SAN MARCOS 14

1Cab'to tz'ayic b'ay ch'ichi k'in̈ b'ay ẍnalaxtij tzet xu yel con̈ob' israel b'et Egipto, yet ẍwalax ixim pan machcoj yan̈al, sk'umlan sb'a heb'naj swi'al yin̈ heb'naj sacerdote, b'oj heb'naj cuywaom yin̈ sley ya' Moisés, tzet chu stzab'noj heb'naj Comam Jesús yin̈ ewantaj cat spotx'noj heb'naj Comam yalni. 2Chalni heb'naj: —Machu co tzab'ni naj yin̈ k'in̈ ti' haxca yamanc'oj anma, tajca ẍpaq'uicoj heb'naj jin̈. 3Yet ay Comam Jesús Betania, yatut ya' Simón aytic'acoj yab'il lepra yin̈, c'uxan lan̈an swa' Comam, yet x'apni hune' ix b'oj hune' perfume caw xuk' sam, nardo sb'ih, caw ay stohol, alabastro sch'enal. Sc'utzniltoj ix snuk' frasco tu', xaniatoj ix hune' an̈ xuk' sam tu' yin̈ swi' Comam. 4Xol mac ayic'toj b'etu' ay mac xchiwacan̈ sc'ul, xalni tet hunun: —¿Tzet yuxin ch'etalaxtoj hune' an̈ caw xuk' sam ti'? 5Ec'b'al mi oxeb' ciento denario stohol, ¿tox machu xtxon̈laxtoj cat yitxk'alaxtoj stohol yin̈ anma meb'a'? ẍi heb'ya'.Tx'oj ẍhalot yin̈ ix. 6Yaja' xal Comam: —Mach he cach ix ti'. Mach che ya' tacoj sc'ul ix. Hune' chu ix win̈ ti'an caw c'ul. 7Haxca anma meb'a' ayn̈etic'acoj te xol, stohb'alk'inal chu he colwa yin̈. Walinan mat ton̈c'aoj ayinc'oj te xolan. 8Ix ti', cha' ix hantaj c'uxan tzujchaapnoj yu. Yalan̈to maẍto chin mujian chanicoj ix yan̈al hin nimanilan. 9Yin̈ caw yeli ẍwal teyetan, tzan b'ay ẍhal-laxoj tzoti' yet colb'anil satyib'an̈k'inal ti', ẍhal-laxoj pax hune' chu ix win̈ ti'an, yu scancanoj yalb'aniloj ix. 10Naj Judas ah Queriot yetb'i heb'ya' ẍcuywi yin̈ Comam Jesús, xto naj tzoteloj b'oj heb'naj swi'al yin̈ heb'naj sacerdote tzet chu yanojcoj naj Comam yul sk'ab' heb'naj. 11Caw stzala heb'naj yab'en tzet chal naj Judas tu', xal heb'naj ta ch'a'laxoj stohol naj. Yuxin x'oc naj saya' tzet chu yanicoj Comam yul sk'ab' heb'naj. 12Ha' x'apni b'ab'el tz'ayic k'in̈ b'ay ẍnalaxtij tzet xu yel con̈ob' israel b'et Egipto, b'ay ẍwalax ixim pan mach yan̈al, ha' hune' tz'ayic tu' b'ay ẍpotx'lax no' canelu c'uxlaxoj. Yuxin sk'amb'e heb'ya' ẍcuywi yin̈ Comam Jesús tet: —¿B'ay chawoche ta ẍco watx'e ita ẍco lob' yin̈ hune' k'in̈ ti'?. 13Hactu' xu yanitoj Comam cawan̈ heb'ya', xalni tet heb'ya': —Aswej yul con̈ob', ha' che yilnoj yec'ojtoj hune' naj i'n̈e hune' chok' ha' ha'. Ocan̈wej tzujnuj yin̈ naj. 14Ha' yet ch'apnoj naj, cheyalnoj tet naj yahaw n̈ah tu': Chal ya' co Cuywaoman: ¿B'ami ay hune' cuarto b'ay chin wa'oj b'oj heb'ya' wetb'i yin̈ k'in̈ snab'aniltij scolb'anil heb'ya' jichmam? ẍi ya', quexchinaoj. 15Cat syenoj naj hune' cuarto nimejal aycoj yin̈ scab' piso teyet, caw watx'eb'ilxa yul cuarto tu'. Hat che watx'e' tzet ẍco lob' tu'. 16Lawitu' xto heb'ya' cawan̈ tu' yul con̈ob' Jerusalén, c'uxan x'elicoj haca' xute Comam yalni. Swatx'en heb'ya' ita ẍlolaxoj yin̈ k'in̈ tu'. 17Yet lan̈anxa yay numnayi, x'apni Comam b'oj heb'ya' lahun̈wan̈xa. 18Yet ayxactoj Comam b'oj heb'ya' wa'oj yin̈ meẍa, xalni Comam: —Yin̈ caw yeli ẍwal teyetan, mac lan̈an swa' co xol ti', ha' chin anojcoj yul sk'ab' camicalan. 19X'oc b'isc'ulal yu heb'ya' yab'en hune' tu', yuxin hununtajil xu sk'amb'en heb'ya' tet Comam, chalni heb'ya': —¿Tom hayinan? . 20Xta'wi Comam: —Te xol hex cab'lan̈wan̈ hexti', ay hune' mac hun chin lab'ah sti' hin pan xol yal ita ti' b'ojan, ha' chin anojcoj yul sk'ab' camicalan. 21Yilal yijni sb'a tzet tz'ib'n̈eb'ilcan win̈ hayin Ab'ilintij yu Comam Dios xol jet-anmail ti'an ta chin camojan, yaja' c'antaj naj chin anojcoj yul sk'ab' camicalan. K'a' c'ul mi ta mach xpitzc'a naj. 22Yet lan̈an swa' Comam b'oj heb'ya', xinican̈ ixim pan, xa'ni yuch'antioẍ tet Comam Dios, x'oc sk'axponojay ixim. Lawitu' xitxk'antoj Comam ixim yin̈ heb'ya', xalni Comam: —Tiwej cat he wani, hune' ti' hin nimanilan 23Lawitu' xinican̈ ch'en copa, xa'ni pax yuch'antioẍ tet Comam Dios, xa'ni tet heb'ya', sunil heb'ya' x'uc'ni. 24Xalni pax Comam: —Ha' ti' hin chiq'uil ẍt'in̈b'anojcan slahc'ul Comam Dios b'oj hexan; ẍmalojtoj yu sc'ulaloj yet tx'ihal anma. 25Yin̈ caw yeli ẍwal teyetan, matxa hunec'oj ẍwuc'u' hune' vino ti'an hato yet ẍwuc'nuj yin̈ ac' hunecxaan yet ch'ocoj Comam Dios Jahawoj. 26Lawi sb'itn̈en Comam hunk'aan Salmo b'oj heb'ya', xto b'oj heb'ya' yin̈ sc'ul witz Olivo. 27Xalni Comam tet heb'ya': —Te hunil ẍcab'conojcan̈ he c'ul win̈an, cat heyelojcan̈ yin̈ hune' ak'b'al ti', haxca chalayoj yul Yum Comam Dios: Chin potx'o' naj tan̈eom caneluan cat spaxoj tiẍna no', ẍiayoj. 28Yaja' yet chin pitzc'aojcan̈an chin b'ab'ojtoj Galilea te satajan. 29Xalni ya' Pedro tet Comam: —Waxan̈ca sunil mac ẍcab'conojcan̈ sc'ul tawin̈, walinan mach scab'concan̈ in c'ulan. 30Xalni Comam: —Yin̈ caw yeli ẍwal tawetan, hatic'a yin̈ hune' ak'b'al ti', yalan̈to maẍto ch'ok' no' chiyo scayel, oxel chawala' ta mat hin hawohtajojan, . 31Cawn̈etic'a swi' ya' chalni: —Waxan̈ca hayin hun chin cam tawin̈an, mach wala'an ta mat hach wohtajojan. Sunil heb'ya' hactu' yalni. 32Lawitu' xto Comam Jesús b'oj heb'ya' xol tz'unub' ay b'et Getsemaní. Xalni Comam tet heb'ya': —Canan̈wej tz'on̈noj b'eti' c'un hin to wa'noj woraciónan. 33Xinitoj Comam ya' Pedro, ya' Jacobo b'oj ya' Juan yin̈. Xhitztoj Comam b'oj heb'ya' hanic'xa. Ha' tu' x'ichi stac' sc'ul Comam, x'oc b'isc'ulal yu, 34Xalni tet heb'ya': —Caw etza chin camiloj yu b'isc'ulalan. Canan̈wej b'eti', iwejiloj he wayan̈ win̈an. 35Xhitztoj Comam ni'anxa sataj heb'ya', x'ay jahnoj, x'aycan xulnuj sat tx'otx', sk'anni tet Comam Dios ta ay tzet chu yec'toj hune' sya'tajil chul yib'an̈. 36Chalni Comam yin̈ yoración: —Mam, hachti' sunil chu hawu, colin tet hune' sya'tajil chul win̈ ti'an, yaja' mat haca'oj chal hin c'ulan, to haca' chal ha c'ul. 37Ha' xmeltzo Comam b'ay ay heb'ya' oxwan̈, xax waynac'oj heb'ya'. Xalni Comam tet ya' Pedro: —Simón, ¿wayoj chawu? ¿Mach ninoj chu hawiniloj ha wayan̈ hunuj orail? 38Iwejiloj he wayan̈ cat he yoc yin̈ oración, haxin̈wal machex ay yin̈ xtx'ojal. Yin̈ caw yeli, wal heyanma t'in̈an yalni, yaja' mach ẍtecha ilweb'al yu he nimanil. 39Lawitu' xto pax Comam ya'noj yoración hunecxa. Hune'n̈etic'a chal Comam. 40Xmeltzo Comam b'ay ay heb'ya', yaja' wayojxa chu pax heb'ya', haxca caw ib'il heb'ya' yu wayan̈. Yuxin mach xtxumcha yu heb'ya' tzet chu sta'wi tet Comam. 41Ha' xmeltzo Comam sc'atan̈ heb'ya' yin̈ syoxelxa sb'ey ya'noj yoración, xalni tet heb'ya': —¿Tom yehn̈e he wayi b'oj he xewi? C'ojb'ilxa, haxca hayin Ab'ilintij yu Comam Dios xol jet-anmail ti'an, x'apni yorail b'ay chin alaxojcoj yul sk'ab' anma tx'ojan. 42Ahan̈wej wanoj, ton̈wej. Lan̈an yul naj chin anojcoj yul sk'ab' anma tu'an. 43Lan̈anto b'in yalni Comam Jesús hune' tu' x'apni naj Judas, naj yetb'i heb'ya' ẍcuywi yin̈ Comam. Tx'ihal heb'naj tzujan yin̈ naj. Ay heb'naj ib'il yespada yu, ay heb'naj te' ib'il yu. Heb'naj swi'al yin̈ heb'naj sacerdote x'anitoj heb'naj b'oj heb'naj cuywaom yin̈ sley ya' Moisés b'oj heb'naj swi'con̈ob'. 44Naj Judas tu', xal naj tet heb'naj tzab'waom mac stzab'a' heb'naj: —Naj chin tz'oho'an, ha' naj che tzab'a'ayoj, cat heyinitoj naj. C'ul cheyute' he c'alni naj. 45Yuxin man̈e apni naj, xalni naj: —Mam Cuywaom. Stz'ohni naj Comam haca' tioẍb'alil. 46Hactu' xu stzab'niayoj heb'naj Comam. 47Ha' xilni hune' ya' yetb'i Comam, xiniatij ya' yespada yul yatut, stzoc'niltoj ya' hune' xtxiquin naj schejab' naj swi'al yin̈ heb'naj sacerdote. 48Xalni Comam tet heb'naj tzab'waom tu': —Ib'il heyespada b'oj he te' chex hul hin he tzab'nojtojan. ¿Tox elk'omin teyetan? 49Hunun tz'ayic ayin te xolan, quex hin cuyni yamak' yatut Comam Diosan, yaja' mach hunecoj xquin heyitoj presuan. Yaja' tinan̈, yun̈e yijni sb'a tzet tz'ib'n̈eb'ilcan win̈an, yuxin chu hune' ti'. 50Lan̈antic'a tu' x'elcan̈ heb'ya' ẍcuywi yin̈ Comam, xcan Comam schuquil yul sk'ab' heb'naj. 51Yaja' ay hune' naj tzeh tzujan yin̈ Comam, han̈c'a hune' sábana aycoj yin̈ naj, stzab'otayoj naj. 52Yaja' scoliloj sb'a naj, xcan k'ap sábana, t'eb'anxa naj x'el naj yin̈ an̈e. 53Lawitu', x'iottoj Comam Jesús yin̈ sat naj yahaw yin̈ heb'naj sacerdote. Hat syamb'a sb'a sunil heb'naj swi'al yin̈ heb'naj sacerdote, heb'naj swi'con̈ob', b'oj heb'naj cuywaom yin̈ sley ya' Moisés. 54Wal ya' Pedro nahat tzujann̈e ye ya' yin̈ Comam masanto x'apnican ya' b'ay x'oc Comam yin̈ sat naj swi'al yin̈ heb'naj sacerdote tu'. Hat xcan tz'on̈noj ya' amak' k'aẍnoj yin̈ k'a' sc'atan̈ heb'naj ẍtan̈en yatut Comam Dios. 55Heb'naj swi'al yin̈ heb'naj sacerdote tu' b'oj sunil heb'naj lahti'wom x'oc heb'naj saya' mac cha' sb'a yin̈ heb'naj yu scawxicoj smul Comam yib'an̈, yun̈e chu spotx'ni heb'naj Comam yalni, yaja' mach mac xchalo yu heb'naj. 56Tx'ihal heb'naj xa' sb'a yin̈ heb'naj shob'nican̈ lek'ti'al yin̈ Comam, yaja' mach scha sb'a tzet chal heb'naj. 57Aytic'a heb'naj x'ah lin̈noj shob'nican̈ lek'ti'al yin̈ Comam, chalni heb'naj: 58—Hayon̈ ti'an, xjab'e yalni naj ti'an: Chin hucha'ayoj yatut Comam Dios watx'eb'il yu anmaan, yin̈n̈e oxeb' tz'ayic ẍwa'a'can̈ hune'xa mat anmaoj ẍwatx'enan, ẍi naj ti'. 59Yaja' maẍtic'a scha pax sb'a tzet chal heb'naj. 60Hactu' xu yah lin̈noj naj swi'al yin̈ heb'naj sacerdote tu' xol heb'naj, xalni naj tet Comam: —¿Tom machach ta'wi yin̈ tzet lan̈an yalni heb'naj tawin̈ ti'?. 61Maẍtic'a xta'wi Comam tet naj. Sk'amb'en naj hunecxa: —¿Tom hachti' Cristo Sc'ahol Comam Dios ẍhal-lax c'ulal?. 62Xta'wi Comam tet naj: —Ho' hayinan, ẍto heyila' wayoj tz'on̈noj yin̈ swatx' Comam Dios Sunil Chu Yuan, cat heyilnoj hin tij satcan̈ xol asun hayin Ab'ilintij yu Comam Dios xol jet-anmail ti'an. 63Man̈e yab'e naj swi'al yin̈ heb'naj sacerdote hune' tzet xal Comam tu', shatz'nitoj naj xil sk'ap syeb'aniloj to tx'oj chab'e naj tzet chal Comam, xalni naj: —¿Tzet to ch'oc testigo ju? 64Hex caw cheyab'e tzet chute naj yalni tzoti' tx'oj yin̈ Comam Dios. ¿Tzet cheyute heyalni? . Sunil heb'naj xhalni ta yilal ẍcam Comam. 65Ay heb'naj x'oc tzub'n̈enoj Comam, smajchen heb'naj sat, smak'ni heb'naj, chalni: —Haliloj mac chach mak'ni. B'oj heb'naj ẍtan̈en yatut Comam Dios smak' heb'naj Comam. 66Hat ahayoj ya' Pedro amak', yet x'apni hune' ix ẍmunla yin̈ naj swi'al yin̈ heb'naj sacerdote. 67Ha' xilni ix ta ahayoj ya' k'aẍnoj, x'oc t'an̈noj ix yin̈ ya', xalni ix: —Hachti', hach hun tzujanach yin̈ naj Jesús ah Nazaret ti'. 68Yaja' xal ya' Pedro ta mat yohtajoj ya' Comam, xalni ya': —Machin txuman tzet chawala. Lawitu' xto ya' sti' pulta, yin̈n̈ena tu' x'ok' hune' no' chiyo. 69Xt'an̈xipaxtoj ix yin̈ ya', xalni ix tet heb'naj ahayoj b'etu': —Hune' naj ti' yetb'i sb'a naj b'oj naj Jesús ti'. 70Yaja' xeb'a' pax ya' scayel. Hunep tu' x'oc heb'naj ahayoj tu' yalnoj tet ya': —Yin̈ caw yeli, hachti' hawetb'i ha b'a b'oj naj Jesús ti', haxca ah Galilea hach. 71Yaja' x'oc ya' stz'acti'n̈e sb'a, chawten ya' sb'i Comam Dios yin̈ tzet chala, xalni ya': —Chab'e Comam Dios, mat wohtajoj hune' naj cheyal ti'an. 72Yin̈n̈ena tu' x'ok' no' chiyo yin̈ scayel. Ha' tu' xtitcan̈ yin̈ sc'ul ya' tzet xal Comam Jesús: Yalan̈to maẍto ch'ok' no' chiyo scayel, oxel chawala' to mat hin hawohtajojan, ẍi Comam. Ha' xtit yin̈ sc'ul ya', x'oc ya' ok'oj.


Copyright
Learn More

will be added

X\