SAN MARCOS 13

1Yet lan̈an yeltij Comam Jesús yamak' yatut Comam Dios, xalni hune' ya' ẍcuywi yin̈: —Mamin, wac'a' nimejtaj ch'en b'oj nimejtaj n̈ah ti'. 2Xta'wi Comam: —Ho', hunk'aan nimejtaj n̈ah chawil ti' ch'ec'oj huynayi, matxa hunuj ch'en ẍcanoj yib'an̈ hune'xa ch'en. 3Lawitu', xto Comam b'oj heb'ya' ẍcuywi yin̈ b'et witz Olivo, x'ay tz'on̈noj b'ay hab'an jilnitoj yatut Comam Dios. Yet schuquil Comam b'oj ya' Pedro, ya' Jacobo, ya' Juan b'oj ya' Andrés, sk'amb'en heb'ya' tet Comam: 4—Ẍjochean chawal jetan b'ak'in̈ chuuj tzet xawal tu'. ¿Tzet taxca ẍyenoj yet lan̈anxa yijnoj sb'a sunil tu'?. 5Xta'wi Comam: —Nann̈e heyu taj cheya' sub'u' he b'a, 6haxca tx'ihal mac chuluj cat shob'nojcoj hin b'ih yin̈an, chalnoj: Hayin ti' Cristo hinan, ẍinaoj heb'naj. Caw tx'ihal mac sub'chaoj yu heb'naj. 7Yet cheyab'enoj sk'umal howal cawil-laj ti' b'oj nahatlaj, machex xiwojcan̈, haxca yilal yuhuj hunk'aan tzetet tu', yaja' maxtotaj tu' slahub'al. 8Nananxan̈e ya'nojcan̈ hej con̈ob' howal, heb'naj yahaw nimej con̈ob' cha'a'can̈ heb'naj howal b'oj hunujxa naj yahaw nimej con̈ob'. Tx'ihal b'ay ch'ec'oj hej chixcab', b'oj wahil, yaja' yichob'anilto ye b'ay ch'ec'oj ya' anma. 9Nann̈e heyu, haxca chex alaxojcoj yul sk'ab' heb'naj i'n̈e ley cat he mak'laxoj yulaj capiya. Chex ilaxojtoj yin̈ sat heb'naj yahaw con̈ob', haxca cheya' yuluj he c'ul win̈an, hactu' chu he yenojiloj ta tzujan hex win̈an. 10Yalan̈to maẍto ch'apni slahub'al tz'ayic, ẍto pujb'alaxojc'oj tzoti' yet colb'anil sunil yulaj hej con̈ob'. 11Yet chex alaxojcoj yul sk'ab' heb'naj i'n̈e ley tu', macheya'a'coj yin̈ he c'ul tzet cheyala', to ha' tzet ch'a'laxoj he nab' yin̈ hunip k'inanil tu', ha' cheyala'. Haxca mat hexoj chex tzoteloj, to ha' Comam Espíritu Santo. 12- 13Yet tu', sunil anma chex yahnoj cat schiwaojcoj sc'ul teyin̈ haxca cheya' yuluj he c'ul win̈an. Ayex chex alaxojcoj yul sk'ab' camical yu mactaj ayto heyu he b'a b'oj. Ay uninale ch'alaxojcoj yul sk'ab' camical yu smam smi', ay mame mi'e ch'alaxojcoj yul sk'ab' camical yu yuninal. Yaja' mac ẍtechaoj yu masanto slahub'al ẍcolchaoj. 14Tz'ib'n̈eb'ilcanoj to chuluj naj ch'etanojtoj yatut Comam Dios yu hej tzetet tx'oj chub'. (Mac ch'ilni hune' ti' xtxumab'i.) Ha' cheyilnoj yoctoj naj b'ay mat yetoj aya ch'octoj, hex ayex yul yet Judea ti' elan̈wej, cat he to swi'laj witz. 15Mac ahatoj yac'alil swi' yatut yin̈ hune' tz'ayic tu', matxa ch'aytij yi'a' stzetet yul n̈ah. 16Mactaj ayto munil, matxa ẍto yi'a' xil sk'ap xiloj yin̈ yet ch'oc munlaoj. 17C'antaj heb'ix ayxa tzet ye yet hune' tz'ayical tu' b'oj heb'ix aytocoj yunin yin̈ im. 18K'anwej tet Comam Dios ta mat n̈ab'iloj chuuj hune' tu'. 19Caw ch'ec'oj ya' anma yin̈ hunk'aan tz'ayical tu'. Maxto hunecoj chu hune' tzet chuuj tu' yichotax swatx'en Comam Dios satyib'an̈k'inal ti', matxaca b'ak'in̈al chuuj. 20Ta mach sc'otzb'a' Comam Jahaw yoj hunk'aan tz'ayic tu', machmi hunuj mac ẍcolchaoj. Yaja' sc'otzb'a' Comam yoj yu anma sic'leb'ilxa yu. 21Yuxin ta ay mac ẍhalnoj teyet: Ab', hat ay naj Cristo b'eti', mato, Ay naj b'etu', ta ẍi, macheya' yuluj he c'ul. 22Haxca chuluj heb'naj sub'um anma cat yalnoj sb'a heb'naj Cristoal, to schejab'lom Comam Dios ye heb'naj yalni. Syeb' heb'naj c'ayb'alc'ule yun̈e sub'chaoj sunil anma yu heb'naj. Etza ẍc'atzla sub'chaoj mac sic'leb'ilxa yu Comam. 23Yuxin nann̈e heyu, yalan̈to ẍwalnican teyetan. 24Yet lawi yec'ojcan sya'tajil tu', ẍk'ejholojiloj, matxa yip ẍmujluj tz'ayic, matxaca yip ẍmujluj x'ahaw, 25ẍb'ilojcan̈ nimejtaj tx'umel satcan̈, hasta ay ẍtijc'ayoj. 26Ha' tu' ch'il-laxoj wuluj xol asun hayin Ab'ilintij yu Comam Dios xol jet-anmail ti'an, b'oj sunil scan̈il wean b'oj hin may hin k'ak'alan. 27Yin̈n̈ena tu' ẍwanojtoj hej ángel syamb'a'coj anma sic'leb'il wu, sunil satyib'an̈k'inal ti'an. 28Iwejiloj heyet yin̈ te' higuera. Ta syaxb'ixatij schon te' cat stit niẍtej xajte', heyohtajxa chaltu' ta yocojxa ha' n̈ab'. 29Hactu' ye hunk'aan tzet ẍwal ti'an. Ha' ch'ichojcoj, che txumu' to cawilxa yetij b'ay chin hulan. 30Yin̈ caw yeli ẍwal teyetan: Sunil ti' chija' sb'a yalan̈to maxto ẍcamtoj hun con̈ob'al anma ti'. 31Satcan̈ b'oj tx'otx'otx' ti' ẍtan̈ojiloj, yaja' tzet xax wal ti'an mach yec'b'anil yijnoj sb'a. 32Yaja' wal stz'ayical b'oj yorail b'ay chin huluj tu'an, mach mac ohtajn̈e, ni hej yángel Comam Dios, ni hayin Sc'ahol Comam Dios ti'an, to hatcachan hin Mam ohtajn̈ean. 33Yuxin mache nahuln̈e he b'a, majwejc'oj, haxca mat heyohtajoj b'ak'in̈ ch'apnoj yorail. 34K'inaloj ta ay hunuj naj yahaw n̈ah ẍto yin̈ hunuj b'el caw nahat, stak'encan naj yatut tet schejab', chalni naj tzet munilal chub' hunun heb'naj, chalnipax naj tet naj tan̈eom sti' pulta ta caw stan̈e naj. 35Heb'naj chejab' tu' mat yohtajoj heb'naj b'ak'in̈ chuluj naj yahaw n̈ah, ta lan̈an yayoj numnayi, mato chuman ak'b'al mato yet ch'ok'oj no' chiyo, mato sahc'alilxa. Yuxin, haca' ye naj yahaw n̈ah tu' hactu' wean, mat heyohtajoj b'ak'in̈ chin huluj paxan. Tan̈e majb'il heyu, 36haxca tajca nahul heyeyi cat wulcan̈ lemnaan. 37Hune' ẍwal teyet ti'an mat heyetojn̈e yeyi, to sunil anma ay yet yeyi, majwejc'oj.


Copyright
Learn More

will be added

X\