naj sacerdote, b'oj heb'naj cuywaom yin̈ sley ya' Moisés, x'oc heb'naj stzeye Comam, chalni heb'naj tet hunun: —Tx'ihal mac scol naj, wal naj, machu scolniaytij sb'a naj. 32Ta scolaytij sb'a naj yin̈ culus ti' yin̈ co sat, waltu' ẍja' yuluj co c'ul ta ha' naj Cristo co reyal. B'oj heb'naj aycan̈ yin̈ culus sc'atan̈ Comam, ahun heb'naj tx'oj chal yin̈ Comam. 33Ha' x'apni yin̈ chuman, sunil sat tx'otx'otx' xk'ejholiloj masanto x'apni yin̈ sk'ejb'alil. 34Yalan̈to maxto sajb'iloj tu' x'awican̈ Comam Jesús yin̈ ip, xalni Comam: —Eloí, Eloí ¿lama sabactani?. Ha' chaliloj: Hach hin Diosan, hach hin Diosan, ¿tzet yuxin chin ha tin̈chacanan? ẍi Comam. 35Ha' xab'en heb'naj ahayoj b'etu' tzet xal Comam, xalni heb'naj: —Ab'ewej, lan̈an yawten naj naj Elías schejab'lom Comam Dios. 36Xto hune' naj yin̈ an̈e slab'anoj hune' esponja xol vino caw pah, xanicoj naj yin̈ swi' hune' te' ah, xaniatoj naj yin̈ sti' Comam, xalni naj: —Jechmawej, jila' ta chuluj naj Elías tu' yi'a'aytij naj yin̈ culus. 37Lawitu' x'awi Comam yin̈ ip, xcamiloj. 38K'ap niman k'ape aycan̈ yul yatut Comam Dios, cab'n̈e x'aycoj k'ap stzilmohayoj. Xtit stzilb'enal swi' masanto x'ay sat tx'otx'. 39Ha' xilni naj scapitán heb'naj soldado to hactu' xu xcamiloj Comam, xalni naj: —Yin̈ caw yeli, hune' naj ti' Sc'ahol Comam Dios ye naj. 40Ay heb'ya' nahatn̈e t'an̈antij. Xol heb'ya' tu' aycoj ya' María ah Magdala, ya' Salomé, b'oj ya' María smi' ya' Jacobo k'a' txanto, b'oj ya' José. 41Hunk'aan heb'ya' ti' tzujantic'a yin̈ Comam b'oj xcolwa heb'ya' yin̈, yet ay b'et Galilea, b'oj haywan̈ heb'ya' hun xu yapni b'oj Comam b'et Jerusalén. 42- 43Ayto yay numnayi x'apni hune' ya' José sb'ih ah Arimatea. Ha'hun ya' xol heb'naj swi'con̈ob', caw ay smay ya' yul sat heb'naj, chechma pax ya' yocoj Comam Dios Jahawoj. Yin̈ hune' sk'ejb'alil tu' sk'uycan sb'a anma haxca ch'ichicoj tz'ayic xewb'al, yuxin xto ya' tzoteloj tet naj Pilato, maẍtic'a ninoj xiw ya' sk'anni ya' snimanil Comam Jesús smuju'. 44Xc'ayiloj sc'ul naj Pilato tu' xab'en naj yalni ya' ta camnajxa Comam, yuxin xawte naj naj scapitán heb'naj soldado, sk'amb'en naj ta yeli xax cam Comam. 45Xalni naj capitán tu' to yeli, hactu' xu yalni naj ta chu yiniaytij ya' José snimanil Comam yin̈ culus. 46Lawitu' slok'ni ya' hune' k'ap k'ape lino sb'ih ẍb'ac'laxojcoj yin̈ Comam. Xiniaytij ya' Comam yin̈ culus, sb'ac'nicoj ya' k'ape tu' yin̈ Comam, xanictoj ya' snimanil Comam yul hune' ch'en ch'en tz'ujb'il, xanicoj ya' hune' ch'en pak'an ye smajiloj sti' b'ay x'octoj snimanil Comam tu'. 47Ya' María ah Magdala b'oj ya' María smi' ya' José xil heb'ya' b'ay xmuji Comam.


Copyright
Learn More

will be added

X\